Sɔ̄ɔ̍ŋ Chɔ̍ɔ̍ma᷄ŋndo̍ŋ 6 - Yāu̍ Mɛ̄lɛ̄ka̍a̍

Sāā Fɔ̍ŋndɔ̍ɔ̍ fāŋa̍ tāāmāsi̍la̍ŋ o̍ yāu̍wo̍

¹ O̍ ko̍ŋ kɔ̍ɔ̍lī, tāāmāsi̍la̍ ŋɔ᷄mmɛ̍ūlā wa̍ o̍ yāu̍wo̍ ho̍ō la̍ŋ, mi̍ cha᷅ mi̍ Sāā Fɔ̍ŋndɔ̍ɔ̍ ho̍ō fāŋā ō tāso̍o̍. Mɛ̄ɛ̍ o̍ fa̍ŋa̍ ndu̍, mi̍ nyāā yōōmāā hīɔ̍ɔ̍lu̍a̍a̍ ō pīlɔ̍ɔ̄ vēēlū chōo̍ cho̍o̍ āā, “Hu̍ŋ.” Wānā a̍a̍ tu̍e̍ī ndu̍ dīōm pɛ̍ āā, ta᷅ŋnde̍ŋ le̍ dēŋī ni̍.

² O̍ ko̍ŋ mi̍ cha᷅ mi̍ so᷅ hūmbōo̍ fūlā a̍ wāŋndo̍ īchāli̍ le̍cho̍o̍. Wānā ko̍ŋ chīɔ̄ūwo̍ wa̍ ndu̍ o̍ bā. Ndu̍yɛ̍, ma̍ kē ndu̍ mɔ̍si̍l lēmāsāa̍. O̍ ko̍ŋ, mbo̍ kūānu᷄ŋ mɛ̄ɛ̍ ku̍u̍ba̍nɔ̍ bɛ̍ndōo̍ yām nu̍a̍ā chɔ̄ūwo̍, ndu̍yɛ̍ mbō wa̍ kɔ̄la̍ŋ le̍ fo̍ndāŋndā chēle̍ŋ sōlīo̍o̍ kɛ᷅ kɛ᷅ a̍ chɔ̄ūwo̍ yɛ̍.

³ O̍ ko̍ŋ kɔ̍ɔ̍lī, mi̍ Sāā Fɔ̍ŋndɔ̍ɔ̍ ho̍ō fāŋā tāāmāsi̍ di̍i̍ŋ ndɔ̄ɔ̍. Mɛ̄ɛ̍ o̍ fa̍ŋa̍, mi̍ tu̍ɛ̍ī mi̍ nyāā yōōmāa̍ ō dīi̍ŋ ndɔ̄ɔ̍ vēēlū āā, “Hu̍ŋ.”

⁴ O̍ ko̍ŋ mi̍ so᷅ chēle̍ŋ fūlā. Ō wa̍ ō sīāŋā yɔ̍ɔ̄. Wāna̍ wa̍ īchāli̍ le̍cho̍o̍ wo̍, di̍o̍o̍ wa̍ ndu̍ ō kēna᷄ŋ le̍ mī ndu̍ o̍o̍ fa̍ŋa̍ kɔ̄l nyūlōo̍ o̍ chi̍e̍ēŋndo̍ chōo̍ ba̍ū, le̍ mī ŋ̄wāŋndā chīe̍e̍ a̍ chɔ̍ū mā dīūwa᷅ŋ. Ndu̍yɛ̍, ma̍ kē ndu̍ mūɛ̄ī fāŋīī bɛ̄ndūe̍i̍.

⁵ O̍ ko̍ŋ kɔ̍ɔ̍lī, mi̍ Sāā Fɔ̍ŋndɔ̍ɔ̍ fāŋā tāāmāsi̍ ŋgāa̍ ndɔ̄ɔ̍. Mɛ̄ɛ̍ o̍ fa̍ŋa̍, mi̍ tu̍ɛ̍ī nyāā yōōmāa̍ ō ŋgāa̍ ndɔ̄ɔ̍ mbo̍ vēēlū āā, “Hu̍ŋ.” O̍ ko̍ŋ, mi̍ cha᷅ so᷅ tīŋīo̍o̍. Wāna̍ wa̍ īchāli̍ le̍cho̍o̍ wo̍, sīke̍līi̍ nda̍ tūū lu̍su̍l nyɔ̍ɔ̍ŋ ndo̍ ō wa̍ ndu̍ o̍ bā.

