Sa᷅m 145 - Yāu̍ Mɛ̄lɛ̄ka̍a̍

Chōnde̍i̍ le̍ Mɛ̄lɛ̄ka̍ sāŋgālāa̍

¹ Nu᷄m cho̍ Mɛ̄lɛ̄ka̍ nūu̍ ni̍, Māsa̍ nī bɛ̍ndo̍o̍, I̍ cho̍ nu̍m sāŋgālā, ndu̍yɛ̍ le̍ te̍le̍ŋ o̍ te̍le̍ŋ mī wa̍ wāŋnda̍ di̍mu̍llo̍ a̍ mɛ̄ɛ̍ ŋ̄ chō ō bɛ̄ndū yɛ̍ o̍kɔ̄ɔ̄.

² I̍ cho̍ nu̍m sāŋgālā lēpāa̍ o̍ lēpāa̍, ndu̍yɛ̍ le̍ te̍le̍ŋ o̍ te̍le̍ŋ mī wa̍ dīōlā nūmnda̍ŋ hēēlōo̍ te̍mā.

³ Mɛ̄lɛ̄ka̍ Ya̍a̍wɛ̄ɛ̄ ā cho̍ ō bɛ̄ndū, ā chō ō bɛ̄ndū le̍ mā sɔ̄la̍ sāŋgālāa̍. Wāna̍ chi̍e̍e̍ nɔ̍lā mbō si̍na̍ mɛ̄ɛ̍ kpɛ̍ ŋ̄ cho̍ ō bɛ̄ndū yɛ̍ le̍.

⁴ Mɛ̄lɛ̄ka̍, wāŋnda̍ yu̍ŋgu̍la̍ŋ o̍ yu̍ŋgu̍la̍ŋ ni᷄ŋ ā wā ni̍ŋ di̍mīo̍o̍ a̍ wa̍lta̍ nu̍mnda̍ŋ o̍kɔ̄ɔ̄. Ā wā ni̍ŋ di̍mīo̍o̍ a̍ wa̍lta̍ nu̍mndā kɔ̄ndɔ̄fi̍lta̍ŋ o̍kɔ̄ɔ̄.

⁵ Ā wā ni̍ŋ di̍mīo̍o̍ a̍ nāŋɔ̄ɔ̄ nūm bɛ̍ndōo̍ o̍kɔ̄ɔ̄, ndu̍yɛ̍ a̍ kpāāyā nu̍m lēmāsāa̍. Le̍ te̍le̍ŋ o̍ te̍le̍ŋ, I̍ cho̍ wā yi̍ya᷄ŋndo̍ a̍ wa̍lta̍ nu̍mndā kɔ̄ndɔ̄fi̍lta̍ŋ o̍kɔ̄ɔ̄.

⁶ Wāŋnda̍ wā ni̍ŋ di̍mīo̍o̍ a̍ wa̍lta̍ nu̍mndā kpāāyāla̍ bɛ̄ndūla̍ŋ o̍kɔ̄ɔ̄. Ndu̍yɛ̍ I̍ wa᷅ ni̍ŋ wa᷅ŋnda̍ dīmūllo̍ a̍ wa̍lta̍ nu̍mndā bɛ̄ndūla̍ŋ o̍kɔ̄ɔ̄.

⁷ Wānā o̍ wānā o̍ wa᷅ ni̍ŋ di̍mīo̍o̍ a̍ wa̍lta̍ kɛ̍ndɛ̄lā bɛ̄ndūlā ŋ̄ tōsa̍ la̍ŋ o̍kɔ̄ɔ̄, ndu̍yɛ̍ mā sōli̍ chōnde̍i̍ a̍ mɛ̄ɛ̍ ŋ̄ chō wāna̍ īkɛ̄ndɛ̄ yɛ̍ o̍kɔ̄ɔ̄.

⁸ Mɛ̍lɛ̄ka̍ Ya̍a̍wɛ̄ɛ̄, ā chō wāna̍ īnyīɛ̍ɛ̍, ndu̍yɛ̍ ma̍ wā wāna̍ īkɛ̄ndɛ̄. A̍ cho̍ wa᷅na̍ dɔ̍u̍nu᷄ŋ tu̍mbe̍ chɔ̍ chɔ̍ le̍, ndu̍yɛ̍ ā nɔ̄ kāālā nu᷄m cho̍ le̍ te̍le̍ŋ o̍ te̍le̍ŋ ndo̍.

⁹ Mɛ̄lɛ̄ka̍ Ya̍a̍wɛ̄ɛ̄, ā cho̍ wānā kɛ̍ndɛ̄ nāa̍ wānā o̍ wānā chu̍a̍. Ā nɔ̄ nyīɛ̍ɛ̍ye̍ le̍ nyɛ̄ o̍ nyɛ̄ yōōmāā ŋ̄ to̍o̍si̍a̍a̍.

¹⁰ Mɛ̄lɛ̄ka̍ Ya̍a̍wɛ̄ɛ̄, wānā o̍ wānā ŋ̄ tōōsi̍a̍a̍ a̍ bālā nūmnda̍ŋ, nda̍ kpo̍u̍ ā chō nu̍m sāŋgālā. Wānāā nūmnda̍ kpo̍u̍, ā chō dīōlā nūmnda̍ŋ hēēlū te̍mā.

