Sɔ̄ɔ̍ŋ Chɔ̍ɔ̍ma᷄ŋndo̍ŋ 5 - Yāu̍ Mɛ̄lɛ̄ka̍a̍

Wāna̍ bɛ̍nda̍ mbō tīmbi̍ yāu̍wo̍ wo̍

¹ O̍ ko̍ŋ kɔ̍ɔ̍lī, wāna̍ wa̍ ko̍ŋ i̍cha̍li̍ o̍ kpe̍ŋgbe̍i̍ lēmāsāa̍ chōo̍ wo̍, mi̍ cha᷅ yāu̍ si̍mbūlāa̍ ndu̍ o̍ bā kɛ̄ndɔ̄ɔ̍. Yāu̍wo̍ ho̍ō wa̍ ō pōōnyīāā kpo̍u̍ le̍ni̍ŋ a̍ o̍ kɔ̄ɔ̍. Tāāmāsi̍la̍ŋ lā wa̍ lā hōlāā o̍ yāu̍wo̍ ho̍ō sālā ŋɔ᷄mmɛ̍ū.

² O̍ ko̍ŋ kɔ̍ɔ̍lī, mi̍ cha᷅ Mɛ̄lɛ̄ka̍ ki̍i̍la̍nɔ̍ ndɔ̍ kpāāyāa̍, ō pūm. Mbo̍ nyūnā chōo̍ cho̍o̍ kpe̍le̍ŋ āā, “Ō nɛ̄ɛ̍nɛ̍ cho̍ yɛ̄ ō bɛ̄ndāā mbō fāŋa̍ tāāmāsi̍o̍o̍ o̍ yāu̍wo̍ ho̍ō mbō tīmbi̍ ndu̍?”

³ Kɛ̍, wānā bɛ̍ɛ̍ sɔ̍la̍ŋ o̍ ti̍mbī ya̍u̍wo̍ ho̍ō mbō nu̍a̍ lēni᷄ŋ te̍. Ɛ̄chɛ̍nɛ̄ ni̍, o̍ chi̍e̍ēŋndo̍ chōo̍ ni̍, chi̍e̍e̍ pīɔ̍m ni̍, wānā bɛ̍ɛ̍ sɔ̍la̍ŋ te̍.

⁴ Mɛ̄ɛ̍ ya̍ che᷅ māā wānā bɛ̍ɛ̍ sɔ̍la̍ŋ o̍ bɛ̍nda̍ mbō tīmbi̍ yāu̍wo̍ ho̍ō, mbō nu̍a̍ lēni᷄ŋ te̍, mi̍ cha᷅ŋ ta̍u̍.

⁵ Kɛ̍ ndu̍yɛ̍, mi̍ lāŋgba̍ā kālla̍ ō pīlɛ̍ nyɔ̄ɔ̄lū ya̍ āā, “Cha᷅ŋ te̍.” Mbo̍ dīmī āā, “Si̍na̍ pɛ̍ŋgu̍ māā wānā cho̍, dīōlā ndɔ̄la̍ŋ āā, Kpɔ̍ku᷄ŋ fu̍la̍ o̍ kāa̍le̍ Chu̍dāle̍ŋ chōo̍ wo̍, mā vēēlū ndu̍ vɛ̄lɛ̄ āā Yɛ̄yi̍i̍ Tɔ̍ɔ̍mɛ̍i̍ Māsāa̍ Dēēve̍ ve̍. Ndu̍ ye᷅m ya̍a̍mɔ̍ɔ̍wa̍ ni̍. Ndu̍ ndu̍ nɔ̍lā mbō fāŋa̍ tāāmāsi̍la̍ sālā ŋɔ᷄mmɛ̍ūla̍ŋ o̍ yāu̍wo̍ ho̍ō mbō tīmbi̍ ndu̍.”

