Sa᷅m 146 - Yāu̍ Mɛ̄lɛ̄ka̍a̍

Chōnde̍i̍ le̍ Mɛ̄lɛ̄ka̍ sāŋgālāa̍, o̍ cho̍ wānā pi̍ŋīa̍a̍ wo̍

¹ Sāŋgālāa̍ chō le̍ Mɛ̄lɛ̄ka̍ Ya̍a̍wɛ̄ɛ̄! I̍ cho̍ Mɛ̄lɛ̄ka̍ Ya̍a̍wɛ̄ɛ̍ sāŋgālā a̍ kɔ̄l nūu̍ kpo̍u̍!

² I̍ cho̍ lō Mɛ̄lɛ̄ka̍ Ya̍a̍wɛ̄ɛ̄ sāŋgālāa̍ ha̍a̍a̍ a̍ te̍le̍ŋ ya̍ I̍ cho̍ yōōmū wo̍. I̍ cho̍ lō chōndo̍ŋ sōlīo̍o̍ le̍ ndu̍ sāŋgālāa̍, ha̍a̍a̍ mbō fūūlu̍u̍ a̍ yōōmū nūu̍ mɛ̄ɛ̄lu̍la̍ŋ.

³ Ō bɛ̄nda̍ mī wānā dɔ̍ū tīīnda᷄ŋndo̍ o̍ wānāā bɛ̄ndūa̍a̍ ni᷄ŋ te̍. Ō bɛ̄nda̍ bɛ̍ɛ̍ mī wānā dɔ̍ū tīīnda᷄ŋndo̍ o̍ wāna̍ chi̍o̍o̍ ni᷄ŋ le̍ nu̍m chīīndīa̍a̍ le̍.

⁴ Kāni̍ wāna̍ chi̍o̍o̍ tē ō vī dɔ̍ɔ̍ pɛ̍, ō mīīŋgu̍ o̍ pu̍u̍lōo̍ ni᷄ŋ. Pāa̍le̍ o̍ cho̍ wu᷄ le̍ŋ, tūūlā ndɔ̄la̍ŋ kpo̍u̍ la̍ mɛ̍ɛ̍lū.

⁵ Wānāa̍ dɔ̍ū tīīnda᷄ŋndo̍ o̍ Mɛ̄lɛ̄ka̍ Che̍kɔ̍pū wo̍ ni᷄ŋ le̍ nda̍ mālāa̍ wa̍, ā pɛ̄l tɔ̄nɔ̄ɔ̍, nda̍ yɔ̍nūŋ ni̍ māā, wānāa̍ ti̍i̍nda̍ŋ Mɛ̍lɛ̄ka̍ Ya̍a̍wɛ̄ɛ̄ le̍ nda̍ mālāa̍ wa̍.

⁶ Ndu̍ to̍o̍si̍a̍a̍ ɛ̄chɛ̍nɛ̄, a̍ chi̍e̍ēŋndo̍, a̍ pēē mɛ̄ŋmā īhɛ᷄llo̍ ni̍, ndu̍yɛ̍ a̍ nyɛ̄ o̍ nyɛ̄ cho̍ lēni᷄ŋ. Ndu̍ cho̍ Mɛ̄lɛ̄ka̍ lo᷅ o̍ lēdīōm le̍ fɛ̍ɛ̍ŋ a̍ fɛ̍ɛ̍ŋ ndo̍ ni̍.

⁷ Wānāa̍ nda̍ chō nyɛ̄ pālāa̍ tūsīo̍o̍ chōo̍ wa̍, ndu̍ su̍ŋgū le̍ nda̍ ni̍, wānāa̍ cho̍ a̍ yīa̍a̍ŋ nda̍, mbō ke̍ nda̍ nyɛ̄ dīa̍a̍. Wānāa̍ cho̍ o̍ bīyɔ̄ɔ̍ ni᷄ŋ nda̍, mī Mɛ̄lɛ̄ka̍ Ya̍a̍wɛ̄ɛ̄ o̍ ba̍ŋa̍ nda̍,

⁸ wānāā sūmɛ̍i̍ya̍ mbō tōsa̍ mā chē. Wānāa̍ cho̍ a̍ kɔ̄ltā tāmbɛ̍i̍la̍ŋ nda̍ mbō nyɔ̄ɔ̄lu̍ nda̍ kɔ̄lta̍ŋ. Mɛ̄lɛ̄ka̍ Ya̍a̍wɛ̄ɛ̄ o̍ ka̍a̍la̍ wānāā ndūa̍a̍ cho̍ ndu̍ o̍ hɔ̄l sa̍kpō wa̍.

⁹ Wānāā lēkāa̍wa̍a̍ cho̍ na̍a̍ tɛ̄ɛ̄ŋ nda̍, mbō mānda̍ nda̍, ndu̍yɛ̍ vīi̍ya̍a̍ nɔ̍ lɛ̍ ŋ̄fi̍nyā le̍ wa̍, a̍ wāŋ lāāndūa̍a̍ nɔ̍ lɛ̍ ŋ̄pīāāndū le̍ wa̍, mbō māla̍ nda̍. Kɛ̍ wānāā dɛ̍nɛ̍ wɔ̍ɔ̍ŋnda̍ nda̍, mbō tɛ̄ɛ̄mbu̍u̍ nda̍.

¹⁰ Mɛ̄lɛ̄ka̍ Ya̍a̍wɛ̄ɛ̄ ndu̍ cho̍ wā māsāa̍ le̍ fɛ̍ɛ̍ŋ a̍ fɛ̍ɛ̍ŋ ni̍. Wāŋnda̍ I̍sɔ̄lūɛ̄ī, Mɛ̄lɛ̄ka̍ nyāa̍ ndu̍ cho̍ māsāa̍ le̍ fɛ̍ɛ̍ŋ a̍ fɛ̍ɛ̍ŋ ni̍. Sāŋgālāa̍ chō le̍ Mɛ̄lɛ̄ka̍ Ya̍a̍wɛ̄ɛ̄!