Pu̍lɔ̍wāā 16 - Yāu̍ Mɛ̄lɛ̄ka̍a̍

¹ Na̍a̍ wāŋndā chīe̍e̍ya̍ mī ŋ̄ tūu̍, kɛ̍ Mɛ̄lɛ̄ka̍ Ya̍a̍wɛ̄ɛ̍ chɛ᷅l ni̍, ma̍lāŋ nyɛ̄ na̍a̍ ŋ̄ tūūwo̍ ō yɔ̄nu̍ŋ.

² Wāŋndo̍ mbō wa̍ sūɛ̍i̍ tōsāa̍ mbō yīya̍ŋ māā sūɛ̍i̍ kɛ̍ndɛ̄i̍ o̍ cho̍ to̍sāa̍ ni̍, kɛ̍ Mɛ̍lɛ̄ka̍ Ya̍a̍wɛ̄ɛ̄ ndu̍ nɔ̍lā ni̍ mbō kēlū yāmɛ̍i̍ a̍ yīya᷄ŋ wānā ko̍ŋ o̍kɔ̄ɔ̄.

³ Tē a̍ wa̍ nyɛ̄ o̍ nyɛ̄ tōsā pɛ̍, ma̍l Mɛ̍lɛ̄ka̍ Ya̍a̍wɛ̄ɛ̄ o̍ bā, ō nɔ̄lā mbō tōsa̍ mī nyɛ̄ o̍ nyɛ̄ kūɛ̄ ō kɛ̄ndɛ̄.

⁴ Nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ to̍sa̍, ō tōsa̍ ndu̍ le̍ sa̍bū. Wāna̍ yɔ̄ŋ wɔ̄ɔ̍ŋndo̍ bɛ̍ɛ̍, mɛ̄ɛ̄lu̍la̍ ndɔ̄la̍ŋ la̍ cho̍ dɛ̍nɛ̍ pa̍lāa̍ ni̍.

⁵ Wānā o̍ wāna̍ cho̍ wāna̍ yōŋgā, Mɛ̄lɛ̄ka̍ Ya̍a̍wɛ̄ɛ̄ o̍ tu̍l nda̍ lēyɛ̄. Ō me᷅l nda̍ mā hɛ̄lu᷄ŋ dɛ̍nɛ̍ pa̍lāa̍ le̍.

⁶ Tē wānā yɔ̍ŋgu̍ŋ o̍ Mɛ̄lɛ̄ka̍ Ya̍a̍wɛ̄ɛ̄ lo̍ pɛ̍, ndu̍yɛ̍ mā wa̍ sa̍kpō, mālɔ̄ɔ̍ ŋ̄ sɔ̄lā le̍ yɔ̄ŋ nūm wɔ̍ɔ̍ŋndo̍ ni̍. Tē wānā nɔ̍ sīōōŋnde̍ le̍ Mɛ̄lɛ̄ka̍ Ya̍a̍wɛ̄ɛ̄ pɛ̍, kpɛ̄kpɛ̄lāa̍ ŋ̄ kpɛ̄kpɛ̄lā yɔ̍ŋ wɔ̄ɔ̍ŋndo̍ ni̍.

⁷ Wānā o̍ wānā tē a̍ hi̍ni̍ Mɛ̄lɛ̄ka̍ Ya̍a̍wɛ̄ɛ̍ kɔ̄l o̍ kēlālā nūmnda̍ŋ ni᷄ŋ pɛ̍, ya̍a̍mɔ̍ɔ̍wa̍a̍ nu̍mnda̍ bɛ̍ɛ̍, kɔ̄l nyūlōo̍ mi̍i̍ŋgū nya̍ tɛ̄ɛ̄ŋ nya̍ nda̍ā ni̍.

⁸ Ō bɛ̄nda̍ mī wānā nɔ̍ o̍ bā ō pɔ̄mbɔ̄ kɛ̍ mā wa̍ wānā kɛ̍ndɛ̄, mbo̍ hīāū nɔ̄ɔ̍ o̍ bā ta̍u̍, kɛ̍ mā wa̍ wāna̍ lāka̍fā.

