Sa᷅m 8 - Yāu̍ Mɛ̄lɛ̄ka̍a̍

Ŋ̄wāŋndā chīe̍e̍ kpo̍u̍ ā chō chɔ̄ɔ̍ mɛ̄ɛ̍ Mɛ̄lɛ̄ka̍ chō ō bɛ̄ndū yɛ̍

¹ O̍o̍ Mɛ̄lɛ̄ka̍ Ya̍a̍wɛ̄ɛ̄, Māsānɔ̍ nāa̍, wāŋnda̍ bā o̍ bā fe̍e̍ o̍ chi̍e̍ēŋndo̍ chōo̍ ā chō chɔ̄ɔ̍ mɛ̄ɛ̍ ŋ̄ chō Mɛ̄lɛ̄ka̍ bɛ̄ndū yɛ̍. Sāŋgālā wāŋndā chīe̍e̍ya̍ ā chō nu̍m ndo̍ chō ō bɔ̄ɔ̍, sāŋgālā kōŋ ō fūūlu̍u̍ ɛ̄chɛ̍nɛ̄ di̍.

² Chūāāmbūa̍a̍ a̍ chɛ̄lɛ̄kpi̍a̍a̍ ā chō nu̍m sāŋgālāa̍ le̍ mɛ̄ɛ̍ ŋ̄ chō Mɛ̄lɛ̄ka̍ bɛ̄ndū yɛ̍. He̍ī tōsa̍ mi̍ ya̍a̍mɔ̍ɔ̍wa̍a̍ nu̍mnda̍ ā mēī do̍ŋ. Ī tōsa̍ wānāa̍ tu̍l nu̍m lēyɛ̄ ndu̍yɛ̍ ma̍ sīmūl nu̍m nda̍ ā nɔ̍ lɛ̍ nyɛ̄ nda̍ dīmī le̍.

³ Tē I̍ to̍fa̍ pɛ̍ cho̍o̍ cho̍o̍ mī che᷅ ha̍la̍ ŋ̄ tōōsi̍a̍a̍ wo̍, mī che᷅ pāŋge̍i̍, a̍ lōo̍ŋ ŋ̄ tōōsi̍a̍a̍ ma̍ hāndū chōo̍ cho̍o̍ wo̍ŋ,

⁴ tē a̍ nɔ̍la̍ pɛ̍ ma̍ tōōsīāā nyɔ̄ɔ̍ŋ mu᷅ŋ, vɛ̄ɛ̍nɛ̍ kpɛ̍ wāna̍ chi̍o̍o̍ chō yɛ̍, nūm Mɛ̄lɛ̄ka̍ ma̍ būūla᷄ŋ a̍ ndu̍ nu̍a̍ā kpɛ̍? Vɛ̄ɛ̍nɛ̍ o̍ cho̍ yɛ̍ ma̍ nɔ̄ kɔ̄llo̍ o̍ ndu̍ lo̍ nu̍a̍ā?

⁵ Tōōsīāā ŋ̄ tōōsi̍a̍a̍ ndu̍ wo̍, ma̍ hāndū ndu̍ mbo̍ wā nyɛ̄ o̍ nyɛ̄ chīla̍ŋ, mɛ̄ɛ̍ nūm pi̍la̍ mi̍ nāa̍ nu̍m ā sīmāa̍ ā hīāū a̍ ndūa̍a̍ nyɛ̄ pɔ̄mbɔ̄. Ma̍ tōsā mbo̍ wā nyɛ̄ o̍ nyɛ̄ bōlle̍ŋ, ndu̍yɛ̍ ma̍ nɛ̄ŋī ndu̍, ma̍ kē ndu̍ bɛ̄ɛ̄le̍ŋ ta̍u̍.

⁶ Nyɛ̄ o̍ nyɛ̄ fe̍e̍ ŋ̄ tōōsi̍a̍a̍ ma̍ chūā wāna̍ chi̍o̍o̍ ma̍ hāndū ndu̍ chīla̍ŋ kpo̍u̍. Ma̍ tōsā mi̍ nyɛ̄ o̍ nyɛ̄ fe̍e̍ wa᷅ ndu̍ o̍ bā bɛ̄ŋgu̍.

⁷ Lāsāā ni̍, lānāū ni̍, a̍ vīsīāā yōndūa̍a̍,

⁸ a̍ yōūwa̍, a̍ sūūwa̍, a̍ nyɛ̄ o̍ nyɛ̄ yōōmāa̍ cho̍ o̍ pēēla̍ mɛ̄ŋmā īhɛ᷄lla̍ŋ ni᷄ŋ, ndu̍ o̍ bā bɛ̄ŋgu̍ nda̍ chō ni̍.

⁹ O̍o̍ Mɛ̄lɛ̄ka̍ Ya̍a̍wɛ̄ɛ̄, Māsānɔ̍ nāa̍, wāŋnda̍ bā o̍ bā fe̍e̍ o̍ chi̍e̍ēŋndo̍ chōo̍ ā chō chɔ̄ɔ̍ mɛ̄ɛ̍ ŋ̄ chō Mɛ̄lɛ̄ka̍ bɛ̄ndū yɛ̍.