Sa᷅m 149 - Yāu̍ Mɛ̄lɛ̄ka̍a̍

Chōnde̍i̍ le̍ Mɛ̄lɛ̄ka̍ Sāŋgālāa̍

¹ Sāŋgālāa̍ chō le̍ Mɛ̄lɛ̄ka̍ Ya̍a̍wɛ̄ɛ̄! Lā sōli̍ chōndi̍i̍ sɛ̍nɛ̄īye̍ le̍ Mɛ̄lɛ̄ka̍ Ya̍a̍wɛ̄ɛ̄ sāŋgālāa̍! Nya̍ wānāā ndūa̍a̍ cho̍ sa̍kpo̍ mi̍ lā chūūŋgi̍āŋ nda̍, lā sāŋga̍la̍ ndu̍!

² Wāŋnda̍ I̍sɔ̄lūɛ̄ī, lā dɔ̄ɔ̄nu̍ŋ nya̍a̍le̍ le̍ wāna̍ to̍o̍si̍a̍a̍ nya̍ wo̍! Wāŋnda̍ Sa̍a̍yɔ̄ŋ, lā tōsa̍ kɔ᷅l kɛ̄ndɔ̄ɔ̍ le̍ māsa̍ nya̍ bɛ̍ndōo̍!

³ Lā sāŋga̍la̍ ndu̍ a̍ yōla̍ŋ! Lā lɔ̄ɔ̍ du̍ndūla̍ŋ, a̍ tōwāla̍ŋ le̍ ndu̍ sāŋgālāa̍!

⁴ Kāni̍ fo̍ndōle̍, Mɛ̄lɛ̄ka̍ Ya̍a̍wɛ̄ɛ̄ o̍ hi̍ni̍ kɔ̄l a̍ wānāā ndūa̍a̍. Wānāa̍ tu̍si̍ŋ o̍ ndu̍ bā bɛ̄ŋgu̍ wa̍, ō tōsa̍ ma̍ sɔ̄lā bɛ̄ɛ̄le̍ŋ sa̍na̍a̍ ā yōmɔ̄ɔ̄ nda̍ yēm ndo̍, kāni̍ fo̍ndōle̍, ō tōsa̍ ma̍ yām ya̍a̍mɔ̍ɔ̍wa̍a̍ ndāa̍.

⁵ Wānāa̍ cho̍ le̍ Mɛ̄lɛ̄ka̍ wa̍ ā dɔ̄ɔ̄nu̍ŋ nya̍a̍le̍, kāni̍ fo̍ndōle̍, le̍ mɛ̄ɛ̍ nda̍ ye᷅m ya̍a̍mɔ̍ɔ̍wa̍a̍ ndāa̍ yɛ̍. Ā lɔ̄ɔ̄lu̍ cho̍ndu̍ŋ kɔ̄l kɛ̄ndɔ᷄ŋ sōlīo̍o̍ o̍ kpēlēla̍ ndāla̍ŋ chōo̍ pi̍i̍ pi̍i̍.

⁶ Ā sāŋga̍la̍ Mɛ̍lɛ̄ka̍ chōo̍ cho̍o̍ kpe̍le̍ŋ, a̍ mɔ̄ɔ̄ŋ ndāa̍ŋ fāŋndo̍ŋ o̍ lābā,

⁷ le̍ mā mīŋgu̍l lɛ̄ŋnde̍ māa̍, ndu̍yɛ̍ mā tūsi̍ wāŋnda̍ nyɛ̄ pālāa̍ chōo̍,

⁸ le̍ mā bīu̍ māsāā bɛ̍ndūa̍a̍ cho̍ lɛ̄ŋnde̍ he̍ī chōo̍ wa̍, a̍ wānāā ndāā bɛ̍ndūa̍a̍, mā ba̍i̍yi̍a̍a̍ nda̍ yɔ̄lɔ᷄ŋ le̍ kɔ̄la̍ŋ a̍ nda̍ o̍ bīyɔ̄ɔ̍ ni᷄ŋ,

⁹ le̍ mā tūsi̍ lɛ̄ŋnde̍ nyɛ̄ pālāa̍ chōo̍, mɛ̄ɛ̍ Mɛ̄lɛ̄ka̍ kɛ̄ɛ̄si̍a̍a̍ le̍ ndi̍ nyɛ̄ pālāa̍ tūsīo̍o̍ chōo̍ yɛ̍. Wānāa̍ cho̍ le̍ Mɛ̄lɛ̄ka̍ wa̍, bɛ̍ɛ̍le̍ nda̍ nɔ̄ le̍ sɔ̄lāa̍ le̍ŋ, le̍ŋ le̍ cho̍ le̍ŋ ni̍. Sāŋgālāa̍ chō le̍ Mɛ̄lɛ̄ka̍ Ya̍a̍wɛ̄ɛ̄!