Pu̍lɔ̍wāā 12 - Yāu̍ Mɛ̄lɛ̄ka̍a̍

¹ Wāna̍ bi̍a̍ndūŋ ho̍ō, mbō chɛ᷄l mā mīŋgi̍ ndu̍ o̍ nɛ̄īyo̍, wāna̍ ka̍a̍la̍ kɔ̄l kālo̍o̍ wo̍ cho̍ ko̍ŋ ni̍. Kɛ̍ wāna̍ bi̍a̍ndūŋ ho̍ō, ō chɛ᷅l mā mīŋgi̍ ndu̍ o̍ nɛ̄ī le̍ wo̍, dīɔ̄mndo̍ o̍ cho̍ ni̍.

² Wāna̍ tōnya̍a̍, le̍ te̍le̍ŋ o̍ te̍le̍ŋ, chɔ̄ɔ̍ Mɛ̄lɛ̄ka̍ Ya̍a̍wɛ̄ɛ̄ o̍ cha᷅ ndu̍ nyīnā ni̍. Kɛ̍ wānāa̍ cha᷅l ha̍ā mā tūu̍ sɔ̄ɔ̍ŋ wɔ̍ɔ̍ŋndo̍ŋ a̍ chāāŋāā ndāa̍ o̍kɔ̄ɔ̄ wa̍ nda̍, dɛ̍nɛ̍ pa̍lāa̍ Mɛ̄lɛ̄ka̍ Ya̍a̍wɛ̄ɛ̄ o̍ tu̍sī nda̍ chōo̍ ni̍.

³ Wāna̍ to̍sā ho̍ō yɔ̄ŋ wɔ̄ɔ̍ŋndo̍ wo̍ yōōmū ndɔ̄ɔ̍ ō ve᷅ o̍ bā ndɔ̄ɔ̍ chōo̍ yɛ̍lɛ̍kɛ̍lɛ̍ɛ̍ le̍. Kɛ̍ wāna̍ tōnya̍a̍ ndu̍, le̍ te̍le̍ŋ o̍ te̍le̍ŋ, yōōmū ndɔ̄ɔ̍ ō wānūŋ o̍ bā ndɔ̄ɔ̍ chōo̍ yɛ̍lɛ̍kɛ̍lɛ̍ɛ̍, nyɛ̄ o̍ nyɛ̄ yɔ̍nūŋ a̍ ndu̍ le̍.

⁴ Wānā la̍nɔ̍ kɛ̍ndɔ̄ɔ̍ chīɛ̄ī ni̍ŋ, ō chō māchūāā pɔ̍nɔ̍ɔ̍ o̍ bā mɛ̄ɛ̍ mɔ̍si̍l lēbɛ̄ɛ̄ bɛ̄ndōo̍ ō wā nu̍a̍ā wāŋndo̍ o̍ lēbōl lɛ̍. Kɛ̍ wānā la̍nɔ̍ chu̍ū ho̍ō pɔ̍nɔ̍ɔ̍ si̍ɔ̍mbu̍la̍ŋ chīɛ̄ī ni̍ŋ ndo̍ ō chō māchūāā mɛ̄ɛ̍ nāa̍ ō bīī nu̍a̍ā wāŋndo̍, mbō lūɛ̄ī ndu̍ o̍ pāāla̍ŋ ni᷄ŋ yɛ̍ mī pāa̍le̍ŋ lā sɛ̄ ndu̍ yɛ̍.

⁵ Wāna̍ tōnya̍a̍, le̍ te̍le̍ŋ o̍ te̍le̍ŋ tūūlā ndɔ̄la̍ŋ, o̍ nɛ̄ī sa̍kpō la̍ wa᷅ ni̍. Kɛ̍ wāna̍ dɛ̍nɛ̍ wɔ̍ɔ̍ŋndo̍ ndu̍, sīlā o̍ si̍lā wa̍nā wo̍, le̍ nu̍m hūīyo̍ o̍ si̍lā nu̍m ni̍.

