Sa᷅m 18 - Yāu̍ Mɛ̄lɛ̄ka̍a̍

Chōndi̍i̍ Dēēve̍ so̍li̍ le̍ yōmɔ̄ɔ̄ o̍ ye᷅m ya̍a̍mɔ̍ɔ̍wa̍ ve̍

¹ I̍ ka̍a̍la̍ bɔ̄ɔ̍ nu̍m Mɛ̄lɛ̄ka̍ Ya̍a̍wɛ̄ɛ̄, kāni̍ fu̍u̍le̍, nu̍m nɔ̍ kpāāya̍ nūu̍ ni̍.

² Mɛ̄lɛ̄ka̍ Ya̍a̍wɛ̄ɛ̄, nu᷄m cho̍ pōū kpo̍o̍wa̍a̍ ō ya̍ I̍ vi̍a̍ŋnūŋ le̍bɛ̍ŋgu̍ wo̍ ni̍, nu̍m cho̍ sāāsā ka̍lā ba̍lu̍ ya̍ wo̍ ni̍. Mɛ̄lɛ̄ka̍ nūu̍ chō māchūāā māā pōū kpo̍o̍wa̍ bɛ̍ndū, tē I̍ ve̍ŋnu᷄ŋ o̍ ndu̍ bɛ̍ŋgu̍ pɛ̍, nyɛ̄ yɔ̍nūŋ ya̍ le̍. Ndu̍ ma̍ndā ni̍, mɛ̄ɛ̍ nyɛ̄ kālā ka̍lā cho̍ māā bōo̍la̍ bɛ̍ndū mī so̍vɛ̄i̍ya̍ bīī o̍ lābā le̍ nda̍ māndāa̍ wo̍ cho̍ yɛ̍. Ndu̍ ya̍ ka̍fālāŋ ni̍, ya̍a̍mɔ̍ɔ̍wa̍ ā yɔ᷅ŋ ya̍ nyɛ̄ le̍. Ndu̍ cho̍ wāna̍ ma̍ndā ya̍ wo̍ ni̍.

³ Mɛ̄lɛ̄ka̍ Ya̍a̍wɛ̄ɛ̄, o̍ bɛ̍nda̍ mbō sɔ̄la̍ sāŋgālāa̍ wo̍, mɛ̄ɛ̍ ya̍ I̍ ve̍e̍lu̍ ndu̍ le̍ ya̍ pīŋīo̍o̍ ya̍a̍mɔ̍ɔ̍wa̍a̍ nīa̍a̍ o̍ bā, mbo̍ pīŋī ya̍.

⁴ Pīɔ̍mndo̍ ndu̍ o̍o̍ chi̍i̍ ya̍ ni᷅ŋ yīī. Ndu̍ o̍o̍ lo̍ ni᷅ŋ cho̍be̍ mī ndu̍ o̍o̍ hi̍o̍ū a̍ ya̍, mɛ̄ɛ̍ tīndi̍le̍ kpāāyāle̍ŋ le̍ hīāū nu̍a̍ā a̍ wāŋndo̍ yɛ̍.

⁵ Kpūndɛ̍ pīɔ̍mndo̍ ō wa̍ ni᷅ŋ ya̍ ō bālāā kpɔ̍kɔ̍su̍, pīɔ̍mndo̍ ndu̍ o̍o̍ ye̍ŋ ya̍ ni᷅ŋ yāŋɔ̄ɔ̄le̍ŋ.

⁶ Mɛ̄ɛ̍ kpūndɔ̍ɔ̍ de᷄l la̍ chōo̍, mi̍ ve̍e̍lū Mɛ̄lɛ̄ka̍ Ya̍a̍wɛ̄ɛ̄, mi̍ ve̍e̍lū Mɛ̄lɛ̄ka̍ nūu̍ le̍ mbō māla̍ ya̍. Mbo̍ tūɛ̄ī dīōm nūu̍, nāa̍ o̍ cho̍ o̍ chīɛ̍i̍ Mɛ̄lɛ̄ka̍a̍ ni᷄ŋ nda̍. Vēēlōo̍ ndu̍ le̍ ya̍ mālāa̍, mbo̍ mūlī ya̍ dīōm.

