Pu̍lɔ̍wāā 8 - Yāu̍ Mɛ̄lɛ̄ka̍a̍

Chōnde̍i̍ le̍ kɔ̄l kālo̍o̍ sāŋgālāa̍

¹ Kɔ̄l kālo̍o̍ ō chō vēēlōo̍ mɛ̄ɛ̍ wāŋndo̍ ō sīm nu̍a̍ā mbō wa̍ wāŋndo̍ vēēlōo̍ chōo̍ cho̍ kpe̍le̍ŋ yɛ̍. Sīnā pɛ̄ŋgo̍o̍ ō chō yōndāa̍ chōo̍ cho̍o̍ kpe̍le̍ŋ, le̍ mī lā tūēī ndu̍ dīōm.

² Ō chō īsīsi̍ o̍ pēmbo᷄ŋ chōo̍ o̍ nɛ̄īyo̍ da̍ŋga̍la̍, ndu̍yɛ̍ a̍ o̍ nɛ̄īla̍ ba᷅ŋnda̍ŋ, mbo̍ wā vēēlōo̍.

³ Ō chō īsīsi̍ o̍ dīō sāāsa̍ chi̍o̍o̍, nāa̍ wānā o̍ wānā ke̍e̍kū mā lūɛ̄ī chi̍e̍e̍ wa̍, mbo̍ wā dīmīo̍o̍ āā,

⁴ “Nya̍ wānā o̍ wāna̍ cho̍ hīōūwɔ̄ɔ̍ na̍nu᷄ŋ lā ya᷄ŋ ya̍ nīla̍ŋ. I̍ cho̍ yōndāa̍ nāa̍ nya̍ ŋ̄wāŋndā chīe̍e̍ chu̍a̍ kpo̍u̍ le̍ mī lā tūēī ya̍ dīōm.

⁵ Nya̍ si̍nā dɛ̍nɛ̍ o̍ dɛ̍nɛ̍ le̍ wa̍, lā ya᷄ŋ ni᷅la̍ŋ mī lā sīmnu᷄ŋ wa̍nāā kɔ̄l kālu̍. Nya̍ nɔ̍ dīɔ̄mnde̍ wa̍, lā ya᷄ŋ ni᷅la̍ŋ mī lā kēndū kɔ̄l.

⁶ Lā ya᷄ŋ ya̍ nīla̍ŋ, fo̍ndōle̍, I̍ nɔ̍ dīōmndā kɛ̄ndɛ̄ kɛ̍ndɛ̄ o̍ sōndō le̍ nya̍ dīmūl. Ndu̍yɛ̍ nyɛ̄ o̍ nyɛ̄ fu̍lā ya̍ o̍ sōndō, tōnya̍a̍ o̍ cho̍ ni̍.

⁷ Tōnya̍a̍ ndu̍ ya̍ I̍ di̍mī lɔ̍ɔ̍ lɔ̍ɔ̍ ni̍. I̍ chɛ᷅l mī sōndō nūu̍ dīmi̍ chōōla̍ŋ te̍.

⁸ Nyɛ̄ o̍ nyɛ̄ ya̍ I̍ di̍mi̍ pɛ̍, mɛ̄ɛ̍ mbō wa̍ o̍ nɛ̄ī sa̍kpō. I̍ di̍mī di̍ōm o̍ dīōm, mī ka̍fāla̍ŋ lā wa̍ lēni᷄ŋ, ɔ̄ɔ̄ mbō wa̍ dīōm lāchōōwā le̍.

⁹ Wānāa̍ nɔ̍ sīnā pɛ̄ŋgo̍o̍ wa̍, dīōmnda̍ŋ nda᷅ŋ lā chō kpe̍nde̍ke̍le̍ nda̍ o̍ hɔ̄l, wānāa̍ nɔ̍ kɔ̄l kālo̍o̍ wa̍, ā sīnā māā dīōmnda̍ŋ nda᷅ŋ lā chō dīōmndā tōnya̍.

¹⁰ Le̍la̍ŋ yɔ̄ŋi̍ nya̍ chīe̍e̍ chi̍e̍e̍ le̍ ka̍ni̍ŋ hu̍mbo᷄ŋ sɔ̄lāa̍ yɛ̍, lā chīēē chi̍e̍i̍ le̍ mī lā sɔ̄la̍ dīōmndā sīlāālā nīla̍ŋ. Yɔ̄ŋi̍ nya̍ chīēē chi̍e̍i̍ le̍ ko̍o̍līi̍ kɛ̍ndɛ̄ kɛ̍ndɛ̄i̍ yɛ̍, lā chīēē chi̍e̍i̍ le̍ tāāsi̍o̍o̍ sɔ̄lāa̍.

