Pu̍lɔ̍wāā 7 - Yāu̍ Mɛ̄lɛ̄ka̍a̍

¹ Po̍ nūu̍, wa̍ lo̍o̍nɔ᷄ŋndo̍ a̍ nyɛ̄ ya̍ I̍ cho̍ nu̍m ho̍ō dīmūllo̍ wo̍. Nyɛ̄ o̍ nyɛ̄ ya̍ I̍ cho̍ nu̍m dīmūllo̍ le̍ tōsāa̍, kɛ̍si̍ŋ ndu̍ o̍ kɔ̄l.

² Nyɛ̄ o̍ nyɛ̄ ya̍ I̍ di̍mu̍l nu̍m le̍ tōsāa̍, to̍sa̍ ndu̍, o̍ ko̍ŋ mā wa̍ yōōmū. Nyɛ̄ o̍ nyɛ̄ ya̍ I̍ cho̍ nu̍m pɛ̄ɛ̄kōo̍, ma̍nda̍ ndu̍ o̍ kɔ̄l nūmndo̍ ni᷄ŋ mɛ̄ɛ̍ ŋ̄ māndā nu̍a̍ā hɔ̄ltē nūmnde̍ŋ yɛ̍.

³ Ō wa̍ nu̍m o̍ kɔ̄l mɛ̄ɛ̍ kēlɛ̄i̍ ī wā nu̍a̍ā wānā o̍ ŋ̄sū yɛ̍. Po̍o̍nyi̍a̍ŋ ndu̍ o̍ kɔ̄l mɛ̄ɛ̍ nda̍ pōōnyīāā nu̍a̍ā nyɔ̄ɔ̍ o̍ pɛ̄ŋgɛ̍i̍ chōo̍ le̍ lōōnɔ᷄ŋndo̍ yɛ̍.

⁴ Si̍i̍ŋgu̍u̍ kɔ̍l kālo̍o̍ māā yēmā nu̍m, o̍ ko̍ŋ kɔ̍ɔ̍lī, mā chu̍a̍ sīnā pɛ̄ŋgo̍o̍ māā chāa̍ŋ nūm kɛ̍ndɛ̄ kɛ̍ndɛ̄.

⁵ Lā chō nu̍m mālā, a̍ tu᷅l wa᷅ŋ lāāndūa̍a̍ cho̍ o̍ nɔ̄la̍ŋ, kɛ̍ ma̍ wā wāŋ lāāndūāā sūūndɛ̍i̍ya̍ wa̍ kɔ̄ɔ̄lī le̍. Nda̍ yɔ̍nūŋ ni̍ māā wāŋ lāāndūa̍a̍ mɛ̍ī pi̍a̍a̍ndāā ndāa̍, mā bālū pu̍a̍a̍ che̍le̍ŋ nda̍ kɔ̄ɔ̄lī a̍ sōndōlā yēēlɛ̍i̍la̍ŋ nda̍.

A̍ wānā la̍nɔ̍ su̍u̍ndɛ̍i̍yo̍ o̍kɔ̄ɔ̄

⁶ Pāa̍le̍ pi᷅lɛ̍, I̍ wa̍ o̍ ya̍ lo̍ chi̍ɛ̍i̍ ni̍ŋ mi̍ wa᷅ tōfāa̍ o̍ wu̍ndɛ̄i̍yo̍.

⁷ Mi̍ cha᷅ chūāā pīāāndūa̍a̍ ā pūm ā nda̍ a̍a̍ nɔ̍ ta̍āsi̍ bɔ̄ɔ̄ le̍ wa̍ bālɔ̄ɔ̍. Chūāā pīāāndūa̍a̍ ha̍ā mi̍ cha᷅ ō pīlɛ̍ nda̍ tɛ̄ɛ̄ŋ ndu̍ o̍o̍ nɔ̍ kɔ̍l kālu̍ le̍.

⁸ Ō wa̍ kɔ̄la̍ŋ o̍ nɛ̄ī, bā sɔ̍ŋgi̍le̍ŋ le̍ kɔ̄la̍ŋ o̍ chīɛ̄ī chūā pīlɛ̍. Ō wa̍ kēēkōo̍ kūmbū chīɛ̄ī chūa̍a̍ ho̍ō.

⁹ A̍ te̍le̍ŋ fīti̍līo̍o̍ ki̍nɛ̍i̍ sūɛ̍i̍ he̍ī ī wa̍ yɔ̄nɔ᷄ŋndo̍ ni̍. Nyūmnda̍ŋ ma̍a̍ ka̍ndū wɔ̄ ko̍ to̍lɔ̄ɔ̍ ki̍nɛ̍i̍.

