Sa᷅m 148 - Yāu̍ Mɛ̄lɛ̄ka̍a̍

A̍ mɛ̄ɛ̍ chi̍e̍ēŋndo̍ kpo̍u̍ o̍ nɔ̍ mbō sāŋga̍la̍ Mɛ̄lɛ̄ka̍ yɛ̍ o̍kɔ̄ɔ̄

¹ Sāŋgālāa̍ chō le̍ Mɛ̄lɛ̄ka̍ Ya̍a̍wɛ̄ɛ̄! Nya̍ wānā o̍ wāna̍ cho̍ o̍ ha̍la̍a̍ ni̍ŋ cho̍o̍ cho̍o̍, lā sāŋga̍la̍ Mɛ̍lɛ̄ka̍ Ya̍a̍wɛ̄ɛ̄! Lā sāŋga̍la̍ ndu̍, nya̍ cho̍ o̍ fo̍ndāŋnda̍ŋ chōo̍ cho̍o̍ wa̍!

² Lā sāŋga̍la̍ ndu̍, nya̍ ki̍i̍la̍a̍ ndūa̍a̍ kpo̍u̍! Lā sāŋga̍la̍ ndu̍, nya̍ so̍vɛ̄i̍ya̍a̍ ndūa̍a̍ kpo̍u̍ cho̍o̍ cho̍o̍!

³ Pāa̍le̍ŋ a̍ pāŋge̍i̍, lā sāŋga̍la̍ ndu̍! Lōo̍ŋ o̍ ha̍la̍a̍ ni᷄ŋ cho̍o̍ cho̍o̍ kpo̍u̍, lā sāŋga̍la̍ ndu̍!

⁴ Lā sāŋga̍la̍ ndu̍, nya̍ nyɛ̄ o̍ nyɛ̍ cho̍ o̍ ha̍la̍a̍ ni᷄ŋ cho̍o̍ cho̍o̍, a̍ nya̍ mɛ̄ŋma̍ cho̍ o̍ ha̍la̍a̍ ni᷄ŋ cho̍o̍ cho̍o̍ wa̍ŋ!

⁵ Nyɛ̄ o̍ nyɛ̄ cho̍ o̍ ha̍la̍a̍ ni᷄ŋ cho̍o̍ cho̍o̍, ā nɔ̄ mā sāŋga̍la̍ Mɛ̄lɛ̄ka̍ Ya̍a̍wɛ̄ɛ̄! Kāni̍ fo̍ndōle̍, ndu̍ to̍o̍si̍a̍a̍ nyɔ̄ɔ̍ŋ mu᷅ŋ kpo̍u̍ a̍ dīōmnde̍ fu̍la̍ ndu̍ o̍ sōndō le̍ŋ ni̍.

⁶ Ndu̍ to̍o̍si̍a̍a̍ mu̍ŋ o̍ fo̍ndāŋndā ŋ̍ cho̍ la̍ŋ le̍ fɛ̍ɛ̍ŋ a̍ fɛ̍ɛ̍ŋ nda̍ŋ ni̍. Ndu̍yɛ̍ nyɛ̄ o̍ nyɛ̄ o̍ di̍mu̍l mu̍ŋ le̍ tōsāa̍ pɛ̍, ŋ̄ so̍lī ndu̍ dīōm te̍.

⁷ Lā sāŋga̍la̍ Mɛ̍lɛ̄ka̍ Ya̍a̍wɛ̄ɛ̄ o̍ chi̍e̍ēŋndo̍ ni᷄ŋ, nya̍ nyāā yōōmāa̍ tɔ̍ɔ̍ma̍a̍ bɛ̍ndūa̍a̍ o̍ pēē mɛ̄ŋmā īhɛ᷄llo̍ ni᷄ŋ ni̍, a̍ nya̍ nyāā yōōmāa̍ kpo̍u̍ o̍ fo̍ndāŋndā yīŋgi̍lɛ̍i̍la̍ bɛ̍ndūla̍ŋ,

