Proverbs 11 - Yupik Bible

¹ Uqamaltassiarcuun teglessaagutngulria Atanrem eq'ukaa, angniutekluku tau͡gken assilria uqamaltassiarcuun.

² Yuk ellminek pivakellria kasnguyullerkaminun tekiutelartuq. Ellminek pivakenricaraq umyuartuyarauguq.

³ Piciuyaram ellualria ciuliqagtelaraa, tau͡gaam asguranarqellriit yuut piciunriluciata piunrirciqai.

⁴ Tukuutet catngungaitut tuquqataquvet, elluaryaram tau͡gaam aviucugngaaten tuqumek.

⁵ Elluarucian yuum canganarqutailnguum tumkaa atuyunarivkarciqaa, tau͡gaam assiitellria yuk ellminek paallautekiulartuq.

⁶ Elluaruciata nangrunaunateng yuulriit aviuciiqai; tau͡gaam piciunrilnguut naptelartut ayaritaucirmegcetun.

⁷ Assiitellria yuk tuquaqami neryuniurutkairut'lartuq; neryuniuruteksaaqellra agayutailnguum piungailami.

⁸ Ellualria aviucimalartuq picurlallerkaminek; picurlautekaqsaaqellra elluanrilngurnun tull'uni.

⁹ Agayutailnguum nunaqlini qanmikun caunrilarai; tau͡gaam umyuartuyarakun ellualriit aviucimalartut.

¹⁰ Elluarrluteng piurarqata ellualriit, nunat angnilartut; yuut assiitellriit piunrirqata erinialartut quyaluteng.

¹¹ Atawaqautaitgun ellualriit nunat nanraumalartut; tau͡gaam yuut assiitellriit qanritgun piunriumaaqluteng.

¹² Caunrilkilria ilaminek umyuartulriarunrituq. Yuk taringumalria nepaunani yuulartuq.

¹³ Qannguaryulriim qanrutkesqumanrilnguut nallunrircet'larai. Tau͡gken piciulriim tamakut qemangqatuluki.

¹⁴ Ayuqucirturtailnguut picurlagalartut. Ayuqucirturilriit tau͡gaam amlleraqata picurlalriartaitelartuq.

¹⁵ Nallukengarpet yuum akiilngua akilitarkauluku akqikuvet umyuarniurciquten. Assinruciquq tuatnanrilkuvet.

¹⁶ Takumcutalria arnaq qigcikumalartuq. Arnaq tau͡gken elluanrilnguq kasngunarqelriaruluni. Qessanqurrulria angun akiutengqessuituq, tau͡gken pingnatugluni yuulria tukuurtetuluni.

¹⁷ Yuk takumcutalria piluaqautelartuq ellminek. Nangcilriarukuvet elpenek tau͡gaam akngirciiquten.

¹⁸ Assiitellria yuk caunrilngurmek akingelartuq; tau͡gaam piciulriakun calilria akiliumanrilngaituq.

¹⁹ Asvailnguum elluarucimikun piksagutelaraa unguva. Assiilngurmek ciumurucilria tuquciquq.

²⁰ Atanrem eq'ukai assiilngurmek umyuangcatulit, kenkaqluki tau͡gken assirluteng yuulriit.

²¹ Nallunailngurmek assiitellriit yuut anucimirqecetaarumanrilngaitut. Tau͡gaam ellualriit aviciiqaat anucimirqecetaarun.

²² Suulutaatun kulutetun sitiinkaam cigvikekiitun; tuaten ayuquq arnaq kenegnalria tau͡gken ellatuvkenani.

²³ Ellualriit piyullrat assilriamek iqungqelartuq. Tau͡gken assiitellriit yuut piyullerteng unakaqatgu yuut tamarmeng eq'urtelartut.

²⁴ Yuum ilii cikirturilartuq qunuvkenani, tau͡gken tukuurrngiinaraqluni; allam tau͡gken cikiutekarkauyaaqellni qunukluku pingqerciigalilartuq.

²⁵ Qunuilnguq nuryugcingaituq, ilaminek-llu ikayuq'ngelria ikayuumaarkauluni.

²⁶ Yuut aniqlaaciqaat neqkanek qunulria, tau͡gken atawakluku tun'ilria tamakunek.

²⁷ Assilriim atungnaqu'urtii yualriaruuq pikegtakumallerkaminek. Yuk tau͡gaam assiilngurmek yuarpakarluni nalaququrainalartuq.

²⁸ Tukuutmeggnek cacetuqutengqellriit nalaciqut napam cuyaatun uksuarmi. Tau͡gaam ellualriit nauciqut napat cuyaicetun kiagmi.

²⁹ Yuk ilarraminek picurlagcecilria iquani camek pingqerrngaituq. Usviilnguq-llu pisten͞guciquq usvitulriamun.

³⁰ Elluaryaraq unguvamek cikiqengelriaruuq, tau͡gaam aaricaraq unguvamek cagmarilriaruuq.

³¹ Assirluteng yuulriit akiliumalartut maani nunami, taumek ilumuulriamek assiitellriit assiilngurtulriit-llu anucimirqecetaarumaciqut.