Proverbs 2 - Yupik Bible

Umyuartunrem Akiliutai

¹ Qetunramaa, ciuniuquvki qaneryaranka qemaggluki-llu,

² niicugniluten umyuarturinarqellrianek taringengnaqluki-llu;

³ aa-ang, cakneq elicuumiquvet qanllerpegun-llu nallunairluku taringyuumillren,

⁴ piksagucuumiquvgu yuarru qerrlitun pitarrluku, elausngalriatun-llu tukuutetun.

⁵ Nutaan nallunrirciqan qigciklerkaa Atanrem nallunrirluku-llu Agayun.

⁶ Tua-i-wa Ataneq cikiqengelriaruan umyuartunermek; elliin qanrutek'laraa elisnganeq taringyuyaraq-llu;

⁷ elluarrluteng yuulriit piciuluteng ikayularai camun-llu pivkarngaunaki.

⁸ Camun pivkarngaitai ilateng elluarrluki pilriit, qaunqelluki-llu piciulriit ellminun.

⁹ Niicugnikuvnga nallunriciiqan piciulria, pitalqeggsaraq, elluaryaraq-llu. Nallunrirluku-llu qaillun pillerkan.

¹⁰ Umyuarturiciquten, elitellren-llu ilukegcitkeciqan.

¹¹ Ellatullerpet taringumallerpet-llu camun pivkarngaitaaten;

¹² aviulluten assiitellriamek, angutnek-llu piciatun qalarculrianek,

¹³ cakaarilrianek elluarrluteng yuullerkameggnek uitanaluteng assiilnguum tan'gerani,

¹⁴ nunanikluku assiilnguum aturtainek, arcaqanqurrulriit-llu assiilnguut piyuumiutekestaitnek;

¹⁵ nalirrugnarqelrianek yugnek ukveksunaunateng.

¹⁶ Maligarutarkaunrirciquten arnamun anguciuryulriamun unayaqengraaten pinqegcirluni,

¹⁷ allaliuryulriamun uini cakaarluku, nalluyagulluki akqutkellni qigcignarqelriit.

¹⁸ Enii taum arnam tuqunarqelriaruuq. Itquvet tuqumalriit nuniitnun itellriatun ayuqeciquten.

¹⁹ Kina tuavet ayalria utercuituq, unguvam-llu tumyaraa nataqenqiggngaunaku.

²⁰ Taumek cuqekluki maligtaqukiki ellualriit yuut, ellualriit tumyaraatgun ayagluten.

²¹ Piciuluteng yuulriit —ellakluteng— maani ellamten̄i uitaciqut.

²² Tau͡gaam assiitellriit yuut au͡gaumaciqut qecuumalriatun naunrartun nunamek.