Ta̍i̍tɔ̄ɔ̄ 2 - Yāu̍ Mɛ̄lɛ̄ka̍a̍

¹ Nūm nūm Ta̍i̍tɔ̄ɔ̄, nyɛ̄ o̍ nyɛ̍ cho̍ ō chɛ̄la᷅ŋ a̍ pɛ̄ɛ̄kū sa̍kpōo̍ o̍kɔ̄ɔ̍, pɛ̍ɛ̍ku̍ wa᷅ŋnda̍ ndu̍.

² Di̍mu̍l bɛ̍ndūāā wāŋ pīāāndūa̍a̍ mā wa̍ wānāa̍ ti̍u̍ kɔ̄ltā ndāla̍ŋ bā, ndu̍yɛ̍, mā wa̍ wānāa̍ kɛ̍si̍ŋ le̍bɛ̍ɛ̍. Di̍mu̍l nda̍ ā wa̍ wa̍nāā tāāsi̍ ndu̍yɛ̍, mā wa̍ wānāa̍ nɔ̍ tīīnda᷄ŋ sa̍kpōo̍ o̍ Mɛ̄lɛ̄ka̍ ni᷄ŋ. Ā nɔ̄ mā nɔ̄ kāālā sa̍kpōo̍. Ā nɔ̄ mā si᷄m o̍ dɛ̍nɛ̍ o̍ dɛ̍nɛ̍ ni̍ŋ sa̍kpō.

³ Ndu̍yɛ̍, mā di̍mu̍l bɛ̍ndūāā wāŋ lāāndūa̍a̍ māā ā tōsa̍ ka̍āla̍ chɔ᷅m māā wānāa̍ Mɛ̄lɛ̄ka̍a̍ nda̍ chō ni̍ la̍ŋ. Di̍mu̍l nda̍ ā wa᷅ wānāa̍ ba̍lu̍ a̍ wānā o̍ sōndō le̍, ndu̍yɛ̍, ā wa᷅ wānāa̍ hi̍u̍ māmūɛ̄ī kōlɔ̄ɔ̄ le̍. Ā nɔ̄ mā pɛ̄ɛ̄ku̍ chūāā lāāndūa̍a̍ nyɛ̍ bɛ̍nda̍ le̍ tōsāa̍ wo̍.

⁴ O̍ he̍ī ni᷄ŋ, mā pɛ̄ɛ̄ku̍ chūāā lāāndūa̍a̍ mɛ̄ɛ̍ nda̍ nɔ̄ mā kāāla̍ pīāāndāā ndāa̍ a̍ chūāūwāā ndāa̍ yɛ̍.

⁵ Mā pɛ̄ɛ̄ku̍ nda̍ mā wa̍ wānāā tāāsi̍, ndu̍yɛ̍, mā wa̍ wānāā dīāndāā Mɛ̄lɛ̄ka̍ o̍ hɔ̄l. Ndu̍yɛ̍, mā pɛ̄ɛ̄ku̍ nda̍ mā wa̍ lāāndūāā kɛ̄ndɛ̄ a̍ to̍sā wa̍llo̍ ō kālā kpo᷅ke̍ o̍ yu̍ŋgu̍la̍ ndāla̍ŋ chōo̍ wa̍. Ndu̍yɛ̍, mā pɛ̄ɛ̄ku̍ nda̍ a̍ wāa̍ wānāā kɛ̄ndɛ̄ nāa̍ wāŋnda̍ chūā, mā wa̍ wānāā tūsīa̍ŋ pi̍a̍a̍ndāā ndāa̍ o̍ bā bɛ̄ŋgu̍. O̍ he̍ī ni᷄ŋ, wānā o̍ wānā nɔ̍lā lɛ̍ mbō dīmi̍ dīōm wɔ̄ɔ̍ŋ a̍ sūɛ̍i̍ Mɛ̄lɛ̄kɛ̍i̍ o̍kɔ̄ɔ̄ le̍.

⁶ O̍ ko̍ŋ kɔ̍ɔ̍lī, si̍la̍ chu̍a̍ā pīāāndūa̍a̍ mā wa̍ wānāa̍ ti̍u̍ kɔ̄ltā ndāla̍ŋ bā.