⁹ Na̍a̍ wāŋndā chīe̍e̍ya̍ mī ŋ̄ tūu̍, kɛ̍ Mɛ̄lɛ̄ka̍ Ya̍a̍wɛ̄ɛ̄ kɛ̍ɛ̍sīāā nyɛ̄ na̍a̍ ŋ̄ nɔ̄ le̍ tōsāa̍ wo̍ ni̍.

¹⁰ Dīōmnda̍ fu̍lā ma̍sā bɛ̍ndōo̍ o̍ sōndō la̍ŋ, lā chō dīōmndā kpāāyā. Le̍la̍ŋ īyāma̍ o̍ īyāma̍ māsā bɛ̍ndōo̍ ō kēlū pɛ̍, o̍ nɛ̄ī o̍ ki̍a̍lū ndi̍ ni̍.

¹¹ Mɛ̄lɛ̄ka̍ Ya̍a̍wɛ̄ɛ̄ o̍ ye̍e̍ma̍ wāa̍ sa̍kpō o̍ wāŋnda̍ wɔ̄ŋgūla̍ŋ tūūlūllo̍ ni᷄ŋ, ndu̍yɛ̍ a̍ nda̍ wɔ̄ŋgūla̍ŋ lēndūllo̍ o̍ sēke̍lēi̍la̍ŋ. Ndu̍ Mɛ̍lɛ̍ka̍ chɔ᷅m mɛ̄ɛ̍ lūsu̍l wɔ̄ŋgūla̍ŋ lā nɔ̄ le̍ wāa̍ o̍ sēke̍lēi̍yo̍ chōo̍ yɛ̍ ni̍.

¹² Tē māsā bɛ̍ndōo̍ ō wa᷄ wānā kɛ̍ndɛ̄ pɛ̍ ō nɔ̄lā mbō sīīŋgu̍u̍ ndu̍ māsa̍ kpāāyāā bɛ̍ndū. Le̍la̍ŋ, nūm māsāa̍ ā nɔ̄ mā tu̍l dɛ̍nɛ̍ wɔ̍ɔ̍ŋndo̍ lēyɛ̄.

¹³ Māsā bɛ̍ndōo̍, ō yēēmā mbō ya᷄ŋ wāna̍ di̍mī to᷅nya̍a̍ wo̍ lānī o̍ sūɛ̍i̍ ni᷄ŋ. Ndu̍yɛ̍ wānāa̍ di̍mī to᷅nya̍a̍ wa̍, chɔ̄ɔ̍ o̍ cha᷅ nda̍ nyīnā ni̍.

¹⁴ Tē māsā bɛ̍ndōo̍ ō dɔ̄ɔ̄nu᷄ŋ tu̍mbe̍ a̍ wānā pɛ̍, ō nɔ̄ kpāāyāa̍ mbō dīī nu̍m. Le̍la̍ŋ wānā o̍ wāna̍ cho̍ wāna̍ kɔ̄l kālu̍, ō chɛ᷅l mī māsā bɛ̍ndōo̍ ō dɔ̄ɔ̄nu᷄ŋ tu̍mbe̍ a̍ ndu̍ le̍.

¹⁵ Tē māsā bɛ̍ndōo̍ ō wa᷄ a̍ kɔ̄l kɛ̄ndɛ̄ pɛ̍ mbō chɔ᷄m wāŋnda̍ hɔ̄lāā kɛ̄ndīa̍a̍, yōōmōo̍ o̍ wa᷅ ko̍ŋ wa᷅ŋnda̍ kīo̍o̍ ni̍. Nyi̍nā māsā bɛ̍ndōo̍ ō chā wa̍nā wo̍, ō chō māchūāā mɛ̄ɛ̍ pīɔ̍ɔ̍ ō chūchū nu̍a̍ā mbō pɔ̄ɔ̄līāā lɛ᷅ŋnde̍ŋ yɛ̍.

¹⁶ Kɔ̄l kālo̍o̍ sɔ̄lāa̍, ō bɛ̄nda̍ mbo̍ hīāū ko̍o̍līi̍ye̍ nɔ̄ɔ̍. Sīnā pɛ̄ŋgo̍o̍ ndu̍ hi̍o̍ū nāŋɔ̄ɔ̄ a̍ ka̍ni̍i̍ hu̍mbūe̍i̍.

