Sa᷅m 13 - Yāu̍ Mɛ̄lɛ̄ka̍a̍

Pīɛ̄īle̍ŋ le̍ mālāa̍

¹ O̍o̍ Mɛ̄lɛ̄ka̍ Ya̍a̍wɛ̄ɛ̄, bāā ā chō wɔ̄ hīōūwɔ̄ɔ̄ lāchī kɛ᷅ a̍ pūɛ̄ɛ̄nɔ᷄ŋndo̍ a̍ ya̍ o̍kɔ̄ɔ̄? Bāā pūɛ̄ɛ̄nɔ᷄ŋndo̍ ŋ̄ chō a̍ ya̍ o̍kɔ̄ɔ̄ le̍ fɛ̍ɛ̍ŋ a̍ fɛ̍ɛ̍ŋ ni̍? Ā chō wɔ̄ hīōūwɔ̄ɔ̄ lāchī kɛ᷅ a̍ ya̍ hɔ̄lāā nūmnda̍ vīŋndo̍ Mɛ̄lɛ̄ka̍?

² Vɛ̄ɛ̍nɛ̍ kpɛ̍ ya̍ I̍ cho̍ yɛ̍ hīōūwɔ̄ɔ̄ lāchī a̍ nyɛ̄ nɛ̄īyāa̍ bīūwɔ᷄ŋndo̍ o̍ kɔ̄llo̍ ni᷄ŋ? Vɛ̄ɛ̍nɛ̍ kpɛ̍ sāŋga̍ cho̍ ho̍ō o̍ kɔ̄l nūu̍ ni᷄ŋ īdīi̍ a̍ īchɔ̄l lo̍, ō hīāū yɛ̍ ni̍ŋ la̍chi̍? Vɛ̄ɛ̍nɛ̍ kpɛ̍ ya̍a̍mɔ̍ɔ̍wa̍a̍ nīa̍a̍ ā hīāū yɛ̍ ni̍ŋ la̍chi̍ a̍ ya̍ kpāāyāa̍ nɔ̄ɔ̍ chōo̍?

³ O̍o̍ Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ nūu̍, mɛ̍ɛ̍nda᷄ŋ sa᷅ŋga̍ cho̍ ya̍ chōo̍ wo̍, mā mu̍li̍ ya̍ dīōm fɔ̍. Mi̍ŋgi̍ ya̍ kpāāyāa̍ o̍ ŋ̄dīāl Mɛ̄lɛ̄ka̍ nūu̍, tē ō cho̍ ko̍ŋ te̍ I̍ cho̍ pīɔ̍mndo̍ sɔ̄lā.

⁴ O̍ ko̍ŋ, mī ya̍a̍mɔ̍ɔ̍wa̍a̍ nīa̍a̍ ā dīmi̍ āā, “Ŋ̄ yēm ndu̍.” Wānāa̍ tu̍l la̍ lēyɛ̄ wa̍ mā dɔ̄ɔ̄nu᷄ŋ nya̍a̍le̍ le̍ mɛ̄ɛ̍ ya̍ I̍ de̍l le̍.

⁵ Kɛ̍ I̍ dɔ̍ū tīīnda᷄ŋ nūu̍ kpo̍u̍ o̍ nūm ni̍ŋ Mɛ̄lɛ̄ka̍, fo̍ndōle̍, kāālā ŋ̄ nɔ̄ le̍ ya̍ wo̍, kāāla̍ cho̍ le̍ fɛ̍ɛ̍ŋ a̍ fɛ̍ɛ̍ŋ ndo̍ o̍ cho̍ ni̍. I̍ cho̍ nya̍a̍le̍ dɔ̍ɔ̍nɔ᷄ŋ, fo̍ndōle̍, le̍ mɛ̄ɛ̍ ŋ̄ chīīndi̍a̍a̍ ya̍ yɛ̍.

⁶ I̍ cho̍ chōndo̍ŋ sōlī le̍ nu̍m sāŋgālāa̍ Mɛ̄lɛ̄ka̍ Ya̍a̍wɛ̄ɛ̄, fo̍ndōle̍, le̍ sɔ̄ɔ̍ŋ kɛ̍ndɛ̄ŋ bɛ̄ndūŋ ŋ̄ tōsa̍l la̍ wo̍ŋ.