Proverbs 13 - Yupik Bible

¹ Umyuartulria qetunraq murilkelartuq atami inerquagaqani, tau͡gaam caunrilkilriim cateksuitaa ayuqucirtuutni.

² Assilriit yuut nunuliumaciqut qanllermegteggun, tau͡gaam yuut piciunrilnguut akngirkengengnaquralartut.

³ Qanmi nayumiqastii unguvaarkauguq; picimitun qalarculria piunrilartuq ellminek.

⁴ Qessanqurrulria camek ayaring'e'rmi piksagusngaitaa. Pingnatunqellria tau͡gaam enuqicuituq.

⁵ Ellualriim yuum piciunrilnguut eq'ukai. Assiitellria yuk kasngunarquq kiaresngianaqluni ayuqucimikun.

⁶ Elluaryaram camun pivkarngaitai camek pitkailnguut; inerciigalliqsaraq picurlautekaat assiilngurtulriit.

⁷ Yuut ilait tukuungualartut amta-llu caunateng. Ilait tau͡gken cali arrsaunguaraqluteng tukuunge'rmeng.

⁸ Tukuulriim akiutni akiliutekciqai unguvangnaqluni, tau͡gken arrsaulria akeqnerrlugqaqestaitaqluni.

⁹ Ellualriit kenurratun tanqigcetellriatun ayuqut; assiitellriit tau͡gken ayuqluteng kenurratun qamyartulriatun.

¹⁰ Yuunguineq ayagniutngulartuq inglukucaramun. Umyuartulriaruuq yuk ayuqucirtuutminek ciuniurilria.

¹¹ Qaciggluten tukuurtellrukuvet ak'anivkenak cagmariciquten tukuutevnek. Tau͡gken cakviurluten unangetukuvet amlleriinararkauluteng.

¹² Neryuniurutem piciurtenritaqami umyuaq navgularaa, tau͡gken yuum piyuumiutni unakaqamiu cakneq angniraqluni.

¹³ Qaneryaram caunrilkestii piunrillerkiulartuq ellminek; tau͡gaam alerquutem qigcikestii nunuliutengqerciquq.

¹⁴ Ayuqucirtuutait umyuartulriit unguvanarqelriaruut; aarnarqelriami uitakuvet anagceciiqaatgen.

¹⁵ Elisngallran yuk takarnarqevkarciqaa, tau͡gaam yuut ukvernarqenrilnguut picurlallerkameggnun ayalriaruut.

¹⁶ Ellatulriit yuut umyuangcarraarluteng tau͡gaam piarkarteng pituat. Tau͡gken usviilnguut yuut nasvaumalaraat nallumalriarucirteng.

¹⁷ Elluatuuvkenani qanerkamek ayagacilria picurlagcecilriaruuq, tau͡gken elluatuuluteng pilriit uitanqegcivkarilriaruluteng.

¹⁸ Yuk elicunrilnguq arrsauciquq kasngunaqluni. Tau͡gken ayuqucirtuumaaqami niicugnituli takaqumaaqluni.

¹⁹ Piyuumiutem unakellra ilukegcinarquq. Usviilnguut yuut pegcuumiitelarait assiilnguut aturyukteng.

²⁰ Umyuartulriit ilaliaratukuvki umyuarturiciquten. Yugnikek'ngangqerquvet usviilngurnek caunrirciquten.

²¹ Picurlagnarqellriim nayularai assiilngurtulriit ayallratnun tamiin. Tau͡gken ellualriit yuut nunuliumaarkauluteng assilrianek.

²² Assilria angun kinguvarcetarkangqelartuq tutgaraminun, tau͡gaam assiilngiumalriit tukuutait ellualriit piksaguciiqait.

²³ Atuumanrilnguut naucetaarviit naugiyartut amllernek arrsaulriit neqkaitnek, tau͡gaam elluanrilnguut yuut nauceciivkaryunritait.

²⁴ Anucimirqecetaarinrilnguq irniaminek kenkilriarunrituq, tau͡gaam irniaminek kenkilriim pinritevkenaki anucimirqecetaatui.

²⁵ Ellualriit neqkameggnek nuryugciyuitut, tau͡gaam assiitellriit yuut kainiquralartut.