Ta̍i̍tɔ̄ɔ̄ 3 - Yāu̍ Mɛ̄lɛ̄ka̍a̍

¹ Di̍mu̍l cha̍a̍ŋāā nūm a̍ la̍a̍la᷄ŋnda̍ māā ā tūe̍i̍ wa̍nāa̍ cho̍ lɛ̄ŋnde̍ŋ bōlle̍ŋ nda̍ dīōm nyɛ̄ kɛ̄ndɛ̄ kɛ̍ndɛ̄. Di̍mu̍l nda̍ vɛ̄lɛ̄ māā ā wa̍ a̍ bɛ̍ɛ̍ndīa̍ŋ le̍ mā tōsa̍ o̍ cho̍ sa̍kpō le̍ tōsāa̍ wo̍ o̍ nɛ̄ī o̍ nɛ̄ī ni̍ŋ.

² Di̍mu̍l nda̍ māā ā su̍a̍ā dīōm wɔ̄ɔ̍ŋ a̍ wānā le̍. Ā wa᷅ wānāa̍ sɛ̍ɛ̍ŋgi̍āŋ a̍ wānā le̍. Wānāa̍ nɔ̍ i̍sɔ̍ɔ̍ a̍ wānā le̍ wa̍ nda̍ nɔ̄ ni̍ mā wa̍. Ā nɔ̍ bɛ̍ɛ̄le̍ŋ le̍ wānā o̍ wānā.

³ Kāni̍ fu̍u̍le̍, na̍a̍ pi̍la̍ bɛ̍ɛ̍ dīɔ̄mnda̍ na̍a̍ ŋ̄ wa̍ ni̍. Ŋ̄ ve̍ wa̍nāa̍ tu̍e̍ī Mɛ̄lɛ̄ka̍ dīōm te̍. Ndu̍yɛ̍, nda̍ a̍a̍ fa̍ŋa̍ na̍a̍ o̍ nɛ̄i̍ tōnya̍a̍ chōo̍ ba̍ū. Yēēma̍ŋ le̍ kɔ̄l kɛ̄ndɛ̄ chi̍e̍ēŋndo̍ a̍ yēēma̍ŋ fa̍ŋgāŋ chēle̍ŋ, ŋ̄ wa̍ na̍a̍ ŋ̄ hīāūvāā o̍ kɔ̄l kɔ̄ɔ̄lī pu᷅ŋ. Le̍ lɔ̍ɔ̍ lɔ̍ɔ̍ ŋ̄ wa̍ sɔ̄ɔ̍ŋ dɛ̍nɛ̍ wɔ̍ɔ̍ŋndo̍ŋ tōsāa̍. Ŋ̄ wa̍ pāŋa̍li̍āŋnda̍ŋ o̍ nyɔ̄ɔ̍ŋ chōo̍. Ndu̍yɛ̍, wāŋnda̍ wa̍ na̍a̍ yɛ̄le̍ŋ tūllo̍, na̍a̍ bɛ̍ɛ̍ mī ŋ̄ tūl nda̍ yɛ̄le̍ŋ.

⁴ Kɛ̍ ndu̍yɛ̍, mɛ̄ɛ̍ Mɛ̄lɛ̄ka̍ o̍ cho̍ wānā na̍a̍ pīŋīa̍a̍ wo̍ ō chɔ᷄m na̍a̍ kɛ̄ndɛ̄i̍ ndūɛ̍i̍, ndu̍yɛ̍ mbo̍ chɔ̄m na̍a̍ kāālā ndɔ̄ɔ̍,

⁵ mbo̍ pīŋī na̍a̍. Mɛ̄lɛ̄ka̍ ō pīŋi̍ na̍a̍ le̍ na̍a̍ pi̍la̍ wa̍li̍ nāā kɛ̍ndɛ̄ le̍. Ō pīŋi̍ māpīŋīāā na̍a̍ le̍ mɛ̄ɛ̍ o̍ nɔ̍ nyīɛ̍ɛ̍ye̍ le̍ na̍a̍ yɛ̍. Ō tōsa̍ he̍ī sa̍na̍a̍ a̍ pūlɔ̄ɔ̄ Nyi̍na̍ Mɛ̄lɛ̄ka̍a̍ tōsa̍ mi̍ ŋ̄ sɔ̄lā wo̍, pūlɔ̄ɔ̍ chu̍u̍ na̍a̍ vīōlɔ᷄ŋ sɛ̍nɛ̄īyo̍ a̍ yōōmū sɛ̄nɛ̄īyo̍ wo̍.

