Sa᷅m 144 - Yāu̍ Mɛ̄lɛ̄ka̍a̍

Māsā Bɛ̍ndōo̍ Me᷄l Mɛ̄lɛ̄ka̍ Ba̍li̍ka̍ le̍ mɛ̄ɛ̍ o̍ ye᷅m yɛ̍

¹ Sāŋgālāa̍ chō le̍ Mɛ̄lɛ̄ka̍ Ya̍a̍wɛ̄ɛ̄, pōū kpo̍o̍wa̍ ma̍ndā ya̍ wo̍. Ndu̍ pɛ̍ɛ̍kū ya̍ a̍ chɔ̄ūwo̍ o̍kɔ̄ɔ̄ ni̍, ndu̍ bɛ̍ɛ̍ndi̍a̍a̍ ya̍ le̍ sɔ̍ŋgɔ̄ɔ̍ ni̍.

² Ndu̍ cho̍ pōū bɛ̄ndū ya̍ I̍ vi̍a̍ŋnūŋ le̍bɛ̍ŋgu̍ le̍ ya̍ māndāa̍ wo̍ ni̍. Ndu̍ cho̍ sāāsā ka̍lā ba̍lu̍ ya̍ wo̍ ni̍, wāna̍ chi̍i̍ndīāā ya̍ wo̍. Ndu̍ cho̍ pōū kpo̍o̍wa̍ bɛ̍ndū ya̍ I̍ vi̍a̍ŋnūŋ le̍bɛ̍ŋgu̍ nyɛ̄ o̍ nyɛ̄ yɔ̍nūŋ ya̍ le̍ wo̍ ni̍. Ō tōsa̍ mi̍ lɛ̄ŋīī chēle̍ŋnde̍ ī lūɛ̄ī ya̍ o̍ bā bɛ̄ŋgu̍.

³ Mɛ̄lɛ̄ka̍ Ya̍a̍wɛ̄ɛ̄, vɛ̄ɛ̍nɛ̍ kɛ̍i̍ wāna̍ chi̍o̍o̍ chō yɛ̍, nūm Mɛ̄lɛ̄ka̍ ma̍ būūla᷄ŋ a̍ ndu̍ nu̍a̍ā kpɛ̍? Vɛ̄ɛ̍nɛ̍ o̍ cho̍ yɛ̍ ma̍ nɔ̄ kɔ̄l lo̍ o̍ ndu̍ lo̍ nu̍a̍ā?

⁴ Wāna̍ chi̍o̍o̍ ō chō māchūāā mɛ̄ɛ̍ hūēīye̍ ī chō nu̍a̍ā yɛ̍. Pālɛ̍i̍ wāna̍ chi̍o̍o̍ ō chīī o̍ chi̍e̍ēŋndo̍ chōo̍ ve̍, mɛ̄ɛ̍ wūndu̍le̍ŋ lē kēlēŋā nu̍a̍ā lōo̍ yɛ̍, le̍nde̍ i̍ ke̍lēŋā chu̍wɔ̄ɔ̍ ni̍.

⁵ O̍o̍ Mɛ̄lɛ̄ka̍ Ya̍a̍wɛ̄ɛ̄, bu̍li̍ ha̍la̍a̍ mā tōl lɛ̄ŋ na̍nu᷄ŋ. Pi̍la̍ŋ lu̍a̍ŋūŋ bɛ̄ndo᷄ŋ, mī ŋ̄ sāndu̍, mī ku᷄mnde̍ he̍l tu̍ū.

⁶ Yɔ̍ŋ ta᷅ŋnda̍ŋ, mā to̍sa̍ mī ya̍a̍mɔ̍ɔ̍wa̍a̍ nu̍mnda̍ ā sɛ̄ŋi̍ŋ. Vi̍i̍ vi̍i̍ nda̍ a̍ chīŋɔ̍ma̍ nūmnda̍ŋ, mā nyāānu̍ŋ.

⁷ Si̍ɛ̍ndi̍ ba᷅ nūmndo̍ nāa̍ ŋ̄ chō īchāli̍ Ɛ̄chɛ̍nɛ̄ wa̍, mā chi̍i̍ndi̍a̍a̍ ya̍. So̍li̍ ya̍ o̍ lūmīī yīŋgi̍lɛ̍i̍ bɛ̍ndūe̍i̍ ni᷄ŋ, mā chi̍i̍ndi̍a̍a̍ ya̍. So̍li̍ ya̍ wānāā lēkāa̍wa̍ o̍ bā,

⁸ wānāa̍ di̍mī ha̍ā tōnya̍ le̍ wa̍, a̍ chu̍ā ha̍ā būŋga᷄ŋ le̍ sūɛ̍i̍ tōsāa̍ mā me̍na̍ŋ, kɛ̍ ā to̍sā le̍ wa̍.