⁷ O̍ ko̍ŋ kɔ̍ɔ̍lī, mɛ̄ɛ̍ Mɛ̄lɛ̄ka̍ dɔ̄ɔ̄nu᷄ŋ tu̍mbe̍, mi̍ lɛ̄ŋnde̍ŋ lē nyīīyā, mi̍ lē hīīlu᷄ŋ, mi̍ pēmbūŋ bɛ̄ndo᷄ŋ ŋ̄ cha᷄ŋ a̍ hīīlɔ᷄ŋndo̍ o̍ chīīyūŋ ŋ̍ si̍m chōo̍ wo̍ŋ di̍ di̍, mi̍ ŋ̄ yɔ̄nu᷄ŋ yo̍kpa᷄ŋ yo̍kpa᷄ŋ.

⁸ Mɛ̄lɛ̄ka̍ dɔ̄ɔ̄nu᷄ŋ tu̍mbe̍ pɛ̍, ku᷄mnde̍ fūlāa̍ ndu̍ o̍ mi᷄ŋnda̍ŋ. Yīŋndē wūle̍ wu᷅le̍ le̍ bɛ̍ndūle̍ lu̍ām nyɛ᷅ o̍ nyɛ̄ le̍ŋ a̍ dɛ̄ŋgūlta̍ŋ fūlāa̍ ndu̍ o̍ sōndō.

⁹ Ō kūmbi̍ ha̍la̍a̍, mbo̍ tūāl a̍ ha̍la̍ tīŋīo̍o̍ ndu̍ o̍ pēlo᷄ŋ bɛ̄ŋgu̍.

¹⁰ Ō hīŋ o̍ ha̍la̍a̍ ni᷄ŋ cho̍o̍ cho̍o̍ o̍ nyāā lākūmba᷅ŋāā ā pūm chōo̍. O̍ chō hūnɔ̄ɔ̍ o̍ hūēīye̍ ni᷄ŋ cho̍o̍ cho̍o̍ fu̍kū fūkū bɛ̄ndū.

¹¹ Ō kūmbū ndu̍ pi̍la̍ kpu̍ a̍ ha̍la̍ tīŋī bɛ̄ndōo̍, pīɔ̄ɔ̄ bɛ̄ndōo̍ he᷄l mbo̍ bālū ndu̍ kpɔ̍kɔ̍su̍ bɛ̍ndū.

¹² Nāa̍ o̍ cho̍ nu̍a̍ā wa̍, nyɛ̄ ŋūāla̍lɛ̍īyo̍ chō kīōlōo̍ ndu̍ lāchī, mī pa̍ŋgēle̍ kōŋ ō tōsā wu̍lɛ̄ī wūlɛ̄ī, mī lōōŋ kpu̍ŋgba᷄ŋ ŋ̄ dēlī.

¹³ Mɛ̄lɛ̄ka̍ Ya̍a̍wɛ̄ɛ̄ de̍ŋi̍ o̍ ha̍la̍a̍ ni᷄ŋ cho̍o̍ cho̍o̍ pa̍ndāŋ. Sɛ̄kpɛ̄! Ā tūēī Mɛ̄lɛ̄ka̍ hi̍o̍ū kpo̍u̍ wo̍ di̍ōm. Lōōŋ kpu̍ŋgba᷄ŋ chō dēlīo̍o̍, nyɛ̄ ŋūāla̍lɛ̍īyo̍ chō kīōlōo̍ kpe̍e̍kpe̍i̍.

¹⁴ Ō vīī vi̍i̍ ya̍a̍mɔ̍ɔ̍wa̍a̍ ndūa̍a̍ a̍ chīŋɔ̍ma̍ ndɔ̄ma̍ lēyīŋnda̍ŋ, mbo̍ pūūsīāā nda̍. Ō vīī vi̍i̍ nda̍ a̍ ta᷅ŋnda̍ŋ ma̍ nyāānu᷄ŋ.

