Chōndi̍i̍ Sɔ̍lɔ̍mɔ̄ŋ Nde̍ 2 - Yāu̍ Mɛ̄lɛ̄ka̍a̍

¹ Mɛ̄ɛ̍ bīl lāpe̍e̍ŋge̍ kɛ̍ndɛ̄ kɛ̍ndɔ̄ɔ̍ Si̍a̍lɔ̄ŋ o̍ cho̍ nu̍a̍ā yɛ̍, le̍nde̍ ya̍ I̍ cho̍ nūm wāna̍ ni̍ ya̍ I̍ ka̍a̍la̍ wo̍ o̍ hɔ̄l ni̍. I̍ cho̍ māchūāā nu̍m o̍ hɔ̄l mɛ̄ɛ̍ pɔ̄mbīle̍ kɛ̍ndɛ̄ kɛ̍ndɛ̄le̍ŋ lē wā nu̍a̍ā o̍ lɛ̄ŋndē dɛ̍ŋgbɛ̍le̍ŋ yɛ̍.

Nyɛ̄ pōo̍ sōō wo̍

² Mɛ̄ɛ̍ pɔ̄mbīle̍ kɛ̍ndɛ̄ kɛ̍ndɛ̄le̍ŋ lē sīm nu̍a̍ā o̍ yɔ̄ɔ̍ŋ tɛ̄ɛ̄ŋ yɛ̍, le̍nde̍ chūā ya̍ I̍ ka̍a̍la̍ wo̍ chō chūāā lāāndūa̍a̍ ā pīli̍a̍a̍ tɛ̄ɛ̄ŋ ni̍.

Nyɛ̄ chūa̍a̍ sōō wo̍

³ Mɛ̄ɛ̍ yɔ̄m a̍pɔ̍ɔ̄ wo̍ ō wā nu̍a̍ā o̍ būndɔ̍ɔ̍ ni᷄ŋ yɔ᷅mnde̍ tɛ̄ɛ̄ŋ yɛ̍, le̍nde̍ po̍ ya̍ i̍ hɛ̍na̍ŋ ho̍ō hɛ̍na᷄ŋ bɛ̍ndōo̍ wo̍ ō chō chūāā pīāāndūa̍a̍ ā pīli̍a̍a̍ tɛ̄ɛ̄ŋ ni̍. Nyɔ̄ɔ̍ hɛ̄na̍ŋ ya̍ bɔ̄ɔ̍ le̍ cha᷄lle̍ o̍ wūndu̍ma̍ ndūa̍ŋ bɛ̄ŋgu̍. Ndu̍yɛ̍ kōmɔ̄ɔ̄ ndɔ̄ɔ̍ ō yēēla̍ ya̍ o̍ sōndō bɔ̄ɔ̍.

⁴ Ō kūɛ̄ a̍ ya̍ o̍ chīɛ̄ī ndɔ̄ɔ̍ nāa̍ di̍a̍ā nyɛ̄ dīāā bɛ̄ndūa̍a̍, ndu̍yɛ̍ mi̍ kāālā ndɔ̄ɔ̍ kūmbū ya̍ māā kōlā.

⁵ Mbɔ̄ māā ō ke᷄ ya̍ kīle̍pīi̍ma̍ ve̍sɛ̍i̍ya̍ŋ le̍ mī mi̍i̍ŋgu̍ yōōmūa̍ŋ sɔ̄lā fɔ̍. Mbɔ̄ māā ō ke᷄ ya̍ a̍pɔ̍ɔ̄mā yēēlɛ̍i̍ya̍ŋ le̍ ya̍ yōōmūa̍ŋ mīŋgīo̍o̍ fɔ̍. I̍ cha̍l le̍ wu̍ pɛ̍ a̍ kāālā ndɔ̍ cho̍ ya̍ o̍ kɔ̄l lo̍.

⁶ I̍ ya̍mbu̍ ndu̍ bōlle̍ŋ o̍ bā ndɔ̄ mi̍āllo̍ chōo̍, ndu̍yɛ̍, mbo̍ kɔ̄ma᷄ŋ ya̍ a̍ bā ndɔ̄ kɛ̍ndɔ̄ɔ̍.

