Sɔ̄ɔ̍ŋ Chɔ̍ɔ̍ma᷄ŋndo̍ŋ 3 - Yāu̍ Mɛ̄lɛ̄ka̍a̍

Yōōŋgōo̍ le̍ ku̍ndā wānāā lāāla᷄ŋnda̍ Sa̍a̍dīī

¹ Mbo̍ dīmūl la̍ vɛ̄lɛ̄ āā, “Po̍o̍nyi̍a̍a̍ yo̍o̍ŋgōo̍ ho̍ō nāa̍ ki̍i̍la̍nɔ̍ Mɛ̄lɛ̄ka̍a̍ chūā, o̍ cho̍ ku̍ndā wānāā lāāla᷄ŋnda̍ Sa̍a̍dīī chi̍e̍e̍ māndāa̍ wo̍. Di̍mu̍l ndu̍ āā, “ ‘Wāna̍ nyi̍nāā ŋɔ᷄mmɛ̍ūwa̍ sa̍a̍ŋgīāl Mɛ̍lɛ̄ka̍ wa̍ ā chō o̍ bā bɛ̄ŋgu̍, mi̍ lōōŋ ŋɔ̍mmɛ̍ū wo̍ŋ ŋ̄ wā ndu̍ o̍ bā wo̍, yōōŋgū o̍ yɔ̍ŋ ndo̍ ndu̍ cho̍ ho̍ō ni̍. Ō dīmi̍ āā, Nyɛ̄ o̍ nyɛ̄ nya̍ chō tōsāa̍ I̍ si̍nā. Wāŋnda̍ chu̍a̍ nya̍ māā lā chō yōōmū, kɛ̍ ā vīlɛ̍i̍ya̍ nya̍ chō ni̍.

² Ndu̍yɛ̍, I̍ sa̍a̍lu̍ŋ māā kūɛ̍i̍la̍ nyāla̍ŋ lā cho̍ wɔ̍ sa̍kpō Mɛ̄lɛ̄ka̍ nūu̍ o̍ hɔ̄l te̍. Le̍la̍ŋ lā tīōndu̍ mī lā tōsa̍ nyɛ᷄m lo̍ wɔ̄ a̍ nya̍ o̍kɔ̄ɔ̄ mi̍ ŋ̄ wā tēndu̍ pīɔ̍m ndo̍ŋ, mī nyɛ̄m mu᷅ŋ ŋ̄ mīīŋgu̍ kpāāyāa̍ sɔ̄lā.

³ Le̍la̍ŋ lā lōōnu̍ŋ nyɛ᷅ nda̍ pɛ̄ɛ̄ku̍ nya̍ wo̍ a̍ nyɛ̄ nya̍ tūēī yo̍, mī lā tōsa̍ ndu̍, ndu̍yɛ̍ mī lā ma᷄l yɔ̄ŋndā nyāla̍ wɔ̍ɔ̍ŋnda̍ŋ. Tē lā tīndu̍ le̍, I̍ cho̍ hūnɔ̄ɔ̄ mī ko̍ma̍l nya̍, ndu̍yɛ̍ hūnɔ̄ɔ̄ nūu̍ yɔ̄nūŋ ni̍ŋ mɛ̄ɛ̍ vīīyo̍ ō hūŋ yɛ̍. Lā si̍nā ni̍ŋ bo̍o̍ndi̍i̍ ya̍ hu᷅ŋ ni̍ŋ nde̍ le̍.

⁴ Kɛ̍ ndu̍yɛ̍, wāŋnda̍ chō wɔ̄ nyɛ̄ pɔ̄mbɔ̄ nya̍ tɛ̄ɛ̄ŋ Sa̍a̍dīī, a̍ nɔ̍ɔ̍li̍a̍a̍ nyɛ̍lā ndāla̍ŋ te̍ wa̍. Ndu̍yɛ̍, ā chō hūnɔ̄ɔ̄ dōvi᷄ŋ o̍ nyɛ̄lā hūmbūla̍ŋ ni᷄ŋ, na̍a̍ nda̍ā mī ŋ̄ wa̍ bālɔ̄ɔ̍, kāni̍ fu̍u̍le̍, ā chō ā bɛ̄ndāā le̍ ke̍ŋ.