¹⁷ Wānā o̍ wāna̍ cho̍ wānā kɛ̍ndɔ̄ɔ̍, ō ku̍ē o̍ nɛ̄i̍ dɛ̍nɛ̍ wɔ̍ɔ̍ŋndo̍ chōo̍ le̍. Wānā o̍ wāna̍ ma̍nda̍ŋ o̍ kēlālā ndɔ̄la̍ŋ ni᷄ŋ pɛ̍, mɛ̄ɛ̍ ō mānda̍ yōōmū ndɔ̄ɔ̍.

¹⁸ Yōŋgāa̍ mbō tɛ̄ɛ̄mbu̍u̍ yōōmū wāŋndo̍, hɔ̄lāā hēēlāā bɛ̄ndūa̍a̍, mā ma᷄l wānā kpɔ᷅ŋ.

¹⁹ Ō bɛ̄nda̍ mī wānā wa̍ wānā tu̍sīa̍ŋ mā wa̍ o̍ tāmbe̍i̍ ni᷄ŋ, mbo̍ hīāū nyɛ̄m nda̍ pūŋgā wa᷅ŋnda̍ o̍ lābā wo̍ŋ pīɔ̄ūvi̍āŋndo̍ nya̍ wānāā yōŋgāa̍.

²⁰ Wānā o̍ wāna̍ chu̍a̍ sīlāa̍ pɛ̍, dɛ̍nɛ̍ kɛ̍ndɔ̄ɔ̍ ndu̍ tu̍āl nu̍m kɔ̄ɔ̄lī ni̍. Ndu̍yɛ̍ wānā o̍ wāna̍ dɔ̍ū tīīnda᷄ŋndo̍ o̍ Mɛ̄lɛ̄ka̍ Ya̍a̍wɛ̄ɛ̄ ni̍ŋ pɛ̍, ā pɛ̄l tɔ̄nɔ̄ɔ̍.

²¹ Wāna̍ kɔ̄l kālo̍o̍, o̍ sɔ̄ɔ̍ŋ tāāsi̍ŋ o̍ to̍sā wo̍ŋ wānā si̍nā ndu̍ ni̍. Dīōmndā kɛ̄ndɛ̄la̍ fu̍lā wa̍nā o̍ sōndō la̍ŋ, mī lā tōsa̍ mī wāŋnda̍ chɛ̄la᷅ŋ a̍ nyɛ̄ ŋ̄ dīmi̍ wo̍.

²² Wānāa̍ nɔ̍ kɔ̄l kālo̍o̍ wa̍, kɔ̄l kālu̍ ndāa̍ chō māchūāā māā pēē yɔ̍ŋgū yo̍o̍mōo̍ wo̍. Kɛ̍ dīɔ̄mndo̍ ndu̍ ndu̍, dīɔ̄mīī ndūɛ̍i̍ ndi̍ i̍ sa̍a̍ŋgīāā ndu̍ ni̍.

²³ Wāna̍ kɔ̄l kālo̍o̍ sɔ̄ɔ̍ŋ kɔ̄l kālu̍ŋ cho̍ o̍ kɔ̄l ndɔ̄ɔ̍ ni᷅ŋ ndo̍ŋ, mu̍ŋ o̍ su̍a̍ā ni̍. Ndu̍yɛ̍ mu̍ŋ ma̍lā ndu̍ ni̍, mī wāŋnda̍ ā chɛ̄la᷅ŋ a̍ nyɛ̄ o̍ di̍mī wo̍.

²⁴ Dīōmndā kɛ̄ndɛ̄la̍ fu̍lā lāŋ wāŋndo̍ o̍ sōndō la̍ŋ, mɛ̄ɛ̍ līa̍a̍ŋ mā yēēla̍ nu̍a̍ā yɛ̍, le̍nde̍ la̍ ye̍e̍la̍ ni̍. Lā nɔ̄lā mī lā tōsa̍, mī wāŋndo̍ wa̍ a̍ kɔ̄l kɛ̄ndɛ̄, ndu̍yɛ̍ mbō nɔ̄ kɛ̍ndi̍a̍a̍ o̍ dīāllūŋ ndɔ̄ɔ̍ŋ ni᷅ŋ.

