Pu̍lɔ̍wāā 11 - Yāu̍ Mɛ̄lɛ̄ka̍a̍

¹ Mɛ̄lɛ̄ka̍ Ya̍a̍wɛ̄ɛ̄ o̍ tu̍l wānāa̍ to̍sāl wa᷅ŋnda̍ ka̍fāla̍ŋ o̍ wɔ̄ŋgūla̍ŋ ni᷄ŋ a̍ sēke̍lēi̍la̍ŋ nda̍ lēyɛ̄. Kɛ̍ wānāa̍ wa᷅ ha̍ā sa̍kpō a̍ wāŋnda̍ o̍ wɔ̄ŋgūla̍ŋ ni᷄ŋ nda̍, nda̍ o̍ ka̍a̍la̍ ni̍.

² Yōŋgāa̍ nyɛ̄ o̍ chu̍ū wa̍nā wo̍ ndu̍ cho̍ si̍ɔ̍mbu̍la̍ŋ ni̍. Le̍la̍ŋ ō chō sūɛ̍i̍ kɔ̄l kālu̍ le̍ mī wānā tu̍si̍ŋ.

³ Wānāā tōnya̍a̍, sa̍kpōyɛ̍ī ndɛ̄i̍, ndi̍ ma̍ndā nda̍ ni̍. Kɛ̍ wānāa̍ se̍ndu̍ ha̍ā le̍ wa̍, ka̍fālā ndāla̍ŋ, la̍ŋ la̍ tɛ̍ɛ̍mbūū nda̍ ni̍.

⁴ Mɛ̄ɛ̍ mɛ̄ɛ̍ wāŋndo̍ su᷄l tē Mɛ̄lɛ̄ka̍ dɔ̄ɔ̄nu᷄ŋ tu̍mbe̍ a̍ ndu̍ pɛ̍, sūl ndɔ̄ ko̍ŋ ō nɔ̍lā mbō māla̍ ndu̍ le̍. Kɛ̍ wāa̍ wāna̍ tōnya̍, ō nɔ̄lā mbō chīīndi̍a̍a̍ nu̍m, nāa̍ nūm o̍o̍ sɔ̍la̍ pīɔ̍m a̍ vi᷅ le̍.

⁵ Wānāā tōnya̍a̍, mī sa̍kpōyɛ̍ī ndɛ̄i̍ tōsa̍, mī yōōmū ndāa̍ ō wa̍ bɛ̍ɛ̍ŋ bɛ̍ɛ̍ŋ. Kɛ̍ wānāā dɛ̍nɛ̍ wɔ̍ɔ̍ŋnda̍ nda̍ mī dɛ̍nɛ̍ ndā wɔ̍ɔ̍ŋndo̍ ō tɛ̄ɛ̄mbu̍u̍ nda̍.

⁶ Wānāā tōnya̍a̍, mī sa̍kpōyɛ̍ī ndɛ̄i̍ ī chīīndi̍a̍a̍ yōōmūlā ndāla̍ŋ. Kɛ̍ wānāa̍ se̍ndu̍ ha̍ā le̍ wa̍, mī hɔ̄ltē ndāle̍ŋ lē tōsa̍ mā hāu̍.

⁷ Wāna̍ dɛ̍nɛ̍ wɔ̍ɔ̍ŋndo̍ tē ō vī pɛ̍, ō nɔ᷅ lɛ̍ nyɛ̄ o̍ nyɛ̄ o̍ wa᷅ le̍hɔ̍l o̍ nɛ̄ī le̍ ndu̍ le̍. Tīīnda᷄ŋ ndɔ̍ ndu̍ o̍o̍ dɔ̍ū o̍ sūllo̍ ni᷄ŋ ndo̍, mbō sīmnu᷄ŋ nyɛ᷅ fo̍ndō fu̍u̍.

⁸ Wāna̍ tōnya̍a̍, mī dɛ̍nɛ̍ pa̍lāa̍ ō kpɛ̄kpɛ̍la̍ ndu̍, ō pi̍lāŋ ndu̍ le̍. Mī dɛ̍nɛ̍ pa̍lāā kōŋ ō kɔ̍ to᷅l wāna̍ dɛ̍nɛ̍ wɔ̍ɔ̍ŋndo̍ chōo̍.

⁹ Wāna̍ dɛ̍nɛ̍ wɔ̍ɔ̍ŋndo̍, mī dīōmndā ndɔ̄la̍ŋ lā tɛ̄ɛ̄mbu̍u̍ wāna̍ nda̍ chīɛ̄ɛ̄li̍āŋndo̍. Kɛ̍ wāna̍ tōnya̍a̍, mī kɔ̄l kālu̍ ndɔ̄ɔ̍ tōsa̍ mbō hɛ̄lu᷄ŋ.

