Proverbs 20 - Yupik Bible

¹ Anagarulluni wine-amek melria picingssautekiyulartuq, taangamek-llu melria calluayugluni; kina imna alartellria maaggun umyuartulriarunrituq.

² Alikiciu qenertellria atanrulria, ayuqulluku uirranilriamun yugtutulimun; kia imum qenerteskuniu unguvani qevingaciqaa.

³ Usviilnguq tamarmi ayagniriyugngauq qanemyuugautellrianek, atawauciquq yuk ilagautenrilkuni.

⁴ Nauceciiyurta qessaluni nunamek itumciyuumiilkuni pinaringraan camek quyurtarkaiciiquq.

⁵ Yuum umyuangutai ayuqut mertun et'ulriami elakami, tau͡gaam taringumalriim yuum tuaken ancugngai.

⁶ Tamarmeng yuut qalartelaryaaqut piciuniluteng, tau͡gaam nurnalartut ilumun tuaten ayuqellriit.

⁷ Mikelnguut piluaqerciqut atangqellriit iqluyuilngurmek elluarrluni-llu yuulriamek.

⁸ Atanrulriim aqumgalriim qanercetaarvigmi nallunrit'laraa assiilnguq tangrraqamiu.

⁹ Kina waten qaneryugngaa, “Wiinga camek umyuarniurutaitua; assiilngillemnek menuirutua”?

¹⁰ Atanrem eq'ukai yuut atulriit piciunrilngurnek uqamaltassiarcuutnek cuqyutnek-llu.

¹¹ Mikelnguunge'rmi ayuqucini nasvalaraa caurallermikun; nallunriciiqan iqluyuilkan assirluni-llu.

¹² Atanrem cikillruakut iimten̄ek tanglaasqelluta ciutemten̄ek-llu niitelaasqelluta.

¹³ Qavarpakaquvet arrsaugarkauguten. Caliuralaquvet tau͡gken neqkaucirluten.

¹⁴ Kipussaalria qanemyuugalartuq akitussiyaalrianek, tau͡gken an'aqami ucuryagtaqluni akiinaki kiputellerminek.

¹⁵ Qanerkan taringumaluku qalarutkekuvgu avalingqertuten akitunritnek teggalquqegtaaraat wall'u suulutaat.

¹⁶ Kina imna usviilucini aturluku akqikuni allanrem akiilngui ellminun ellisqelluki, taum aklui tegunarqait akilirillerkaanun asguranairutkevkarluki.

¹⁷ Cat unakelten piciunrilngurkun neqkaqegtaartun elpeni ayuqerkauyaaqut, tau͡gaam kinguqvaarni qau͡gyatun qanerpeni ayuqliriciqut.

¹⁸ Assilriamek ayuqucirturtengqerquvet elluarrluten piciquten; curugyaqunak anguyallerkarpenun picirkiurraarpek'nak.

¹⁹ Qannguaryulriim aassaqnarqelriit qemangqasciigatai. Nayuryaqunaki qanenrussiyaalriit yuut.

²⁰ Acivaqaniratelaquvkek angayuqaagken unguvan iqukliciiquq kenurratun nipellriatun tan'germi.

²¹ Akinek unangelaquvet qaciggluten iquani atawaungaituq.

²² Elpenek assiilnguq akinauryaqunaku. Cacetuqutekiu Ataneq ikayurniaraaten.

²³ Atanrem eq'ukai yuut teglessaalriit uqamaltassiarcuutet aturluki.

²⁴ Atanrem elkartellrua tumkarput; qaillun tua-i wangkuta nallunrirciqseta natmun ayallerkarput?

²⁵ Umyuangcanqegcaararraaqina elliitekarpenek akqivailegpet Agayutmun. Kinguknerakun ciinlluguarayuartuten.

²⁶ Umyuartulriim atanrulriim kangingengnaqciqaa yuk tauna alartelleq, anucimirqecetaarluku-llu takumcukevkenaku.

²⁷ Yuum anernera kenurraqaa Atanrem, nallungaunaku yuum ayuqucia tamalkuan.

²⁸ Atanrulriim pinini pikciqaa atanirturillermi piciuluni elluarrluni-llu taktaciatun.

²⁹ Ayagyuat tangssunarqutkaat tememeng pinia, tau͡gken qiiret takarnarqutekluki ak'allaurtellrit.

³⁰ Iliini caknernarqelriim atullemta tau͡gaam ayuqucirput cimircet'laraa.