¹⁵ Mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ dɔ̍ɔ̍nu᷄ŋ tu̍mbe̍ mbo̍ dēŋī, mi̍ mɛ̄ŋnda̍ŋ o̍ pēē mɛ̄ŋmā īhɛ᷄llo̍ mā fāŋa᷄ŋ, mi̍ lūmūŋ yīŋgi̍lɛ̍i̍yo̍ŋ lē bɛ̄ŋgu̍ di̍ di̍ ŋ̍ chɔ̍mnu᷄ŋ. Mɛ̄ɛ̍ o̍ yo̍o̍mu̍ fu̍ū, mi̍ chīīyūŋ chi̍e̍ēŋndo̍ si᷄m chōo̍ wo̍ŋ ŋ̄ chɔ̄mnu᷄ŋ.

¹⁶ Mɛ̄lɛ̄ka̍ Ya̍a̍wɛ̄ɛ̄ o̍ lo̍ ɛ̄chɛ̍nɛ̄ mbo̍ sīɛ̄ndī bāa̍ mbo̍ sāā ya̍, mbo̍ sōlī ya̍ o̍ lūmīī yīŋgi̍lɛ̍i̍ye̍ ni᷄ŋ.

¹⁷ Ya̍a̍mɔ̍ɔ̍wa̍a̍ nīa̍a̍ nda̍ a̍a̍ hi̍o̍ū ya̍ māyōōmū, kɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ chi̍i̍ndīāā ya̍ nda̍ o̍ bā, mbo̍ sōlī ya̍ wānāa̍ tu̍l ha̍ā ya̍ lēyɛ̄ wa̍ o̍ bā.

¹⁸ O̍ pāa̍le̍ kpūndɔ̍ɔ̍ wa̍ ya̍ chōo̍ le̍ŋ nda̍ de᷄l la̍ chōo̍ ni̍. Kɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ si᷅m ya̍ kɔ̄ɔ̄lī.

¹⁹ Mbo̍ sōlī ya̍ nda̍ tɛ̄ɛ̄ŋ, mbo̍ yāā ya̍ o̍ fo̍ndāŋ nyɛ̄ yɔ̍nūŋ a̍ ya̍ le̍ wo̍. Mbo̍ pīŋī yōōmū nūu̍, kāni̍ fu̍u̍le̍, ō hīni̍ kɔ̄l a̍ ya̍.

²⁰ Mɛ̄lɛ̄ka̍ Ya̍a̍wɛ̄ɛ̄ o̍ pa̍a̍wa̍ ya̍, le̍ mɛ̄ɛ̍ ya̍ I̍ to̍sa̍ sūɛ̍i̍ cho̍ sa̍kpō ndu̍ o̍ hɔ̄l le̍ yɛ̍. Ō dɔ̄ū ya̍ sa̍lā le̍ mɛ̄ɛ̍ bālā nīla̍ cho̍ o̍ sūɛ̍i̍ wɔ̍ɔ̍ŋ ni᷄ŋ te̍ yɛ̍.

²¹ I̍ chu̍a̍ sāwāla̍ Mɛ̄lɛ̄ka̍ Ya̍a̍wɛ̄ɛ̄ la̍ŋ sa̍kpō. Ndu̍yɛ̍, Mɛ̄lɛ̄ka̍ ya̍ cho̍ pīɛ̄īyo̍ wo̍, I̍ fe̍ŋāŋ o̍ nɛ̄i̍ ndɔ̄ɔ̍ chōo̍ le̍. I̍ to̍sā yɔ᷅ŋ wɔ̄ɔ̍ŋ wāā le̍nde̍ le̍.

²² Nyɛ̄ o̍ nyɛ᷅ di̍mi̍ŋ o̍ sāwāla̍ ndɔ̄la̍ŋ ni᷄ŋ mi̍ chu̍ā kpo̍u̍. I̍ tɛ̍ɛ̍mbu̍u̍ ndu̍ le̍.

²³ Ō sīnā māā I̍ to̍sa̍ nyɛ᷅ o̍ nyɛ̄ wɔ̄ɔ̍ŋ te̍. Bālā nīla̍ cho̍ o̍ īsɔ̄ɔ̍ o̍ īsɔ̄ɔ̍ wɔ̍ɔ̍ŋ ni᷄ŋ te̍.

²⁴ Le̍ he̍ī, ō ke̍ ya̍ fāndāa̍, kāni̍ fo̍ndōle̍, le̍ mɛ̄ɛ̍ ya̍ I̍ to̍sā nyɛ᷄ cho̍ sa̍kpō wo̍ yɛ̍, kāni̍ fu̍u̍le̍, o̍ sīnā māā I̍ to̍sa̍ i̍sɔ̍ɔ̍ o̍ īsɔ̄ɔ̍ wɔ̍ɔ̍ŋ te̍.