¹⁰ Tē wāna̍ tōnya̍a̍ ō dīī dɛ̍nɛ̍ pɛ̍, chi̍e̍e̍ o̍ wa᷅ ni̍ŋ ndo̍, nya̍a̍lo̍o̍ nda̍ dūāūnūŋ ni̍. Tē wāna̍ dɛ̍nɛ̍ wɔ̍ɔ̍ŋndo̍ ō vī pɛ̍, nya̍a̍lo̍o̍ wāŋnda̍ ā dūāūnūŋ ni̍.

¹¹ Wāna̍ ka̍ā kɛ̄ndɔ̄ɔ̍, sa̍la̍a̍ o̍ du̍a̍ū chi̍o̍o̍ ni̍, mī chi̍o̍o̍ hīōū lāchī. Kɛ̍ wāna̍ dɛ̍nɛ̍ wɔ̍ɔ̍ŋndo̍ ndu̍ pīɔ̄lɔ̄ɔ̍ o̍ pi̍āl chi̍o̍o̍ a̍ dīōmnda̍ fu̍lā ndu̍ o̍ sōndō la̍ŋ ni̍.

¹² Dīɔ̄mndo̍, ndu̍ ma᷅m wa᷅na̍ nda̍ chīɛ̄ɛ̄li̍āŋndo̍ māmɔ̄ɔ̄ chīyāā ndu̍ bɛ̄ɛ̄ wo̍ ni̍. Wāna̍ kɔ̄l kālo̍o̍ yɛ̄, ndu̍ nɔ̍ mēīnɔ᷄ŋndo̍ ni̍.

¹³ Wāna̍ cho̍ŋgū ho̍ō wo̍, ō cho̍ wāna̍ wānā di̍mūl īsɔ̄ɔ̍ mī ī lo̍ nya̍ tɛ̄ɛ̄ŋ nya̍ ŋi̍ɔ̍ɔ̍ŋ te̍. Kɛ̍ wāna̍ wānā la̍a̍lāŋ ho̍ō a̍ dīōm ndɔ̄ɔ̍ wo̍ ndu̍, ā nɔ̄lā mā di̍mu̍l ndu̍ sūɛ̍i̍ mī ī lo̍ nya̍ tɛ̄ɛ̄ŋ nya̍ ŋi̍ɔ̍ɔ̍ŋ.

¹⁴ Lēlɛ̄ŋ o̍ lēlɛ̄ŋ, tē lē nɔ̍ wa̍nāā sīlāā le̍, dēlɔ̄ɔ̍ le̍ de᷅l ni̍. Kɛ̍ lēlɛ̄ŋ o̍ lēlɛ᷄ŋ le̍ nɔ̍ wānāā sīlāa̍ kɛ̄ndīa̍a̍ ta̍u̍ pɛ̍, wānɔ᷄ŋndo̍ lɛ̄ŋndē lēŋ lē wānūŋ o̍ bā ndɔ̄ɔ̍ chōo̍ yɛ̍lɛ̍kɛ̍lɛ̍ɛ̍ ni̍.

¹⁵ Wānā o̍ wāna̍ ta̍a̍ni̍ mīāllo̍ pɛ̍, ā kēl sūe̍i̍. Ō wā o̍ kɛ̍ndɛ̄, wānā wo̍ū la̍ba̍ o̍ sūɛ̍i̍ wa̍ā le̍nde̍ ni̍ŋ te̍.

¹⁶ Wānā la̍nɔ̍ īkɛ̄ndɔ̄ɔ̍, bɛ̄ɛ̄le̍ŋ o̍ sɔ̍lā le̍ te̍le̍ŋ o̍ te̍le̍ŋ ni̍. Kɛ̍ wāŋ pīāāndūāā dɛ̍nɛ̍ wɔ̍ɔ̍ŋnda̍ nda̍, sūllo̍ ko̍ni̍ nda̍ sɔ̄lā ni̍, kɛ̍ ā nɔ᷅ le̍bɛ̍ɛ̍ le̍.

¹⁷ Kɛ̄ndɛ̄i̍ tōsāa̍ mī ī māla̍ wānā. Kɛ̍ dɛ̍nɛ̍ wɔ̍ɔ̍ŋndo̍ tōsāa̍ ndu̍ ndu̍, dɛ̍nɛ̍ pa̍lāa̍ nūm pi̍la̍ tu̍sīŋ cho̍o̍ ni̍.

