Nɔ̍mbāā 9 - Yāu̍ Mɛ̄lɛ̄ka̍a̍

Mɛ̄lɛ̄ka̍ dīmu̍l I̍sɔ̄lūɛ̍i̍ya̍ le̍ mā bīī Bɔ̄ŋa᷅ŋ Hīōūwɔ̄ɔ̄ chōo̍ dīi̍ŋ ndɔ̄ɔ̍

¹ Mɛ̄ɛ̍ I̍sɔ̄lūɛ̍i̍ya̍ ā ma᷄l I̍chi̍pī ma̍ wā kɔ̄la̍ŋ, ā chīi̍ wɔ̄sīo̍o̍ ō pīlɛ̍, o̍ tīɔ̍ɔ̍ŋ ndɔ̄ɔ̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ su̍a̍ā nāa̍ Mūu̍sē chu̍a̍ o̍ pāŋgi̍i̍ tāse̍i̍ ni᷄ŋ, o̍ wɔ̄sī kōŋ ni᷄ŋ, nāa̍ nda̍ wa̍ o̍ po̍llo̍ ni᷄ŋ Sa̍a̍nāī wa̍. Mbo̍ dīmūl Mūu̍sē āā,

² “Di̍mu̍l wa᷅ŋnda̍ I̍sɔ̄lūɛ̄ī mā bīī Bɔ̄ŋa᷅ŋ Lōōna᷄ŋndo̍ a̍ Hīōūwɔ̄ɔ̄ chōo̍ wo̍ o̍kɔ̄ɔ̄, a̍ te̍le̍ŋ nda̍ nɔ̄ le̍ ndu̍ bīyɔ̄ɔ̍ wo̍.

³ Lā nɔ̄ mā bīī bɔ̄ŋa᷅ŋndo̍ ho̍ō o̍ pāŋge̍i̍ he̍ī ni᷄ŋ mālɔ̄ tɔ̍ a̍ lē hīɔ̍ɔ̍lu̍, a̍ te̍le̍ŋ fīti̍līo̍o̍. Ndu̍yɛ̍ mɛ̄ɛ̍ sāwāla̍ bɔ̄ŋa᷅ŋndo̍ ho̍ō lā dīmi̍ yɛ̍, le̍nde̍ nya̍ nɔ̄ ni̍ mī lā bīī ndu̍, lā nɔ̄ mī lā tōsa̍ nyɛ̄ o̍ nyɛ̄ mɛ̄ɛ̍ i̍ cho̍ ī dīmīāā yɛ̍.”

⁴ O̍ ko̍ŋ, mi̍ Mūu̍sē o̍ di̍mu̍l wāŋnda̍ I̍sɔ̄lūɛ̄ī le̍ mā bīī Bɔ̄ŋa᷅ŋ Lōōna᷄ŋndo̍ a̍ Hīōūwɔ̄ɔ̄ chōo̍ wo̍ ho̍ō.

⁵ Mi̍ wāŋnda̍ I̍sɔ̄lūɛ̄ī a̍ bi̍ī bɔ̄ŋa᷅ŋndo̍ ho̍ō nāa̍ nda̍ wa̍ o̍ po̍llo̍ ni᷄ŋ Sa̍a̍nāī wa̍, o̍ pāŋgi̍i̍ ke̍ŋ ni᷄ŋ mālɔ̄ tɔ̍ a̍ lē hīɔ̍ɔ̍lu̍ a̍ fīti̍līo̍o̍. Ndu̍yɛ̍ mi̍ wāŋnda̍ I̍sɔ̄lūɛ̄ī a̍ to̍sā nyɛ̄ o̍ nyɛ̄ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l Mūu̍sē yɛ̍.

⁶ Kɛ̍ mi̍ ī yɔ̄nu᷄ŋ wāŋnda̍ ā pūm nda̍ tɛ̄ɛ̄ŋ ā bīi̍ bɔ̍ŋa᷅ŋndo̍ ho̍ō pāa̍le̍ le̍ŋ te̍, kāni̍ fo̍ndōle̍, ā ve̍ a̍ di̍a̍ndāā Mɛ̄lɛ̄ka̍ o̍ hɔ̄l te̍, nda̍ a̍a̍ pi̍la̍ŋ wa̍nā vi̍lɛ̍i̍yo̍. O̍ ko̍ŋ, ma̍ hūŋ nāa̍ Mūu̍sē chu̍a̍ nda̍ E̍lɔ̄ŋ pāa̍le̍ le̍ŋ.