¹⁰ O̍ ko̍ŋ kɔ̍ɔ̍lī, mi̍ cha᷅ mi̍ chūa̍a̍ ho̍ō ō hūŋ pōo̍ ho̍ō lāchī. Ō wa̍ ō dōvīa̍ŋ mɛ̄ɛ̍ wānā la̍nɔ̍ ti̍a̍māa̍ ti̍ām ho̍ō le̍ nyɛ̄ sɔ̄lāa̍ wo̍ ō dōvīŋ nu̍a̍ā yɛ̍. Wānā a̍a̍ cha᷅ ndu̍ māā ō wa̍ sɔ̄ɔ̍ŋ tūūnɔ᷄ŋndo̍ o̍ kɔ̄l kpe̍e̍kpe̍i̍ le̍ mɛ̄ɛ̍ o̍ ti̍ū po̍o̍ ho̍ō bā yɛ̍.

¹¹ Wānā la̍nɔ̍ hɔ̄lāā hēēlāa̍ nɔ̍ la̍si̍ɔ̍mbu̍ le̍ wo̍ o̍ wa̍ ni̍, wānā la̍nɔ̍ che᷅l chi̍ɛ̍ī ni̍ŋ te̍ wo̍.

¹² Le̍ te̍le̍ŋ o̍ te̍le̍ŋ ō chō o̍ nɛ̄īla̍ŋ ɔ̄ɔ̄ o̍ lɔ̍ɔ̍la̍ŋ ni᷄ŋ. Kɔ̄la̍ŋ si᷄mnda̍ŋ o̍ sɔ̍ŋgi̍la̍ŋ pūa̍a̍ chūmndo̍.

¹³ Mɛ̄ɛ̍ chūa̍a̍ ho̍ō ō chē pōo̍ ho̍ō, mbo̍ kɔ̍ kɔ̍ma̍ŋ ndu̍, mbo̍ sɔ̄sā ndu̍ kūu̍wo̍. Mbo̍ tōfā pōo̍ hɔ̄lla̍ chi̍ŋ, mbo̍ dīmūl pōo̍ āā,

¹⁴ “I̍ pe̍e̍lu̍ hāū bu̍ŋgɛ̄i̍ ya̍ i̍i̍ chu̍a̍ Mɛ̄lɛ̄ka̍ o̍ hɔ̄l le̍, mi̍ so̍lī sa̍lā kōŋ. Ndu̍yɛ̍ vīsīŋ sa̍lāŋ mu᷅ŋ ŋ̄ ti᷄ŋ ŋ̄ lo̍, mi̍ ŋ̄ wā ya̍ o̍ bā chīɛ̄ī ni̍ŋ.

¹⁵ Nūm ya̍ I̍ hi᷅ŋ ni᷅ŋ tōfāa̍ ni̍. Ya̍ i̍i̍ ye̍e̍ma̍ bɔ̄ɔ̍ mī ya̍ i̍i̍ che᷅ nu̍m. Ndu̍yɛ̍ mi̍ bo᷅ŋ bɛ̄ŋgu̍ mi̍ chā nu̍m.

¹⁶ I̍ pɛ̍ŋgɛ̍la̍ kōlāla̍ kɛ̍ndɛ̄ kɛ̍ndɛ̄la̍ nɔ̍ tīndi̍ma̍ yɛ̍ yi̍a̍a̍ŋ, mā chāŋ a̍ la̍ŋ I̍chi̍pī la̍ŋ o̍ kpēlē, mi̍ to̍o̍sīāā kpēlōo̍ nyɛ̄ kɛ̄ndɛ̄ kɛ̍ndɛ̄.

¹⁷ O̍ ko̍ŋ kɔ̍ɔ̍lī, mi̍ chu̍chū si̍ɛ̍ndīi̍ma̍ chūŋ kɛ̄ndɛ̄ kɛ̍ndīa̍ŋ lēcho̍ō, mɔ̍ɔ̄ wa̍ŋ, a̍ a̍lo̍o̍sī wa̍ŋ, a̍ si̍na̍mɔ̄ŋ nda̍ŋ.

¹⁸ Le̍la̍ŋ ŋ̄ kɔ̍ mī ŋ̄ kɔ̍ lɔ᷅l chūɛ̄llɛ̄ŋ kɔ̄ɔ̄mi̍āŋndo̍ pi̍i̍ o̍ kpēlē. Ŋ̄ kɔ̍ mī ŋ̄ kɔ̍ tu̍e̍ī kāālā nāa̍ yēēlā.

¹⁹ Pɔ̍nɔ̍ nūu̍ ō cho̍ na̍nu᷄ŋ te̍, ō kūɛ̄ kēlāa̍ nāa̍ le̍vi᷅l.

