Sa᷅m 7 - Yāu̍ Mɛ̄lɛ̄ka̍a̍

Pīɛ̄īle̍ŋ le̍ mī Mɛ̄lɛ̄ka̍ kēlū yāmɛ̍i̍

¹ O̍o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nūu̍, I̍ hi᷅ŋ nāa̍ nūm chu̍a̍ mā ma̍nda̍ ya̍. Pi̍ŋi̍ ya̍ ya̍a̍mɔ̍ɔ̍wa̍ cho̍ ya̍ tōūwɔ̄ɔ̍ wa̍ o̍ bā mā ba̍ŋa̍ ya̍.

² Yɔ̄ŋi̍ nda̍ de᷄l la̍ chōo̍ mɛ̄ɛ̍ kpɔ̍kūŋndo̍ ō dēl vīsīo̍o̍ chōo̍ yɛ̍, yɔ̄ŋi̍ nda̍ kpūwa̍ ya̍ mā kūɛ̄ a̍ ya̍ sāsɔ̄ɔ̍, mā kɔ̍ sɛ̍ɛ̍sīāā ya̍, wānā bɛ̍ɛ̍ nɔ̍lā mbō sōli̍ ya̍ nda̍ o̍ bā le̍.

³ O̍o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nūu̍, Ya̍a̍mɔ̍ɔ̍wa̍ ha̍ā ā chōnu᷄ŋ ya̍ kɔ̄ɔ̄lī fu̍u̍. Tē I̍ to̍sa̍ sūɛ̍i̍ wɔ̍ɔ̍ŋ a̍ wānā pɛ̍,

⁴ kɛ̄lɛ̄ŋgāā lē pīlɛ̍ bɛ̍ɛ̍ mi̍ I̍ ma̍l ndi̍a̍a̍mɔ̍ɔ̍ nī la̍ya̍a̍mɔ̍ɔ̍ o̍ bā mā yɔ᷄ŋ ndu̍ nyɛ̄ pɛ̍, kɛ̄lɛ̄ŋgāā mī yɔ̍ŋ ya̍a̍mɔ̍ɔ̍ nūu̍ nyɛ̄ o̍ fo̍ndō fu̍u̍wo̍ chōo̍,

⁵ mu᷅ŋ ki̍nɛ̍i̍ tē I̍ to̍sa̍ ī pīlɛ̍ bɛ̍ɛ̍ pɛ̍, mɛ̄ɛ̍ tē ya̍a̍mɔ̍ɔ̍wa̍a̍ nīa̍a̍ ā tōl la̍ kɔ̄ɔ̄lī pɛ̍, ā tīu̍ ya̍ bā. Mɛ̄ɛ̍ ā de᷄l la̍ chōo̍ mā lo̍ ya̍ lɔ̄ɔ̍ mā dīī ya̍, mā mɛ̄i̍ dīāllūŋ nūu̍ŋ ŋ̄ mālāā lɛ̄ŋ.

⁶ O̍o̍ Mɛ̄lɛ̄ka̍ Ya̍a̍wɛ̄ɛ̄, chɔ̍ŋ a̍ tu̍mbo̍o̍ mā si̍mu̍l ya̍a̍mɔ̍ɔ̍wa̍a̍ cho̍ ha̍ā a̍ kɔ̄l nī tu̍ū bɛ̄ndōo̍ wa̍. Nūm pi̍la̍ a̍ chi̍i̍ pāa̍le̍ ŋ̄ chō nda̍ yāmɛ̍i̍ kīlūl mā tu̍si̍ nda̍ nyɛ̄ pālāa̍ chōo̍ le̍ŋ kɛ̄ɛ̄sīāā.

⁷ Chu̍u̍ŋgi̍a̍a̍ wa᷅ŋnda̍ o̍ chi̍e̍ēŋndo̍ chōo̍ kpo̍u̍ na̍a̍ pi᷅lɛ̍ mā bālu̍ nu̍m si̍lɔ̍, mā cha̍l o̍ kpe̍ŋgbe̍i̍ nu̍m lēmāsāa̍ chōo̍ cho̍o̍ cho̍o̍ mā wa̍ nda̍ chōo̍ ma̍sāa̍.

⁸ Mɛ̄lɛ̄ka̍ Ya̍a̍wɛ̄ɛ̄, nu᷄m cho̍ yāma̍nɔ̄ɔ̍ le̍ chūāā ŋ̄wāŋndā chīe̍e̍ kpo̍u̍ ni̍. Ki̍o̍lu̍ ya᷅mɛ̍i̍ a̍ ya̍ o̍kɔ̄ɔ̄, kāni̍ ya̍ ya̍ I̍ si̍nā māā ka̍ā nūu̍ chō sa̍kpō. Ndu̍yɛ̍ nūm pi̍la̍ ā sīnā māā I̍ tɛ̍ɛ̍mbu̍u̍ i̍sɔ̍ɔ̍ o̍ īsɔ̄ɔ̍ le̍.

