Sa᷅m 17 - Yāu̍ Mɛ̄lɛ̄ka̍a̍

Pīɛ̄īlē wānā kɛ̄ndɔ̄ɔ̍ pīɛ̄īle̍ŋ

¹ O̍o̍ Mɛ̄lɛ̄ka̍ Ya̍a̍wɛ̄ɛ̄, ya̍ŋ ya̍ nīla̍ŋ mā kēlū yāmɛ̍ī tōnyɛ̍i̍ na̍a̍ tɛ̄ɛ̄ŋ na̍a̍ ya̍a̍mɔ̍ɔ̍wa̍a̍ nīa̍a̍. I̍ cho̍ vēēlōo̍ chōo̍ cho̍o̍ le̍ mā ma̍la̍ ya̍, le̍la̍ŋ, yāndi̍i̍ mu̍li̍ ya̍ dīōm. I̍ cho̍ nu̍m pīɛ̄īle̍ŋ a̍ kɔ̄l nī di̍a̍ndāa̍ kpo̍u̍, yāndi̍i̍ ya̍ŋ ya̍ lānī.

² Ā chō yāmɛ̍i̍ kīōlɔ̄ɔ̄ mā ke̍ ya̍ di̍, kāni̍ fu̍u̍le̍, nūm ā sīnā to᷅nya̍a̍.

³ A̍ mɛ̍ɛ̍ndīa̍ŋ o̍ kɔ̄l nūu̍ ni᷄ŋ, ā hīŋ nāa̍ ya̍ chu̍a̍ a̍ nyūmnda̍ŋ, a̍ tɔ̍ɔ̍nda̍ŋ ya̍ ma̍ sāālu᷄ŋ māā I̍ nɔ̍ ye̍e̍mɛ̍i̍ wɔ̍ɔ̍ŋ ni᷄ŋ te̍. I̍ su̍ū di̍ōmndē wɔ̄ɔ̍ŋ te̍,

⁴ kɛ̄lɛ̄ŋgāā ni᷅ŋ te̍ mī to᷅l sɔ̄ɔ̍ŋ wɔ̍ɔ̍ŋ wāŋnda̍ tōsā wo̍ŋ kɔ̄ɔ̄lī, ɔ̄ɔ̄ mī to̍sa̍ sɔ̄ɔ̍ŋ dɛ̍nɛ̍ wɔ̍ɔ̍ŋ nda̍ tōsā wo̍ŋ. I̍ lo̍ o̍ ko̍ŋ mi̍ to̍sā nyɛ̄ ŋ̄ dīmu̍l la̍ wo̍.

⁵ I̍ lo̍ sīsi̍la̍ŋ o̍ nɛ̄ī nu̍mndo̍ chōo̍ nyɛ᷅ kɛ̄ndɛ̄ yi̍, sīɛ̄ɛ̄lā bɛ̍ɛ̍ I̍ si̍ɛ̍ɛ̍lā le̍.

⁶ O̍o̍ Mɛ̄lɛ̄ka̍ nūu̍, I̍ cho̍ nu̍m pīɛ̄īyo̍, kāni̍ fu̍u̍le̍ I̍ si̍nā māā ā mūlī ya̍ dīōm. Le̍la̍ŋ yāndi̍i̍, mu̍li̍ŋ nāa̍ ya̍ chu̍a̍ mā ya̍ŋ nīla̍ŋ o̍ sūɛ̍i̍ ya̍ I̍ cho̍ nu̍m dīmūl le̍.

⁷ Mɛ̄lɛ̄ka̍, to̍sa̍ i̍sɔ̍ɔ̍ mā chɔ̍m kāālā bɛ̄ndū ŋ̄ kāāla̍ ya̍ wo̍, kāni̍ fu̍u̍le̍, nu᷄m cho̍ wāna̍ ma̍ndā wa̍nāā nūmnda̍ wo̍ ni̍, a̍ hu᷅ŋ nāa̍ nūm chu̍a̍ le̍ nda̍ māndāa̍ ya̍a̍mɔ̍ɔ̍wa̍a̍ ndāa̍ o̍ bā wa̍.

⁸ Ma̍nda̍ ya̍ nyɛ̄ kɛ̄ndɛ̍ī Mɛ̄lɛ̄ka̍, mɛ̄ɛ̍ wāŋndo̍ māndā nu̍a̍ā hɔ̄ltē ndɔ̄le̍ŋ yɛ̍, ku̍mbu̍ ya̍ mɛ̄ɛ̍ sɔ̄ɔ̍ kūmbū nu̍a̍ā chɔ̄ūwāā ndūa̍a̍ o̍ kūmba᷅ŋnda̍ŋ bɛ̄ŋgu̍ yɛ̍.