⁷ Ta̍i̍tɔ̄ɔ̄, chɔ̍m nu᷅m pi̍la̍ o̍ nyɛ̄ o̍ nyɛ̄ ni᷄ŋ ŋ̄ tōsa̍ lē wāa̍ māā tāāmāsi̍ a̍ sɔ̄ɔ̍ŋ kɛ̍ndɛ̄ŋ wāŋndo̍ nɔ̄ mbō tōsa̍ wo̍ŋ o̍kɔ̄ɔ̄. Tē a̍ wa̍ wāŋnda̍ pɛ̄ɛ̄kōo̍ pɛ̍, chɔ̍m a̍ wāa̍ sa̍kpō a̍ bɛ̄ɛ̄le̍ŋ kɛ̄si᷄ŋndo̍ le̍ wāa̍ māā tāāmāsi̍ le̍ nda̍.

⁸ So̍o̍ di̍ōmnda̍ bɛ̍nda̍ la̍ŋ, lā wāŋndo̍ ō nɔ̍lā mbō pɛ̄ɛ̄sa̍ nu̍m le̍ la̍ŋ te̍ la̍ŋ, le̍ yɔ̄ŋi̍ wānāa̍ si̍mu̍l nu̍m nda̍ ā sāālu̍ŋ nyɛ᷅ o̍ nyɛ̄ wɔ̄ɔ̍ŋ ō nda̍ nɔ̄lā mā chɔ᷄m nu̍m chōo̍ wo̍. O̍ he̍ī ni᷄ŋ mī si̍ɔ̍mmbu̍la̍ŋ lā bīī nda̍.

⁹ Ndu̍yɛ̍, di̍mu̍l wa̍nāa̍ cho̍ o̍ chɛ̄le̍ŋ ni᷄ŋ nda̍ māā ā tūsi̍ŋ wa̍nāā nda̍ chō o̍ bā wa̍ o̍ bā bɛ̄ŋgu̍. Nyɛ̄ o̍ nyɛ̍ cho̍ mbo̍ wā ō kɛ̄ndɛ̄, o̍ nɛ̍ŋī wa̍nāā nda̍ chō o̍ bā wa̍ kɔ̄l lo̍ ā tōsa̍ ndu̍. Si̍la̍ nda̍ māā ā mu̍lī nda̍ bāli̍ o̍ sōndō ō wɔ̄ɔ̍ŋ te̍.

¹⁰ Ndu̍yɛ̍, ā yɔ᷅ŋ nda̍ lēvīī le̍. Ā wa̍ nyɛ᷅ kɛ̄ndɛ̄ sa̍kpō o̍ nyɛ̄ o̍ nyɛ̄ ni᷄ŋ nda̍ tōsa̍. Mɛ̄ɛ̍ o̍ he̍ī ni᷄ŋ, nyɛ̄ o̍ nyɛ̄ nda̍ tōsa̍ ō nɔ̄lā mbō hīŋ a̍ tɔ̍ɔ̍ kɛ̍ndɔ̄ɔ̍ o̍ pɛ̄ɛ̄kū na̍a̍ ŋ̄ chō ho̍ō wāŋnda̍ wo̍ chōo̍ o̍ cho̍ ho̍ō a̍ Mɛ̄lɛ̄ka̍ pi̍ŋī na̍a̍ wo̍ o̍kɔ̄ɔ̄ wo̍.

¹¹ O̍ nɛ̄ī wa̍ā nu̍a̍ā ni᷄ŋ ka̍ālā wānāā lāāla᷄ŋnda̍ lā nɔ̄ le̍ wāa̍ ni̍. Kāni̍ fo̍ndōle̍, Mɛ̄lɛ̄ka̍ tōsa̍l wāŋnda̍ kɛ̄ndɛ̄i̍ ndūɛ̄ī bɛ̍ndūe̍i̍. Ko̍ŋ cho̍ ni̍, ō chɔ᷄m nɛ̄īyo̍ mɛ̄ɛ̍ wāŋnda̍ kpo̍u̍ a̍ sɔ̍lā pi̍o̍ŋɔ̄ɔ̍ yɛ̍.