²⁵ Nɛ̄īyo̍ ō pūm chō mī wāŋndo̍ chu̍a̍ ndu̍ māā nɛ̄ī kɛ̍ndɔ̄ɔ̍ o̍ cho̍ kɔ̄la̍ŋ chōo̍ ni̍, kɛ̍ mɛ̄ɛ̄lu̍la̍ nɛ̄ī ko̍ŋ mī lā wa̍ pīɔ̍mndo̍.

²⁶ Tē yīa̍a̍ŋ mā bīī wānā to̍sāā kpe̍ko̍o̍ pɛ̍, ko̍ŋ ke᷅ ndu̍ kpi̍i̍li̍a̍a̍ ni̍ mbō tōsa̍ wa̍llo̍ kpe̍e̍kpe̍i̍. Kāni̍ fo̍ndōle̍, ō nɔ̄lā mbō tōsa̍ wa̍llo̍ mī yīa̍a̍ŋ mā fūla̍ ndu̍.

²⁷ Wānāā dɛ̍nɛ̍ wɔ̍ɔ̍ŋnda̍, le̍ te̍le̍ŋ o̍ te̍le̍ŋ, nɛ̄īla̍ŋ nda̍ nūūwā le̍ wāŋnda̍ īwɔ̄ɔ̍ŋnde̍ tōsāllo̍ ni̍. Dīōmnda̍ fu̍lā nda̍ o̍ sōndō la̍ŋ, lōmɔ̄ɔ̍, to̍fa̍ wɔ̍ ko̍ mɛ̄ɛ̍ yīŋnde̍ŋ lē lūām nu̍a̍ā yɛ̍.

²⁸ Wānā wɔ̍ɔ̍ŋndo̍, ndu̍ ma᷅l kpu᷅ndɛ̍la̍ŋ wāŋnda̍ tɛ̄ɛ̄ŋ ni̍. Ndu̍yɛ̍, chōŋgūla̍ŋ, mī lā tɛ̄ɛ̄mbu̍u̍ nāāŋa᷅ŋndo̍.

²⁹ Wānāā lāsɔ̍ŋgāa̍, mā hūi̍ chāāŋāā ndāa̍ mā ma᷄l nda̍ o̍ nyɛ̄ pālāa̍ ni᷄ŋ.

³⁰ Mā yīi̍ chāāŋāā ndāa̍ de̍fe̍ wɔ̍ɔ̍ŋndo̍ a̍ lāhɔ̄l. Ma̍ chīi̍ sūɛ̍i̍ wɔ̍ɔ̍ŋnde̍ tūū a̍ chāāŋāā ndāa̍ a̍ ŋ̄chɔ̄chɔ̄.

³¹ Yūlu̍ŋīī wāŋndo̍ sɔ̄lā he̍ī o̍ yu̍wɛ̍i̍ ndūɛ̍i̍ ni᷄ŋ nde̍, bɛ̄ɛ̄le̍ŋ pīla̍ i̍ nɔ̍ ni̍. Kāni̍ fo̍ndōle̍, wāa̍ wānā kɛ̍ndɛ̄, ndu̍ to̍sā ni̍ mī wāŋndo̍ yūwa̍ mbō sūŋgū yūlu̍ŋnde̍ŋ.

³² Ō bɛ̄nda̍ mī wānā wa̍ wānā bi̍u̍wa᷄ŋ, mbo̍ hīāū wāa̍ wāna̍ dīāllūŋ kālā. Ō bɛ̄nda̍ mī wānā wa̍ wāna̍ ti̍u̍ kɔ̄l nūmndo̍ bā, mbo̍ hīāū wāa̍ wāna̍ kpāāyā mā bīī chi̍o̍o̍ŋ.

³³ Wāŋnda̍ mā wa̍ sūɛ̍i̍ tōsāa̍ mā wūu̍ kōo̍ŋ, kɛ̍ ō cho̍ ko̍ōŋ mu̍ŋ te̍ ŋ̍ chɔ᷅m nda̍ nyɛ̄ nda̍ nɔ̄ le̍ tōsāa̍ wo̍ le̍, Mɛ̄lɛ̄ka̍ pīla̍ chɔ̄m nda̍ ni̍.