¹¹ “Kāni̍ fo̍ndōle̍, kɔ̄l kālo̍o̍ ō chō nyɛ̄ kpe̍e̍kpe̍i̍, ō hīōū nyɛ̄m ba̍āŋ kāla᷄ŋ wāŋ lāāndūa̍a̍ ā bāāyīāŋndo̍ŋ. Nyɛ̄ o̍ nyɛ̄ cho̍ mī wānā ye̍e̍ma̍ ndu̍ mbō sīīma᷅ŋ māā kɔ̄l kālo̍o̍ le̍.

¹² Ya̍ cho̍ kɔ̄l kālo̍o̍ ni̍, I̍ nɔ̍ sīnā pɛ̄ŋgo̍o̍, a̍ tāāsi̍o̍o̍, ndu̍yɛ̍ mi̍ wā wānā si̍nāā īsɔ̄ɔ̍.

¹³ Wāna̍ nɔ̍ pɛ̍ si̍o̍ōŋnde̍ le̍ Mɛ̄lɛ̄ka̍ Ya̍a̍wɛ̄ɛ̄, mɛ̄ɛ̍ mā tu̍l yɔ̄ŋ wɔ̄ɔ̍ŋndo̍ lēyɛ̄. Nyɛ̄ o̍ nyɛ̍ cho̍ nīīlū yōŋgāa̍, a̍ hɔ̄lāā hēēlāa̍, a̍ nīīlūlā dɛ̍nɛ̍ wɔ̍ɔ̍ŋnda̍ŋ, ndu̍yɛ̍ a̍ chōōla̍ŋ, I̍ tu̍l la̍ŋ lēyɛ̄.

¹⁴ Sīlālā kɔ̄l kālu̍ la̍ŋ, a̍ sɔ̄ɔ̍ŋ kɔ̄l kālo̍ŋ, mu̍ŋ cho̍ sɔ̄ɔ̍ŋ nūu̍ŋ ni̍. I̍ nɔ̍ sīnā pɛ̄ŋgo̍o̍ ndu̍yɛ̍ a̍ kpāāyāa̍.

¹⁵ O̍ sa̍bū nūu̍ ni᷄ŋ wāŋnda̍ ā wā ma̍sāā bɛ̍ndūa̍a̍ lɛ̄ŋnde̍ chōo̍ ni̍. Ndu̍yɛ̍ o̍ sa̍bū nūu̍ ni᷅ŋ wānāa̍ cho̍ wāŋnda̍ chīla̍ŋ nda̍ ā dūāū sa̍wāla̍ŋ o̍ nɛ̄ī sa̍kpōo̍ chōo̍ ni̍.

¹⁶ Ya̍ wānāā bɛ̄ndūa̍a̍ ā sōlīŋ kpe̍ku̍ ni̍, le̍ lɛ̄ŋnde̍ wāa̍ chōo̍ la̍ma̍sā. Wānāā bɛ̄ndūa̍a̍ cho̍ lɛ̄ŋnde̍ chīla̍ŋ o̍ chi̍e̍ēŋndo̍ ni᷄ŋ nda̍ kpo̍u̍, ya̍ nda̍ sōlīŋ kpe̍ku̍ ni̍.

¹⁷ Wānāa̍ ka̍a̍la̍ ya̍ wa̍, nda̍ ya̍ I̍ ka̍a̍la̍ ni̍, ndu̍yɛ̍ wāna̍ nu̍u̍va̍ ya̍ pɛ̍, a̍ sa̍a̍lu̍ŋ ya̍.

¹⁸ I̍ nɔ̍ sūlta̍ŋ o̍ bā a̍ bɛ̄ɛ̄le̍ŋ le̍ wāŋnda̍ pīɔ̄ūwo̍, ndu̍yɛ̍ mi̍ nɔ᷅ dɛ̍nɛ̍ kɛ̍ndɔ̄ɔ̍, a̍ hīōūwɔ̄ɔ̄ lāchī fɛ̍ɛ̍ŋ a̍ fɛ̍ɛ̍ŋ ndo̍ le̍ wāŋnda̍ kīo̍o̍.