⁷ Chūāā lāāndūa̍a̍ Chūlu̍sɛ̄lɛ̄m, lā chūe̍l la̍ būŋgɛ̄i̍, lā mēna̍la̍ŋ ya̍ o̍ kīa̍la̍a̍ nya̍a̍nūŋ nya̍a̍nɔ᷄ŋ bɛ̍ndōo̍ wa̍, a̍ o̍ kīa̍la̍a̍ yɔ̍ŋāa̍ ā pīli̍a̍a̍, māā lā pa̍lā ni̍ŋ na̍a̍ o̍ kāālā nāa̍ ho̍ō ni᷄ŋ te̍.

Chōndi̍i̍ di̍i̍ŋ ndūɛ̍i̍ Nyɛ̄ chūa̍a̍ sōō wo̍

⁸ I̍ tu̍e̍ī wāna̍ ya̍ I̍ ka̍a̍la̍ wo̍ dīōmndo̍. Ō chō hūnɔ̄ɔ̍ a̍ kīlta̍ŋ o̍ lūāŋūŋ bɛ̄ndo᷄ŋ chōo̍. Ō chō hūnɔ̄ɔ̍ a̍ hūūlōo̍ o̍ pēmbo᷄ŋ chōo̍ le̍ hūnɔ̄ɔ̍ nāa̍ ya̍ chu̍a̍.

⁹ Po̍ ya̍ i̍ ka̍a̍la̍ kāālā bɛ̄ndōo̍ wo̍, ō chō māchūāā mɛ̄ɛ̍ kīa̍la̍a̍ ke̍lēŋā ha̍ā kēlēŋā bɛ̄ndōo̍ wa̍ ā chō yɛ̍, mɛ̄ɛ̍ kīa̍l fɔ̍ŋndɔ̍ pi̍a̍a̍ndōo̍ ō wā nu̍a̍ā yɛ̍, le̍nde̍ o̍ cho̍ ni̍. Nu̍a̍ā wɔ̍ ndu̍ īsīsi̍ o̍ bɛ̍ɛ̄, chīɛ̄īyo̍ ō hɔ̄lna᷄ŋ. Ō sīɛ̄ndi̍ hɔ̄lte̍ŋ o̍ wu̍ndɛ̄i̍yo̍ mbo̍ wā ya̍ nūa̍a̍, Ō chō tōfāa̍ o̍ tɛ̄ɛ̄ŋgūŋ pɔ̄mbɔ᷄ŋ cho̍ o̍ wu̍ndɛ̄i̍yo̍ wo̍ŋ le̍ mbō chē ya̍.

¹⁰ Wāna̍ ni̍ ka̍a̍lāa̍ ō sōō nāa̍ ya̍ chu̍a̍. Chɔ̍ŋ mā hīŋ nūm wāna̍ ya̍ I̍ ka̍a̍la̍ wo̍, hu̍ŋ ŋ̄ kɔ̄ŋnu̍ŋ tīŋgu̍e̍i̍nɔ̍ nūu̍.

Nyɛ̄ pōo̍ sōō wo̍

¹¹ Te̍le̍ŋ īhūēīyo̍ hīōū. Pīɔ̍ɔ̍ bɛ̍ɛ̍ ō chūū chōo̍ cho̍o̍.

¹² Bīltā lāpe̍e̍ŋge̍la̍ŋ lā sōli̍ ni᷅ŋ pe̍e̍ŋge̍la̍ŋ kpo̍u̍. Te̍le̍ŋ wāŋnda̍ ā sōlī cho̍ndo̍ŋ ndo̍ ndu̍ cho̍ ni᷅ŋ ho̍ō ni̍. Bā o̍ bā wānā kɔ̍ ni᷄ŋ o̍ lɛ̄ŋnde̍ŋ nde᷅ŋ ni᷄ŋ a̍ te̍le̍ŋndo̍ ho̍ō, pīīŋāā wɔ̄ɔ̄lē pɔ̄mbūa̍a̍ ko̍ni̍ ŋ̄ tūɛ̄ī ni᷅ŋ cha᷄ŋndo̍ ni̍.

