Sa᷅m 10 - Yāu̍ Mɛ̄lɛ̄ka̍a̍

Pīɛ̄īle̍ŋ le̍ mī Mɛ̄lɛ̄ka̍ kēlū yāmɛ̍i̍

¹ O̍o̍ Mɛ̄lɛ̄ka̍ Ya̍a̍wɛ̄ɛ̄, vɛ᷅ ma̍ wā nu̍a̍ā la̍nda̍ŋ a̍ na̍a̍? Vɛ᷅ mi̍ ŋ̄ wā o̍ dɛ̍nɛ̍ pa̍lāa̍ ni᷄ŋ, ma̍ vīŋ na̍a̍ hɔ̄lāā nūmnda̍ nu̍a̍ā?

² Wānāā dɛ̍nɛ̍ wɔ̍ɔ̍ŋnda̍ ā chō yōŋgāa̍ kīōlɔ̄ɔ̍ kpe̍e̍kpe̍i̍, mā tūsī wa̍nāā tāmbɛ̍i̍ya̍ nyɛ̄ pālāa̍ chōo̍. Tūūlā wɔ̄ɔ̍ŋndā nda̍ tūu̍ a̍ wāŋnda̍ la̍ŋ, to̍sa̍ mī nda̍ pi̍la̍ ā mīīŋgu̍ lēbɛ̄ŋgu̍.

³ Wānāā dɛ̍nɛ̍ wɔ̍ɔ̍ŋnda̍ ha̍ā ā chō yōŋgāa̍ kīōlɔ̄ɔ̍ kpe̍e̍kpe̍i̍ a̍ sɔ̄ɔ̍ŋ wɔ̍ɔ̍ŋ nda̍ kɛ̄ɛ̄si̍a̍a̍ o̍ kɔ̄ltā ndāla̍ŋ ni᷄ŋ ndo̍ŋ. Wānāa̍ nɔ̍ hɔ̄lte̍ŋ nɔ̄ bɛ̄ndōo̍ wa̍, ā chō dīōmndā wɔ̄ɔ̍ŋnda̍ŋ dīmīo̍o̍ a̍ Mɛ̄lɛ̄ka̍ Ya̍a̍wɛ̄ɛ̄ o̍kɔ̄ɔ̄.

⁴ Wānāā dɛ̍nɛ̍ wɔ̍ɔ̍ŋnda̍ ha̍ā ā chūānu̍ŋ a̍ bɛ̍ndū ha̍a̍a̍, ā yēēma̍ bɛ̍ɛ̍ mā sīna̍ a̍ Mɛ̄lɛ̄ka̍ o̍kɔ̄ɔ̄ le̍. Ā yīya̍ŋ o̍ kɔ̄ltā ndāla̍ŋ ni᷄ŋ māā Mɛ̄lɛ̄ka̍ cho̍ le̍.

⁵ Kāni̍ fo̍ndōle̍, nyɛ̄ o̍ nyɛ̄ wāŋnda̍ ha̍ā ā tōsa̍, dɛ̍nɛ̍ kɛ̍ndɔ̄ɔ̍ nda̍ sɔ̄lā le̍ni̍ŋ ni̍. Yāmɛ̍ī Mɛ̄lɛ̄ka̍ kīlūl wa᷅ŋnda̍ le̍ nda̍ nyɛ̄ pālāa̍ tūsīo̍o̍ chōo̍ ve̍, ā si̍nā ndi̍ bɛ̍ɛ̍ pɛ̄ŋgu̍ le̍. Wāŋnda̍ ha̍ā ā chi᷄ bɛ̍ɛ̍ ya̍a̍mɔ̍ɔ̍wa̍a̍ ndāa̍ māā ŋ̄wāŋndā chīe̍e̍ le̍.

⁶ Le̍ te̍le̍ŋ o̍ te̍le̍ŋ ā chō yīya᷄ŋndo̍ o̍ kɔ̄ltā ndāla̍ŋ ni᷄ŋ mā dīmī āā, “Nyɛ̄ o̍ nyɛ̄ hi̍i̍lūū na̍a̍ le̍. Le̍ te̍le̍ŋ o̍ te̍le̍ŋ nyɛ̄ pālāā ō ko̍māl na̍a̍ le̍.”