⁵ Wānā o̍ wāna̍ hi̍o̍ū lāchī a̍ sīsi̍la̍ŋ a̍ dīāllūŋ kālā pɛ̍ yi̍, mbo̍ lo̍ o̍ ko̍ŋ mbō yēm pɛ̍, nda̍ cho̍ wā ā dōvīa̍ŋ le̍nde̍ o̍ nyɛ̄lā hūmbūla̍ŋ ni᷄ŋ ni̍. Ndu̍yɛ̍, wānā ko̍ŋ I̍ so̍lī di̍o̍lā ndɔ̄la̍ŋ o̍ yāu̍ wānāa̍ nɔ̍ yōōmū kpe̍e̍kpe̍i̍yo̍ wa̍ ni᷄ŋ te̍. O̍ ko̍ŋ kɔ̍ɔ̍lī, mī chɔ̍m ndu̍ o̍ Fi̍nyā nūu̍ lo̍ a̍ ki̍i̍la̍a̍ ndūa̍a̍ māā wāna̍ nūu̍ o̍ cho̍ ni̍.’

⁶ “Wānā o̍ wāna̍ nɔ̍ nīlā tūɛ̄īyāā īsɔ̄ɔ̍ pɛ̍, mɛ̄ɛ̍ lā ya᷄ŋ ni᷅la̍ŋ mī lā tūēī mī lā si̍na̍ nyɛ̄ Nyi̍na̍ Mɛ̄lɛ̄ka̍a̍ chō ku̍ndālā wānāā lāāla᷄ŋnda̍ dīmūllo̍ wo̍ pɛ̍ŋgu̍.”

Yōōŋgōo̍ le̍ ku̍ndā wānāā lāāla᷄ŋnda̍ Fīlēdɛ̍ɛ̍fīāā

⁷ O̍ ko̍ŋ kɔ̍ɔ̍lī, mbo̍ dīmūl la̍ āā, “Po̍o̍nyi̍a̍a̍ yo̍o̍ŋgōo̍ ho̍ō nāa̍ ki̍i̍la̍nɔ̍ Mɛ̄lɛ̄ka̍a̍ chūā, o̍ cho̍ ku̍ndā wānāā lāāla᷄ŋnda̍ Fīlēdɛ̍ɛ̍fīāā māndāa̍ wo̍. Di̍mu̍l ndu̍ māā, “Wānā sa̍kpōo̍ ō wānā nɔ̍lā mā ti̍i̍nda̍ŋ ndo̍, ndu̍yɛ̍ mbo̍ nɔ̍ ki̍īye̍ le̍ chīɛ̍i̍ Māsāa̍ Dēēvi̍o̍o̍ wo̍, o̍ ku̍mbī di̍o̍o̍ wānā o̍ wānā nɔ̍lā ki̍ndā le̍ wo̍, o̍ kīndā wānā o̍ wānā nɔ̍lā mbō kūmbi̍ le̍ wo̍, yōōŋgū o̍ yɔ̍ŋ ndo̍ ndu̍ cho̍ ho̍ō ni̍.

⁸ Ō dīmi̍ māā, nyɛ̄ o̍ nyɛ̄ nya̍ chō tōsāa̍ I̍ si̍nā. Lā kɛ̄si̍ŋ o̍ kɔ̄l māā I̍ ku̍mbu̍l nya̍ dīo̍o̍, ndu̍yɛ̍ wānā o̍ wānā nɔ̍lā mbō kīnda̍ ndu̍ le̍. I̍ si̍nā māā lā nɔ̍ kpa̍a̍yā bɔ̍ɔ̍ le̍, kɛ̍ ndu̍yɛ̍ mi̍ lā tōsā nyɛ̄ ya̍ I̍ di̍mu̍l nya̍ wo̍, ndu̍yɛ̍ lā kɛ̄ɛ̍ ya̍ le̍.

