Pu̍lɔ̍wāā 18 - Yāu̍ Mɛ̄lɛ̄ka̍a̍

¹ Wāna̍ nɔ̍ ho̍ō nāāŋa᷅ŋ te̍ wo̍, le̍ te̍le̍ŋ o̍ te̍le̍ŋ le̍ dɛ̍nɛ̍ ndɔ̄ kɛ̍ndɔ̄ɔ̍ ko̍ni̍ o̍ chi̍e̍e̍ chīēī ni̍. Ō ye̍e̍mā mī wānā di̍mu̍l ndu̍ tōnya̍ o̍ tōnya̍ le̍.

² Dīɔ̄mndo̍ ō hēu̍ ba̍ le̍ mbō sīna̍ nyɛ̄ o̍ nyɛ̄ pɛ̄ŋgu̍ le̍. Nyɛ̍ cho̍ yīya᷄ŋ ndɔ̄ɔ̍ wo̍, ndu̍ tu̍ŋ o̍ ye̍e̍mā le̍ wāŋnda̍ chɔ̄mndo̍ ni̍.

³ Tē wānā ye̍e̍ma̍ pɛ̍, mī wāŋnda̍ pɛ̄ɛ̄sa̍ nu̍m, to̍sa̍ dɛ̍nɛ̍ wɔ̍ɔ̍ŋndo̍. Tē wānā ye̍e̍ma̍ bɛ̄ɛ̄la̍ ta̍mbɛ̍i̍la̍ŋ pɛ̍, to̍sa̍ su̍ɛ̍i̍ lāsi̍ɔ̍mbu̍e̍i̍.

⁴ Dīōmnda̍ fu̍lā wa᷅na̍ chi̍o̍o̍ o̍ sōndō la̍ŋ, mɛ̄ɛ̍ lūmnde̍ ī yīŋgi̍la̍ nu̍a̍ā yɛ̍, le̍nde̍ la̍ yi̍ŋgi̍la̍ ni̍. Kɔ̄l kālo̍o̍ chō māchūāā mɛ̄ɛ̍ pēē pɔ̍mbɔ̄ɔ̍ ō pīɔ̄l nu̍a̍ā o̍ fo̍ndāa̍ mbō wa̍ hīōūwɔ̄ɔ̍ yɛ̍.

⁵ Ō bɛ̍ndā mī wānā si̍m wānā wɔ̍ɔ̍ŋnda̍ kɔ̄ɔ̄lī o̍ sūɛ̍i̍ ni᷄ŋ, ndu̍yɛ̍ mā to̍sa̍ mī wānā tɛ̍ɛ̍mbu̍u̍ i̍sɔ̍ɔ̍ le̍ wo̍, ō sɔ̄la̍ yāmɛ̍ī lāka̍fɛ̄i̍ kīlūllo̍ le̍.

⁶ Dīōmnda̍ fu̍lā di̍ɔ̄mndo̍ o̍ sōndō la̍ŋ, mī lā hīŋ a̍ sɔ̍ŋgɔ̄ɔ̍. Dīɔ̄mndo̍ mī ndu̍ pi̍la̍ nu̍u̍va̍ lɔ̄ɔ̍, a̍ nyɛ̍ fu̍lā ndu̍ o̍ sōndō wo̍.

⁷ Dīɔ̄mndo̍, mī nyɛ̍ fu̍lā ndu̍ o̍ sōndō wo̍ ō tɛ̄ɛ̄mbu̍u̍ yōōmū ndɔ̄ɔ̍. Mī ndu̍ pi̍la̍ yi̍i̍nu̍ŋ a̍ dīōmndā ndɔ̄la̍ ndu̍ pi̍la̍ la̍ŋ.

⁸ Dīōmnda̍ di̍mīŋ o̍ wāŋndo̍ chōŋgōo̍ ni᷄ŋ nda̍ŋ, yēēlāa̍, to̍fa̍ wɔ̍ ko̍ mɛ̄ɛ̍ nyɛ̄ dīa̍a̍ ō yēēla̍ nu̍a̍ā yɛ̍. Lūɛ̄īyɔ̄ɔ̍ wānā o̍ kɔ̄l di̍.