⁶ O̍ ko̍ŋ kɔ̍ɔ̍lī, mi̍ tu̍ɛ̍ī nyɔ̄ɔ̍ nyāā yōōmāā hīɔ̍ɔ̍lu̍a̍a̍ ka̍ŋ tɛ̄ɛ̄ŋ māā dīōm wāna̍ chi̍e̍e̍ āā, “Wi̍tīi̍yo̍ŋ sīa̍a̍mbūi̍yo̍ lē pīlɛ̍ kpe̍, le̍ pāāwā wa̍li̍ lēpāla̍. Sūa̍a̍ŋ sīa̍a̍mbūi̍yo̍ lēyāa̍ kpe̍ le̍ pāāwā wa̍li̍ lēpāla̍. Kɛ̍ ndu̍yɛ̍, tɛ̍ɛ̍mbūū chūɛ̄īya̍ŋ a̍ mūɛ̄īya̍ŋ te̍.”

⁷ O̍ ko̍ŋ kɔ̍ɔ̍lī, mi̍ Sāā Fɔ̍ŋndɔ̍ɔ̍ fāŋā tāāmāsi̍ hi̍ɔ̍ɔ̍lo̍o̍. Mɛ̄ɛ̍ o̍ fa̍ŋa̍, mi̍ tu̍ɛ̍ī mi̍ nyāā yōōmāa̍ ō hīɔ̍ɔ̍lo̍o̍ vēēlū āā, “Hu̍ŋ.”

⁸ Mi̍ cha᷅ mi̍ so᷅ pu̍pu̍la̍a̍ wo̍ fūlā. Wāna̍ wa̍ īchāli̍ le̍cho̍o̍ wo̍ dīōlā ndɔ̄la̍ŋ āā, Pīɔ̍mndo̍. Mi̍ o̍ nɔ̍ dīōla̍ŋ āā, Chi̍e̍e̍ Pīɔ̍m ndo̍ hūŋ ndu̍ kɔ̄ɔ̄lī. Nda̍ nda̍ ŋi̍ɔ̍ɔ̍ŋ kpāāyāa̍ wa̍ nda̍ ō kēna᷄ŋ māā o̍ wānāā hīɔ̍ɔ̍lu̍ o̍ wānāā hīɔ̍ɔ̍lu̍ tɛ̍ɛ̄ŋ o̍ chi̍e̍ēŋndo̍ chōo̍ mā dīī ō pīlɛ̍. Kpāāyāa̍ wa̍ nda̍ ō kēna᷄ŋ le̍ mā dīu̍ wāŋnda̍, a̍ chɔ̄ūla̍ŋ, a̍ yīa̍a̍ŋ, a̍ nāāla̍ŋ, a̍ vīsīāā bīyāa̍ yōndōo̍ ni᷄ŋ.

⁹ O̍ ko̍ŋ kɔ̍ɔ̍lī, mi̍ Sāā Fɔ̍ŋndɔ̍ɔ̍ fāŋā tāāmāsi̍ ŋu̍ɛ̍ɛ̍no̍o̍. Mɛ̄ɛ̍ o̍ fa̍ŋa̍, mi̍ cha᷅ mi̍ nyi̍nāā wānāā nda̍ dīu̍ le̍ sūɛ̍i̍ Mɛ̄lɛ̄kɛ̍i̍ ya̍, a̍ dīmūl wāŋnda̍ a̍ Mɛ̄lɛ̄ka̍ o̍kɔ̄ɔ̄ wo̍. Ā wa̍ o̍ ma̍āŋndo̍ bɛ̄ŋgu̍.

¹⁰ Mi̍ tu̍ɛ̍ī ma̍ dīmī chōo̍ cho̍o̍ āā, “Māsānɔ̄ɔ̍ Mɛ̄lɛ̄ka̍ nɔ̍ kpāāyāa̍ kpo̍u̍ wo̍, nūm Mɛ̄lɛ̄ka̍ sa̍kpōo̍, nūm wānā nɔ̍lā mā ti̍i̍nda̍ŋ ndo̍, vɛ̄ɛ̍nɛ̍ kpɛ̍ na̍a̍ ŋ̄ nɔ̄ yɛ̄ mī ŋ̄ chu᷄m le̍ mbō lo̍ o̍ ko̍ŋ mā kēlū yāmɛ̍i̍, mā hu̍ŋ mi̍ŋgūl wānāa̍ cho̍ o̍ chi̍e̍ēŋndo̍ chōo̍ wa̍ māa̍, le̍ dīū nda̍ dīu̍ na̍a̍ wo̍?”