²⁵ O̍o̍ Mɛ̄lɛ̄ka̍ Ya̍a̍wɛ̄ɛ̄, wānāā hi̍a̍ū la̍chi̍ a̍ nu̍m tīīnda᷄ŋndo̍ wa̍, wāa̍ ŋ̄ wā nda̍ kɔ̄ɔ̄lī ni̍. Wānāa̍ cho̍ nu̍m o̍ hɔ̄l sa̍kpō wa̍, dɛ̍nɛ̍ kɛ̍ndɔ̄ɔ̍ ŋ̄ tōsāl nda̍ te̍le̍ŋ o̍ te̍le̍ŋ ni̍.

²⁶ Wānāa̍ nɔ̍ kɔ̄ltā dīāndāāla̍ŋ nda̍, tōsāllo̍ ŋ̄ tōsāl nda̍ kɛ̄ndɛ̄i̍ ni̍. Kɛ̍ wānāā dɛ̍nɛ̍ wɔ̍ɔ̍ŋnda̍ nda̍ nda̍, o̍ nɛ̄ī wa̍ā le̍ndo̍o̍ chōo̍ ko̍ni̍ ŋ̄ bi̍ī nda̍ ni̍.

²⁷ Pīŋīo̍o̍ ŋ̄ pīŋī wa̍nāā tūsīa̍ŋ nda̍ ni̍, kɛ̍ wānāā hɔ̄lāā hēēlāa̍ nda̍, mā tu̍si̍ nda̍ tōōlō.

²⁸ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nūu̍, nu᷄m yɔ̍ŋgū ya̍ nyɛ̄ wa̍wo̍ŋndo̍ ni̍, le̍ mī che᷅. Tē a̍ yɔ̍ŋgu̍ ya̍ nyɛ̄ wa̍wo̍ŋndo̍ pɛ̍, nyūmnda̍ŋ mā fāŋa̍ŋ.

²⁹ Nu᷄m lu̍e̍ī ya̍ kpāāyāa̍ ni̍, mī nɔ̍la̍ mī I̍ sɔ̍ŋga̍ a̍ ya̍a̍mɔ̍ɔ̍wa̍a̍ nīa̍a̍, mī he̍l o̍ sāāsāla̍ ka̍lā ka̍lālā ya̍a̍mɔ̍ɔ̍wa̍ tāŋgūl le̍ chi̍e̍e̍ŋ ndāa̍ŋ māndāa̍ la̍ŋ chōo̍.

³⁰ Mɛ̄lɛ̄ka̍a̍ ho̍ō, ō chō sa̍na̍a̍. Dīōmndā ndɔ̄la̍ŋ lā chō sa̍kpō. Nyɛ̄ kālā cho̍ māā bōo̍ bɛ̍ndū wo̍ o̍ cho̍ ni̍, le̍ wa̍nāa̍ ku̍ā nāa̍ ndu̍ chu̍a̍ le̍ nda̍ māndāa̍ wa̍.

³¹ Mɛ̄lɛ̄ka̍ Ya̍a̍wɛ̄ɛ̄ ndu̍ pīlɛ̍ kpe̍ cho̍ Mɛ̄lɛ̄ka̍ ni̍. Ndu̍yɛ̍, wānā o̍ wānā cho̍ mbō wa̍ māā pōū kpo̍o̍wa̍ le̍, mɛ̄ɛ̍ ndu̍ Mɛ̄lɛ̄ka̍.

³² Ndu̍ cho̍ Mɛ̄lɛ̄ka̍ o̍ lu̍e̍ī ya̍ dīāllūŋ kāla᷄ŋ ndo̍ ni̍. Mbō mānda̍ ya̍ mī wa̍ sɔ̄ɔ̍ŋ sa̍kpo᷄ŋ tōsāa̍.

³³ Mbo̍ kīndī ya̍ pēlo᷄ŋ māā pēlūŋ kīa̍l, I̍ nya̍a̍nu̍ŋ bɛ̍ɛ̍ I̍ de᷅l te̍. Mbō tōsa̍ mi̍ si̍m o̍ pēmbēi̍ lāndɔ᷄ŋndo̍ I̍ de᷅l te̍.

