Sa᷅m 16 - Yāu̍ Mɛ̄lɛ̄ka̍a̍

Pīɛ̄īle̍ŋ le̍ tīīnda᷄ŋndo̍ nɔ̄ɔ̍ o̍ Mɛ̄lɛ̄ka̍ ni᷄ŋ

¹ O̍o̍ Mɛ̄lɛ̄ka̍, nūm ya̍ I̍ ti̍i̍nda̍ŋ le̍ ya̍ māndāa̍ ni̍, le̍la̍ŋ, ma̍nda̍ ya̍.

² Mi̍ di̍mūl Mɛ̄lɛ̄ka̍ Ya̍a̍wɛ̄ɛ̄ a̍a̍, “Nūm kpe̍e̍kpe̍i̍ cho̍ māsānɔ̍ nūu̍ ni̍. Dɛ̍nɛ̍ o̍ dɛ̍nɛ̍ kɛ̍ndɛ̄ ya̍ I̍ sɔ̍la̍, nu᷄m ke̍ ya̍ ni̍.”

³ Wānāa̍ Mɛ̄lɛ̄ka̍a̍ o̍ chi̍e̍ēŋndo̍ ni᷄ŋ nda̍ cho̍ wānāā tɔ̍ɔ̍wa̍ ni̍. A̍ nda̍ ya̍ I̍ hi̍ni̍ kɔ̄l ni̍.

⁴ Kɛ̍ wānāa̍ yɔ̍ŋgu̍ŋ o̍ nyɛ̄m chēle̍ŋndo̍ŋ sōōlūūwo̍ ni᷄ŋ nda̍ nda̍, ā kūīīlu̍l nda̍ pi̍la̍ dɛ̍nɛ̍la̍ pa̍lāāla̍ŋ bɔ̄ɔ̍. Le̍la̍ŋ ya̍ ya̍, I̍ di̍ī la̍chɔ̍lū māā sa̍lā o̍ nyɛ̄m ndāa̍ŋ nda̍ sōōlūū mu̍ŋ ndo̍ŋ te̍. I̍ pe᷅l mu̍ŋ bɛ̍ɛ̍ la̍di̍o̍ mī so̍o̍lu̍u̍ mu̍ŋ te̍.

⁵ Kɛ̍ nūm Mɛ̄lɛ̄ka̍ Ya̍a̍wɛ̄ɛ̄, nu᷄m cho̍ nyɛ̄m ke᷅ŋ nūu̍ŋ ni̍, ndu̍yɛ̍, nyɛ̄ o̍ nyɛ̄ ya̍ I̍ ha̍u̍ ba̍, nu᷄m ke᷅ ya̍ ni̍. Nu᷄m nɔ̍ sīɔ̄dīi̍ lāchī nūu̍ o̍ bā ni̍.

⁶ Nyɛ̄m ŋ̄ kē ya̍ wo̍ŋ ŋ̄ na᷄ŋ ŋ̄ bɔ̄ɔ̍, ŋ̄ chō bɔ̄ɔ̍ nyɛ᷅m kɛ̄ndɛ̄ŋ bɛ̄ndū.

⁷ Sāŋgālāa̍ chō o̍ Mɛ̄lɛ̄ka̍ Ya̍a̍wɛ̄ɛ̄ lo̍, kāni̍ fu̍u̍le̍, ndu̍ chɔ᷅m ya̍ nɛ̄i̍ ya̍ nɔ̍ mī ku̍ɛ̄ chōo̍ wo̍ ni̍. Mānyūm o̍ mānyūm tē I̍ hi̍ni̍ pɛ̍, ndu̍ Mɛ̄lɛ̄ka̍ ō lūɛ̄ī o̍ kɔ̄l nūu̍ ni᷄ŋ, ō mīŋgi̍ ya̍ o̍ nɛ̄ī.

⁸ I̍ si̍nā māā le̍ lɔ̍ɔ̍ lɔ̍ɔ̍ Mɛ̄lɛ̄ka̍ Ya̍a̍wɛ̄ɛ̄ cho̍ a̍ ya̍ la̍tu̍lu̍. Le̍ pɛ̄ŋgu̍ o̍ pɛ̄ŋgu̍ ō chō ya̍ īkɛ̄i̍, le̍ he̍ī, nyɛ̄ o̍ nyɛ̄ hi̍i̍lūū ya̍ le̍.

⁹ Le̍ he̍ī, nya̍a̍lo̍o̍ chō o̍ kɔ̄l nūu̍ ni᷄ŋ, I̍ na̍ŋ kɔ̄l bu̍tē, kāni̍ fu̍u̍le̍, bā ndɔ̄ɔ̍ chō ya̍ chōo̍, le̍la̍ŋ I̍ cho̍ŋnu̍ŋ o̍ bā nūu̍ chōo̍, nyɛ̄ o̍ nyɛ̄ hi̍i̍lūū ya̍ le̍.

¹⁰ Nūm Mɛ̄lɛ̄ka̍ a̍ me᷅l la̍ mī lo̍ o̍ sɛ̄īyo̍ ni᷄ŋ te̍. A̍ me᷅l bu̍ɛ̍ī nu᷄m cho̍ nu̍m pīɛ̄īyo̍ wo̍ mbō lo̍ chīe̍e̍ pīɔ̍m te̍.

¹¹ Ā chō ya̍ nɛ̄i̍ wānā ke̍e̍kū mā sɔ̍la̍ yōōmū kpe̍e̍kpe̍i̍yo̍ wo̍ chɔ̄m. Tē ā chō ya̍ īkɛ̄i̍ pɛ̍, le̍ pɛ̄ŋgu̍ o̍ pɛ̄ŋgu̍ I̍ wa᷅ a̍ kɔ̄l hīnīāā. Tē ā chō a̍ ya̍ la̍tu̍lu̍ pɛ̍, I̍ wa᷅ a̍ kɔ̄l kɛ̄ndɛ̄ le̍ fɛ̍ɛ̍ŋ a̍ fɛ̍ɛ̍ŋ.