⁹ Ma̍nda̍ ya̍ wānāā dɛ̍nɛ̍ wɔ̍ɔ̍ŋāa̍ hi᷅ŋ ya̍ chīēīyo̍ wa̍ o̍ bā. Ya̍a̍mɔ̍ɔ̍wa̍a̍ nīa̍a̍ ha̍ā ā hīŋ ma̍ bālū ya̍ si̍lɔ̍.

¹⁰ Ya̍a̍mɔ̍ɔ̍wa̍ ha̍ā ā nɔ̍ īnyīɛ̍ɛ̍ le̍, ndu̍yɛ̍ sɔ̄ɔ̍ŋ yōŋgāŋ bɛ̄ndo᷄ŋ fu̍lā nda̍ o̍ sōndō ni̍.

¹¹ Ā lo̍ ya̍ kɔ̄ɔ̄lī ha̍a̍a̍ ma̍ bēndāl la̍. Ā bālu̍ ya̍ si̍lɔ̍. Ā chō ya̍ mɛ̄ŋgɛ̄lāa̍ le̍ mɛ̄ɛ̍ nda̍ lōōkū mā chūū ya̍ lɛ̄ŋ yɛ̍.

¹² Mɛ̄ɛ̍ kpɔ̍kūŋndo̍ ō bɛ̄ɛ̄ndīāŋ le̍ vīsīo̍o̍ dēlɔ̄ɔ̍ chōo̍ mbō sɛ̄ɛ̄si̍a̍a̍ ndu̍ yɛ̍, le̍nde̍ nda̍ bɛ̍ɛ̍ndi̍a̍ŋ le̍ ya̍ sɛ̄ɛ̄sīa̍a̍ ni̍. Ā bɛ̄ɛ̄ndi̍a̍ŋ mɛ̄ɛ̍ kpɔ̍kūŋ fɔ̍ŋndɔ̍ɔ̍ ō vīāŋnūŋ vi̍sīo̍o̍ lāchī yɛ̍.

¹³ Le̍la̍ŋ Mɛ̄lɛ̄ka̍ Ya̍a̍wɛ̄ɛ̄, hu̍ŋ mā hu̍ŋ sɔ̍ŋgā a̍ ya̍a̍mɔ̍ɔ̍wa̍a̍ nīa̍a̍ ha̍ā, mā yēm nda̍. Chu̍a̍ mu̍ɛ̍ī nu̍m fāŋnde̍, mā ba̍ŋa̍ yōōmū nūu̍ wānāā dɛ̍nɛ̍ wɔ̍ɔ̍ŋnda̍ ha̍ā o̍ bā.

¹⁴ Mɛ̄lɛ̄ka̍ Ya̍a̍wɛ̄ɛ̄, ba̍ŋa̍ ya̍ wāŋnda̍ ha̍ā o̍ bā a̍ kpāāyā nu̍m bɛ̄ndōo̍, wānāa̍ cho̍ le̍ chi̍e̍ēŋndo̍ ho̍ō su̍e̍e̍ wa̍. Tūsi̍ nda̍ nyɛ᷅ pālāā ŋ̄ bɛ̄ɛ̄ndi̍a̍a̍ le̍ nda̍ tūsīo̍o̍ chōo̍ wo̍ chōo̍. Ā sɔ̄la̍ nyɛ᷅ pālāa̍ mbō tīu̍ nda̍, ndu̍yɛ̍, mī chūāūwāā ndāa̍, a̍ chūāūwāā ndāā ma̍māa̍ ā hu᷄ŋ sɔ̍lā nyɛ̄ pālāā pīlɛ̍ kōŋ.

¹⁵ Ndu̍yɛ̍ ya̍ ya̍, ha̍a̍a̍ mi̍ to̍sā nyɛ᷅ cho̍ sa̍kpō nu̍m o̍ hɔ̄l lo̍, ŋ̄ chō wā lātūlu̍ na̍a̍ nūm. Ndu̍yɛ̍ tē I̍ te̍ndū pɛ̍ mī che᷅ nu̍m, I̍ hi̍ni̍ kɔ̄l mɛ̄ɛ̍.