⁷ Ma̍ hu᷄ŋ di̍mūl nda̍ āā, “Ŋ̄ cho̍ a̍ di̍a̍ndāā Mɛ̄lɛ̄ka̍ o̍ hɔ̄l te̍, fo̍ndōle̍, ŋ̄ pīla̍ŋ wa̍nā vi̍lɛ̍i̍yo̍. Ndūyɛ̍ ŋ̄ yēēma̍ mī ŋ̄ wa̍ ā kpēēŋāā īkɛ̄i̍, ŋ̄ ve᷅ I̍sɔ̄lūɛ̍i̍ya̍ ā pīli̍a̍a̍ chōo̍ le̍ sa̍lāa̍ sōlīo̍o̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍, a̍ te̍le̍ŋ kpe̍e̍kpe̍i̍ na̍a̍ ŋ̄ nɔ̄ le̍ ndu̍ sōlīo̍o̍ wo̍ le̍.”

⁸ Mi̍ Mūu̍sē o̍ di̍mūl nda̍ āā, “Mɛ̄ɛ̍ lā chu᷄m ndɔ̍ mī nyu̍na̍ Mɛ̄lɛ̄ka̍ Ya̍a̍wɛ̄ɛ̄ a̍ ndi̍ o̍kɔ̄ɔ̄, mī ŋ̄ tūēī nyɛ̄ o̍ cho̍ dīmī a̍ nya̍ o̍kɔ̄ɔ̄ wo̍.”

⁹ Ndu̍yɛ̍ mɛ̄ɛ̍ Mūu̍sē o̍ nyu̍na̍ Mɛ̄lɛ̄ka̍ Ya̍a̍wɛ̄ɛ̄, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl ndu̍ āā,

¹⁰ “Di̍mu̍l wa᷅ŋnda̍ I̍sɔ̄lūɛ̄ī māā nyɛ̄ ya̍ Mɛ̍lɛ̄ka̍ dīmi̍ wo̍ cho̍ ho̍ō ni̍. Nya̍ ni̍ a̍ chūāūwāā nyāā ma̍māa̍ lēpūlā kɛ᷅, tē ī yɔ̄nu̍ŋ pɛ̍ mi̍ wānā o̍ wānā o̍ pi̍la̍ŋ wa̍nā vi̍lɛ̍i̍yo̍ a̍ te̍le̍ŋ bɔ̄ŋa᷅ŋndo̍ ho̍ō, ndu̍yɛ̍ mi̍ wānā ko̍ŋ ō sīmnu᷄ŋ o̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̍l, ɔ̄ɔ̄ mī ī yɔ̄nu̍ŋ mī te̍le̍ŋ bɔ̄ŋa᷅ŋndo̍ ho̍ō ō bīī wānā o̍ kēlā ni᷄ŋ, o̍ nɛ̄ī o̍ nɛ̄ī ni̍ŋ wānā ko̍ŋ ō nɔ̄ mbō bīī bɔ̄ŋa᷅ŋndo̍ ho̍ō.

¹¹ Kɛ̍ wānā ko̍ŋ o̍ pāŋgi̍i̍ di̍i̍ŋ ndūɛ̍i̍ ni᷄ŋ o̍ nɔ̍ ni᷅ŋ ni̍ mbō bīī bɔ̄ŋa᷅ŋndo̍ ho̍ō, o̍ mālɔ̄ tɔ̍ a̍ lē hīɔ̍ɔ̍lu̍a̍ŋ chōo̍ a̍ fīti̍līo̍o̍. Ndu̍yɛ̍ sāa̍ nda̍ chō dīyɔ̄ɔ̄ le̍ bɔ̄ŋa᷅ŋndo̍ ho̍ō wo̍, ā nɔ̄ mā dē ndu̍ a̍ lām lāpēē lōlɛ̍i̍yo̍ ndu̍yɛ̍, a̍ bēe̍dīi̍ nɔ̍ yi̍i̍sīi̍ le̍ wo̍ lātūlu̍.