⁶ Mɛ̄lɛ̄ka̍ tōsa̍ mi̍ Nyi̍nā ndɔ̄ɔ̍ tūāl na̍a̍ kɔ̄ɔ̄lī ta̍u̍ ta̍u̍. Ndu̍yɛ̍, ō tōsa̍ he̍ī sa̍na̍a̍ o̍ Chi̍i̍sū Ki̍li̍tī ni̍ŋ, o̍ pi̍ŋi̍ na̍a̍ wo̍.

⁷ Mɛ̄lɛ̄ka̍ yɔ̄ŋgu̍ Nyi̍nā ndɔ̄ɔ̍ na̍a̍ kɔ̄ɔ̄lī le̍ mbō sīīŋgu̍u̍ na̍a̍ wānāā sa̍kpō ndu̍ pi̍la̍ o̍ hɔ̄l sa̍na̍a̍ o̍ kɛ̄ndɛ̄i̍ ndūɛ̍i̍ ni᷄ŋ. Le̍ mbō lo̍ o̍ ko̍ŋ mī ŋ̄ sīmnu᷄ŋ chu̍a̍u̍vāā ndɔ̄, ndu̍yɛ̍, mī ŋ̄ wa̍ hɔ̄lte̍ŋ o̍ nɛ̄ī le̍ yōōmu̍ nɔ̍ la̍mɛ̍ɛ̍lu̍ le̍ wo̍.

⁸ Dīōmnda̍ di̍mi̍ŋ la̍ŋ nda̍ŋ lā chō tōnya̍. I̍ hɛ̍na̍ŋ mā chɔ̍ɔ̍lu̍ sɔ̄ɔ̍ŋ mu᷅ŋ kīndīlā kpe̍e̍kpe̍i̍ le̍ mī wānāa̍ du̍a̍ū tīīnda᷄ŋndo̍ o̍ Mɛ̄lɛ̄ka̍ ni᷄ŋ nda̍ ā lāndu̍ŋ kɔ̍l le̍ te̍le̍ŋnda̍ ndāla̍ŋ chūa̍a̍ o̍ sɔ̄ɔ̍ŋ kɛ̍ndɔ᷄ŋ tōsāa̍. Sɔ̄ɔ̍ŋ mu᷅ŋ ŋ̄ na᷄ŋ ta̍u̍, ndu̍yɛ̍ ŋ̄ chō sɔ̄ɔ̍ŋ tɔ̄nɔ̄ le̍ wānā o̍ wānā fe̍e̍.

⁹ Wo̍ū sōndō o̍ dīɔ̄mūŋ fo̍ndōŋ mu᷅ŋ ni᷄ŋ te̍, ndu̍ yɔ̍nūŋ ni̍ māā dīōmnda̍ŋ hīŋa᷅ŋ kōŋ a̍ pɛ̄ɛ̄kōo̍ a̍ dīōlā wānāā māsīndīāā fāŋgā fāŋgāa̍ tōmbōlā kōŋ kɛ᷅ kɛ᷅. Ndu̍yɛ̍, wo̍ū sōndō o̍ sɛ̄ɛ̄ŋgi̍āŋnda̍ŋ ni᷄ŋ a̍ dīōmnda̍ŋ hīŋa᷅ŋndo̍ a̍ sāwāla̍ Mūu̍sēla̍ŋ o̍kɔ̄ɔ̄ le̍. Fo̍ndō fu̍u̍ sɔ̄ɔ̍ŋ mu̍ŋ chō ni̍, ndu̍yɛ̍, tɔ̄nɔ̄ bɛ̍ɛ̍ cho̍ le̍ni̍ŋ te̍.

