Proverbs 14 - Yupik Bible

¹ Yuungnaqellriit taqumaut usvitulriakun arnakun, tau͡gaam piunriumalartut usviilkarcarakun.

² Piciuluten yuullerpegun nasvagan qigcikilriarucin Atanermek, tau͡gken cali piciunritlerpegun nasvagluku qigcikilriarunrilucin Atanermek.

³ Yuum qaneni nayumiqallermikun unguvani-llu nayumiqaciqaa, tau͡gken qanerpakalria picurlallerkaminun ellminek tekiutarkauluni.

⁴ Qimugtekaunaku nunam itumcissuutii qemaggviit imaiciiqut, tau͡gken qimugtekangqerquni imartuarkauluni mukaarkanek.

⁵ Paqnanailnguq nallunritesta iqluyuituq. Tau͡gken paqnanarqekuni piciunrilngurnek qalarciiquq.

⁶ Caunrilkiyulria yuk umyuarturingaituq, tau͡gken taringumalriamun yugmun elisngayaraq qacignaqluni.

⁷ Usviilnguut ilaliryaqunaki; camek elitnaurutkaitut elpenun.

⁸ Usvitulria umyuartucimikun nallunrit'lartuq qaillun ayallerkaminek, tau͡gaam usviilnguq umyugailkartellermikun tamalartuq.

⁹ Usviilnguut yuut umyuarniuyuitut assiilnging'e'rmeng, tau͡gken yuut assilriit au͡g'aritesqumaaqluteng.

¹⁰ Angniuten elpet kiivet pikan, angniiluten-llu cali elpet pikluku. Allam nallukengarpet pillgucirciigataaten tamakutgun.

¹¹ Assilriim yuum enii napaciquq assiitellriim yuum eniin piunriumallran kinguani.

¹² Tumyarartangqertuq assirngalngurmek yugmun, tau͡gaam iqungqerrluni tuqumek.

¹³ Yuk engelaryunqeng'e'rmi umyuamikun angniilutengqelartuq, angnillra-llu angniitnarqelriamek iqungqerraqluni.

¹⁴ Assiitellriit yuut ayuqucimeng pitatiinek akurturciqut; tau͡gken yuut cali assilriit akiliumaluteng caliallermegteggun.

¹⁵ Usviilnguut yuut ukvek'larait cat tamalkuita, tau͡gaam usvitulriim nallunairturciqaa natmun ayaucini.

¹⁶ Ellatulria yuk murilkelartuq neguraaqluki picurlagnarqelriit, tau͡gaam usviilnguut aaryuyuitut ca egmianun pileryagaqluku.

¹⁷ Yuut qenqercukaaralriit usviilkartetuut; umyuartunrulriit yuut pillagayuitut.

¹⁸ Nallumalriit yuut usviilucimeng ayuqiinek pingciqut, usvitulriit tau͡gken nunuliumaluteng elisngamek.

¹⁹ Assiitellriit yuut cikciiqut ellualriit ciuqerritnun kaigavikluki elluarrluteng pisqelluteng.

²⁰ Yuut assikenritait arrsaulriit nunalgutkeng'e'rmegteki, tukuulriit tau͡gken yugnikesteliraqluteng.

²¹ Angnirluten yuuyukuvet naklekiki arrsaulriit, assiilnguuguq ilaminek caunrilkineq.

²² Alartenritut-qaa assiilngurmek picirkiulriit? Picirkiutulit assilrianek pikegtakumalartut takaqumaluteng-llu.

²³ Caliluten pikangqerrnaurtuten; aqumgaluten qalangssagluten caurailngaquvet arrsauciquten.

²⁴ Umyuartulriit nunuliutengqelartut tukuutnek; usviilnguut nallunaitelartut usviilkartellermegteggun.

²⁵ Nallunritesta yugnek unguvavkarilartuq piciulriamek qalartaqami; tau͡gken iqluaqami yugnek tun'ilartuq inglukestaitnun.

²⁶ Atanrem qigcikellra cacetunarquq umyuarniurutaitnaqluni yugmun ilarrainun-llu.

²⁷ Tuqu-qaa avicugan? Qigcikellra Atanrem unguvanarqelriaruuq.

²⁸ Atanrem angtacia tusngalartuq qaillun amllertalrianun atanirturillranun; atanirturarkailkuni tua-i caungaituq.

²⁹ Qenqerrngialnguq yuk umyuartulriaruuq; qenqercukaarquvet tua-i nasvagan amllermek usvingqenrilucin.

³⁰ Umyuaqegcillrem tema segganqegcet'laraa, tau͡gaam ciknayaraq mamyuilngurtun ayuquq.

³¹ Nangcilriarukuvet arrsaulrianek, caunrilkiuten Agayutmek piliaqestellratnek; tau͡gken takumcukikuvet arrsaulrianek agayulriatun ayuqeciquten.

³² Assiitellriit yuut ellmeggnek picurlallerkameggnun tekiutelartut caliamegteggun, tau͡gaam assilriit yuut canganarqutaitellermegteggun avitelaraat picurlallerkarteng.

³³ Umyuartuneq umyugaatni uitalartuq ayuqucingumalriit. Umyuartuneq cauciitaat usviilnguut yuut.

³⁴ Elluarucim angelriaruvkalaraa atanruvik, assiilnguq tau͡gken kasngunarqutekluku.

³⁵ Atanret ilukegcitkait calistet caliarteng murilkelluku calilriit, anucimirqecetaaraqluki tau͡gken elluarrluteng pinrilnguut.