⁶ O̍ ko̍ŋ kɔ̍ɔ̍lī, mi̍ cha᷅ Sāā Fɔ̍ŋndɔ̍ɔ̍ īsīsi̍. Wānā a̍a̍ che᷅ ndu̍ pɛ̍ āā mɛ̄ɛ̍ nda̍ dīī nyɛ̍. Ō wa̍ īsīsi̍ o̍ lu᷅ŋndo̍ tɛ̄ɛ̄ŋ, chɔ̍ŋ o̍ kpe̍ŋgbe̍i̍ lēmāsā tāso̍o̍ le̍ hūnɔ̄ɔ̍ nāa̍ nyāā yōōmāā hīɔ̍ɔ̍lu̍a̍a̍ a̍ lāŋgba̍ā kālla̍ wa̍ wa̍, tɛ̍ɛ̄ŋ ndo̍ŋ. Sāā Fɔ̍ŋndɔ̍ɔ̍ ho̍ō, ndu̍ o̍o̍ nɔ̍ lēēla̍ŋ lā ŋɔ᷄mmɛ̍ū a̍ hɔ̄lta̍ŋ lā ŋɔ᷄mmɛ̍ū. Hɔ̄ltā la᷄ŋ la̍ si̍m le̍ nyi̍nāā ŋɔ᷄mmɛ̍ūwa̍ a̍ sa̍a̍ŋgīāl Mɛ̍lɛ̄ka̍ wa̍ ni̍, ā o̍ vīām ba᷅ o̍ bā fe̍e̍ o̍ chi̍e̍ēŋndo̍ chōo̍ wa̍.

⁷ O̍ ko̍ŋ kɔ̍ɔ̍lī, mi̍ Sāa̍ ho̍ō kūā nāa̍ wāna̍ wa̍ īchāli̍ o̍ kpe̍ŋgbe̍i̍ lēmāsāa̍ chōo̍, mi̍ yāu̍ si̍mbu̍lāa̍ wā ndu̍ o̍ bā kɛ̄ndɔ̄ɔ̍ wo̍ chūā. Mbo̍ bīī yāu̍ ko̍ŋ.

⁸ Mɛ̄ɛ̍ o̍ bi̍ī dɔ̍ɔ̍ yāu̍wo̍, mi̍ nyāā yōōmāā hīɔ̍ɔ̍lu̍a̍a̍ a̍ lāŋgba̍ā kālāā ŋ̄wāŋ bi̍di̍i̍ŋ a̍ wānāā hīɔ̍ɔ̍lu̍a̍a̍ kūā, ma̍ kɔ̍ ba᷅ŋ wūla̍ŋ Sāa̍ Fɔ̍ŋndɔ̍ɔ̍ ho̍ō lāchī. Nda̍ kpo̍u̍, tōwāla̍ŋ lā wa̍ nda̍ o̍ lābā, a̍ hɛ̄ŋgɛ̍i̍la̍ ŋ̄ko̍o̍līi̍la̍ŋ a̍ nyɛ̄m chūŋ kɛ̄ndɔ᷄ŋ lēni᷄ŋ ŋ̍ pi̍a̍ā, mu̍ŋ cho̍ yɛ̄ pīɛ̄īlē wānāa̍ Mɛ̄lɛ̄ka̍a̍ ni̍.

⁹ O̍ ko̍ŋ kɔ̍ɔ̍lī, nyāā yōōmāa̍ ha̍ā ni̍ a̍ lāŋgba̍ā kālla̍ ha̍ā, ma̍ sōlī chōndi̍i̍ sɛ̍nɛ̄īye̍ āā, “A̍ bɛ̍nda̍ le̍ yāu̍wo̍ bīyɔ̄ɔ̍ mā fa̍ŋa̍ tāāmāsi̍la̍ cho̍ lo̍ŋ nda̍ŋ mā ti̍mbi̍ ndu̍. Kāni̍ fu̍u̍le̍, nūm nda̍ dīī ni̍, o̍ ko̍ŋ, ma̍ bāŋā ŋ̄wāŋndā chīe̍e̍ le̍ Mɛ̄lɛ̄ka̍ sa̍na̍a̍ a̍ pīɔ̍m ŋ̄ sɔ̄la̍ wo̍. Nda̍ yɔ̍nūŋ ni̍ māā, wāŋnda̍ lēkāa̍ o̍ lēkāa̍, a̍ īsɔ̄ɔ̍ o̍ īsɔ̄ɔ̍ ma̍ŋgālāā, a̍ wāŋnda̍ su̍u̍ o̍ su̍u̍, a̍ lēlɛ̄ŋ o̍ lēlɛ̄ŋ.