¹³ Fi̍kīi̍ya̍ŋ mā kāndu̍ ni᷅ŋ dīūwɔ̄ɔ̍ o̍ kpe̍le̍la̍ŋ ni᷄ŋ. Kīle̍pīi̍ya̍ŋ bɛ̍ɛ̍ mā sōli̍ ni᷅ŋ pe̍e̍ŋge̍la̍ŋ le̍ yāndɔ̄ɔ̍, chūŋ lāpe̍e̍ŋge̍ ko̍ŋ ō chō ō tīūwāā bā o̍ bā fe̍e̍. Chɔ̍ŋ mā hīŋ nūm wāna̍ ya̍ I̍ ka̍a̍la̍ wo̍, hu̍ŋ ŋ̄ kɔ̄ŋnu̍ŋ tīŋgu̍e̍i̍nɔ̍ nūu̍.

¹⁴ Ōo̍ chūa̍a̍, ā kūɛ̄ ya̍ bɔ̍ɔ̍ le̍vi᷅l. Mɛ̄ɛ̍ pīīŋndo̍ ō wānūŋ nu̍a̍ā o̍ pōūta̍ŋ tɛ̄ɛ̄ŋ pɔ̍, o̍ tɛ̄ɛ̄ŋgōo̍ ni᷄ŋ yɛ̍, le̍nde̍ ŋ̄ vēŋnu᷄ŋ o̍ pēmbīī bɛ̄ndūe̍i̍ da̍ŋga̍la̍ ni̍. So̍li̍ wɔ̍ hɔ᷅lla̍ mī ŋ̄ chāna᷅ŋ fɔ̍. Ɔ̍ɔ̄ so̍o̍ wɔ̍, I̍ tu̍ɛ̍ī nu̍m dīōm, Dīōm nūmndo̍ yēēla̍ bɔ̄ɔ̍. Ndu̍yɛ̍ hɔ̄lāā nūmnda̍ ā chō hɔ̄lāā kāālāā.

¹⁵ Lā bīīlu̍l na̍a̍ tūŋāā yōndūa̍a̍ ha̍ā, tūŋāā yōndūa̍a̍ pɔ̄mbūa̍a̍ ha̍ā, yɔ̄ŋi̍ nda̍ tɛ̄ɛ̄mbu̍u̍ kpe̍le̍ na̍a̍ mākīle̍pīi̍yo̍. Kīle̍pīi̍ma̍ nāa̍ŋ mā sōli̍ pe̍e̍ŋge̍la̍ŋ ki̍nɛ̍i̍ le̍ yāndɔ̄ɔ̍.

Nyɛ̄ chūa̍a̍ sōō wo̍

¹⁶ Wāna̍ ni̍ ya̍ I̍ ka̍a̍la̍ wo̍, ya̍ nɔ̍ ndu̍ ni̍, ndu̍yɛ̍ mi̍ ndu̍ nɔ᷅ ya̍. Ō chō sāa̍ ndūāā ku̍ndāa̍ māndāa̍ o̍ pɔ̄mbīa̍ŋ tɛ̄ɛ̄ŋ.

¹⁷ Lɔ̍ɔ̍ pa̍ mī pāa̍le̍ŋ lē sɛ̄, mī nyūmnda̍ŋ mā fa̍ŋa̍ŋ, mi̍i̍ŋgu̍ na̍ŋnu᷄ŋ nūm po̍ ya̍ ka̍a̍la̍ ho̍ō wo̍. Hu̍ŋ a̍ kīlta̍ŋ mɛ̄ɛ̍ kīa̍llo̍, ɔ̄ɔ̄ kīa̍l fɔ̍ŋndɔ̍ɔ̍ ō nyāānūŋ nu̍a̍ā o̍ pōūtā fe̍ke̍fe̍ke̍la̍ŋ chōo̍ yɛ̍.