⁹ Wāna̍ to̍sā ho̍ō kpe̍ku̍ le̍ wo̍, pɔ̄mbɔ̄ ndɔ̍ cho̍ wānā tɛ̍ɛ̍mbāā dɛ̍nɔ̍ɔ̍ ni̍.

¹⁰ Dīōla̍ Mɛ̄lɛ̄ka̍ Ya̍a̍wɛ̄ɛ̄ la̍ŋ, lā chō māchūāā fo̍ndāŋ vīlɛ̄ī kālā ka̍lā wāŋnda̍ kūā vi̍o̍ŋnɔ᷄ŋndo̍ le̍ yōōmūlā ndāla̍ŋ māndāa̍ wo̍. Lo̍ŋ wānāā tōnya̍a̍ ā nyāānūŋ ni̍, mā sɔ̄la̍ chīndāa̍.

¹¹ Wānāā su̍lāa̍ ā chu̍a̍ māchūāā sūl ndāa̍, māā kpākī ka̍lā ka̍lā bɛ̄ndōo̍ nda̍ o̍ bālāā le̍ nda̍ māndāa̍. Mɛ̄ɛ̍ sāāsā vi̍lɛ̄ī bɛ̄ndōo̍ ō wā nu̍a̍ā chi̍o̍o̍ ō bālāā le̍ ndu̍ māndāa̍ yɛ̍, le̍nde̍ nda̍ chu̍a̍ sūl ndāa̍ ni̍.

¹² Yōŋgāa̍, tɛ̄ɛ̄mbūūwo̍ o̍ tɛ̍ɛ̍mbūū yo̍o̍mu̍ wāna̍ chi̍o̍o̍ ni̍. Kɛ̍ tūsi᷄ŋndo̍ ndu̍ ndu̍, bɛ̄ɛ̄le̍ŋ o̍ chu̍ū wa̍nā ni̍.

¹³ Wānā o̍ wāna̍ mu̍li̍ nyūnāa̍ pɛ̍, mbō ye᷄ŋ fɛ̍lɛ̍ŋ nyu̍nā kālāa̍ lānī le̍, ō tōsa̍ dīɔ̄mīī bɛ̄ndū, ndu̍yɛ̍ si̍ɔ̍mbu̍la̍ŋ la̍ wa᷅ le̍ ndu̍ ni̍.

¹⁴ Wāa̍ a̍ kɔ̄l kɛ̄ndɛ̄, mbō māla̍ wānā o̍ dīālīī nɛ̄īyɛ̄i̍ ni᷄ŋ. Kɛ̍ tē a̍ wa̍ a̍ nāa̍ pɛ̍, mā wa̍ a̍ kɔ̄l tāmbɛ̍i̍yo̍, a̍ fu̍lā o̍ nāa̍ kōŋ ni᷄ŋ te̍.

¹⁵ Wāna̍ tāāsi̍o̍o̍, le̍ te̍le̍ŋ o̍ te̍le̍ŋ ō yēēmā mbō chɔ̄ɔ̄lu̍ tāāsi̍o̍o̍ sɔ̄lā. Wāna̍ kɔ̄l kālo̍o̍, nɛ̄īla̍ŋ o̍ nu̍u̍wā ni̍ le̍ mbō chɔ̄ɔ̄lu̍ kɔ̄l kālo̍o̍ sɔ̄lā.

¹⁶ Tē a̍ ye̍e̍ma̍ le̍ wānā bɛ̍ndōo̍ chɔ̄ɔ̍ pɛ̍, yo̍o̍ ndu̍ nyɛ̄ o̍ bā. Ā nɔ̄lā mā chē ndu̍ bɛ̍ɛ̍ŋ bɛ̍ɛ̍ŋ.

¹⁷ Tē sūɛ̍i̍ kēēka᷅ŋ wa̍nāā ŋīɔ̍ɔ̍ŋ tɛ̄ɛ̄ŋ pɛ̍, wāna̍ tāse̍ ke̍lēŋā ti̍mbī wo̍, ndu̍ ŋ̄ kūā le̍ dīo̍o̍ kīo̍o̍ ni̍, mɛ̄ɛ̍ mī wāŋndo̍ ō pīlɔ̍ɔ̍ bɛ̍ɛ̍ ndu̍ ti̍mbi̍.