³⁴ Mbo̍ pɛ̄ɛ̄ku̍ ya̍ a̍ chɔ̄ūwo̍, ā yɔ᷄ŋ bɛ̍ɛ̍ āā chīɔ̄ū nda̍ tōōsi̍a̍a̍ a̍ būlɔ̍ŋsīi̍ye̍ wo̍ ni̍, I̍ nɔ̍lā mī sɔ̍ŋga̍ a̍ ndu̍.

³⁵ O̍o̍ Mɛ̄lɛ̄ka̍ Ya̍a̍wɛ̄ɛ̄, nu᷄m ma̍ndā ya̍ ni̍, ndu̍yɛ̍ pīŋī ŋ̄ pīŋi̍ ya̍ wo̍, ndu̍ cho̍ nyɛ̄ kālā ka̍lā cho̍ māā bōo̍ bɛ̍ndū mbō ma̍ndā ya̍ wo̍ ni̍. Bā nūmndo̍ chō ya̍ chōo̍ mbo̍ wā ya̍ māndāa̍. Ndu̍yɛ̍ mālā ŋ̄ mālā ya̍ wo̍ tōsa̍ mi̍ fu̍lā tɔ̍ɔ̍.

³⁶ A̍ ke̍ ya̍ fo̍ndāŋ fɛ̄kɛ̄īyo̍, nāa̍ ya̍ mu̍u̍lūŋ a̍ sɔ̍ŋgɔ̄ɔ̍ wa̍. Ndu̍yɛ̍ pēlūŋ nūu̍ŋ chō ŋ̄ sīmūlāā yi̍ le̍ sɔ̍ŋgɔ̄ɔ̍, I̍ de᷅l kpo̍so̍ŋ te̍.

³⁷ I̍ lo̍ ya̍a̍mɔ̍ɔ̍wa̍a̍ nīa̍a̍ tōūwɔ̄ɔ̍ mi̍ bi̍ī nda̍, I̍ mi̍i̍ŋgū kɔ̍ɔ̍lī le̍, mɛ̄ɛ̍ mī chi̍i̍ a̍ nda̍.

³⁸ I̍ lo᷅ nda̍ lɔ̄ɔ̄vīa̍a̍, mā dēlī lɛ̍ɛ̍si̍ɛ̍ŋ, ō pīlɛ̍ bɛ̍ɛ̍ ti̍u̍ ba̍ mbō chɛ᷄ŋ te̍, mā hīni̍ le̍nde̍ lɛ᷅ŋ, mī ni̍ɔ̍ū nda̍ a̍ bɛ̄ŋgu̍.

³⁹ A̍ lu̍e̍i̍ ya̍ kpāāyāa̍ le̍ mi̍ chi̍e̍i̍ a̍ ya̍a̍mɔ̍ɔ̍wa̍a̍ nīa̍a̍, mī ye᷅m nda̍.

⁴⁰ A̍ to̍sa̍ mi̍ ya̍a̍mɔ̍ɔ̍wa̍a̍ nīa̍a̍ ā nyāānu᷄ŋ ya̍. I̍ di̍u̍ wānāa̍ tu̍l la̍ lēyɛ̄ wa̍ mi̍ chi̍ī a̍ nda̍.

⁴¹ Mi̍ ya̍a̍mɔ̍ɔ̍wa̍a̍ nīa̍a̍ kōŋūl le̍ wāna̍ pi̍ŋī nda̍ wo̍, kɛ̍ ā sɔ̄la̍ wa̍nā le̍. Ma̍ kōŋūl nāa̍ Mɛ̄lɛ̄ka̍ Ya̍a̍wɛ̄ɛ̄ chu̍a̍ le̍ nda̍ mālāa̍, kɛ̍ ō mūli̍ nda̍ dīōm te̍.

⁴² Mi̍ fu̍lī nda̍ ma̍ sīmnu᷄ŋ mɛ̄ɛ̍ chu̍ndo̍o̍ wā nu̍a̍ā lɛ̄ŋ, te̍ hūēīye̍ hɔ᷄ŋ pɛ̍, ī kūɛ̄ a̍ ndu̍ yɛ̍. Mi̍ kpa̍a̍tīāā nda̍, mɛ̄ɛ̍ nda̍ kpāātīāā nu̍a̍ā lōōlīo̍o̍ o̍ nɛ̄ī yɛ̍.

