Pu̍lɔ̍wāā 13 - Yāu̍ Mɛ̄lɛ̄ka̍a̍

¹ Chūā kɔ̄l kālo̍o̍ ndu̍ ya᷅ŋ si̍la̍ fi̍nyā ndɔ̄ɔ̍ lānī ni̍. Kɛ̍ wāna̍ yōŋgāa̍ ndu̍, ō bīōndu̍ŋ bɛ̍ɛ̍, ō chɛ᷅l mā mīŋgi̍ ndu̍ o̍ nɛ̄ī le̍.

² Wāna̍ tōnya̍a̍, dīōmndā kɛ̄ndɛ̄la̍ fu̍lā ndu̍ o̍ sōndō la̍ŋ, mbō dē la̍ŋ tɔ̄nɔ̄. Kɛ̍ wānāa̍ hu̍ī ha̍ā wāŋnda̍ wa̍ nda̍, le̍ te̍le̍ŋ o̍ te̍le̍ŋ ā chō a̍ yēēmɛ̍i̍ le̍ wāŋnda̍ dɛ̍nɛ̍ wɔ̍ɔ̍ŋndo̍ tōsāllo̍.

³ Wānā o̍ wāna̍ ma̍nda̍ sōndō ndɔ̄ɔ̍ pɛ̍, yōōmū ndɔ̄ɔ̍ o̍ wa᷅ ko̍ŋ māndāa̍ ni̍. Kɛ̍ wāna̍ su̍a̍ā ho̍ō ō yi̍yāŋ te̍ wo̍, dɛ̍nɛ̍ pa̍lāa̍ o̍ sɔ̍lā ni̍.

⁴ Wāna̍ sīɛ̄lɛ̍i̍yo̍, ō ye̍e̍ma̍ bɛ̍ɛ̍ nyɔ̍ɔ̍, o̍ sɔ̍lā ndu̍ le̍. Kɛ̍ wāna̍ to̍sā ho̍ō wa̍llo̍ tōsā bɛ̄ndōo̍ wo̍ ndu̍, nyɛ̄ o̍ nyɛ̄ o̍ ye̍e̍ma̍, sɔ̄lāa̍ o̍ sɔ̍lā ndu̍ ni̍.

⁵ Wānā o̍ wāna̍ cho̍ wāna̍ tōnya̍a̍, tūllo̍ o̍ tu᷅l cho̍ōla̍ŋ yɛ̄le̍ŋ ni̍. Kɛ̍ wānāā dɛ̍nɛ̍ wɔ̍ɔ̍ŋnda̍ nda̍, sɔ̄ɔ̍ŋ lāsi̍ɔ̍mbo̍ŋ, a̍ sɔ̄ɔ̍ŋ bɛ̄ɛ̄la̍ ta̍mbɛ̍i̍yo̍ŋ, mu̍ŋ nda̍ kāālā to̍sāa̍ ni̍.

⁶ Wāna̍ tōnya̍a̍, sɔ̄ɔ̍ŋ tōnya̍ŋ o̍ to̍sā wo̍ŋ, mu̍ŋ ma̍ndā ndu̍ ni̍. Kɛ̍ wāna̍ dɛ̍nɛ̍ wɔ̍ɔ̍ŋndo̍ ndu̍, sɔ̄ɔ̍ŋ dɛ̍nɛ̍ wɔ̍ɔ̍ŋ o̍ to̍sā wo̍ŋ, mu̍ŋ tɛ̍ɛ̍mbūū ndu̍ ni̍.

⁷ Wāŋnda̍ ā pūm mā chūānu̍ŋ māā ā su᷄l, kɛ̍ ā nɔ᷅ nyɛ᷅ o̍ nyɛ̄ o̍ bā le̍. Wāŋnda̍ ā pūm yɛ̍, mā chūānu̍ŋ māā wānāā tāmbɛ̍i̍ya̍ nda̍ chō ni̍, kɛ̍ wānāā su̍lāa̍ nda̍ wā ni̍.

⁸ Wānā su̍lāa̍, te̍le̍ŋnda̍ŋ lā pūm le̍ yōōmū ndɔ̄ɔ̍ chīɔ̄ūwo̍ wānāā wɔ̄ɔ̍ŋnda̍ o̍ bā, mɛ̄ɛ̍ mbō pīsi̍ nyɛ̄ sɔ̄lāa̍. Kɛ̍ wānā ta̍mbɛ̍i̍yo̍ ndu̍, kpūndɛ̍ wāā le̍nde̍ o̍ ko̍māl ndu̍ le̍, fo̍ndōle̍, ō nɔ̍ nyɛ̄ o̍ nyɛ̄ o̍ bā le̍.