⁹ Mɛ̄lɛ̄ka̍ cho̍ sa̍kpō wo̍ ŋ̄ chō ni̍. Nūm ā sīnā nyɛ̍ cho̍ wāna̍ chi̍o̍o̍ o̍ kɔ̄llo̍ a̍ sɔ̄ɔ̍ŋ o̍ yi̍yāŋ o̍ bōllē ndɔ̄le̍ŋ ni᷄ŋ ndo̍ŋ. To̍sa̍ mī wānāā dɛ̍nɛ̍ wɔ̍ɔ̍ŋnda̍ ā ma̍l sɔ̍ɔ̍ŋ wɔ̍ɔ̍ŋ nda̍ chō tōsāa̍ wo̍ŋ, ndu̍yɛ̍, mā ke̍ wānāā nūm a̍ to̍sā sɔ̍ɔ̍ŋ sa̍kpo᷄ŋ nda̍ nyɛ̄m kɛ̄ndɔ᷄ŋ ta̍u̍.

¹⁰ Mɛ̄lɛ̄ka̍ cho̍ ya̍ māndāa̍ ni̍. Ndu̍ pi̍ŋī wa̍nāa̍ cho̍ sa̍kpō wa̍ ni̍.

¹¹ Mɛ̄lɛ̄ka̍ cho̍ yāma̍nɔ̄ sa̍kpōo̍ ni̍. Le̍ te̍le̍ŋ o̍ te̍le̍ŋ kīlūllo̍ o̍ ki̍lūl wānāa̍ to̍sā sɔ̍ɔ̍ŋ wɔ̍ɔ̍ŋndo̍ŋ nda̍ yāmɛ̍i̍ ni̍ mbō tūsi̍ nda̍ nyɛ̄ pālāa̍ chōo̍.

¹² Tē ā me᷄l yɔ᷅ŋndā ndāla̍ wɔ̍ɔ̍ŋnda̍ŋ te̍, mɛ̄ɛ̍ Mɛ̄lɛ̄ka̍ chō mūɛ̄ī ndūɛ̍i̍ fāŋnde̍ yīkpā lē nda̍. Ndu̍yɛ̍, ō bɛ̄ɛ̄ndi̍a̍ŋ mbo̍ kīndū chīɔ̄ū ndɔ̄ɔ̍ ve̍le̍ ve̍le̍.

¹³ Ō chu̍a̍ wōlɔ̄ɔ̄lā ndɔ̄la̍ chɔ̄ūla̍ŋ, la̍ nɛ̍ī a̍ wānā di̍yɔ̄ɔ̄ le̍ la̍ŋ. Ō yūlū chīŋɔ̍ma̍ ndɔ̄ma̍ lēyīŋnda̍ŋ.

¹⁴ To̍fa̍ wɔ̍ mɛ̄ɛ̍ wānāā dɛ̍nɛ̍ wɔ̍ɔ̍ŋnda̍ ha̍ā ā kɛ̄ɛ̄si̍a̍ŋ sɔ̍ɔ̍ŋ wɔ̍ɔ̍ŋndo̍ŋ o̍ lākɔ̄l lɛ̍, ā kɛ̄ɛ̄si̍a̍a̍ sɔ̄ɔ̍ŋ dɛ̍nɛ̍ wɔ̍ɔ̍ŋndo̍ŋ pɛ̍, ā hāndu̍ vɛ̄lɛ̄ chōōla̍ŋ lēchōo̍.

¹⁵ Kɛ̍ ndu̍yɛ̍, so̍o̍ŋnda̍ nda̍ tūāū le̍ chāāŋnda̍ la̍ŋ, lēni᷄ŋ nda̍ pi̍la̍ dēl ni̍.

¹⁶ O̍ ko̍ŋ, dɛ̍nɛ̍ wɔ̍ɔ̍ŋ nda̍ tūu̍ le̍ chāāŋnda̍ wo̍, mbō mīīŋgu̍ nda̍ pi̍la̍ chōo̍. Ba̍l nda̍ nda̍ chɔ̄ū le̍ wāŋnda̍ wo̍, ō mīī nda̍ pi̍la̍ chūkɔ̄ɔ̄.

¹⁷ I̍ me̍l Mɛ̄lɛ̄ka̍ Ya̍a̍wɛ̄ɛ̄ ba̍li̍ka̍ le̍ mɛ̄ɛ̍ o̍ ki̍a̍lū ya᷅mɛ̍i̍ sa̍kpō yɛ̍, I̍ cho̍ īchōndu̍ mī chu̍u̍ndu̍u̍ Mɛ̄lɛ̄ka̍ Ya̍a̍wɛ̄ɛ̍, o̍ hi̍o̍ū kpo̍u̍ wo̍.