⁶ Wāna̍ dɛ̍nɛ̍ wɔ̍ɔ̍ŋndo̍, dīōmndā dīyāā la̍ŋ, la̍ŋ la̍ fu̍lā ndu̍ o̍ sōndō ni̍. Kɛ̍ wāna̍ tōnya̍a̍ ndu̍, dīōmndā ndɔ̄la̍ŋ, lā nɔ̄lā mī lā chīīndi̍a̍a̍ wānāā nda̍ kɔ̄ŋgɔ̍la̍ŋ le̍ nda̍ dīūwo̍ wa̍.

⁷ Wānāā dɛ̍nɛ̍ wɔ̍ɔ̍ŋnda̍, tē ā vī pɛ̍, ā chūū wu᷄. Kɛ̍ wāna̍ tōnya̍a̍ ndu̍, ā yɔ̍ŋ bɛ̍ɛ̍ mbō vī, hīōūwɔ̄ɔ̍ chīɛ̄ī ndɔ̄ɔ̍ ō hīāū la̍chi̍ a̍ si᷄mnda̍ŋ nyɛ̄ kɛ̄ndɛ̄ yi̍ ni̍.

⁸ Wānā nɔ̍ kɔ̄l kālo̍o̍ pɛ̍, wāŋnda̍ līsa̍ nu̍m le̍ kɔ̄l kālu̍ nu̍mndo̍. Kɛ̍ tē ā nɔ̄ dīɔ̄mnde̍ pɛ̍, wānā o̍ wānā nɔ᷅ le̍bɛ̍ɛ̍ le̍ nūm te̍.

⁹ Wāna̍ cho̍ ho̍ō, ō chu̍e̍nūŋ o̍ bɛ̍ndū le̍, kɛ̍ mbo̍ nɔ̄la̍ mbō tōsa̍ wa̍llo̍ le̍ ndu̍ pi̍la̍ wo̍, ō nɔ̄ bɛ̄ɛ̄le̍ŋ mbo̍ hīāū wāna̍ chu̍a̍nu̍ŋ ho̍ō ō bɛ̄ndū, kɛ̍ nyɛ̄ dīa̍a̍ bɛ̍ɛ̍ ō nɔ̍ ndu̍ le̍ wo̍.

¹⁰ Wāna̍ tōnya̍a̍, chɔ̄lūāā ndūa̍a̍ bɛ̍ɛ̍ chāa̍ o̍ cha̍ā nda̍ bīyɔ̄ɔ̍ ni̍. Kɛ̍ wāna̍ dɛ̍nɛ̍ wɔ̍ɔ̍ŋndo̍, sūɛ̍i̍ o̍ yi̍yāŋ bɛ̍ɛ̍ māā sūɛ̍i̍ tōnyɛ̍i̍ o̍ to̍sa̍ ni̍ ve̍, sūɛ̍i̍ wɔ̍ɔ̍ŋnde̍ i̍ wa᷅ ni̍.

¹¹ Wāna̍ to̍sā ho̍ō wa̍llo̍ tōsā bɛ̄ndōo̍ wo̍, le̍ te̍le̍ŋ o̍ te̍le̍ŋ nyɛ̄ dīa̍a̍ o̍ nɔ᷅ ta̍u̍ ni̍. Kɛ̍ dīɔ̄mnda̍ nda̍, sɔ̄ɔ̍ŋ fo̍ndō fo̍ndo̍ŋ, mu̍ŋ nda̍ nyāānūŋ kɔ̍ɔ̍lī ni̍.

¹² Wānāā dɛ̍nɛ̍ wɔ̍ɔ̍ŋnda̍, nda̍ ye̍e̍mā nyɛ᷅m chāāŋāā ndāā wa̍nāā dɛ̍nɛ̍ wɔ̍ɔ̍ŋnda̍ ā pūŋgā wāŋnda̍ o̍ lābā wo̍ŋ ni̍. Kɛ̍ wānāā tōnya̍a̍ nda̍ nda̍, le̍ te̍le̍ŋ o̍ te̍le̍ŋ ā chō īsīsi̍ yi̍, mɛ̄ɛ̍ yɔ̄m pūūndu᷅ŋ ndɔ̄ɔ̍ŋ ŋ̄ lūɛ̄ī ho̍ō lɛ̄ŋ di̍ di̍ wo̍ ō wā nu̍a̍ā yɛ̍.