⁹ I̍ cho̍ nu̍m sāŋgālā o̍ chōndi̍i̍ sɛ̍nɛ̄īye̍ ni᷄ŋ, Mɛ̄lɛ̄ka̍ nūu̍. I̍ cho̍ tōwāa̍ lɔ̄ɔ̄, ndu̍yɛ̍ mī sa̍ŋga̍la̍ nu̍m o̍ chōnde̍i̍ ni᷄ŋ.

¹⁰ Nu᷄m ke᷅ ma̍sāā bɛ̍ndūa̍a̍ kpāāyāa̍ ni̍ mā yēm. Nu᷄m chi̍i̍ndi̍a̍a̍ bu̍ɛ̍ī nūmndo̍ Dēēve̍ ni̍ ma̍ sōlī ndu̍ pīɔ̍mndo̍ o̍ bā.

¹¹ Chi̍i̍ndi̍a̍a̍ ya̍ ya̍a̍mɔ̍ɔ̍wa̍a̍ kɔ̄l vēsɛ̍i̍ya̍a̍ bɛ̍ndūa̍a̍ ha̍ā o̍ bā. Ba̍ŋa̍ ya̍ wānāā lēkāa̍wa̍ ha̍ā o̍ bā, a̍ di̍mī ha̍ā tōnya̍ le̍ wa̍, a̍ chu̍ā ha̍ā būŋga᷄ŋ le̍ sūɛ̍i̍ tōsāa̍ mā me̍na̍ŋ, kɛ̍ ā to̍sā le̍ wa̍.

¹² Mbɔ̄ māā chūāūwāā nāā wa᷅ŋ pīāāndūa̍a̍ ā hu᷄ŋ wa᷅ o̍ chūā pīāāndūyɛ̍ī ndɛ̄i̍ ni᷄ŋ, mɛ̄ɛ̍ yɔ̄m nda̍ tūāl ho̍ō mbō hīndū, mbō sīmnu᷄ŋ yɔ᷅m kālā ka̍lā wo̍ ō wā nu̍a̍ā yɛ̍ fɔ̍. Mbɔ̄ māā chūāūwāā nāā wa᷅ŋ lāāndūa̍a̍ ā sīmnu᷄ŋ mɛ̄ɛ̍ sūŋgbu̍ma̍ kɛ̍ndɛ̄ kɛ̍ndɛ̄ma̍, sa̍ā chīɛ̄ī lēmāsāa̍ wa̍ŋ mā wā nu̍a̍ā yɛ̍ fɔ̍.

¹³ Mbɔ̄ māā ko̍nda̍la̍ nāāla̍ŋ lā wa̍ la̍ pi̍a̍ā a̍ nyɛ̄ dīāā, ō su̍u̍ o̍ su̍u̍ fɔ̍. Mbɔ̄ māā sāa̍ nāa̍ ā kūi̍ o̍ wāa̍la̍ŋ ni᷄ŋ fɔ̍, ā kūi̍ wāa̍la̍ŋ o̍ wāa̍la̍ŋ ni᷄ŋ o̍ fo̍ndāŋndā nāāla̍ ma̍ndāā lāsāāla̍ŋ fɔ̍.

¹⁴ Mbɔ̄ māā nāūwāā nāa̍ kūi̍ ta̍u̍ ta̍u̍ fɔ̍. Mbɔ̄ māā ā vi̍i̍kūū, kɛ̄lɛ̄ŋgāā mā lāāsi̍a̍ŋ te̍ fɔ̍. Mbɔ̄ māā cha᷄ŋnda̍ nyɛ̄ pālāālā lā wa᷅ o̍ bɛ̍ɛ̄lā nāāla̍ŋ te̍ fɔ̍.

¹⁵ Wānāā Mɛ̄lɛ̄ka̍ ō tōsāl sɔ̍ɔ̍ŋ kɛ̍ndɔ᷄ŋ mu᷅ŋ ki̍nɛ̍i̍ ya̍, ā pɛ̄l tɔ̄nɔ̄ɔ̍. Wānāā Mɛ̄lɛ̄ka̍ Ya̍a̍wɛ̄ɛ̄ o̍ cho̍ Mɛ̄lɛ̄ka̍ ndāa̍ wa̍, ā pɛ̄l tɔ̄nɔ̄ɔ̍.