⁷ Le̍ te̍le̍ŋ o̍ te̍le̍ŋ, yīōūla̍ŋ, a̍ chōōla̍ŋ, ndu̍yɛ̍ a̍ wāŋnda̍ kɔ̄ŋgɔ̄līa̍ŋnda̍ŋ, mu̍ŋ ko̍ni̍ ŋ̍ cho̍ nda̍ o̍ lāsōndō ni̍. Sɔ̄ɔ̍ŋ lākpūndɔ̍ŋ a̍ sɔ̄ɔ̍ŋ dɛ̍nɛ̍ wɔ̍ɔ̍ŋndo̍ŋ, mu̍ŋ ko̍ni̍ ŋ̍ fu̍lā nda̍ o̍ lāsōndō ni̍.

⁸ O̍ sɔ̄ndɔ̄kɔ̍lta̍ŋ nda̍ kūā wa᷅ŋnda̍ chūmndo̍ ni̍, kɔ̄la̍ŋ mā kɔ᷄ vi̍ŋi᷄ŋ le̍ wānāa̍ tɛ̍ɛ̍mbu̍u̍ i̍sɔ̍ɔ̍ o̍ īsɔ̄ɔ̍ le̍ wa̍ dīūwo̍. Le̍ te̍le̍ŋ o̍ te̍le̍ŋ ā chō wānāa̍ nɔ̍ wa̍nā ma̍ndāā le̍ wa̍ mɛ̄ŋgɛ̄lāa̍ le̍ nda̍ dīūwo̍.

⁹ Mɛ̄ɛ̍ kpɔ̍kūŋndo̍ ō wā nu̍a̍ā vīsīo̍o̍ mɛ̄ŋgɛ̄lāa̍ yɛ̍, le̍nde̍ nda̍ vīŋīŋ le̍ wāŋnda̍ bīyɔ̄ɔ̍ ni̍, le̍nde̍ nda̍ wā wa̍nāa̍ nɔ̍ wa̍nā ma̍ndāā le̍ wa̍ mɛ̄ŋgɛ̄lāa̍ ni̍ le̍ nda̍ dīūwo̍. Wānāa̍ nɔ̍ wa̍nā o̍ wānā ma̍lāā le̍ wa̍, nda̍ nda̍ yēŋ ya̍ŋɔ̄ɔ̄la̍ŋ ni̍ mā hāū mā sāsu̍ nda̍ mā kūɛ̄ a̍ nda̍.

¹⁰ Wānāa̍ nɔ̍ kpa̍a̍yā o̍ kpāāyā le̍ wa̍, bīyɔ̄ɔ̍ nda̍ mā sūsa̍ nda̍ sōndōo̍ lɛ̄ŋ. Le̍ mɛ̄ɛ̍ nda̍ nɔ̄ kpāāyāa̍ ma̍ hīāū wāŋnda̍ ha̍ā yɛ̍, nyɛ̄ nda̍ yēēmā le̍ tōsāa̍ a̍ nda̍ wo̍ ndu̍ ko̍ni̍ nda̍ tōsā ni̍.

¹¹ Wānāā dɛ̍nɛ̍ wɔ̍ɔ̍ŋnda̍ ha̍ā ā bīī pɛ̍ ā dīmi̍ āā, “Mɛ̄lɛ̄ka̍ pūɛ̄ɛ̄nu̍ŋ a̍ nyɛ̄ o̍ nyɛ̄ na̍a̍ ŋ̄ tōsa̍. Ō fāŋa̍ na̍a̍ hɔ̄lte̍ŋ kɔ̄ɔ̄lī mɛ̄ŋgɛ̄lāa̍, nyɛ̄ o̍ nyɛ̄ na̍a̍ ŋ̄ chō tōsāa̍ ō cho̍ ndu̍ chɔ̄ le̍.”

¹² O̍o̍ Mɛ̄lɛ̄ka̍ Ya̍a̍wɛ̄ɛ̄, yāndi̍i̍ tu̍si̍ wa̍nāā dɛ̍nɛ̍ wɔ̍ɔ̍ŋnda̍ nyɛ̄ pālāa̍ chōo̍. Pu̍ɛ̍ɛ̍nu᷄ŋ a̍ wānāā nda̍ chō nyɛ̄ pālāa̍ tūsīo̍o̍ chōo̍ wa̍ le̍ Mɛ̄lɛ̄ka̍.