⁴³ A̍ pi̍ŋi̍ ya̍ wānāa̍ si̍mu̍l la̍ wa̍ o̍ bā, nu᷄m si̍i̍ŋgu̍u̍ ya̍ māsāa̍ lɛ̄ŋīī fāŋgā chōo̍ ni̍. Wānāā ya̍ i̍i̍ si̍nā bɛ̍ɛ̍ pa̍a̍ndū le̍ wa̍, ma̍ wā ya̍ o̍ bā bɛ̄ŋgu̍.

⁴⁴ Mɛ̄ɛ̍ wānāā lēkāa̍wa̍ ā tūēī a̍ ya̍ o̍kɔ̄ɔ̄, ma̍ hu᷄ŋ tu̍ndu᷄ŋ ya̍ o̍ lābɛ̄ŋgu̍ ni̍ŋ, ndu̍yɛ̍ ma̍ tōsa̍ nyɛ̄ ya̍ I̍ di̍mūl nda̍ wo̍.

⁴⁵ Tūēīyɔ̄ɔ̍ a̍ ya̍ o̍kɔ̄ɔ̄, mi̍ yōōmūa̍ŋ mā fūlā nda̍ po̍, ma̍ fūlā o̍ fo̍ndāŋndā ndāla̍ cho̍ lā bālāā a̍ sāāsāla̍ ka̍lā ka̍lāla̍ŋ nda̍ŋ a̍ nyīīyāa̍ ma̍ hūŋ.

⁴⁶ Nūm Mɛ̄lɛ̄ka̍ Ya̍a̍wɛ̄ɛ̄, ā chō yōōmū, nu᷄m cho̍ pōū kpo̍o̍wa̍ ma̍ndā ya̍ wo̍ ni̍. Sāŋgālāa̍ chō le̍ nūm Mɛ̄lɛ̄ka̍. Nu᷄m cho̍ wāna̍ pi̍ŋī ya̍ wo̍ ni̍.

⁴⁷ Mɛ̄lɛ̄ka̍, a̍ ma̍la̍ ya̍ mi̍ ya᷅m ya̍a̍mɔ̍ɔ̍wa̍a̍ nīa̍a̍. A̍ tōsa̍ mi̍ lɛ̄ŋīī chēle̍ŋnde̍ Ī lūɛ̄ī ya̍ o̍ bā bɛ̄ŋgu̍.

⁴⁸ A̍ ba̍ŋa̍ ya̍ ya̍a̍mɔ̍ɔ̍wa̍a̍ nīa̍a̍ o̍ ba̍. O̍o̍ Mɛ̄lɛ̄ka̍ Ya̍a̍wɛ̄ɛ̄, a̍ to̍sa̍ mi̍ ya᷅m ya̍a̍mɔ̍ɔ̍wa̍. A̍ so̍li̍ ya̍ wānāā lātānda̍a̍ o̍ bā.

⁴⁹ Le̍ he̍ī, I̍ cho̍ nu̍m sāŋgālā lɛ̄ŋnde̍ o̍ hɔ̄l. I̍ cho̍ nu̍m chūūndūū o̍ chōndo̍ŋ ni᷄ŋ.

⁵⁰ Mɛ̄lɛ̄ka̍ tōsa̍ mi̍ māsā bɛ̍ndū o̍ hɛ̍li̍ wo̍ ō yām ya̍a̍mɔ̍ɔ̍wa̍ o̍ chɔ̄ūlā bɔ̄ɔ̍ bɔ̄ɔ̍. Ō chɔ᷄m kāālā ndɔ̍ cho̍ le̍ te̍le̍ŋ o̍ te̍le̍ŋ ndo̍ nāa̍ Māsāa̍ Dēēve̍ chu̍a̍, a̍ wānāa̍ fu̍la̍ o̍ pūlālē ndɔ̄le̍ŋ chōo̍ wa̍ le̍ fɛ̍ɛ̍ŋ a̍ fɛ̍ɛ̍ŋ.