¹⁹ Nyɛ̄ wānā sɔ̍lā ya̍ o̍ bā wo̍, ō bɛ̄nda̍ mbo̍ hīāū ko̍o̍līi̍ kɛ̍ndɛ̄ kɛ̍ndɛ̄i̍, ō bɛ̄nda̍ mbo̍ hīāū vɛ̄lɛ̄ ka̍ni̍i̍ hu̍mbūīī kɛ̄ndɛ̄ kɛ̍ndɛ̄i̍.

²⁰ I̍ cho̍ o̍ nɛ̄i̍ tōnya̍a̍ chōo̍ le̍ te̍le̍ŋ o̍ te̍le̍ŋ, ndu̍yɛ̍ sa̍kpōyɛ̍i̍ ndi̍ ya̍ I̍ tu̍āl kɔ̍ɔ̍lī lɔ̍ɔ̍ lɔ̍ɔ̍ ni̍.

²¹ Wānāa̍ ka̍a̍la̍ ya̍ wa̍, tōsāa̍ ya̍ I̍ to̍sā ni̍ mā su᷄l, mī to̍sa̍ mā pēi̍ chīɛ̄īlā ndāla̍ŋ a̍ nyɛ̄m sūla᷄ŋ.

²² “Ya̍ wa̍ nyɛ̄ tāse̍ Mɛ̄lɛ̄ka̍ Ya̍a̍wɛ̄ɛ̄ o̍ to̍o̍si̍a̍a̍ wo̍ ni̍. Lɔ̍ɔ̍pa̍ mbo̍ tōōsīāā nyɛ̄ o̍ nyɛ̄ sīndɛ̄, ya̍ fɛ̍lɛ̍ŋ o̍ to̍o̍si̍a̍a̍.

²³ Ya̍ Mɛ̄lɛ̄ka̍ ke̍le̍ŋa̍ tōōsi̍a̍a̍ o̍ kāndɔ᷄ŋndo̍ pe̍kēkē ni̍, lɔ̍ɔ̍pa̍ bɛ̍ɛ̍ mi̍ chi̍e̍ēŋndo̍ ō kāndu᷄ŋ.

²⁴ Vīōlɔ᷄ŋ nūu̍ pēē mɛ̄ŋmā īhɛ᷄llo̍ ndu̍ o̍o̍ to̍o̍si̍a̍ŋ ndɔ̍ bɛ̍ɛ̍ le̍, kɛ̄lɛ̄ŋgāā ni᷅ŋ te̍ pēēla̍ pɔ̍mbɔ̄la̍ŋ.

²⁵ Lɔ̍ɔ̍pa̍ bɛ̍ɛ̍ mi̍ pēmbūŋ bɛ̄ndo᷄ŋ ŋ̄ wā, ya̍ i̍i̍ ve̍lu᷄ŋ ni᷅ŋ. I̍ wa̍ ni᷅ŋ, lɔ̍ɔ̍pa̍ bɛ̍ɛ̍ mi̍ pēmbo᷄ŋ ŋ̄ sīm o̍ fo̍ndāŋndā ŋ̍ cho̍ la̍ŋ.

²⁶ Mɛ̄lɛ̄ka̍ ndu̍ o̍o̍ to̍o̍si̍a̍a̍ wɔ̍ bɛ̍ɛ̍ chi̍e̍ēŋndo̍ a̍ yōndōla̍ cho̍ lēni᷄ŋ nda̍ te̍ mi̍ vi̍a̍lu᷄ŋ. Pūūlu̍ tāso̍o̍ lɛ̄ŋ bɛ̍ɛ̍, ndu̍ o̍o̍ ve̍ wɔ̍ bɛ̍ɛ̍ le̍, mi̍ wā.

²⁷ I̍ wa̍ o̍ hɔ̄lndɔ̄ mi̍ Mɛ̄lɛ̄ka̍ tōōsīāā ha̍la̍a̍. I̍ wa̍ lo̍ŋ mbo̍ hāndū pɛ̄ŋgu̍la̍ŋ ha̍la̍a̍ tɛ̄ɛ̄ŋ a̍ pēē mɛ̄ŋmā īhɛ᷄llo̍.

²⁸ I̍ wa̍ lo̍ŋ, mbo̍ tōōsīāā ha̍la̍ hūmbōo̍, ndu̍yɛ̍ mbo̍ tōōsīāā vɛ̄lɛ̄ lūmūŋ bɛ̄ndo᷄ŋ o̍ pēēla̍ŋ.