¹⁸ Wāna̍ dɛ̍nɛ̍ wɔ̍ɔ̍ŋndo̍ nyɛ̄ o̍ nyɛ̄ o̍ sɔ̍la̍, hūēīye̍ ko̍ni̍ o̍ wa᷅ ni̍. Kɛ̍ wāna̍ tōnya̍a̍ ndu̍, dɛ̍nɛ̍ kɛ̍ndɛ̄ o̍ sɔ̍lā o̍ tōnya̍ ndɔ̄ɔ̍ ni᷅ŋ ndo̍, cha᷄lle̍ o̍ cha᷅l ndu̍ o̍ bā ni̍.

¹⁹ Wāna̍ la̍ndu̍ŋ ho̍ō kɔ̄l le̍ tōnya̍a̍ tōsāa̍ wo̍, hīōūwɔ̄ɔ̍ o̍ hi̍a̍ū la̍chi̍ a̍ wāa̍ yōōmū ni̍. Kɛ̍ wānāa̍ nya̍a̍nūŋ ha̍ā dɛ̍nɛ̍ wɔ̍ɔ̍ŋndo̍ kɔ̄ɔ̄lī wa̍ nda̍, wūo̍o̍ nda̍ wū ni̍.

²⁰ Mɛ̄lɛ̄ka̍ Ya̍a̍wɛ̄ɛ̄ o̍ tu̍l wāna̍ nɔ̍ ho̍ō yīya᷄ŋ dɛ̍nɛ̍ wɔ̍ɔ̍ŋndo̍ wo̍ lēyɛ̄. Kɛ̍ wāna̍ tōnya̍a̍ ndu̍ kāālāa̍ o̍ ka̍a̍lā ndu̍ ni̍.

²¹ Wāna̍ dɛ̍nɛ̍ wɔ̍ɔ̍ŋndo̍ ndu̍ ndu̍, dɛ̍nɛ̍ pa̍lāa̍ o̍ nɔ̍ ni̍ mbō sɔ̄la̍, nyɛ̄ o̍ nyɛ̄ tɛ̍ɛ̍mbūū ke̍ŋ te̍. Kɛ̍ wānāa̍ to̍sā ha̍ā sɔ̄ɔ̍ŋ tōnya̍ŋ nda̍ ki̍nɛ̍i̍, bāŋa᷄ŋndo̍ nda̍ sɔ̄lā ni̍.

²² Mɛ̄ɛ̍ mɛ̄ɛ̍ wānā la̍nɔ̍ɔ̍ ō na᷄ŋ, tē ō nɔ̍ kɔ̍l kālu̍ le̍, ō chō māchūāā mɛ̄ɛ̍ nda̍ bāā nu̍a̍ā pēūwo̍, kēlɛ̄i̍ īko̍o̍līi̍ye̍ o̍ mīli̍ŋ yɛ̍.

²³ Wāna̍ tōnya̍a̍, le̍ te̍le̍ŋ o̍ te̍le̍ŋ, dɛ̍nɛ̍ kɛ̍ndɔ̄ɔ̍ ndu̍ fu̍lā o̍ yēēmɛ̍i̍ ndūɛ̍i̍ ni᷄ŋ ni̍. Kɛ̍ wāna̍ dɛ̍nɛ̍ wɔ̍ɔ̍ŋndo̍ ndu̍, nyɛ̄ o̍ nɔ̍ mbō wa̍ lēhɔ̄l o̍ nɛ̄ī le̍ ndu̍ wo̍ cho̍ tu̍mbe̍ Mɛ̄lɛ̄ka̍ dūāūnūŋ a̍ ndu̍ wo̍ ni̍.

²⁴ Mɛ̄ɛ̍ wāŋndo̍ yɔ̄ŋgū a̍ kɔ̄l ndɔ̄ɔ̍ fɛ̍ɛ̍sɛ᷄ŋ yɛ̍, le̍nde̍ o̍ sɔ̍lā ta̍u̍ ni̍. Kɛ̍ wāna̍ sɔ̄ŋgbɔ̍ɔ̍ŋndo̍ ndu̍, nyɛ̄ o̍ nyɛ̄ o̍ nɔ̍, mbō hɛ̄lu᷄ŋ ndu̍, ndu̍yɛ̍ mbō mɛ̄ɛ̄lu̍ o̍ tāmbe̍i̍ ni᷄ŋ.

