Sa᷅m 147 - Yāu̍ Mɛ̄lɛ̄ka̍a̍

Chōnde̍i̍ le̍ Mɛ̄lɛ̄ka̍ nɔ̍ kpāāyāa̍ kpo̍u̍ wo̍ sāŋgālāa̍

¹ Sāŋgālāa̍ chō le̍ Mɛ̄lɛ̄ka̍ Ya̍a̍wɛ̄ɛ̄! Ī chō bɔ̍ɔ̍ sūɛ̍i̍ kɛ̍ndɛ̄ le̍ Mɛ̄lɛ̄ka̍ nāa̍ sāŋgālāa̍. Ī chō bɔ̍ɔ̍ sūɛ̍i̍ kɔ̄l kɛ̄ndɛ̄, ndu̍yɛ̍ mi̍ ī wā sūɛ̍i̍ bɛ̍nda̍ le̍ ndu̍ sāŋgālāa̍.

² Mɛ̄lɛ̄ka̍ Ya̍a̍wɛ̄ɛ̄ o̍ cho̍ Chūlu̍sɛ̄lɛ̄m mīŋgīo̍o̍ tāŋgūllo̍, Ō chō I̍sɔ̄lūɛ̍i̍ya̍a̍ nda̍ kūɛ̄ o̍ bīyɔ̄ɔ̍ ni᷄ŋ nda̍ mīŋgīo̍o̍ o̍ lɛ̄ŋndē ndāle̍ŋ ni᷄ŋ.

³ Wānāa̍ cho̍ a̍ kɔ̄ltā tāmbɛ̍i̍la̍ŋ nda̍, mbō nyɔ̄ɔ̄lu̍ nda̍ kɔ̄lta̍ŋ ni᷄ŋ, ndu̍yɛ̍ mbō sōli̍ nda̍ o̍ kpɔ̍kɔ̍si̍la̍ ndā chō ni᷄ŋ nda̍ŋ.

⁴ Ō nɔ̄lā mbō chɔ᷄m lōo̍ŋ cho̍ o̍ ha̍la̍a̍ ni᷄ŋ cho̍o̍ cho̍o̍ wo̍ŋ bōllē pīlɛ̍, ndu̍yɛ̍ mbō vēēlu̍ mu̍ŋ dīōla̍ŋ ŋ̄ pīlɛ̍ŋ pi̍lɛ̍ŋ.

⁵ Mɛ̄lɛ̄ka̍ Ya̍a̍wɛ̄ɛ̄ nāa̍ ō chō ō bɛ̄ndū, ndu̍yɛ̍ kpāāya̍ ndɔ̄ɔ̍ ō chō ō bɔ̄ɔ̍. Sīnā ndɔ̄ pɛ̍ŋgo̍o̍ ō nɔ̍ la̍mɛ̍ɛ̍lu̍ le̍.

⁶ Wānāa̍ tu̍si̍ nda̍ pi̍la̍ tōōlō wa̍, mbō hēēlu̍ nda̍ te̍mā. Kɛ̍ wānāā dɛ̍nɛ̍ wɔ̍ɔ̍ŋnda̍ nda̍, mbō tɛ̄ɛ̄mbu̍u̍ nda̍.

⁷ Lā me᷄l Mɛ̍lɛ̄ka̍ Ya̍a̍wɛ̄ɛ̍ ba̍li̍ka̍a̍ o̍ chōndo̍ŋ ni᷄ŋ. Lā lɔ̄ɔ̍ to̍wāla̍ŋ le̍ Mɛ̄lɛ̄ka̍ nāa̍ sāŋgālāa̍.

⁸ Mbō tōsa̍ mī pīɔ̍ɔ̍ he̍l, mī ha̍la̍a̍ pīīmi̍a̍a̍ kpi̍lo̍. Mbō yɔ᷄ŋ pīɔ̍ɔ̍ o̍ chi̍e̍ēŋndo̍ chōo̍, mbō tōsa̍ mī bīllo̍ vīl o̍ pēmbo᷄ŋ chōo̍.

⁹ Ndu̍ ke᷅ chɔ̍lūa̍a̍ nyɛ̄ dīa̍a̍ ni̍ mā dē. Tē bāsa̍bāsa̍kūēndi̍a̍a̍ chu̍a̍ūwa̍ ā wa̍ cha᷄ŋndo̍ a̍ yīa̍a̍ŋ pɛ̍, ndu̍ ke᷅ nda̍ nyɛ̄ dīa̍a̍ ni̍ mā dē.

¹⁰ Mi̍ chē bɛ̍ɛ̍ mi̍ su̍a̍a̍ ā nɔ̄ dīāllūŋ kāla᷄ŋ, kɛ̍ dīāllūŋ ndāŋ ka̍la̍ŋ mu᷅ŋ ŋ̄ to̍sā mbō hīni̍ kɔ̄l te̍. So̍vɛ̄i̍ya̍ bɛ̍ɛ̍ kpāāya̍ ndāa̍ ō to̍sā mbō hīni̍ kɔ̄l te̍.