¹⁰ Ma̍ sīīŋgūū nda̍ wānāā ŋ̄ wā ni̍ŋ cho̍o̍ ma̍sā wa̍, ndu̍yɛ̍ ma̍ sīīŋgūū nda̍ wānāā sōlīāā lāsa̍lāa̍. Ndu̍yɛ̍, wāŋnda̍ ha̍ā ā wā ni̍ŋ ma̍sāa̍ ŋ̄wāŋndā chīe̍e̍ cho̍o̍ o̍ chi̍e̍ēŋndo̍ chōo̍.”

¹¹ O̍ ko̍ŋ kɔ̍ɔ̍lī, mi̍ tu̍ɛ̍ī ki̍i̍la̍a̍ Mɛ̄lɛ̄ka̍a̍, wāa̍la̍ŋ a̍ mi̍i̍līɔ̄ŋnda̍ŋ o̍ yi̍lāŋndo̍ ho̍ō ni᷄ŋ. Ā wa̍ ā bālāā kpe̍ŋgbe̍i̍ lēmāsāa̍, ā bālāā nyāā yōōmāa̍, a̍ lāŋgba̍ā kālāā kāŋ.

¹² Ā wa̍ chōndo̍ŋ chōo̍ cho̍o̍ mā dīmī o̍ chōnde̍i̍ ni᷄ŋ āā, “Nūm Sāa̍ nda̍ dīī ho̍ō wo̍, a̍ bɛ̍nda̍ mā sɔ̍la̍ sāŋgālāa̍. Kpāāyāa̍ chō le̍ nūm, a̍ sūllo̍, a̍ kɔ̄l kālo̍o̍, a̍ dīāllūŋ kāla᷄ŋ, a̍ bɛ̄ɛ̄le̍ŋ, a̍ līsāa̍, a̍ sāŋgālāa̍.”

¹³ O̍ ko̍ŋ kɔ̍ɔ̍lī, nyɛ̄ o̍ nyɛ̍ cho̍ nyɛ̄ yōōmāā ɛ̄chɛ̍nɛ̄ ni̍, a̍ o̍ chi̍e̍ēŋndo̍ chōo̍, a̍ chi̍e̍e̍ pīɔ̍m, a̍ o̍ pēē mɛ̄ŋmā īhɛ᷄llo̍ bɛ̄ŋgu̍, nda̍ kpo̍u̍, mi̍ tu̍ɛ̍ī nda̍ dīōm. Ma̍ wā dīmīo̍o̍ āā, “Nūm wāna̍ cha̍l ho̍ō o̍ kpe̍ŋgbe̍i̍ lēmāsāa̍ chōo̍ wo̍, a̍ nūm Sāā Fɔ̍ŋndɔ̍ɔ̍ sāŋgālāa̍ chō le̍ nya̍, a̍ bɛ̄ɛ̄le̍ŋ, a̍ līsāa̍, a̍ kpāāyāa̍ le̍ fɛ̍ɛ̍ŋ a̍ fɛ̍ɛ̍ŋ.”

¹⁴ Mi̍ nyāā yōōmāā hīɔ̍ɔ̍lu̍a̍a̍ dīmī āā, “Ī yɔ̄nu̍ŋ le̍nde̍.” O̍ ko̍ŋ kɔ̍ɔ̍lī, mi̍ lāŋgba̍ā kālla̍ bāŋ wūla̍ŋ ma̍ sōōlūū Mɛ̄lɛ̄ka̍.