²⁵ Wānā o̍ wāna̍ cho̍ wāna̍ īkɛ̄ndɔ̄ɔ̍, dɛ̍nɛ̍ kɛ̍ndɔ̄ɔ̍ ndu̍ o̍ sɔ̍lā ni̍. Tē a̍ ma̍la̍ wāŋndo̍ pɛ̍, nūm bɛ̍ɛ̍ wāŋndo̍ māla̍ nu̍m.

²⁶ Wānāa̍ kɛ̍sī ha̍ā nyɛ̄ ndā di̍a̍a̍ le̍ te̍le̍ŋ māyīo̍o̍, le̍ ndu̍ hūnɔ̄ɔ̍ pīsīo̍o̍ o̍ ba̍ā kālā bɛ̄ndōo̍ wa̍, le̍ te̍le̍ŋ o̍ te̍le̍ŋ yēēmāa̍ wāŋnda̍ ā yēēmā ni̍ māā nyɛ̄ pālāa̍ ō kōma̍l wa̍nāā wāā le̍nde̍. Kɛ̍ wānāa̍ pi̍sī ha̍ā nyɛ̄ ndā dīa̍a̍ wāŋnda̍ o̍ lābā a̍ te̍le̍ŋ māyīo̍o̍ wa̍, sa̍lāa̍ wāŋnda̍ ā dūāū wa̍nāā wāā le̍nde̍ ni̍.

²⁷ Wānā o̍ wāna̍ nu̍u̍va̍ dɛ̍nɛ̍ kɛ̍ndɔ̄ɔ̍ pɛ̍, dɛ̍nɛ̍ kɛ̍ndɔ̄ɔ̍ o̍ sɔ̍lā ni̍. Wāna̍ nu̍u̍va̍ yɛ̄ īwɔ̄ɔ̍ŋnde̍ pɛ̍, īwɔ̄ɔ̍ŋnde̍ ko̍māl ndu̍.

²⁸ Wānāa̍ ti̍i̍ndāŋ ha̍ā sūltā ndāla̍ŋ nda̍, dēlɔ̄ɔ̍ nda̍ dēl ni̍. Kɛ̍ wāna̍ tōnya̍a̍ ndu̍ ndu̍, mɛ̄ɛ̍ yɔ̄mndo̍ ō wā nu̍a̍ā, lɔ̍ɔ̍ o̍ lɔ̍ɔ̍ pēi̍ ndūɛ̍i̍ ī wānūŋ tɛ̍ɛ̍ tɛ̍ɛ̍ yɛ̍, le̍nde̍ o̍ wa᷅ ni̍.

²⁹ Wānā o̍ wānā tē a̍ nu̍u̍va̍ dɛ̍nɛ̍ pa̍lāa̍ le̍ yu̍ŋgu̍ nu̍m nūm pi̍la̍a̍ pɛ̍, a̍ lo̍ bālā fo̍ndō. Le̍ te̍le̍ŋ o̍ te̍le̍ŋ dīɔ̄mnda̍, nda̍ wa᷅ bu̍ɛ̍i̍yāā wānāā kɔ̄l kālu̍a̍a̍ ni̍.

³⁰ Ka̍ālā wāna̍ tōnya̍a̍ lā chō māchūāā mɛ̄ɛ̍ yɔ᷄m yɔ̍ŋgū yo̍o̍mōo̍ wo̍ ō chō yɛ̍. Ndu̍yɛ̍ wānāa̍ na̍ŋnūŋ ha̍ā wāŋndā chīe̍e̍ya̍ o̍ ībūŋ mā sīīŋgu̍u̍ nda̍ wānāā nda̍ wa̍, wānāā kɔ̄l kālu̍a̍a̍ cho̍ ka̍ŋ ni̍.

³¹ Tē wāna̍ tōnya̍a̍ ō sɔ̄la̍ fāndā ndɔ̄ɔ̍ o̍ chi̍e̍ēŋndo̍ chōo̍ le̍ tōnya̍ ndɔ̄ɔ̍ pɛ̍, vɛ̄ɛ̍nɛ̍ i̍ wa᷅ yɛ̍ a̍ wānāā dɛ̍nɛ̍ wɔ̍ɔ̍ŋnda̍ ndu̍yɛ̍ a̍ wānāā yɔ̄ŋ wɔ̄ɔ̍ŋnda̍, ā sɔ̍lā pa̍a̍wā nda̍ nɔ̄ le̍ sɔ̄lāa̍ le̍ yɔ̄ŋndā ndāla̍ wɔ̍ɔ̍ŋnda̍ŋ ndo̍ le̍? Sɔ̄lāa̍ nda̍ sɔ̄lā ndu̍ ni̍.