Sa᷅m 4 - Yāu̍ Mɛ̄lɛ̄ka̍a̍

Pīɛ̄īlē fīti̍le̍ŋ le̍ mālāa̍

¹ O̍o̍ Mɛ̄lɛ̄ka̍, nu᷄m cho̍ wāna̍ su̍ŋgū le̍ ya̍ wo̍ ni̍, ya̍ŋ ya̍ nīla̍ŋ mā mu̍li̍ ya̍ dīōm. I̍ wa̍ o̍ kpūndɔ̍ɔ̍ ni᷄ŋ ma̍ sōlī ya̍ lēni᷄ŋ. Yāndi̍i̍ to̍sa̍l la̍ dɛ̍nɛ̍ kɛ̍ndɛ̄ mā mu̍li̍ pīɛ̄īlē nīle̍ŋ.

² O̍o̍ nya̍ chūāūwāā ŋ̄wāŋndā chīe̍e̍, bāā lā sa̍ŋgā wɔ̍ a̍ ya̍ bɛ̄ɛ̄la̍ŋ tɛ̄ɛ̄mbūūwo̍ le̍? Nya̍ bɛ̍ɛ̍ lā kāāla̍ sɔ̄ɔ̍ŋ fo̍ndo᷄ŋ fɔ̍. Lā Kāāla̍ bɔ̄ɔ̍ cho̍ōla̍ŋ.

³ Kɛ̍ ndu̍yɛ̍, lā sīna̍ pɛ̍ŋgu̍ māā Mɛ̄lɛ̄ka̍ Ya̍a̍wɛ̄ɛ̄ o̍ hɛ̍li̍ wānāa̍ cho̍ sa̍kpō wa̍, le̍ mā wa̍ wānāā ndɔ̄. Tē I̍ ve̍e̍lu̍ ndu̍ o̍ pīɛ̄īle̍ŋ ni᷄ŋ le̍ ya̍ mālāa̍ pɛ̍, mūlīo̍o̍ o̍ mu̍lī ya̍ dīōm ni̍.

⁴ Sīōōŋnde̍ ī bīi̍ nya̍ mī lā ma̍l yɔ̄ŋndā wɔ̄ɔ̍ŋnda̍ŋ tōsāa̍. Tē lā hīni̍ īchɔ̄l pɛ̍, lā yīya̍ŋ nyɛ̍ kɛ̄ndɛ̍ī a̍ ndi̍ o̍kɔ̄ɔ̄, te̍le̍ŋ nya̍ wā i̍hi̍ni̍ mī lā mēi̍ do̍ŋ ndo̍.

⁵ Lā yɔ̄ŋgu̍ sa̍lāla̍ bɛ̍nda̍ la̍ŋ, ndu̍yɛ̍, mī lā dɔ̄ū tīīnda᷄ŋndo̍ o̍ Mɛ̄lɛ̄ka̍ Ya̍a̍wɛ̄ɛ̄ ni̍ŋ.

⁶ Wānāā ka̍ ka̍ pīɛ̄īlē ndāle̍ŋ o̍ Mɛ̄lɛ̄ka̍ lo̍ le̍ cho̍ ni̍ āā, “O̍o̍ Mɛ̄lɛ̄ka̍ Ya̍a̍wɛ̄ɛ̄, dɔ̍u̍ na̍a̍ sa̍lā mā ke̍ na̍a̍ nyɔ̄ɔ̍ŋ cha᷅po̍o̍li̍. Ke̍ na̍a̍ dɛ̍nɛ̍ kɛ̍ndɔ̄ɔ̍.”

⁷ Kɛ̍ ndu̍yɛ̍, mɛ̄ɛ̍ o̍ mɛ̄ɛ̍ nda̍ nɔ̍ nyɛ̍ dīa̍a̍ a̍ mūɛ̄īmā ndāa̍ŋ, kɔ̄l kɛ̄ndɛ̄ nūm Mɛ̄lɛ̄ka̍ Ya̍a̍wɛ̄ɛ̄ ke̍ ya̍ wo̍, ō hīōū kɔ̄l kɛ̄ndɛ̄ nda̍ nɔ̄ le̍ nyɛ̄ ndā di̍a̍a̍ a̍ mūɛ̄īmā ndāa̍ŋ ndo̍.

⁸ Tē I̍ hi̍ni̍ īchɔ̄l pɛ̍, I̍ lɔ̍lnu̍ŋ kpo̍o̍ŋ, sīōōŋīī bɛ̍ɛ̍ ve̍ ya̍ le̍, kāni̍ fu̍u̍le̍, nūm Mɛ̄lɛ̄ka̍ Ya̍a̍wɛ̄ɛ̄, nu᷄m pīlɛ̍ kpe̍ nɔ̍lā ni̍ mā ma̍nda̍ ya̍, nyɛ̄ bɛ̍ɛ̍ yɔ̍nūŋ ya̍ le̍ ni̍.