¹³ Wāna̍ dɛ̍nɛ̍ wɔ̍ɔ̍ŋndo̍, mī ndu̍ pi̍la̍ yi̍i̍nu̍ŋ a̍ dīōmnda̍ fu̍lā ndu̍ o̍ sōndō la̍ŋ. Kɛ̍ wāna̍ tōnya̍a̍ ndu̍, mī tōnya̍ ndɔ̄ɔ̍ sōli̍ ndu̍ o̍ kpūndɔ̍ɔ̍ ni᷄ŋ.

¹⁴ Dīōmnda̍ fu̍lā wa̍nā o̍ sōndō la̍ŋ, mī lā tōsa̍ mā sɔ̍la̍ dɛ̍nɛ̍ kɛ̍ndɔ̄ɔ̍. Le̍nde̍ ko̍ni̍ wānā sɔ̍lā dɛ̍nɛ̍ kɛ̍ndɔ̄ɔ̍ o̍ wa̍li̍ ŋ̄ tōsa̍ a̍ bālā nūmnda̍ŋ ndo̍ ni᷄ŋ ni̍.

¹⁵ Dīɔ̄mndo̍, nyɛ̄ o̍ nyɛ̄ o̍ tu̍u̍nu̍ŋ o̍ kɔ̄l pɛ̍, ō yīya̍ŋ māā ō bɛ̄nda̍. Kɛ̍ wāna̍ cho̍ wāna̍ kɔ̄l kālo̍o̍ wo̍ yɛ̍, nīla̍ŋ o̍ yāŋ o̍ sīlāa̍ ni̍.

¹⁶ Dīɔ̄mndo̍ tē ō dɔ̄ɔ̄nu᷄ŋ dɔ̍ɔ̍ tu̍mbe̍ pɛ̍, wānā nyu̍nā bɛ̍ɛ̍ le̍. Wāna̍ kɔ̄l kālo̍o̍ yɛ̄, te̍le̍ŋnda̍ŋ lā pūm mā yēi̍ ndu̍, kɛ̍ mbō mēīnu̍ŋ.

¹⁷ Wāna̍ di̍mī to᷅nya̍a̍ wo̍ ndu̍ se̍īlē kɛ̄ndɛ̄le̍ŋ o̍ tɛ̍ndā ni̍. Kɛ̍ wāna̍ di̍mī to᷅nya̍ le̍ wo̍ yɛ̄, ndu̍ tɛ̍ndā se̍īlē lāka̍fāle̍ŋ ni̍.

¹⁸ Dīōmndā wɔ̄ɔ̍ŋnda̍ŋ dīmīo̍o̍, lā yɔ̄ŋūl wa᷅ŋndo̍, nu̍a̍ wɔ̍ ko̍ mɛ̄ɛ̍ nda̍ lɔ̄wā nu̍a̍ā wāŋndo̍ a̍ mūɛ̄ī fāŋnde̍ yɛ̍. Kɛ̍ dīōmndā kɔ̄l kālu̍la̍ fu̍lā wa᷅ŋndo̍ o̍ sōndō la̍ŋ nda̍ŋ, sīŋgīo̍o̍ la̍ si̍ŋgī wa᷅ŋndo̍ ni̍.

¹⁹ Tōnya̍a̍ ndu̍, lōo̍ o̍ lo᷅ le̍cho̍ō le̍ fɛ̍ɛ̍ŋ a̍ fɛ̍ɛ̍ŋ ni̍. Kɛ̍ chōōla̍ŋ nda̍ŋ nda̍ŋ, le̍ te̍le̍ŋ bi̍ŋgī ko̍ni̍ la̍ wa᷅ ni̍.

²⁰ Wāna̍ tu̍u̍nūŋ ho̍ō sɔ̄ɔ̍ŋ wɔ̍ɔ̍ŋndo̍ŋ o̍ kɔ̄l a̍ chāāŋāā ndūa̍a̍ wo̍, wāna̍ lāchōōwāa̍ o̍ wa᷅ ni̍. Kɛ̍ wāna̍ tu̍u̍nūŋ ho̍ō sɔ̄ɔ̍ŋ kɛ̍ndɔ᷄ŋ o̍ kɔ̄l a̍ chāāŋāā ndūa̍a̍ wo̍ ndu̍, le̍ te̍le̍ŋ o̍ te̍le̍ŋ ō wānūŋ a̍ kɔ̄l kɛ̄ndɔ̄ɔ̍.