⁸ a̍ ta̍ŋnda̍ŋ, a̍ lōōŋ ŋ̍kpu̍ŋgba᷄ŋ, a̍ mɔ᷄m ŋ̍kpu̍ŋgbāa̍, ndu̍yɛ̍ a̍ mɔ᷄m yu̍u̍yu̍u̍ wo̍, a̍ hūēīyīī bɛ̄ndūe̍i̍, nda̍ kpo̍u̍ mā to̍sā nyɛ̄ Mɛ̄lɛ̄ka̍ ō dīmūl nda̍ wo̍.

⁹ Lā sāŋga̍la̍ ndu̍, nya̍ pēmbūŋ pɔ̄mbɔ᷄ŋ, a̍ nya̍ lūāŋūŋ bɛ̄ndo᷄ŋ, a̍ yɔ̄mīī kūāmɛ̄ī, a̍ būndɛ̍la̍ŋ,

¹⁰ a̍ vīsīāā yōndūa̍a̍, ndu̍yɛ̍ a̍ chɔ̄lūa̍a̍ kpo̍u̍, a̍ nyāā yōōmāa̍ ku̍ā lɛ̄ŋ o̍ dēmbēla̍ŋ chōo̍ wa̍, a̍ yōūwāa̍ ba̍lū cho̍o̍ cho̍o̍ wa̍.

¹¹ Lā sāŋga̍la̍ ndu̍, nya̍ māsāā bɛ̍ndūa̍a̍, a̍ nya̍ wāŋnda̍ kpo̍u̍, a̍ nya̍ wānāā bɛ̄ndūa̍a̍, ndu̍yɛ̍ a̍ nya̍ cho̍ wāŋnda̍ chōo̍ ma̍sāa̍ o̍ chi̍e̍ēŋndo̍ ni᷄ŋ nda̍.

¹² Lā sāŋga̍la̍ ndu̍, nya̍ ŋ̄wāŋndā chīe̍e̍ kpo̍u̍, chūā lāāndū ni̍, chūā pīāāndū ni̍, bɛ̄ndū yūvɛ̍i̍ ni̍, chūāāmbɔ̄ pɔ̄mbɔ̄ ni̍.

¹³ Ā nɔ̄ mā sāŋga̍la̍ Mɛ̄lɛ̄ka̍ Ya̍a̍wɛ̄ɛ̄, mɛ̄ɛ̍ nda̍ chō kpo̍u̍. Kāni̍ fo̍ndōle̍, dīōlā ndɔ̄la̍ŋ lā chō lā bɛ̄ndū mi̍ lā hīāū lādīō o̍ lādīō o̍ chi̍e̍ēŋndo̍ ni᷄ŋ. Ndu̍yɛ̍ nāŋɔ̄ɔ̄ ndɔ̄ bɛ̍ndōo̍ ō chō ō tīūwāā o̍ chi̍e̍ēŋndo̍ ni᷄ŋ, a̍ ɛ̄chɛ̍nɛ̄ kpo̍u̍.

¹⁴ Ndu̍ to̍sa̍ ni̍ mi̍ lɛ̄ŋnde̍ wānāā ndūa̍a̍ lē sīmnu᷄ŋ lɛ᷅ŋndē kpāāyāle̍ bɛ̍ndū, le̍ mī wānāa̍ ndūa̍a̍ cho̍ le̍ ndu̍ wa̍, ā sɔ̄la̍ bɛ̄ɛ̄le̍ŋ, nda̍ yɔ̍nūŋ ni̍ māā wāŋnda̍ I̍sɔ̄lūɛ̄ī, wānāā ndūa̍a̍ kɔ̄l la̍. Sāŋgālāa̍ chō le̍ Mɛ̄lɛ̄ka̍ Ya̍a̍wɛ̄ɛ̄!