⁹ Kɛ̍ ku̍nda̍ to᷅l ho̍ō Sēta̍nā kɔ̄ɔ̄lī wo̍, ndu̍ yɔ̍nūŋ ni̍ māā ku̍nda̍ cho̍ chōōla̍ŋ dīmīo̍o̍ māā Chu̍ūwa̍ nda̍ chō ni̍, kɛ̍ ā cho̍ yɛ̍ lāChu̍ū lēkɛ̍ndɛ̍ī le̍ wa̍, lā kɛ̄si̍ŋ o̍ kɔ̄l māā I̍ cho̍ tōsā mā hu᷄ŋ tu̍ndu᷄ŋ nya̍ o̍ lābɛ̄ŋgu̍ ni̍ŋ. Ā chō sīnā māā I̍ ka̍a̍la̍ nya̍.

¹⁰ Ndu̍yɛ̍, mɛ̄ɛ̍ ya̍ I̍ di̍mu̍l nya̍ le̍ bīūwɔ᷄ŋndo̍ o̍ sɔ̄ɔ̍ŋ pa̍la᷄ŋ ko̍māl nya̍ wo̍ŋ ni᷄ŋ, mi̍ lā bīūnu̍ŋ mɛ̄ɛ̍ ya̍ I̍ di̍mu̍l nya̍ yɛ̍. Le̍ he̍ī, bōōndi̍i̍ nyɛ̄ pālāā bɛ̄ndōo̍ tūāl ni̍ŋ o̍ chi̍e̍ēŋndo̍ chōo̍ le̍ wāŋnda̍ kpo̍u̍ tɔ̄ɔ̄nda᷄ŋndo̍ ve̍, nya̍ nya̍ I̍ ma̍ndā ni̍ŋ nya̍ lēni᷄ŋ.

¹¹ I̍ cho̍ hūnɔ̄ɔ̄ su̍ŋ su̍ŋ. Le̍la̍ŋ nyɛ̄ nya̍ nɔ̄ wo̍, lā hīo̍u̍ la̍chi̍ a̍ ndu̍ bīyɔ̄ɔ̍ kpi̍ŋ, yɔ̄ŋi̍ wānā o̍ wānā ku̍u̍na̍ nya̍ fānda̍ cho̍ le̍ nya̍ wo̍ sɔ̄lāa̍.

¹² Wānā o̍ wāna̍ hi̍o̍ū lāchī a̍ sīsi̍la̍ŋ a̍ dīāllūŋ kāla̍ pɛ̍ yi̍, mbō lo̍ o̍ ko̍ŋ mbō yēm pɛ̍, I̍ to̍sa̍ ndu̍ sūŋgbu̍le̍ŋ o̍ Mɛ̄lɛ̄ka̍ nūu̍ lo̍ chi̍ɛ̍ī ni̍ŋ, ndu̍yɛ̍ fɛ̍ɛ̍ŋ a̍ fɛ̍ɛ̍ŋ ō fu̍lā o̍ chīɛ̍i̍ Mɛ̄lɛ̄ka̍a̍ ni᷄ŋ te̍. Ndu̍yɛ̍ wānā ko̍ŋ, I̍ cho̍ ndu̍ dīōlā Mɛ̄lɛ̄ka̍ nūu̍ po̍o̍nyīāā chōo̍. O̍ ko̍ŋ kɔ̍ɔ̍lī, mī po̍o̍nyi̍a̍a̍ vɛ̄lɛ̄ ndu̍ dīōlā chi̍e̍e̍ Mɛ̄lɛ̄ka̍ nūu̍ chōo̍, o̍ cho̍ chɔ̄nɔ᷄ŋ Ɛ̄chɛ̍nɛ̄ nāa̍ Mɛ̄lɛ̄ka̍ chūā mbō tōl lo̍, ndu̍ yɔ̍nūŋ ni̍ māā Chūlu̍sɛ̄lɛ̄m sɛ̍nɛ̄īyo̍. Ndu̍yɛ̍, I̍ cho̍ vɛ̄lɛ̄ ndu̍ dīōlā nīla̍ sɛ̍nɛ̄īla̍ŋ pōōnyīāā chōo̍.