¹¹ Ā chō wā dīmu̍la᷅ŋndo̍ a̍ mɛ̄ɛ̍ māsāle̍ nu̍mnde̍ŋ lē chō māsāle̍ lɛ̍bɛ̍ɛ̍ yɛ̍, ndu̍yɛ̍ mā dīmi̍ a̍ kpāāyā nu̍mndo̍ o̍kɔ̄ɔ̄.

¹² O̍ ko̍ŋ, ŋ̄wāŋndā chīe̍e̍ kpo̍u̍, mā sīna̍ a̍ wa̍lta̍ nu̍mndā kpāāyāla̍ŋ o̍kɔ̄ɔ̄, ndu̍yɛ̍ mā sīna̍ a̍ mɛ̄ɛ̍ māsāle̍ nu̍mnde̍ŋ lē chō māsāle̍ lēbɛ̄ɛ̄ yɛ̍.

¹³ Māsāle̍ nu̍mnde̍ŋ lē chō le̍ fɛ̍ɛ̍ŋ a̍ fɛ̍ɛ̍ŋ. Nu᷄m cho̍ māsāa̍ ŋ̄wāŋndā chīe̍e̍ cho̍o̍ le̍ fɛ̍ɛ̍ŋ a̍ fɛ̍ɛ̍ŋ ni̍. Mɛ̄lɛ̄ka̍ Ya̍a̍wɛ̄ɛ̄, ā chō wāna̍ lo᷅ o̍ lēdīōm o̍ būŋgāŋ nūmndo̍ŋ chūa̍a̍ ni᷄ŋ. Ā chō wāna̍ īnyīɛ̍ɛ̍ o̍ nyɛ̄ o̍ nyɛ̄ ni᷄ŋ ŋ̄ to̍sa̍.

¹⁴ Wānāa̍ cho̍ o̍ nyɛ̄ pālāa̍ ni᷄ŋ nda̍, nūm Mɛ̄lɛ̄ka̍ Ya̍a̍wɛ̄ɛ̄ mā ma̍lā nda̍, wānāa̍ cho̍ a̍ kɔ̄ltā tāmbɛ̍i̍la̍ŋ nda̍, mā nyɔ̄ɔ̄lu̍ nda̍ kɔ̄lta̍ŋ.

¹⁵ Nyāā yōōmāa̍ kpo̍u̍, nūm nda̍ tīīnda̍ŋ le̍ nda̍ nyɛ̄ dīa̍a̍ kīo̍o̍ ni̍, ndu̍yɛ̍ a̍ te̍le̍ŋnda̍ nda̍ nɔ̄ le̍ nyɛ̄ dīa̍a̍ sɔ̄lāa̍ la̍ŋ ŋ̄ kē nda̍ nyɛ̄ dīāā ni̍.

¹⁶ Ndu̍yɛ̍ mā ke̍ nda̍ ndu̍ a̍ kɔ̄l nūmndo̍ kpo̍u̍, mā to̍sa̍ mī wānā o̍ wānā hi̍ni̍ kɔ̄l.

¹⁷ Mɛ̄lɛ̄ka̍ Ya̍a̍wɛ̄ɛ̄, ā chō sa̍kpō o̍ nyɛ̄ o̍ nyɛ̄ ni̍ŋ ŋ̄ to̍sa̍, ndu̍yɛ̍ ā chō wāna̍ īkɛ̄ndɛ̄ nāa̍ wānā o̍ wānā chu̍a̍.

¹⁸ A̍ chō ō bɛ̍ɛ̍ndīa̍ŋ le̍ te̍le̍ŋ o̍ te̍le̍ŋ le̍ wānāa̍ nyu̍nā nu̍m dīōm nda̍ mālāa̍, wānāa̍ nyu̍nā nu̍m dīōm o̍ tōnya̍a̍ chōo̍ wa̍.

¹⁹ Wānāa̍ nɔ̍ bɛ̄ɛ̄le̍ŋ le̍ nūm nda̍, mā ke̍ nda̍ nyɛ̄ o̍ nyɛ̄ nda̍ hāu̍ bā, ndu̍yɛ̍ mā tūɛ̄ī pīɛ̄īlē ndāle̍ŋ, mā chīīndi̍a̍a̍ nda̍.

²⁰ Wānāa̍ ka̍a̍la̍ nūm Mɛ̄lɛ̄ka̍ Ya̍a̍wɛ̄ɛ̄ wa̍ ki̍nɛ̍i̍, māndāa̍ ŋ̄ ma̍ndā nda̍ ni̍, kɛ̍ wānāā dɛ̍nɛ̍ wɔ̍ɔ̍ŋnda̍ nda̍, mā tɛ̄ɛ̄mbu̍u̍ nda̍.

²¹ I̍ cho̍ Mɛ̄lɛ̄ka̍ Ya̍a̍wɛ̄ɛ̍ sāŋgālā le̍ te̍le̍ŋ o̍ te̍le̍ŋ. Nya̍ nyɛ̄ o̍ nyɛ̄ yōōmāā, lā sāŋga̍la̍ di̍o̍la̍ ndɔ̄la̍ kāsīla̍ŋ le̍ fɛ̍ɛ̍ŋ a̍ fɛ̍ɛ̍ŋ.