¹⁸ Sɔ̍ŋgɔ̄ɔ̍ wānāā kpāāyā bɛ̄ndūa̍a̍ tɛ̄ɛ̄ŋ nda̍ ŋi̍ɔ̍ɔ̍ŋ, kōo̍ŋ wūūwo̍ nda̍ tɛ̄ɛ̄ŋ le̍ sīnāa̍ wāna̍ nɔ̍ di̍ wo̍, nɔ̄lā mbō chīi̍ sɔ̍ŋgɔ̄ kōŋ.

¹⁹ Wānā nu̍mndo̍ sūɛ̍i̍ wɔ̍ɔ̍ŋnde̍ tōsāllo̍, sūɛ̍i̍ ke̍ŋ ī kēndū chūwɔ̄ɔ̄ nya̍ tɛ̄ɛ̄ŋ, ō hīōū mɛ̄ɛ̍ i̍ ke̍ndū nu̍a̍ā le̍ chi̍e̍e̍ nɔ̍ sāāsāla̍ŋ lābālāā wo̍ bīyɔ̄ɔ̍ yɛ̍. Mɛ̄ɛ̍ sāāsāa̍ wā nu̍a̍ā wāŋnda̍ tɛ̄ɛ̄ŋ a̍ dīōlā ŋ̄chīli̍ŋnda̍ŋ yɛ̍, le̍nde̍ sɔ̍ŋgɔ̄ɔ̍ ō pīɔ̄ū wa᷅ŋnda̍ tɛ̄ɛ̄ŋ ni̍.

²⁰ Dīōmnda̍ fu̍lā wa᷅ŋndo̍ o̍ sōndō la̍ŋ mī lā tōsa̍ mbō hi̍ni̍ kɔ̄l. Nyɛ̍ fu̍lā wa᷅ŋndo̍ o̍ sōndō wo̍, mbō ke̍ wānā ko̍ŋ kɔ̄l hīnīa̍a̍ ta̍u̍.

²¹ Dīɔ̄ɔ̄mūlē wāna̍ chi̍o̍o̍ lē nɔ̄ kpāāyāa̍ mī lē dīī, lē nɔ̄ kpāāyāa̍ mī lē mānda̍ yōōmū wāna̍ chi̍o̍o̍. Ndu̍yɛ̍ wānā o̍ wāna̍ ka̍a̍la̍ dīɔ̄ɔ̄mūlē ndɔ̄le̍ŋ pɛ̍, tɔ̄nɔ̍ dīɔ̄ɔ̄mūlē lēŋ lē chūū ndu̍ wo̍, ndu̍ o̍ di̍ā ni̍.

²² Wānā o̍ wāna̍ sɔ̍la̍ la̍nɔ̍ɔ̍ pɛ̍, ō sɔ̄la̍ nyɛ̄ kɛ̄ndɛ̄ bɛ̄ndū. Wānā ko̍ŋ, Mɛ̄lɛ̄ka̍ Ya̍a̍wɛ̄ɛ̄ o̍ che᷅ ndu̍ nyīnā bɔ̄ɔ̍.

²³ Wānā ta̍mbɛ̍i̍yo̍, ndu̍ nɔ̍ nyɔ̄ɔ̄lōo̍ o̍ sūɛ̍i̍ ni᷄ŋ ni̍ le̍ mā tūīīnu̍ŋ ndu̍ īnyīɛ̍ɛ̍. Kɛ̍ wānā su̍lāa̍ ndu̍ ndu̍, mūlīo̍o̍ a̍ kpāāyā mɛ̄ɛ̍ o̍ ye̍e̍mā yɛ̍.

²⁴ Nāāŋa᷅ŋnda̍ŋ lā pūm mī lā tɛ̄ɛ̄mbu̍u̍ wānā. Kɛ̍ nāāŋa᷅ŋndo̍ ō pūm, ō hīōū wānāyɛ̍ī.