Sa᷅m 2 - Yāu̍ Mɛ̄lɛ̄ka̍a̍

A̍ Māsā bɛ̍ndū Mɛ̄lɛ̄ka̍ hɛ̄li̍ wo̍ o̍kɔ̄ɔ̄

¹ Vɛ᷅ mi̍ lɛ̄ŋīi̍ pi̍ɛ̍ī Mɛ̍lɛ̄ka̍ le̍ ve̍ ī yīi̍ de̍fo̍o̍, mi̍ wāŋnda̍ ā yīīna᷅ŋ fo̍ndō fu̍u̍?

² Māsāā bɛ̍ndūa̍a̍ o̍ lɛ̄ŋīi̍ pi̍ɛ̍ī Mɛ̍lɛ̄ka̍ le̍ ve̍ ni᷄ŋ ā bɛ̍ɛ̍ndi̍a̍ŋ. Wānāā bɛ̄ndūa̍a̍ ā kɛ̄ɛ̄si̍a̍a̍ ma̍ sīmūl Mɛ̄lɛ̄ka̍ Ya̍a̍wɛ̄ɛ̄ nda̍ Māsā bɛ̍ndū o̍ hɛ̍li̍ wo̍.

³ Ā bīī ma̍ dīmu̍la᷅ŋ āā, “Lā ŋ̄ fūla᷅ŋ nda̍ o̍ bā bɛ̄ŋgu̍. Ŋ̄ fūla᷅ŋ o̍ chɛ̄lē ndāle̍ŋ bɛ̄ŋgu̍.”

⁴ Kɛ̍ ndu̍yɛ̍, nāa̍ Mɛ̄lɛ̄ka̍ Ya̍a̍wɛ̄ɛ̄ cho̍ nu̍a̍ā o̍ kpe̍ŋgbe̍i̍ ndɔ̍ lēmāsāa̍ chōo̍ wa̍, māmɔ̄ɔ̍ ko̍ni̍ o̍ ma᷅m nda̍ ni̍, sɔ̄ɔ̍ŋ nyɛ̄m māmāŋ fo̍ndō ko̍ni̍ o̍ cha᷅ kɛ̍ɛ̍sīāālā ndāla̍ŋ ni̍.

⁵ O̍ ko̍ŋ, mbō dɔ̄ɔ̄nu᷄ŋ tu̍mbe̍ a̍ nda̍ ō kālā ka̍lā, mbō tūūlu̍ kɔ̄l a̍ nda̍, mī kɔ̄lta̍ŋ lā yɔ̄nu̍ŋ nda̍ ni᷄ŋ ye᷅ŋ yēŋ a̍ sīōōŋnde̍.

⁶ Mbō dīmu̍l nda̍ āā, “I̍ yu̍lū Māsā Bɛ̍ndōo̍ le̍ wāa̍ Māsāa̍ Sa̍a̍yɔ̄ŋ, pēmbīī nīi̍ kāsīe̍i̍.”

⁷ Mi̍ māsā bɛ̍ndōo̍ dīmī āā, “I̍ chɔ᷅m ndɔ̍ nya̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l la̍ wo̍. Ō dīmu̍l la̍ āā, ‘Nu᷄m cho̍ po̍ nūu̍ ni̍. I̍ si̍mnu᷄ŋ ha̍ū fi̍nyā nūm.

⁸ Nyu̍na̍ ya̍ dīōm mī ke̍ nu̍m lɛ̄ŋnde̍ kpo̍u̍, mī ke̍ nu̍m wāŋnda̍ chi̍e̍ēŋndo̍ kpo̍u̍ mā wa̍ nyɛ̄ nūm.

⁹ Ā chō nda̍ kōŋɔ̄ɔ̄ a̍ tīnda̍ īchīli̍ŋndo̍ mā yi̍mi̍ nda̍, mɛ̄ɛ̍ wānā lu̍a̍ā nu̍a̍ā kpɛ̍ɛ̍nɛ̍i̍ pūūlūe̍i̍ mā pe̍si̍ ndi̍ wɔ̍ wɔ̍ yɛ̍.’ ”

¹⁰ Le̍la̍ŋ, nya̍ māsāā bɛ̍ndūa̍a̍, lā nɔ̍ ta̍āsi̍o̍o̍. Nya̍ wānāa̍ cho̍ lɛ̄ŋnde̍ bōlle̍ o̍ chi̍e̍ēŋndo̍ ni᷄ŋ nda̍, lā tūe̍i̍ si̍lāa̍ ho̍ō.

¹¹ Lā yɔ᷄ŋ si̍o̍ōŋnde̍, mī lā sōōlu̍u̍ Mɛ̄lɛ̄ka̍ Ya̍a̍wɛ̄ɛ̄, lā nyīīya̍ a̍ sīōōŋnde̍ le̍ ndu̍.

¹² Lā tūndu̍ŋ ndu̍ o̍ lābɛ̄ŋgu̍ ni̍ŋ, yɔ̄ŋi̍ o̍ dɔ̍ɔ̍nu̍ŋ tu̍mbe̍ le̍ sɔ̄ɔ̍ŋ nya̍ chō tōsāa̍ wo̍ŋ, yɔ̄ŋi̍ o̍ dɔ̍ɔ̍nu̍ŋ tu̍mbe̍ chɔ̍ chɔ̍ mbō tɛ̄ɛ̄mbu̍u̍ nya̍. Kɛ̍ wānāa̍ hu᷅ŋ nāa̍ ndu̍ chu̍a̍ le̍ nda̍ māndāa̍ wa̍ nda̍ nda̍, ā pɛ̄l tɔ̄nɔ̄ɔ̍.