¹² Ndu̍yɛ̍ sāa̍ ho̍ō ā nɔ̍ mā dē ndu̍ īchɔ̄l kōŋ kpo̍u̍, ō nɔ̍ mbō lɔ᷄l ku̍ya̍ le̍. Ndu̍yɛ̍ tē ā wa̍ vīsīŋ ndɔ̄ɔ̍ŋ dīo̍o̍ pɛ̍, ā nɔ̍ mā pɛ̄l pāā ndɔ̄ɔ̍ le̍. Bɔ̄ŋa᷅ŋndo̍ ho̍ō ō nɔ̄ mbō bīīnu᷄ŋ mɛ̄ɛ̍ sāwāla̍ ndɔ̄la̍ŋ lā dīmi̍ yɛ̍.

¹³ Kɛ̍ wānā o̍ wāna̍ cho̍ ō dīāndāā ya̍ Mɛ̍lɛ̄ka̍ o̍ hɔ̄l, tē ō kɛ̄ɛ̍ le̍ bɔ̄ŋa᷅ŋndo̍ ho̍ō bīyɔ̄ɔ̍ pɛ̍, ō cho̍ yɛ̍ mbō wa̍ māā wānā ko̍ŋ bɔ̄ŋa᷅ŋndo̍ ho̍ō ō bīī ndu̍ o̍ kēlā ni᷄ŋ te̍, wānā ko̍ŋ ā nɔ̄ mā sōli̍ ndu̍ I̍sɔ̄lūɛ̍i̍ya̍ tɛ̄ɛ̄ŋ po̍. Kāni̍ fo̍ndōle̍, le̍ mɛ̄ɛ̍ o̍ kɛ̍ɛ̍ le̍ sa̍lāa̍ sōlīo̍o̍ o̍ Mɛ̄lɛ̄ka̍ Ya̍a̍wɛ̄ɛ̄ lo̍ a̍ te̍le̍ŋ bɔ̄ŋa᷅ŋndo̍ ho̍ō yɛ̍. Ndu̍yɛ̍ wānā ko̍ŋ dɛ̍nɛ̍ pa̍lāā o̍ dɛ̍nɛ̍ pa̍lāā o̍ sɔ̍la̍ pɛ̍, ndu̍ pi̍la̍ tɔ̍ɔ̍ya̍ŋ ko̍ŋ ō wā chōo̍ ni̍, fo̍ndōle̍ le̍ yɔ̄ŋ wɔ̄ɔ̍ŋ o̍ to̍sa̍ wo̍.

¹⁴ “Ndu̍yɛ̍ tē ō wa̍ pɛ̍ mī wānāā lēkāa̍wa̍a̍ cho̍ nya̍ tɛ̄ɛ̄ŋ nda̍, nda̍ bɛ̍ɛ̍ mā yēēma̍ le̍ bɔ̄ŋa᷅ŋ hīōūwɔ̄ɔ̄ chōo̍ wo̍ ho̍ō bīyɔ̄ɔ̍, ā nɔ̄ di̍ mā bīī ndu̍, mɛ̄ɛ̍ sāwāla̍ bɔ̄ŋa᷅ŋndo̍ ho̍ō lā dīmi̍ yɛ̍. Sāwāla̍ pi᷅lɛ̍ la̍ŋ nda᷅ŋ, lā chō le̍ nya̍ I̍sɔ̄lūɛ̍i̍ya̍, a̍ wānāā lēkāa̍wa̍a̍ cho̍ nya̍ tɛ̄ɛ̄ŋ nda̍.”