²⁹ I̍ wa̍ lo̍ŋ bōōndi̍i̍ o̍ wa̍ pēē mɛ̄ŋmā īhɛ᷄llo̍ pɛ̄ŋgu̍la̍ŋ hēndūllo̍, mbo̍ dīmūl pe̍e̍ mɛ̄ŋmā īhɛ᷄llo̍ māā ō hi̍a̍ū pɛ̄ŋgu̍la̍ la̍ŋ te̍ ve̍. I̍ wa̍ lo̍ŋ, mbo̍ dūāū chīyīī chi̍e̍ēŋndo̍ ho̍ō ō si᷄m chōo̍ ve̍ lɛ̄ŋ.

³⁰ I̍ wa̍ ndu̍ īkɛ̄i̍, mɛ̄ɛ̍ wāna̍ cha̍ā ta̍ŋgūllo̍ wo̍ ō wā nu̍a̍ā wāŋndo̍ īkɛ̄i̍ o̍ tāŋgūllo̍ mbō mɛ̄ɛ̄ndāŋ wa̍nā ko̍ŋ yɛ̍. Ndu̍yɛ̍ lēpāa̍ o̍ lēpāa̍ ō wa̍ kɔ̄llo̍ nāŋɔ̄ɔ̍ a̍ ya̍. Ndu̍yɛ̍ ya̍ bɛ̍ɛ̍, I̍ wa̍ a̍ kɔ̄l kɛ̄ndɔ̄ɔ̍ le̍ te̍le̍ŋ o̍ te̍le̍ŋ ndu̍ lāchī.

³¹ Mi̍ na᷅ŋ kɔ̄l a̍ chi̍e̍ēŋ o̍ to̍o̍si̍a̍a̍ wo̍, ndu̍yɛ̍ mi̍ na᷅ŋ kɔ̄l a̍ wāŋndā chīe̍e̍ya̍a̍ cho̍ o̍ chi̍e̍ēŋ kālāa̍ ni᷄ŋ nda̍.

³² “Le̍la̍ŋ lā ya᷄ŋ ya̍ nīla̍ŋ pūa̍a̍ nīa̍a̍. Wānā o̍ wāna̍ to̍sa̍ nyɛ̄ ya̍ I̍ di̍mu̍l ndu̍ le̍ tōsāa̍ wo̍ pɛ̍, ō pɛ̄l tɔ̄nɔ̄ɔ̍.

³³ Lā ya᷄ŋ ni᷅la̍ŋ ō nyɛ̄ ya̍ I̍ cho̍ nya̍ pɛ̄ɛ̄kōo̍ wo̍, mī lā sɔ̄la̍ kɔ̄l kālo̍o̍. Lā ma᷅l nyɛ̄ ya̍ I̍ cho̍ nya̍ pɛ̄ɛ̄kōo̍ wo̍ lɛ̄ŋ te̍.

³⁴ Wānāa̍ ya᷅ŋ ha̍ā nīla̍ŋ o̍ pɛ̄ɛ̄kū nūu̍, mā hūŋ o̍ ya̍ lo̍ dīō lēpāa̍ o̍ lēpāa̍, mā chāl la̍ chūmndo̍ o̍ dīo̍o̍ sōndōo̍ le̍ ya̍ nīla̍ŋ yāŋɔ̄ɔ̍ wa̍, ā pɛ̄l tɔ̄nɔ̄ɔ̍.

³⁵ Wānā o̍ wāna̍ sɔ̍la̍ ya̍ pɛ̍, ō sɔ̄la̍ yōōmōo̍. Ndu̍yɛ̍ wānā wa̍ā le̍nde̍, nyīnāa̍ Mɛ̄lɛ̄ka̍ Ya̍a̍wɛ̄ɛ̄ o̍ cha᷅ ndu̍ ni̍.

³⁶ Wānā o̍ wāna̍ bu̍mba̍ le̍ ya̍ sɔ̄lāa̍ pɛ̍ mɛ̄ɛ̍ ō yɔ̄ŋu̍l ndu̍ pi̍la̍. Wānā o̍ wāna̍ tu̍l la̍ lēyɛ̄ pɛ̍, mɛ̄ɛ̍ pīɔ̍mndo̍ o̍ ka̍a̍la̍ ni̍.”