¹¹ Wānāa̍ ke᷅ Mɛ̄lɛ̄ka̍ Ya̍a̍wɛ̄ɛ̄ bɛ̄ɛ̄le̍ŋ, ndu̍yɛ̍ mā dūāū ti̍i̍nda᷄ŋ ndāa̍ o̍ kāāla̍ ndɔ̍ cho̍ le̍ te̍le̍ŋ o̍ te̍le̍ŋ ndo̍ ni᷄ŋ nda̍, nda̍ to̍sā ni̍ mī Mɛ̄lɛ̄ka̍ ō hīni̍ kɔ̄l.

¹² Wāŋnda̍ Chūlu̍sɛ̄lɛ̄m, lā sāŋga̍la̍ Mɛ̍lɛ̄ka̍ Ya̍a̍wɛ̄ɛ̄. Lā sāŋga̍la̍ Mɛ̍lɛ̄ka̍ nyāa̍ wāŋnda̍ Sa̍a̍yɔ̄ŋ.

¹³ Ndu̍ cho̍ wāna̍ ma̍ndā di̍o̍la̍ sāāsāla̍ nyāla̍ŋ ndo̍ ni̍. Ndu̍ du̍a̍ū chu̍a̍u̍wāā nyāa̍ sa̍lā ni̍.

¹⁴ Ndu̍ to̍sā ni̍ mī kɔ̄l nyūlōo̍ ō wa̍ o̍ lɛ̄ŋndē nyāle̍ŋ ni᷄ŋ, ndu̍yɛ̍ mbō ke̍ nya̍ wi̍tīi̍ŋ kɛ̍ndɛ̄ kɛ̍ndɔ᷄ŋ le̍ dīo̍o̍.

¹⁵ Tē ō yēēma̍ le̍ wāŋnda̍ o̍ chi̍e̍ēŋndo̍ ni᷄ŋ di̍mūl le̍ īsɔ̄ɔ̍ o̍ īsɔ̄ɔ̍ to̍sā pɛ̍, yōōŋgū kōŋ kōmāllo̍ wāŋnda̍ o̍ lēpīlɛ̍ ni᷄ŋ chɔ̍ chɔ̍.

¹⁶ Mbō tōsa̍ mī mɔ᷄m ŋ̍kpu̍ŋgbāa̍, ō pɛ̄ŋgɛ̄la᷄ŋ lɛ᷅ŋ lɛ̍tɛ̍u̍, ndu̍yɛ̍ mbō yɔ᷄ŋ mɔ᷄mndo̍ mbō tīu̍ chūchɔ̄ɔ̍ si̍lɔ̍, mɛ̄ɛ̍ chu̍ndo̍o̍ ō wā nu̍a̍ā lɛ̄ŋ yɛ̍.

¹⁷ Mbō tōsa̍ mī lōōŋ kpu̍ŋgba᷄ŋ ŋ̄ hūlu᷄ŋ, chu̍chɔ᷄ŋndo̍ mɛ̄ɛ̍ tɛ̍nɔ̍ŋ ŋ̄ chō nu̍a̍ā lɛ̄ŋ yɛ̍. Mbō tōsa̍ mī fo̍ndāa̍ yɔ̄nu̍ŋ vi̍li̍ vi̍li̍, wāŋnda̍ kpo̍u̍ ā nɔ̍lā mā si᷄m lɛ̄ŋ te̍ a̍ hūēīye̍.

¹⁸ O̍ ko̍ŋ kɔ̍ɔ̍lī, mbō tōsa̍ mī mɛ̄ŋmā īkpūŋgbāmā māŋ mā tēŋga̍, ndu̍yɛ̍ mbō yɔ᷄ŋ hūēīye̍, mī mɛ̄ŋmā māŋ mā hīōū.

¹⁹ Mbo̍ lo̍ o̍ ko̍ŋ mbo̍ kē wānāa̍ fu̍la̍ o̍ pūlāle̍ Che̍kɔ̍pūle̍ŋ chōo̍ wa̍ yōōŋgū ndɔ̄ɔ̍, a̍ pɛ̄ɛ̄kūlā ndɔ̄la̍ŋ, ndu̍yɛ̍ a̍ sāwāla̍ ndɔ̄la̍ŋ, nda̍ yɔ̍nūŋ ni̍ māā wāŋnda̍ I̍sɔ̄lūɛ̄ī.

²⁰ Lɛ̄ŋndē o̍ lɛ̄ŋndē che̍le̍ŋ lē cho̍ mbō to̍sa̍ he̍ī a̍ nda̍ le̍, ndu̍yɛ̍ lɛ̄ŋndē o̍ lɛ̄ŋndē che᷅le̍ŋ lē si̍nā a̍ sāwāla̍ ndɔ̄la̍ŋ o̍kɔ̄ɔ̄ le̍. Sāŋgālāa̍ chō le̍ Mɛ̄lɛ̄ka̍ Ya̍a̍wɛ̄ɛ̄!