¹⁰ Wāna̍ hu᷅ŋ a̍ pīɔ̄ūwa᷅ŋndo̍ wāŋnda̍ tɛ̄ɛ̄ŋ ndo̍ ndu̍ ndu̍, tē lā sīla̍ ndu̍ lē pīlɛ̍ kɛ̄lɛ̄ŋgāā lē dīi̍ŋ pɛ̍ mbō māŋga̍la̍ le̍, lā sēī ndu̍.

¹¹ Nūm sīnā māā wānā wa̍ā le̍nde̍ māā ō ma᷄l nɛ̄i̍ tōnya̍a̍ mbo̍ wōū bāa̍ o̍ yɔ̄ŋ wɔ̄ɔ̍ŋndo̍ tōsāa̍ ni᷄ŋ. Ko̍ŋ kpe̍e̍kpe̍i̍ chɔ̍m ni̍ māā wānā wa̍ā le̍nde̍ ō cho̍ o̍ nɛ̄ī kpo̍so̍ŋ te̍.

Sɔ̄ɔ̍ŋ mɛ̍ɛ̍la᷄ŋ

¹² I̍ cho̍ Āāta̍māa̍ vīōmɔ̄ɔ̄, kɛ̄lɛ̄ŋgāā mī ve᷅m Ti̍ka̍kāā nāa̍ nūm chu̍a̍. Tē ā chē ō pīlɛ̍ pɛ̍ mɛ̄ɛ̍ ki̍ndi̍ ki̍ndi̍ mā ko̍ma̍l la̍ Nīka̍po̍līī chi̍e̍e̍. Kāni̍ fu̍u̍le̍, lo̍ŋ ya̍ I̍ kɛ̍ɛ̍si̍a̍a̍ le̍ wɔ̄ɔ̄lē pɔ̄mbɔ̄le̍ŋ hīvīo̍o̍ ni̍.

¹³ Ki̍ndi̍ mā to̍sa̍ mi̍ Si̍nāā o̍ cho̍ lɔ̍yɛ̄i̍nɔ̍ɔ̍ wo̍ ni̍ nda̍ A̍pɔ̍lɔ̄ɔ̄, mā sɔ̄la̍ mālāa̍ o̍ kɔ̄lā ndāla̍ŋ ni᷄ŋ. Nyɛ̄ o̍ nyɛ̄ bā hāvɛ̍i̍ nda̍ nɔ̄ le̍ sɔ̄lāa̍ o̍ kēlā ndāa̍ ni᷄ŋ, to̍sa̍ mā sɔ̄la̍ ndu̍.

¹⁴ Chāāŋāā nāā wa̍nāā lāāla᷄ŋnda̍ nɔ̄ mā wa̍ sɔ̄ɔ̍ŋ kɛ̍ndɔ᷄ŋ tōsāa̍ lɔ̍ɔ̍ lɔ̍ɔ̍ le̍ mā nɔ̄la̍ mā māla̍ wānāa̍ cho̍ o̍ bā hāvɛ̍i̍yo̍ ni᷄ŋ ta̍u̍ wa̍. Ndu̍yɛ̍, ā nɔ̍ mā wa̍ wānāā bāābāā fo̍ndō le̍.

¹⁵ Chāāŋāā nāa̍ na̍a̍ ŋ̄ cho̍ na̍ŋ nda̍ fa̍ū ā yi᷄l nu̍m. Yi̍l na̍a̍ chāāŋāā nāā wa̍nāā lāāla᷄ŋnda̍ lo̍ŋ. Mbɔ̄ Mɛ̄lɛ̄ka̍ yīya̍ŋ nya̍ kpo̍u̍ cho̍o̍ fɔ̍.