⁹ Wāna̍ tōnya̍a̍, nyɛ̄ ndɔ̄ wa̍wo̍ŋndo̍, le̍ te̍le̍ŋ o̍ te̍le̍ŋ ō wā di̍o̍ndɔ̄ɔ̍ wa̍ke̍e̍ bɛ̍ndū. Kɛ̍ wāna̍ dɛ̍nɛ̍ wɔ̍ɔ̍ŋndo̍ ndu̍, nyɛ̄ ndɔ̄ wa̍wo̍ŋndo̍ le̍ te̍le̍ŋ bi̍ŋgī ko̍ni̍ o̍ di̍a̍ndū ni̍, mbō nyūmnu̍ŋ.

¹⁰ Yōŋgāa̍ ndu̍ ndu̍, sɛ̄ɛ̄ŋgi̍āŋnda̍ŋ o̍ hu᷅ŋ ni̍. Kɛ̍ wānā o̍ wāna̍ ya̍ŋ nīla̍ŋ o̍ sīlāa̍ pɛ̍, mɛ̄ɛ̍ wāna̍ kɔ̄l kālo̍o̍ cho̍ ko̍ŋ ni̍.

¹¹ Nyɛ̄ sɔ̄lāā wānā sɔ̍lā ho̍ō o̍ lūkū lūkōo̍ ni᷄ŋ ndo̍, ō che᷅l nu̍m o̍ bā le̍. Kɛ̍ ō wāŋndo̍ sāŋgā ho̍ō le̍ ndu̍ sɔ̄lāa̍ wo̍ ndu̍, pēēlɔ᷄ŋndo̍ o̍ pe̍e̍lūŋ le̍cho̍ō ni̍.

¹² Tē a̍ wa̍ nyɛ̄ kɔ̄l pɛ̍, mā sɔ̍la̍ ndu̍ le̍, kɔ̄llo̍ pīla̍ ŋ̄ tāmbū ni̍. Kɛ̍ tē a̍ ye̍e̍ma̍ nyɔ̄ɔ̍ pɛ̍, ndu̍yɛ̍ ma̍ sɔ̄lā ndu̍, ā wā bɔ̍ɔ̍ a̍ kɔ̄l kɛ̄ndɛ̄.

¹³ Tē ā sīla̍ nu̍m sīlā kɛ̄ndɔ̄ɔ̍ pɛ̍, mā kɛ̍ɛ̍, mɛ̄ɛ̍ kpūndɔ̍ɔ̍ nūm pi̍la̍ ye̍e̍ma̍ ni̍. Kɛ̍ wānā o̍ wāna̍ ya̍ŋ nīla̍ŋ o̍ sīlā kɛ̄ndɔ̄ɔ̍ pɛ̍, ndu̍yɛ̍ mbō chūa̍ ndu̍, chīndāa̍ wānā ko̍ŋ ō chīndā ni̍.

¹⁴ Wāna̍ kɔ̄l kālo̍o̍, pɛ̄ɛ̄kū ndɔ̄ɔ̍, ō chō māchūāā māā pēē mɛ̄ŋmā ndūa̍ŋ mā kē wa̍nā yo̍o̍mōo̍ wo̍. Pɛ̄ɛ̄kū ndɔ̄ɔ̍ ō nɔ̄lā mbō sōli̍ wānā o̍ yāŋɔ̄ɔ̄lē pīɔ̍mnde̍ŋ.

¹⁵ Wāna̍ nɔ̍ ho̍ō kɔ̄l kālo̍o̍ ta̍u̍ wo̍, bɛ̄ɛ̄le̍ŋ wāŋnda̍ ā kē ndu̍ ni̍. Kɛ̍ wānāā wānā nɔ̍lā ha̍ā mā ti̍i̍nda̍ŋ te̍ wa̍ nda̍ nda̍, nɛ̄i̍ ndāa̍, mɛ̄ɛ̄lu̍la̍ŋ dɛ̍nɛ̍ pa̍lāā bɛ̄ndōo̍ wa᷅ le̍ nda̍ ni̍.

¹⁶ Wāna̍ kɔ̄l kālo̍o̍ nyɛ̄ o̍ nyɛ̄ o̍ wa̍ tōsāa̍ pɛ̍, o̍ kɔ̄l kālo̍o̍ ni᷄ŋ o̍ to̍sā ndu̍ ni̍. Kɛ̍ dīɔ̄mndo̍ ndu̍, sɔ̄ɔ̍ŋ ŋ̄dīɔ̄mndo̍ŋ ko̍ni̍ o̍ to̍sā ni̍.

¹⁷ Ki̍i̍la̍nɔ̍ di̍mī to᷅nya̍ le̍ wo̍, yōōŋgūla̍ hu᷅ŋ a̍ kpūndɛ̍la̍ŋ nda̍ŋ, la̍ŋ o̍ hu᷅ŋ ni̍. Kɛ̍ ki̍i̍la̍nɔ̍ wānā nɔ̍lā ho̍ō mā ti̍i̍nda̍ŋndo̍ ndu̍, ndu̍ yōōŋgūla̍ to̍sā mī wāŋnda̍ tōsa̍ sɔ̄ɔ̍ŋ kɛ̍ndɔ᷄ŋ nda̍ŋ, la̍ŋ o̍ hu᷅ŋ ni̍.