¹² Kɛ̄ndɛ̄i̍ Mɛ̄lɛ̄ka̍ tōsa̍l na̍a̍ he̍ī ye̍ ī chō māchūāā le̍ na̍a̍ pɛ̄ɛ̄kōo̍ le̍ mī ŋ̄ ma᷄l ka̍āla̍ŋ la̍ si̍mu̍l sūɛ̍i̍ Mɛ̄lɛ̄kɛ̍i̍ la̍ŋ, ndu̍yɛ̍, mī ŋ̄ ma᷄l kɔ̄l lānda᷄ŋndo̍ o̍ nyɔ̄ɔ̍ŋ chi̍e̍ēŋ na̍ŋ. Ndu̍yɛ̍, ī chō na̍a̍ pɛ̄ɛ̄kōo̍ le̍ mī ŋ̄ wa̍ wānāa̍ kɛ̍si̍ŋ le̍bɛ̍ɛ̍, mī ŋ̄ wa̍ sa̍kpō ndu̍yɛ̍, mī ŋ̄ nɔ̄ ka̍ālā Mɛ̄lɛ̄ka̍ hɛ̄na̍ŋ māā ŋ̄ tōsa̍ o̍ chi̍e̍ēŋndo̍ ho̍ō chōo̍ la̍ŋ.

¹³ Kɛ̄ndɛ̄i̍ Mɛ̄lɛ̄kɛ̍i̍ he̍ī ī chō na̍a̍ sɔ̄ɔ̍ŋ mu᷅ŋ pɛ̄ɛ̄kōo̍ bōōndi̍i̍ na̍a̍ ŋ̄ chō he̍ī lēhɔ̄l o̍ nɛ̄ī le̍ pāa̍le̍ kɔ̄l kɛ̄ndɛ̄le̍ŋ nde̍ŋ. Mɛ̄lɛ̄ka̍ bɛ̄ndōo̍ o̍ cho̍ wānā na̍a̍ pīŋīa̍a̍ wo̍, ndu̍ yɔ̍nūŋ ni̍ māā Chi̍i̍sū Ki̍li̍tī, ō chō nāŋɔ̄ɔ̄ ndɔ̄ bɛ̍ndōo̍ chɔ̄m o̍ ŋ̄wāŋndā chīe̍e̍ lo̍ o̍ pāa̍le̍ le̍ŋ chōo̍.

¹⁴ Ndu̍ Chi̍i̍sū Ki̍li̍tī mbo̍ yɔ̄ŋgū ndu̍ pi̍la̍ le̍ na̍a̍ le̍ mbō bāŋa̍ na̍a̍ mī ŋ̄ fūla̍ o̍ dɛ̍nɛ̍ wɔ̍ɔ̍ŋndo̍ ni᷄ŋ, ndu̍yɛ̍, mbō sīīŋgu̍u̍ na̍a̍ wānāā dīāndāā, mī ŋ̄ wa̍ wānāā ndɔ̄ ndu̍ pīlɛ̍ kpe̍, ndu̍yɛ̍, mī ŋ̄ wa̍ wānāa̍ la̍ndu̍ŋ kɔ̍l o̍ sɔ̄ɔ̍ŋ kɛ̍ndɔ᷄ŋ tōsāa̍.

¹⁵ Pɛ̍ɛ̍ku̍ wa᷅ŋnda̍ sɔ̄ɔ̍ŋ mu᷅ŋ. Ndu̍yɛ̍, kpāāyā o̍ kpāāya̍ cho̍ nu̍m ō yɔ̄ŋga᷄ŋ to̍sa̍ wa̍llo̍ a̍ ndu̍ le̍ wāŋnda̍ kɔ̄lta̍ŋ dɛ̄ɛ̄nīa̍a̍ a̍ nda̍ bīōndɔ᷄ŋnda̍ ndāla̍ŋ chɔ̄mndo̍. Chɛ᷅l mī wānā o̍ wānā che᷅ nu̍m chɔ̍dɔ̄ le̍.