¹³ “Wānā o̍ wāna̍ nɔ̍ nīlā tūɛ̄īyāā īsɔ̄ɔ̍ pɛ̍, mɛ̄ɛ̍ lā ya᷄ŋ ni᷅la̍ŋ mī lā tūēī, mī lā si̍na̍ nyɛ̄ Nyi̍na̍ Mɛ̄lɛ̄ka̍a̍ chō ku̍ndālā wānāā lāāla᷄ŋnda̍ dīmūllo̍ wo̍ pɛ̄ŋgu̍.”

Yōōŋgōo̍ le̍ ku̍ndā wānāā lāāla᷄ŋnda̍ Lāwo̍di̍sīā

¹⁴ O̍ ko̍ŋ kɔ̍ɔ̍lī, mbo̍ dīmūl la̍ āā, “Po̍o̍nyi̍a̍a̍ yo̍o̍ŋgōo̍ ho̍ō nāa̍ ki̍i̍la̍nɔ̍ Mɛ̄lɛ̄ka̍a̍ chūā, o̍ cho̍ ku̍ndā wānāā lāāla᷄ŋnda̍ Lāwo̍di̍sīā chi̍e̍e̍ māndāa̍ wo̍. Di̍mu̍l ndu̍ āā, “Wāna̍ di̍mī āā, Ī yɔ̄nu̍ŋ le̍nde̍ o̍ nyɛ̄ o̍ nyɛ̄ ni᷄ŋ ndo̍, ndu̍yɛ̍ mbo̍ wā wāna̍ di̍mī to᷅nya̍ Mɛ̄lɛ̄ka̍a̍ ō wānā nɔ̍lā mā ti̍i̍nda̍ŋ ndo̍, o̍ ko̍ŋ kɔ̍ɔ̍lī, mbo̍ wā wu̍lu̍ŋndo̍ le̍ nyɛ̄ o̍ nyɛ̄ fe̍e̍ Mɛ̄lɛ̄ka̍ tōōsi̍a̍a̍, yōōŋgū o̍ yɔ̍ŋ ndo̍, ndu̍ cho̍ ho̍ō ni̍.

¹⁵ Ō dīmi̍ āā, ‘Nyɛ̄ o̍ nyɛ̄ nya̍ tōsa̍ I̍ si̍nā. Lā cho̍ a̍ tu̍ū le̍, lā cho̍ yɛ̍ ā nyūlū le̍. Ndu̍ o̍o̍ bɛ̍ndā bɛ̍ɛ̍ mī nya̍ a̍a̍ si̍m nɛ̄ī pi᷅lɛ̍.

¹⁶ Kɛ̍ nu̍a̍ā cha᷅m cha᷅m nya̍ chō ni̍. Lā cho̍ a̍ nyu̍lū le̍, lā cho̍ a̍ tu̍ū le̍. Le̍ he̍ī, lā kūīsi̍ŋ ya̍ o̍ kɔ̄l kpu̍.

¹⁷ Lā dīmi̍ māā lā chō ā sūlāā, māā dɛ̍nɛ̍ kɛ̍ndɔ̄ɔ̍ chō nya̍ chōo̍, māā nyɛ̄ o̍ nyɛ̄ cho̍ nya̍ lēpɛ̄ŋ te̍. Lā si̍nā bɛ̍ɛ̍ māā mɔ̍nɛ̍i̍ nyɛ̍i̍ ī chō wāŋnda̍ ī bīyāā ta̍u̍ a̍ kūɛ̄ī bɛ̄ndūi̍ cho̍ nya̍ chōo̍ ve̍ le̍. Lā chō ā tāmbɛ̍i̍, ā sūmɛ̍i̍, ndu̍yɛ̍ mi̍ lā wā tūū fo̍ndō.

