Sɔ̄ɔ̍ŋ Chɔ̍ɔ̍ma᷄ŋndo̍ŋ 4 - Yāu̍ Mɛ̄lɛ̄ka̍a̍

Chɔ᷄ŋ chē o̍ yi̍lāŋndo̍ ni᷄ŋ mɛ̄ɛ̍ nda̍ līsa̍ Mɛ̄lɛ̄ka̍ ɛ̄chɛ̍nɛ̄ yɛ̍

¹ O̍ ko̍ŋ kɔ̍ɔ̍lī, mi̍ cha᷅ vɛ̄lɛ̄ yi̍lāŋndo̍. Mi̍ cha᷅ dīo̍o̍ ɛ̄chɛ̍nɛ̄ ō kūmbīāā. Dīōm tāse̍ ya̍ I̍ tu̍e̍ī mbo̍ sūa̍a̍ nāa̍ ya̍ chu̍a̍ māā bu̍lu̍ bɛ̍ndū wo̍, mi̍ tu̍ɛ̍ī mbo̍ dīmūl la̍ āā, “He̍l na̍nu᷄ŋ mī chɔ̍m nu̍m sɔ̄ɔ̍ŋ cho̍ hūnɔ̄ɔ̄ yɔ̄nɔ᷄ŋ o̍ sīɔ̄dīi̍ lāchīo̍o̍ ni᷄ŋ ndo̍ŋ.”

² O̍ ko̍ŋ, mi̍ Nyi̍na̍ Mɛ̄lɛ̄ka̍a̍ tūāl la̍ kɔ̄ɔ̄lī o̍ lēpīlɛ̍ ni᷄ŋ kpe̍. Mi̍ cha᷅ kpe̍ŋgbe̍i̍ lēmāsāa̍ ɛ̄chɛ̍nɛ̄ a̍ wāŋndo̍ īchāli̍ le̍cho̍o̍.

³ Wāna̍ wa̍ ko̍ŋ i̍cha̍li̍ o̍ kpe̍ŋgbe̍i̍ lēmāsā kōŋ chōo̍ wo̍, wānā a̍a̍ che᷅ ndu̍ dīōndɔ̄ɔ̍ īyēlēŋgi̍ ye̍lēŋgi̍e̍i̍ pɛ̍ āā mɛ̄ɛ̍ wānā cha᷅ nu̍a̍ā kɔ̄ɔ̍le̍ chāāki̍īle̍ŋ a̍ lē sīāŋāle̍ŋ o̍ pōū ŋ̄ka̍ni̍o̍o̍ ni᷄ŋ yɛ̍ ni̍. O̍ ko̍ŋ kɔ̍ɔ̍lī, mi̍ cha᷅ ni̍ŋgi̍na̍ŋgāa̍ ō bālāā kpe̍ŋgbe̍i̍ lēmāsāa̍ ho̍ō. Wānā a̍a̍ che᷅ ni̍ŋgi̍na̍ŋgāa̍ ho̍ō pɛ̍ āā, pōū ŋ̄ka̍ni̍ ŋɛ̍lɛ̄ŋgi̍ ŋɛ̍lɛ̄ŋgi̍ nɔ̍ kɔ̄ɔ̍le̍ chāāki̍īle̍ŋ ndo̍ ni̍.

⁴ O̍ ko̍ŋ kɔ̍ɔ̍lī, mi̍ cha᷅ kpe̍ŋgbe̍i̍la̍ lēmāsālā chēle̍ŋ bi̍di̍i̍ŋ a̍ lā hīɔ̍ɔ̍lu̍, lā bālāā kpe̍ŋgbe̍i̍ lēmāsā tāso̍o̍ ho̍ō si̍lɔ̍. Lāŋgba̍ā kālla̍ ŋ̄wāŋ bi̍di̍i̍ŋ ā wānāā hīɔ̍ɔ̍lu̍a̍a̍ ā wa̍ īchāli̍ o̍ kpe̍ŋkpe̍i̍la̍ lēmāsāla̍ŋ nda᷅ŋ chōo̍. Nda̍ kpo̍u̍, ā wa̍ ā dōvīa̍ŋ o̍ nyɛ̄lā hūmbūla̍ŋ ni᷄ŋ a̍ mɔ̍si̍lta̍ lēmāsāla̍ŋ nda̍ o̍ lēbōl, lā tōōsīāā a̍ ko̍o̍līi̍yo̍ŋ.