A̍ mɛ̄ɛ̍ yu̍mbu̍ yu̍mbu̍ īkpūŋgbāa̍ tōl o̍ tɛ̍ndīi̍yo̍ chōo̍ yɛ̍ o̍kɔ̄ɔ̄

¹⁵ Pāa̍le̍ nda̍ chīi̍ tɛ̍ndīi̍ chɔ᷅m māā Mɛ̍lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍ tāŋgu̍l te̍ŋ, mi̍ yu̍mbu̍ yu̍mbu̍ i̍kpu̍ŋgbāa̍ tūāl mbo̍ kūmbū tɛ̍ndīi̍ ko̍ŋ kpo̍u̍. O̍ ko̍ŋ kɔ̍ɔ̍lī, mɛ̄ɛ̍ nyūmnda̍ŋ mā tōl, mi̍ yu̍mbu̍ yu̍mbu̍ i̍kpu̍ŋgbā kōŋ ō sīmnu᷄ŋ māā pa̍ŋgēle̍ lēyīŋ. Mbo̍ lō le̍nde̍ ha̍a̍a̍ mi̍ pāa̍le̍ŋ lē sīā.

¹⁶ Ndu̍yɛ̍ le̍nde̍ tɛ̍ndīi̍yo̍ ho̍ō ō wa̍ ni᷅ŋ ni̍, īpāla̍ ki̍nɛ̍i̍, yu̍mbu̍ yu̍mbu̍ i̍kpu̍ŋgbāa̍ wa̍ le̍chōo̍ ni̍, īchɔ̄l ki̍nɛ̍i̍, mbō sīmnu᷄ŋ māā pa̍ŋgēle̍ lēyīŋ.

¹⁷ Ndu̍yɛ̍ yu̍mbu̍ yu̍mbu̍ i̍kpu̍ŋgbāa̍ ho̍ō, ndu̍ wa̍ kɔ̄la̍ŋ a̍ I̍sɔ̄lūɛ̍i̍ya̍ ni̍. Te̍le̍ŋ o̍ te̍le̍ŋ ndu̍ o̍o̍ fa̍ŋa̍ŋ o̍ tɛ̍ndīi̍yo̍ chōo̍ pɛ̍ mbō wa̍ kɔ̄la̍ŋ, I̍sɔ̄lūɛ̍i̍ya̍ ā tōl ndu̍ kɔ̄ɔ̄lī. Ndu̍yɛ̍ bā o̍ bā ndu̍ o̍o̍ si̍m pɛ̍, ā kēlū dɔ̍ɔ̍ŋgɔ̍ɔ̍ lo̍ŋ.

¹⁸ Tē Mɛ̄lɛ̄ka̍ Ya̍a̍wɛ̄ɛ̄ ndu̍ o̍o̍ di̍mu̍l nda̍ pɛ̍ le̍ mā pūūsi̍a̍a̍ dɔ̍ɔ̍ŋgɔ̍ɔ̍ mā hīōū lāchī a̍ kɔ̄la̍ŋ, ā hīōū lāchī. Tē ō dīmu̍l nda̍ pɛ̍ le̍ mā cha᷄l bā o̍ bā pɛ̍, ā cha᷄l lo̍ŋ. Ndu̍yɛ̍ le̍ mā hīōū lāchī a̍ kɔ̄la̍ŋ, mɛ̄ɛ̍ mī yu̍mbu̍ yu̍mbu̍ i̍kpu̍ŋgbā kōŋ ndu̍ o̍o̍ fa̍ŋa̍ŋ o̍ tɛ̍ndīi̍yo̍ chōo̍ mbō kāndu̍ kɔ̄la̍ŋ. Tē ō fēŋa̍ŋ te̍, ā fe̍ŋāŋ o̍ dɔ̍ɔ̍ŋgɔ̍ nda̍ wā wo̍ le̍.

¹⁹ Ā yɔ᷄ŋ bɛ̍ɛ̍ mī yu̍mbu̍ yu̍mbu̍ i̍kpu̍ŋgbā kōŋ ndu̍ o̍o̍ vi̍o̍ū, mbō yāla̍ fa̍ŋa᷄ŋ o̍ tɛ̍ndīi̍yo̍ chōo̍ mbō hīōū lāchī le̍, wāŋnda̍ I̍sɔ̄lūɛ̄ī nda̍ a̍a̍ fe̍ŋāŋ o̍ dɔ̍ɔ̍ŋgɔ̍ nda̍ wā wo̍ le̍, kāni̍ fu̍u̍le̍, le̍nde̍ Mɛ̍lɛ̄ka̍ Ya̍a̍wɛ̄ɛ̄ ndu̍ o̍o̍ di̍mu̍l nda̍ ni̍.

