Sa᷅m 12 - Yāu̍ Mɛ̄lɛ̄ka̍a̍

Pīɛ̄īle̍ŋ le̍ mālāa̍

¹ O̍o̍ Mɛ̄lɛ̄ka̍ Ya̍a̍wɛ̄ɛ̄, yāndi̍i̍ ma̍la̍ na̍a̍. Wānāā kɛ̄ndīa̍a̍ ō pīlɛ̍ bɛ̍ɛ̍ ō cho̍ lɛ̍ le̍. Wānāa̍ cho̍ nu̍m ō hɔ̄l sa̍kpō wa̍ kpo̍u̍ ā chūu̍, ō pīlɛ̍ bɛ̍ɛ̍ wānā se̍e̍lūŋ ndɛ̍ na̍a̍ tɛ̄ɛ̄ŋ te̍.

² Wāŋnda̍ ā chō ni᷅ŋ chōōla̍ŋ dīmu̍la᷅ŋndo̍ vēllāa̍ vēllē, ā chō hūīya᷅ŋndo̍ vēllāa̍ vēllē, mā dīmu̍la᷅ŋ nyɛ᷅ ve᷅ nda̍ bɛ̍ɛ̍ o̍ lākɔ̄l te̍ wo̍.

³ O̍o̍ Mɛ̄lɛ̄ka̍ Ya̍a̍wɛ̄ɛ̄, to̍sa̍ mī wānāa̍ cho̍ ha̍ā wāŋnda̍ hūīyo̍ wa̍ ā mēi̍. Wānāa̍ cho̍ ha̍ā hēēlɔ᷄ŋ bɛ̍ndōo̍ wa̍, to̍sa̍ mā kīnda̍ sōndōla̍ŋ,

⁴ nda̍ yɔ̍nūŋ ni̍ māā wānāa̍ cho̍ ha̍ā dīmīo̍o̍ māā, sōndōlā ndāla̍ŋ la̍ŋ la̍ ke᷅ nda̍ nyɛ̄ nda̍ yēēmā wo̍ ni̍, māā nyɛ̄ nda̍ yēēmā wo̍ ndu̍ nda̍ dīmī ni̍, wānā o̍ wānā kpe̍ē nda̍ le̍ wa̍.

⁵ Kɛ̍ ndu̍yɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ āā, “I̍ che᷅ nyɛ̄ pālāā nda̍ chō wānāa̍ nɔ̍ wa̍nā ma̍lāā le̍ wa̍ tūsīo̍o̍ chōo̍ wo̍. I̍ tu̍e̍ī kūŋndā wānāā tāmbɛ̍i̍ya̍ ā chō a̍ nyɛ̄ nɛ̄īyāa̍ la̍ŋ. I̍ cho̍ hūnɔ̄ɔ̄ mī hu̍ŋ chi̍i̍ndīāā nda̍, kāni̍ ke̍ŋ nda̍ yēēma̍ ya̍ ni̍ mī to̍sa̍l nda̍.”

⁶ Būŋgāŋ Mɛ̄lɛ̄ka̍ Ya̍a̍wɛ̄ɛ̄ o̍ chu̍ēl wa̍nāā ndūa̍a̍ wo̍ŋ, ŋ̄ chō būŋgāŋ wānā nɔ̍la̍ mā ti̍i̍nda̍ŋ, ŋ̄ chō būŋgāŋ kpe̍e̍kpe̍i̍. Mɛ̄ɛ̍ nda̍ dīndī nu̍a̍ā ka̍ni̍i̍ hu̍mbūe̍i̍ a̍ yīŋnde̍ŋ lē ŋɔ᷄mmɛ̍ū, mī ī sīmnu᷄ŋ i̍kɛ̍ndɛ̄ yɛ̍, le̍nde̍ būŋgāŋ ndɔ̄ɔ̍ŋ o̍ chu̍a̍ wo̍ŋ ŋ̄ chō ni̍.

⁷ O̍o̍ Mɛ̄lɛ̄ka̍ Ya̍a̍wɛ̄ɛ̄, yāndi̍i̍ ma̍nda̍ na̍a̍, chi̍i̍ndi̍a̍a̍ na̍a̍ wānāā dɛ̍nɛ̍ wɔ̍ɔ̍ŋnda̍ o̍ bā.

⁸ Wānāā dɛ̍nɛ̍ wɔ̍ɔ̍ŋnda̍ ā chō ni᷅ŋ ā tīūwāā bā o̍ bā fe̍e̍. Mi̍ chē bɛ̍ɛ̍ mi̍ wāŋnda̍ ā wā sɔ̄ɔ̍ŋ wɔ̍ɔ̍ŋndo̍ŋ tōsāa̍, kɛ̍ wānā o̍ wānā o̍ cho̍ sɔ̄ɔ̍ŋ kɛ̍ndɔ᷄ŋ dīmīo̍o̍ a̍ sɔ̄ɔ̍ŋ wɔ̍ɔ̍ŋ nda̍ chō mu̍ŋ to̍sāa̍ wo̍ŋ o̍kɔ̄ɔ̄.