²⁰ Ō chūa̍ nyɛ̄ sɔ̄lāa̍ cha̍la̍ŋ mbo̍ kūā a̍ ndu̍. Ō kūɛ̄ le̍ lɔ̍ɔ̍la̍ŋ lā tīɔ̍ɔ̍ŋ.”

²¹ O̍ ko̍ŋ, mi̍ chūa̍a̍ ho̍ō ō tīū pōo̍ ho̍ō bā a̍ dīōmndā yēēlɛ̍i̍la̍ŋ ndu̍ dīmūllo̍. Mbo̍ mūlī pōo̍ ho̍ō kɔ̄llo̍ a̍ sōndō ndɔ̄ ye̍e̍lɛ̍i̍ bɛ̍ndōo̍.

²² Pōo̍ ho̍ō tūēīyɔ̄ɔ̍ dɔ̍ɔ̍ dīōmnda̍ŋ nda᷅ŋ, mbo̍ tūāl bɛ̍ɛ̍ chu̍a̍a̍ kɔ̄ɔ̄lī, mī chūa̍a̍ kūā ni᷅ŋ a̍ ndu̍ mɛ̄ɛ̍ nda̍ wā nu̍a̍ā kɔ̄la̍ŋ a̍ nāūwo̍ le̍ ndu̍ kɔ̄la̍ŋ dīyɔ̄ɔ̍ yɛ̍. Mɛ̄ɛ̍ kīa̍llo̍ ō lō nu̍a̍ā kɔ̄la̍ŋ mbō kɔ̍ ha̍ū o̍ yāŋɔ̄ɔ̄le̍ŋ,

²³ mā vɛ̄ ndu̍ a̍ chīŋɔ̍le̍ŋ mī lē kɔ̍ sɛ̍ɛ̍sā ndu̍ kɔ̄llo̍ yɛ̍, le̍nde̍ o̍ wa̍ kɔ̄la̍ŋ chūa̍a̍ kɔ̄ɔ̄lī ni̍. Mɛ̄ɛ̍ yōūwo̍ ō lō nu̍a̍ā nyāānɔ᷄ŋndo̍ mbō kɔ̍ ha̍ū o̍ yāla̍ yōūwa̍ yɛ̍, le̍nde̍ i̍ yɔ̍nu̍ŋ a̍ pōo̍ ho̍ō ni̍. Ō sīna̍ nu̍a̍ā māā yōōmū ndɔ̄ɔ̍ le̍ o̍ wa̍ mālɔ̄ɔ̍ o̍ kpūndɔ̍ɔ̍ ni᷄ŋ te̍.

²⁴ Le̍la̍ŋ lā ya᷅ŋ ni᷅la̍ŋ o̍ nyɛ̄ ya̍ I̍ cho̍ nya̍ dīmūllo̍ wo̍ pūa̍a̍ nīa̍a̍. Lā kɛ̄si̍ŋ di̍o̍mndā ya̍ I̍ cho̍ nya̍ dīmūllo̍ la̍ŋ o̍ lākɔ̄l.

²⁵ Lā chɛ᷅l mī wāŋ lāāndūāā wāā nu̍a̍ā ā tīu̍ nya̍ bā, mā mūli̍ nya̍ kɔ̄lta̍ŋ o̍ nda̍lo̍ le̍. Lā tu̍āl wāŋ lāāndūāā wāā le̍nde̍ kɔ̍ɔ̍lī le̍.

²⁶ Wāŋ lāāndūāā wāā nu̍a̍ā ā tɛ̄ɛ̄mbu̍u̍ ni̍ŋ wa᷅ŋ pīāāndūāā kɛ̄ndɛ̄ kɛ̍ndīāā bɔ̄ɔ̍ bɔ̍ɔ̍. Wāŋ pīāāndūāā bɔ̄ɔ̍ bɔ̍ɔ̍ ā sɔ̄lā ni̍ŋ pi̍ɔ̍mnda̍ŋ o̍ sa̍būlā ndāla̍ŋ ni᷄ŋ.

²⁷ Nɛ̄īla̍ ku̍ɛ̄ o̍ chīɛ̄īlā ndāla̍ŋ nda̍ŋ, nɛ̄īla̍ ya̍ā wa̍nā chi̍e̍e̍ pīɔ̍mnda̍ŋ la̍ cho̍ ni̍. Nɛ̄īla̍ wānā ke̍e̍kū mā ke̍le̍ŋa̍ fūūlūū chi̍e̍e̍ pīɔ̍m chɔ̍ chɔ̍ la̍ŋ la̍ cho̍ la̍ŋ ni̍.