⁵ O̍ ko̍ŋ kɔ̍ɔ̍lī, mi̍ cha᷅ nyɛ̄ ŋūāla̍lɛ̍īyo̍ fūlāa̍ o̍ fo̍ndāŋ kpe̍ŋgbe̍i̍ lēmāsā tāse̍ kōŋ ō wa̍ wo̍, ŋu̍āla̍lɛ̍ī, ŋūāla̍lɛ̍ī bɛ̄ndū. Mi̍ tu̍ɛ̍ī dīōmnda̍ŋ sūɛ̍i̍ mi̍ tu̍ɛ̍ī ta᷅ŋnda̍ŋ dēŋīo̍o̍ fūlāa̍ o̍ kpe̍ŋgbe̍i̍ lēmāsā kōŋ, kpa̍ŋgāŋgāŋ, kpāŋgāŋgāŋ bɛ̄ndū bɛ̍ndū. Mi̍ cha᷅ tɛ̄ŋgɛ̍la̍ŋ sānde̍i̍ lā ŋɔ᷄mmɛ̍ū o̍ kpe̍ŋgbe̍i̍ lēmāsā kōŋ hɔ̄lndɔ̄. Tɛ̄ŋgɛ̍la̍ŋ nda᷅ŋ, la̍ŋ la̍ si̍m le̍ Nyi̍nāā ŋɔ᷄mmɛ̍ūwa̍ sa̍a̍ŋgīāl Mɛ̍lɛ̄ka̍ wa̍ ni̍.

⁶ Mi̍ cha᷅ vɛ̄lɛ̄ nyɔ̄ɔ̍ o̍ kpe̍ŋgbe̍i̍ lēmāsā kōŋ hɔ̄lndɔ̄ tɛ̍ŋgɛ̄lɛ̍sɛ̄ɛ̍ māā, pēē mɛ̄ŋmā īhɛ᷄l bɛ̄ndū. Ō wa̍ dīōndɔ̄ɔ̍ ye̍lēŋgi̍ ye̍lēŋgi̍ bɛ̍ndū māā tōfa᷅ŋ. Mi̍ cha᷅ vɛ̄lɛ̄ nyāā yōōmāa̍ nda̍ nda̍ hi̍ɔ̍ɔ̍lu̍ i̍si̍si̍ o̍ fo̍ndāŋnda̍ŋ sālā hīɔ̍ɔ̍lu̍, a̍ ba̍lāā kpe̍ŋgbe̍i̍ lēmāsā ko̍ŋ. Nyāā yōōmāā hīɔ̍ɔ̍lu̍a̍a̍ ha̍ā, nda̍ a̍a̍ nɔ̍ hɔ̄lta̍ŋ lā tīūwāā nda̍ lēkɔ̄ɔ̍ bā o̍ bā fe̍e̍, lāchī ni̍ a̍ mākɔ̄ɔ̄ ni̍.

⁷ Nyāā yōōmāa̍ ha̍ā, wānā a̍a̍ che᷅ ō tāso̍o̍ pɛ̍ āā kpɔ̍kūŋndo̍ ni̍, dīi̍ŋ ndɔ̄ɔ̍ māā nāū tōōyē, ŋgāa̍ ndɔ̄ɔ̍ hɔ̄lla̍ māā wānā pɔ̍nɔ̍, hīɔ̍ɔ̍lo̍o̍ mɛ̄ɛ̍ kōya᷄ŋndo̍ wā nu̍a̍ā mbō wa̍ bālɔ̄ɔ̍ chōo̍ fɛ̍ɛ̍ɛ̄ yɛ̍.