¹³ Vɛ̄ɛ̍nɛ̍ wāna̍ dɛ̍nɛ̍ wɔ̍ɔ̍ŋndo̍ ō pɛ̄ɛ̄sā yɛ̍ Mɛ̄lɛ̄ka̍, mbō bīī kɔ̄l ndɔ̄ɔ̍ mbō dīmi̍ māā Mɛ̄lɛ̄ka̍ tu̍sī ndu̍ nyɛ̄ pālāā chōo̍ le̍?

¹⁴ Kɛ̍ ndu̍yɛ̍ nūm Mɛ̄lɛ̄ka̍ ā chō chɔ̄ɔ̍ kpo̍u̍ wānāa̍ cho̍ o̍ nyɛ̄ pālāa̍ ni᷄ŋ, mi̍ sāŋgā bɛ̄ndōo̍ ō wā nda̍ chōo̍ wa̍. Ndu̍yɛ̍ le̍ te̍le̍ŋ o̍ te̍le̍ŋ ā chō ō bɛ̍ɛ̍ndīa̍ŋ le̍ nda̍ mālāa̍. Wānāa̍ nɔ̍ wa̍nā ma̍ndāā le̍ wa̍, nūm nda̍ tīīnda̍ŋ le̍ nda̍ mālāa̍ ni̍. Vīi̍ya̍a̍ nɔ̍ lɛ̍ ŋ̄fi̍nyā le̍ wa̍, nu᷄m cho̍ wāna̍ ma̍lā nda̍ wo̍ ni̍.

¹⁵ Wānāā dɛ̍nɛ̍ wɔ̍ɔ̍ŋnda̍ ha̍ā, a̍ cho̍ ha̍ā wāŋnda̍ sɔ̄ɔ̍ŋ wɔ̍ɔ̍ŋndo̍ŋ tōsāllo̍ wa̍, to̍sa̍ mī kpāāya̍ ndāa̍ ō mɛ̄ɛ̄lu̍. Tu̍si̍ nda̍ nyɛ̄ pālāa̍ chōo̍ le̍ nyɛ̄ nda̍ chō tōsāa̍ wo̍, mā lo̍ nda̍ ndu̍ tūsīo̍o̍ chōo̍ ha̍a̍a̍ mā chūu̍.

¹⁶ Mɛ̄lɛ̄ka̍ Ya̍a̍wɛ̄ɛ̄ ndu̍ cho̍ māsā bɛ̍ndōo̍ le̍ fɛ̍ɛ̍ŋ a̍ fɛ̍ɛ̍ŋ ni̍. Kāa̍la̍ kɛ̍ɛ̍ ndu̍ mi̍ lā wā mɛ̄lɛ̄ka̍ā chēle̍ŋnda̍ sōōlūūwo̍ la̍ŋ, ō chō la̍ŋ bāsɔ̄ɔ̄ tɛ̍ɛ̍ o̍ lɛ̄ŋndē ndɔ̄le̍ŋ ni᷄ŋ.

¹⁷ O̍o̍ Mɛ̄lɛ̄ka̍ Ya̍a̍wɛ̄ɛ̄, wānāā nda̍ chō nyɛ̄ pālāa̍ tūsīo̍o̍ chōo̍ wa̍, ā tūɛ̄ī ni̍ŋ pi̍ɛ̍i̍lē ndāle̍ŋ, mā to̍sa̍l nda̍ nyɛ̄ nda̍ yēēma̍ nu̍m o̍ bā wo̍. Ā tūɛ̄ī ni̍ŋ cha̍ŋ ndāa̍, ndu̍yɛ̍ mā nyɔ̍ɔ̍lu̍ nda̍ kɔ̄lta̍ŋ.

¹⁸ Ā chō sūŋgɔ̄ɔ̍ le̍ vi̍i̍ya̍a̍ nɔ̍ lɛ̍ ŋ̄fi̍nyā le̍ wa̍, ndu̍yɛ̍ a̍ wānāā nda̍ chō nyɛ̄ pālāa̍ tūsīo̍o̍ chōo̍ wa̍ mā to̍sa̍ mā sɔ̄la̍ di̍la̍ ndāla̍ŋ. Ko̍ŋ to̍sā ni̍ wāŋndā chīe̍e̍ya̍ ā hi̍ū lɛ̍ lāchī a̍ wāŋnda̍ sɔ̄ɔ̍ŋ ŋ̄sīōōŋ bɛ̄ndo᷄ŋ tōsāllo̍ le̍.