Sa᷅m 6 - Yāu̍ Mɛ̄lɛ̄ka̍a̍

Pīɛ̄īle̍ŋ o̍ te̍le̍ŋ nyɛ̄ pālāa̍ ni᷄ŋ

¹ O̍o̍ Mɛ̄lɛ̄ka̍ Ya̍a̍wɛ̄ɛ̄, tē ō wa̍ pɛ̍ mā dɔ̄ɔ̄nu᷄ŋ tu̍mbe̍ a̍ ya̍, tu̍sī ya̍ nyɛ̄ pālāa̍ chōo̍ mɛ̄ɛ̍ ŋ̄ tāmbū kɔ̍l lɛ̍ le̍. Ha̍ndū ya̍ nyɛ̄ kīndīlāa̍ chōo̍ mɛ̄ɛ̍ ŋ̄ tūūlū kɔ̍l lɛ̍ le̍.

² I̍ cho̍ ni᷅ŋ bɔ̄ɔ̍ o̍ yɔ̍kpāā a̍ nyɛ̄ nɛ̄īyāa̍, le̍la̍ŋ tūīīnu̍ŋ ya̍ īnyīɛ̍ɛ̍ Mɛ̄lɛ̄ka̍ Ya̍a̍wɛ̄ɛ̄. I̍ sa̍ŋga̍ ni᷅ŋ bɔ̄ɔ̍ Mɛ̄lɛ̄ka̍ Ya̍a̍wɛ̄ɛ̄, si̍ŋgi̍ ya̍ fɔ̍.

³ Mɔ̍nɛ̍i̍ chō bɔ̄ɔ̍ o̍ yōōmū nūu̍ ni᷄ŋ. Lɔ̍ɔ̍ kūɛ̍ɛ̍nɛ̍ ŋ̄ chō yɛ̍ ya̍ mālā kɛ̍i̍, Mɛ̄lɛ̄ka̍ Ya̍a̍wɛ̄ɛ̄?

⁴ Mɛ̄lɛ̄ka̍ Ya̍a̍wɛ̄ɛ̄, hu̍ŋ fɔ̍, hu̍ŋ mā hu̍ŋ ba̍ŋā ya̍. Wāna̍ īnyīɛ̍ɛ̍ yo̍ ŋ̄ chō ni̍, so̍li̍ ya̍ o̍ pīɔ̍mndo̍ ho̍ō ni᷄ŋ fɔ̍.

⁵ Tē wāŋndo̍ vī ni᷅ŋ pɛ̍, ō lo̍o̍nūŋ ndɛ̍ pa̍ a̍ nyɛ̄ ŋ̄ tōsa̍l ndu̍ wo̍? Tē ō kūɛ̄ ni᷅ŋ chīe̍e̍ pīɔ̍m pɛ̍, ō sa̍ŋgālā lɛ̍ pa̍ nu̍m?

⁶ I̍ cho̍ ni᷅ŋ ō yɔ̄kpɛ̍i̍ a̍ cha᷄ŋndo̍. Pi̍i̍ pi̍i̍ I̍ lɔ̍ɔ̍lū cha̍ŋndo̍, kpēle̍ ya̍ I̍ hi̍nī cho̍o̍ wo̍ ni̍, a̍ pi̍lēi̍ ya̍ I̍ ya̍mbū bɔ̍lle̍ŋ ndo̍, lā chūū ni᷅ŋ līwā a̍ mɛ̍mi̍a̍ŋ.

⁷ Chɔ̄ kālāa̍ bɛ̍ɛ̍ I̍ si̍o̍ū lɛ̍ lāpi̍ le̍, a̍ cha᷄ŋndo̍. Hɔ̄lta̍ŋ lā yɔ̄nu̍ŋ ya̍ ni᷅ŋ dɔ̍fɔ̍ŋ dɔ̍fɔ̍ŋ a̍ cha᷄ŋndo̍, a̍ nyɛ̄ kīndīlāā ya̍a̍mɔ̍ɔ̍wa̍ cho̍ ya̍ hāndɔ̄ɔ̍ chōo̍ wo̍.

⁸ Nya̍ wānāā yɔ̄ŋndā wɔ̄ɔ̍ŋnda̍ ki̍nɛ̍i̍, lā fāŋa̍ŋ ya̍ kɔ̄ɔ̄lī, Mɛ̄lɛ̄ka̍ Ya̍a̍wɛ̄ɛ̄ o̍ tu̍e̍ī cha᷄ŋ nūu̍.

⁹ Mɛ̄lɛ̄ka̍ Ya̍a̍wɛ̄ɛ̄ tu̍e̍ī kōŋu̍l nūu̍. Ō chō pīɛ̄īlē nīle̍ŋ mūlī.

¹⁰ Si̍ɔ̍mbu̍la̍ŋ lā chō ya̍a̍mɔ̍ɔ̍wa̍a̍ nīa̍a̍ kpe̍nde̍ bi̍yɔ̄ɔ̄, sīōōŋīī bɛ̄ndūe̍i̍ chō nda̍ bīyɔ̄ɔ̄, mā yo᷄m a̍ si̍ɔ̍mbu̍la̍ŋ o̍ lēpīlɛ̍ ni᷄ŋ kpe̍.