⁸ Nyāā yōōmāā hīɔ̍ɔ̍lu̍a̍a̍ ha̍ā, ō kɛ᷅ o̍ kɛ᷅ fe̍e̍, ndu̍ o̍o̍ nɔ̍ kūmba᷅ŋnda̍ŋ lā ŋɔ᷄mpu᷅m. Ndu̍yɛ̍, hɔ̄lta̍ŋ lā wa̍ lā tīūwāā nda̍ lēkɔ̄ɔ̍ ba᷅ o̍ bā fe̍e̍, o̍ kūmba᷅ŋnda̍ŋ bɛ̄ŋgu̍ bɛ̍ɛ̍. Le̍ te̍le̍ŋ o̍ te̍le̍ŋ nyāā yōōmāa̍ ha̍ā ā wa̍ chōndo̍ŋ, īdīi̍ ni̍, īchɔ̄l ni̍, pɛ̄ŋgī bɛ̍ɛ̍ ā pɛ̍ŋgī le̍. Ā wa̍ Mɛ̄lɛ̄ka̍ chūūndūūwo̍ āā, “Mɛ̄lɛ̄ka̍ sa̍kpōo̍, Mɛ̄lɛ̄ka̍ sa̍kpōo̍, Mɛ̄lɛ̄ka̍ sa̍kpōo̍, Māsānɔ̄ɔ̍ Mɛ̄lɛ̄ka̍, nu᷄m nɔ̍ kpāāyāa̍ kpo̍u̍ ni̍. Kāni̍ ma̍si̍ndɛ̄ ō chō, pɛ̄ŋgo̍o̍ ho̍ō bɛ̍ɛ̍ ō chō, ndu̍yɛ̍ ō chō vɛ̄lɛ̄ hūnɔ̄ɔ̄.”

⁹ Ndu̍yɛ̍, wāna̍ wa̍ ko̍ŋ o̍ kpe̍ŋgbe̍i̍ lēmāsāa̍ chōo̍, mbo̍ wā yōōmū le̍ fɛ̍ɛ̍ŋ a̍ fɛ̍ɛ̍ŋ ndo̍, pɛ̄ŋgu̍ o̍ pɛ̄ŋgu̍ nyāā yōōmāā kāŋ, nda̍ a̍a̍ so̍li̍ chōndo̍ŋ le̍ ndu̍ bɛ̄ɛ̄le̍ŋ kīo̍o̍ pɛ̍, ndu̍yɛ̍ mā līsa̍ ndu̍ mā yi᷄l ndu̍ ba̍li̍ka̍a̍ pɛ̍,

¹⁰ lāŋgba̍ā kālāā ŋ̄wāŋ bi̍di̍i̍ŋ a̍ wānāā hīɔ̍ɔ̍lu̍a̍a̍ ā chɛ᷄ŋ ā kɔ̍ ba᷅ŋ wūla̍ŋ ndu̍ lāchī o̍ kpe̍ŋgbe̍i̍ lēmāsā kōŋ. Ā ba᷄ŋ wūla̍ŋ pɛ̍, ā sūŋgū mɔ̍si̍lta̍ ndāla̍ lēmāsāla̍ŋ, ā kɛ̄si̍ o̍ kpe̍ŋgbe̍i̍ lēmāsā kōŋ hɔ̄lndɔ̄, ā sōōlu̍u̍ wāna̍ cho̍ ko̍ŋ yo̍o̍mū le̍ fɛ̍ɛ̍ŋ a̍ fɛ̍ɛ̍ŋ ndo̍. Ā chūūndu̍u̍ ndu̍ o̍ chōnde̍i̍ ni᷄ŋ āā,

¹¹ “Nu᷄m cho̍ Māsa̍ nāa̍ ni̍. Ndu̍yɛ̍ nu᷄m cho̍ Mɛ̄lɛ̄ka̍ nāa̍ ni̍. Nu᷄m to̍o̍si̍a̍a̍ nyɔ̄ɔ̍ŋ kpo̍u̍ ni̍, ndu̍yɛ̍ o̍ hɛ̄na᷄ŋ nu̍mndo̍ ni᷄ŋ ŋ̍ to̍o̍si̍a̍ŋ mi̍ ŋ̄ wā kpo̍u̍ ni̍. Le̍la̍ŋ a̍ bɛ̍nda̍ mā sɔ̄la̍ līsāa̍, a̍ bɛ̄ɛ̄le̍ŋ, a̍ ba̍li̍ka̍a̍ le̍ mɛ̄ɛ̍ ŋ̄ chō wāna̍ kpāāyā yɛ̍.”