²⁰ Te̍le̍ŋnda̍ŋ lā pūm, le̍ pālɛ̍i̍ ti̍ŋ ko̍ni̍ yu̍mbu̍ yu̍mbu̍ i̍kpu̍ŋgbā kōŋ ndu̍ o̍o̍ wa᷅ o̍ tɛ̍ndīi̍yo̍ chōo̍ ni̍, mbō fāŋa̍ŋ mbō hīōū lāchī. Ndu̍yɛ̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l nda̍ wo̍, lēchōo̍ nda̍ wa̍ kɔ̄la̍ŋ ni̍.

²¹ Te̍le̍ŋnda̍ŋ lā pūm le̍ nyūmnda̍ŋ mā pīlɛ̍ ko̍ni̍ yu̍mbu̍ yu̍mbu̍ ko̍ŋ ndu̍ o̍o̍ wa᷅ o̍ tɛ̍ndīi̍yo̍ chōo̍ ni̍. Tē pāa̍le̍ŋ lē sɛ̄ dɔ̍ɔ̍ pɛ̍ ō fāŋa̍ŋ ō hīōū lāchī a̍ kɔ̄la̍ŋ. O̍ ko̍ŋ, mī I̍sɔ̄lūɛ̍i̍ya̍ bɛ̍ɛ̍ a̍ pu̍u̍si̍a̍a̍ dɔ̍ɔ̍ŋgɔ̍ɔ̍ mā hīōū lāchī a̍ kɔ̄la̍ŋ.

²² Yu̍mbu̍ yu̍mbu̍ ko̍ŋ ndu̍ wa̍ kɔ̄la̍ŋ a̍ I̍sɔ̄lūɛ̍i̍ya̍ ni̍, ndu̍ o̍o̍ chi̍i̍ pālɛ̍i̍ i̍ ŋi̍i̍ŋ o̍ tɛ̍ndīi̍yo̍ chōo̍, ndu̍ o̍o̍ chi̍ī pa̍ŋgi̍i̍ pi᷅lɛ̍, kɛ̄lɛ̄ŋgāā mbō hīōū le̍nde̍, ha̍a̍a̍ te̍ ndu̍ o̍o̍ fe̍ŋa̍ŋ ndɔ̍ mbō hīōū lāchī a̍ kɔ̄la̍ŋ te̍, wāŋnda̍ I̍sɔ̄lūɛ̄ī nda̍ a̍a̍ fe̍ŋāŋ nāa̍ nda̍ wā wa̍ mā hīōū lāchī a̍ kɔ̄la̍ŋ te̍. Kɛ̍ dīmīo̍o̍ nu̍a̍ā mī ndu̍ o̍o̍ fa̍ŋa̍ŋ o̍ tɛ̍ndīi̍yo̍ chōo̍ mbō hīōū lāchī a̍ kɔ̄la̍ŋ, mī wāŋnda̍ I̍sɔ̄lūɛ̄ī nda̍ a̍a̍ bɛ̍ɛ̍ndi̍a̍ŋ bɛ̍ɛ̍ mī nda̍ a̍a̍ hi̍o̍ū lāchī a̍ kɔ̄la̍ŋ.

²³ Nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ ndu̍ o̍o̍ di̍mu̍l nda̍ sa̍na̍a̍ a̍ Mūu̍sē pɛ̍, ndu̍ nda̍ a̍a̍ to̍sa̍ ni̍, tē ō dīmu̍l nda̍ le̍ mā kēlū dɔ̍ɔ̍ŋgɔ̍ɔ̍ pɛ̍, ā kēlū, tē ō dīmu̍l nda̍ le̍ mā pūūsi̍a̍a̍ dɔ̍ɔ̍ŋgɔ̍ nda̍ wā wo̍ mā hīōū lāchī a̍ kɔ̄la̍ŋ pɛ̍, ā pūūsi̍a̍a̍ ā hīōū lāchī.