²¹ Wāna̍ tōnya̍a̍ sūɛ̍i̍ kpūndɛ̍i̍ ī kōma̍l ndu̍ le̍. Kɛ̍ wāna̍ dɛ̍nɛ̍ wɔ̍ɔ̍ŋndo̍ ndu̍, yōōmū ndɔ̄ɔ̍ le̍ te̍le̍ŋ o̍ te̍le̍ŋ ō chō o̍ kpūndɔ̍ɔ̍ ni᷄ŋ.

²² Mɛ̄lɛ̄ka̍ Ya̍a̍wɛ̄ɛ̄ o̍ tu̍l wāna̍ lāchōōwāa̍ lēyɛ̄. Kɛ̍ ō kāāla̍ wāna̍ di̍mī ho̍ō sūɛ̍i̍, mbō lo̍ o̍ lēdīōm ndo̍.

²³ Wāna̍ kɔ̄l kālo̍o̍ kɛ̄si᷄ŋndo̍ o̍ kɛ̍sīŋ sɔ̍ɔ̍ŋ o̍ si̍nā wo̍ŋ o̍ kɔ̄l ni̍. Kɛ̍ dīɔ̄mndo̍ ndu̍, dīɔ̄mīī ndūɛ̍i̍ chɔ̄mndo̍ ndi̍ kpe̍nde̍ke̍le̍ a̍ mɛ̄ɛ̍ o̍ su̍a̍ā yɛ̍.

²⁴ Wāna̍ to̍sā ho̍ō wa̍llo̍ tōsā bɛ̄ndōo̍ wo̍, mbō sīmnu᷄ŋ wa᷅na̍ wa᷅ wāŋnda̍ chīla̍ŋndo̍ o̍ kpe̍ku̍ ndɔ̄ so̍līa̍a̍ ni᷅ŋ. Kɛ̍ wāna̍ sīɛ̄lɛ̍i̍yo̍ ndu̍ ndu̍, chīɔ̍ɔ̍ o̍ mɛ̍ɛ̍lū ni̍.

²⁵ Būūla᷄ŋndo̍ wōlɔ̄ɔ̄lā lūsu̍lɛ̍i̍la̍ bɛ̄ndūla̍ŋ pīla̍ o̍ cho̍ ni̍. Kɛ̍ dīōmndā kɛ̄ndɛ̄la̍ŋ nda̍ŋ nda̍ŋ, le̍ te̍le̍ŋ o̍ te̍le̍ŋ, kɔ̄llo̍ la̍ nyɔ̍ɔ̍lū wa̍nā ni̍.

²⁶ Wāna̍ tōnya̍a̍ sīlāa̍ o̍ si̍lā cha̍a̍ŋāā ndūa̍a̍ ni̍, mbō sīmi̍ nda̍ o̍ nɛ̄ī. Kɛ̍ wāna̍ dɛ̍nɛ̍ wɔ̍ɔ̍ŋndo̍ ndu̍, fāŋāa̍ o̍ fa̍ŋā cha̍a̍ŋāā ndūa̍a̍ o̍ nɛ̄i̍ tōnya̍a̍ chōo̍ ni̍.

²⁷ Tē wānā nɔ̍ sīɛ̄lɛ̍i̍yo̍ pɛ̍, a̍ nɔ̍lā mā bīī nyɛ̄ ŋ̄ chō tōūwɔ̄ɔ̍ wo̍ le̍. Kɛ̍ wāna̍ to̍sā ho̍ō wa̍llo̍ tōsā bɛ̄ndōo̍ wo̍, mbō sūl sūllo̍ pīla̍.

²⁸ Wāa̍ wāna̍ tōnya̍, ndu̍ cho̍ nɛ̄ī kpe̍e̍kpe̍i̍ wānā sɔ̍lā yo̍o̍mōo̍ wo̍ ni̍. Kɛ̍ dɛ̍nɛ̍ wɔ̍ɔ̍ŋndo̍ yɛ̄, ndu̍ nɛ̄i̍ ya̍ā wa̍nā chi̍e̍e̍ pīɔ̍mndo̍ o̍ cho̍ ni̍.