Sa᷅m 11 - Yāu̍ Mɛ̄lɛ̄ka̍a̍

A̍ tīīnda᷄ŋndo̍ dɔ̄wɔ̄ɔ̍ o̍ Mɛ̄lɛ̄ka̍ Ya̍a̍wɛ̄ɛ̄ ni̍ŋ o̍kɔ̄ɔ̄

¹ Mɛ̄lɛ̄ka̍ Ya̍a̍wɛ̄ɛ̄ ndu̍ ya̍ I̍ ti̍i̍nda̍ŋ ni̍ le̍ mbō mānda̍ ya̍. Wāŋnda̍ chō ya̍ dīɔ̄mnde̍ dīmūllo̍ āā, “Chɔ̍ŋ cho̍o̍ cho̍o̍ māā yōū, mā kūɛ̄ o̍ pēmbīī bɛ̄ndūe̍i̍ chōo̍.

² Ya̍a̍mɔ̍ɔ̍wa̍ ā bɛ̄ɛ̄ndi̍a̍ŋ a̍ chīɔ̄ūlā ndāla̍ŋ, ā kīndū chīŋɔ̍ma̍ ndāa̍ŋ o̍ chīɔ̄ūlā ndāla̍ŋ, le̍ mā wūu̍ ma̍ŋ o̍ nyūmnda̍ŋ ni᷄ŋ, wa̍nāa̍ cho̍ sa̍kpō Mɛ̄lɛ̄ka̍ o̍ hɔ̄l la̍ kɔ̄ɔ̄lī, le̍ nda̍ vīɔ̍ɔ̍.

³ Tē nyɛ̄ o̍ nyɛ̄ ō lāāsi̍a̍ŋ pɛ̍, ō yɛ̄ɛ̍nɛ̍ wānāā tōnya̍a̍ ā nɔ̄lā yɛ̍ mā tōsa̍?”

⁴ Mɛ̄lɛ̄ka̍ Ya̍a̍wɛ̄ɛ̄ o̍ cho̍ o̍ chīɛ̄ī kāsi̍ Mɛ̄lɛ̄ka̍a̍ ni᷄ŋ. Ō chō īchāli̍ o̍ kpe̍ŋgbe̍i̍ ndɔ̍ lēmāsāa̍ chōo̍ ɛ̄chɛ̍nɛ̄. Ō chō mɛ̄ɛ̄nda᷄ŋndo̍ nyɛ̄ o̍ nyɛ̄ wāŋndā chīe̍e̍ya̍ ā chō tōsāa̍, ndu̍yɛ̍ ō sīnā nyɛ᷅ o̍ nyɛ̄ nda̍ chō tōsāa̍.

⁵ Wānāā tōnya̍a̍ ni̍ a̍ wānāā dɛ̍nɛ̍ wɔ̍ɔ̍ŋnda̍, ō chō kūɛ̍ɛ̍la̍ ndāla̍ŋ mɛ̄ɛ̄nda᷄ŋndo̍ kpo̍u̍. Ndu̍yɛ̍ wānāa̍ ke̍ī sɔ̍ŋgɔ̄la̍ŋ mɛ̄līo̍o̍ wa̍, yɛ̍le̍ŋ pi̍la̍ o̍ tu̍l nda̍ ni̍.

⁶ Mɛ̄lɛ̄ka̍ chō tōsā mī dɛ̄ŋgūlta̍ŋ lā chɛ᷄ŋ cho̍o̍ cho̍o̍ lātūlu̍ a̍ pōūtā lēyīŋnda̍ŋ, mī lā hūlu᷄ŋ wa̍nāā dɛ̍nɛ̍ wɔ̍ɔ̍ŋnda̍ chōo̍. Ō chō nda̍ nyɛ̄ pālāā bɛ̄ndōo̍ tūsī chōo̍ a̍ hūēīyīī tūvīī bɛ̄ndūe̍i̍.

⁷ Wānā sa̍kpōo̍ Mɛ̄lɛ̄ka̍ Ya̍a̍wɛ̄ɛ̄ o̍ cho̍ ni̍, ndu̍yɛ̍ ō kāāla̍ sɔ̄ɔ̍ŋ tōsāa̍ o̍ nɛ̄i̍ sa̍kpōo̍ chōo̍. Wānāa̍ cho̍ sa̍kpō ndu̍ o̍ hɔ̄l la̍, ā chō ndu̍ hūnɔ̄ɔ̄ hɔ̄lla̍ chɔ̄.