¹⁸ Le̍la̍ŋ, I̍ cho̍ nya̍ sīlāa̍ le̍ mī lā hu᷄ŋ pi̍o̍ndū ya̍ ko̍o̍līi̍yo̍ŋ ŋ̍ cho̍ nyɛ̄ kɛ̄ndɛ̄ wa̍la̍ŋ ndo̍ŋ o̍ bā mī lā su᷄l. Ndu̍yɛ̍, lā pīōndu̍ nyɛ̍lā hūmbūla̍ŋ ya̍ o̍ bā le̍ mī lā chūɛ̄ɛ̄nu̍ŋ mī lā kūmbū nya̍ pi̍la̍ īsūla̍, yɔ̄ŋi̍ wāŋnda̍ ā chɔ̍ nya̍ tūū fo̍ndō. Ndu̍yɛ̍, lā pīōndu̍ ko̍o̍ma̍ lāhɔ̄lla̍ŋ ya̍ o̍ bā le̍ mī lā sūūnu̍ŋ o̍ lāhɔ̄l, mī lā chē.

¹⁹ Wānāā ya̍ I̍ ka̍a̍la̍ wa̍ nda̍ ya̍ I̍ su̍a̍ā o̍ ka̍lā ka̍lā le̍ nyɛ̄ nda̍ tōsa̍ wo̍ ni̍, ndu̍yɛ̍ mī tu̍si̍ nda̍ nyɛ̄ pālāa̍ chōo̍. Le̍la̍ŋ, lā lāndu̍ŋ kɔ̍l o̍ sūɛ̍i̍ Mɛ̄lɛ̄kɛ̍i̍, ndu̍yɛ̍ mī lā ma᷄l yɔ̄ŋndā nyāla̍ wɔ̍ɔ̍ŋnda̍ŋ.

²⁰ Lā kɛ̄si̍ŋ o̍ kɔ̄l māā I̍ cho̍ īsīsi̍ o̍ dīō mi̍ wa᷅ dīo̍o̍ kūndɔ̄ɔ̍. Wānā o̍ wāna̍ tu̍e̍ī pɛ̍ di̍ōm nūu̍, mbō kūmbi̍ dīo̍o̍ pɛ̍, I̍ lu̍ɛ̍ī o̍ ndu̍ lo̍ chi̍ɛ̍ī ni̍ŋ, ndu̍yɛ̍ na̍a̍ ndu̍ mī ŋ̄ dē nyɛ̄ dīa̍a̍ lātūlu̍.

²¹ Wānā o̍ wāna̍ hi̍o̍ū lāchī a̍ sīsi̍la̍ŋ a̍ dīāllūŋ kālā pɛ̍ yi̍, mbō lo̍ o̍ ko̍ŋ mbō yēm pɛ̍, I̍ chɛ̍l ndu̍ ō cha᷄l la̍ īkɛ̄i̍ o̍ kpe̍ŋgbe̍i̍ ni̍ lēmāsāa̍ chōo̍ mɛ̄ɛ̍ ya̍ bɛ̍ɛ̍ I̍ ye᷅m mi̍ I̍ cha᷅l Fi̍nyā nūu̍ īkɛ̄i̍ o̍ kpe̍ŋgbe̍i̍ ndɔ̍ lēmāsāa̍ chōo̍ yɛ̍.’

²² “Wānā o̍ wāna̍ nɔ̍ nīlā tūɛ̄īyāā īsɔ̄ɔ̍ pɛ̍, mɛ̄ɛ̍ lā ya᷄ŋ ni᷅la̍ŋ mī lā tūēī, mī lā sīna̍ nyɛ̄ Nyi̍na̍ Mɛ̄lɛ̄ka̍a̍ chō ku̍ndālā wānāā lāāla᷄ŋnda̍ dīmūllo̍ wo̍ pɛ̄ŋgu̍.”