¹⁸ Wāna̍ chu̍ē ho̍ō sīlā le̍ wo̍, o̍ tāmbe̍i̍ ni᷄ŋ o̍ mɛ̍ɛ̍lū ni̍, ndu̍yɛ̍ a̍ si̍ɔ̍mbu̍la̍ŋ. Kɛ̍ wāna̍ chu̍ā ho̍ō sīlāa̍ wo̍, bɛ̄ɛ̄le̍ŋ o̍ sɔ̍lā ni̍.

¹⁹ Tē wānā ye̍e̍ma̍ pɛ̍ nyɛ̄ ndu̍yɛ̍ mā sɔ̍la̍ ndu̍, kɔ̄llo̍ pīla̍ ŋ̄ nāŋ ni̍. Dīɔ̄mnda̍ nda̍ ā ye̍e̍mā mā pɛ̄ŋgi̍ yɔ̄ŋ wɔ̄ɔ̍ŋndo̍ tōsāa̍ mā mūli̍ŋ te̍.

²⁰ Tē wānā ba̍lu̍ a̍ wāna̍ kɔ̄l kālo̍o̍ pɛ̍, nūm bɛ̍ɛ̍ ā sīmnu᷄ŋ wa᷅na̍ kɔ̄l kālu̍. Kɛ̍ wānā o̍ wāna̍ ba̍lu̍ a̍ dīɔ̄mnda̍ pɛ̍, a̍ sa̍ŋga̍.

²¹ Wāna̍ yɔ̄ŋ wɔ̄ɔ̍ŋndo̍ bā o̍ bā o̍ kɔ̍, tōlɔ̄ɔ̍ dɛ̍nɛ̍ pa̍lāa̍ ō tūāl ndu̍ kɔ̄ɔ̄lī ni̍. Le̍nde̍ ko̍ni̍ i̍ cho̍ a̍ wānā kɛ̍ndɔ̄ɔ̍ ni̍, bā o̍ bā o̍ kɔ̍, tōlɔ̄ɔ̍ dɛ̍nɛ̍ kɛ̍ndɔ̄ɔ̍ ō tūāl ndu̍ kɔ̄ɔ̄lī ni̍.

²² Wāna̍ tōnya̍a̍ tē ō vī pɛ̍, chūāūwāā ndūāā ma̍māa̍ ā kōma̍ lo̍ō nyɛ̄m ndɔ̄ɔ̍ŋ ŋ̄ki̍ɔ̍ŋ. Kɛ̍ wānāā dɛ̍nɛ̍ wɔ̍ɔ̍ŋnda̍ nda̍, tē ā vī pɛ̍, wānāā tōnya̍a̍ nda̍ lo̍ō nyɛ̄m ndāa̍ŋ ki̍ɔ̍ɔ̍ŋ ni̍.

²³ Wānā ta̍mbɛ̍i̍yo̍ mbō tōsa̍ chīɛ̍i̍ mbō sɔ̄la̍ nyɛ̄ dīa̍a̍ ta̍u̍ ta̍u̍. Kɛ̍ mī wānāā lāka̍fāa̍ ā kūɛ̄nu᷄ŋ a̍ nyɛ̄ dīāā kōŋ kpo̍u̍ ni̍.

²⁴ Wānā o̍ wānā chūā ndɔ̄ɔ̍ ō tōsa̍ su̍ɛ̍i̍ wɔ̍ɔ̍ŋnde̍ pɛ̍, mbō tūsi̍ ndu̍ nyɛ̄ pālāa̍ chōo̍ le̍ ndu̍ sīlāa̍ le̍, mɛ̄ɛ̍ ō kāāla̍ chu̍a̍ ndɔ̄ ko̍ŋ te̍. Wānā o̍ wāna̍ ka̍a̍la̍ chūā ndɔ̄ɔ̍ pɛ̍, tē chūā ndɔ̄ ko̍ŋ ō tōsa̍ sūɛ̍i̍ wɔ̍ɔ̍ŋnde̍ pɛ̍, sīlāa̍ o̍ si̍lā ndu̍ ni̍.

²⁵ Wāna̍ tōnya̍a̍, nyɛ̄ dīāā ve᷅ ndu̍ lēpɛ̄ŋ te̍, le̍ te̍le̍ŋ o̍ te̍le̍ŋ dīo̍o̍ mbō pūm. Kɛ̍ wānāā dɛ̍nɛ̍ wɔ̍ɔ̍ŋnda̍ nda̍, a̍ yīa̍a̍ŋ nda̍ wā ni̍.