¹¹ O̍ ko̍ŋ kɔ̍ɔ̍lī, mi̍ cha᷅ nda̍ kpo̍u̍ ma̍ kē nda̍ dōmāla̍ hu̍mbūla̍ŋ. Ma̍ dīmūl nda̍ māā ā chɔ̄ɔ̄lu̍ wɔ̍ pɛ̍ŋgī le̍ te̍le̍ŋ bi̍ŋgī, mbō lo̍ o̍ ko̍ŋ mī chāāŋāā ndāā bu̍ɛ̍īya̍, a̍ chāāŋāā ndāā wa̍nāā lāāla᷄ŋnda̍, a̍ nɔ̍ mā sɔ̄la̍ pīɔ̍mndo̍ mɛ̄ɛ̍ nda̍ bɛ̍ɛ̍ nda̍ sɔ̄la̍ pīɔ̍mndo̍ yɛ̍ wa̍, mā chīŋa̍ mɛ̄ɛ̍ nda̍ nɔ̄ le̍ wāa̍ yɛ̍.

¹² O̍ ko̍ŋ kɔ̍ɔ̍lī, mi̍ Sāā Fɔ̍ŋndɔ̍ɔ̍ fāŋā tāāmāsi̍ ŋɔ̍mpu᷅mndo̍. Mɛ̄ɛ̍ o̍ fa̍ŋa̍, mi̍ cha᷅ mi̍ lɛ̄ŋnde̍ŋ lē nyīīyā ta̍u̍ ta̍u̍. Mi̍ pāa̍le̍ŋ lē pīīmīāā kpi̍lo̍ māā pi̍ndi̍ pi̍ndi̍. Mi̍ pāŋge̍i̍ dīū yɔ̍ɔ̄, māā mākōo̍.

¹³ O̍ ko̍ŋ kɔ̍ɔ̍lī, mi̍ lōo̍ŋ di̍a̍ndū o̍ ha̍la̍ wo̍ŋ ŋ̄ dēlī lɛ̄ŋ mɛ̄ɛ̍ hūēīyīī bɛ̄ndūe̍i̍ ī hūāŋ nu̍a̍ā mī yɔ̄m kūāmāa̍ chīɛ̄ɛ̄lu̍ŋ yɛ̍.

¹⁴ Mi̍ ha̍la̍a̍ fāŋa᷄ŋ mɛ̄ɛ̍ nda̍ sīmbūl nu̍a̍ā yāu̍wo̍ yɛ̍. Pēmbo᷄ŋ kpo̍u̍ a̍ lɛ̄ŋīī cho̍ ī bālāā a̍ mɛ̄ŋnda̍ŋ nde̍, mi̍ ŋ̄ fāŋa᷄ŋ o̍ fo̍ndāŋndā ŋ̍ wa̍ la̍ŋ.

¹⁵ O̍ ko̍ŋ kɔ̍ɔ̍lī, mi̍ cha᷅ māsāa̍ o̍ chi̍e̍ēŋndo̍ ni᷄ŋ, a̍ wānāā bɛ̄ndūa̍a̍, a̍ bōlīī so̍vɛ̄i̍ya̍, a̍ wānāā sūlāa̍, a̍ wānāā kpāāyāa̍, a̍ wānā o̍ wānā fe̍e̍, chīa̍a̍ ni̍, a̍ wānāā yɔ̄ŋāā, nda̍ kpo̍u̍ ma̍ kɔ̍ vi̍ŋi᷄ŋ o̍ būūlūla̍ŋ ni᷄ŋ, a̍ o̍ pōūta̍ŋ bɛ̄ŋgu̍ o̍ pēmbo᷄ŋ.

¹⁶ Ma̍ dīmūl pēmbo᷄ŋ a̍ pōūta̍ŋ chōo̍ cho̍o̍ kpe̍le̍ŋ āā, “De̍l na̍a̍ chōo̍ mā vēŋ na̍a̍ le̍ wāna̍ cha̍l o̍ kpe̍ŋgbe̍i̍ lēmāsāa̍ chōo̍ wo̍. Vi̍o̍ŋ na̍a̍ le̍ Sāā Fɔ̍ŋndɔ̍ɔ̍ yɔ̄ŋi̍ o̍ tu̍si̍ na̍a̍ nyɛ̄ pālāa̍ chōo̍.

¹⁷ Vi̍o̍ŋ na̍a̍, kāni̍ fu̍u̍le̍, pāa̍le̍ kpūndɛ̍le̍ŋ lē fūūlu̍u̍, pāa̍le̍ nda̍ nɔ̄ le̍ na̍a̍ nyɛ̄ pālāa̍ tūsīo̍o̍ chōo̍ le̍ŋ. Wānā o̍ wānā nɔ̍lā fu̍lā lēni᷄ŋ te̍.”