Nɔ̍mbāā 6 - Yāu̍ Mɛ̄lɛ̄ka̍a̍

Sāwāla̍ŋ le̍ Na̍a̍sālūɛ̍i̍ya̍

¹ O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ dīmu̍l Mūu̍sē āā,

² “Di̍mu̍l I̍sɔ̄lūɛ̍i̍ya̍ māā nyɛ̄ ya̍ Mɛ̍lɛ̄ka̍ dīmi̍ wo̍ cho̍ ho̍ō ni̍. Tē ō wa̍ pɛ̍ mī wāŋndo̍ ō chūa̍ būŋgɛ̄i̍ ī kālā ka̍lā le̍ mbō yɔ̄nu̍ŋ o̍ ya̍ Mɛ̍lɛ̄ka̍ lo̍ māā Na̍a̍sālūɛ̍i̍nɔ̍, ko̍ŋ cho̍ ni̍, wāna̍ cho̍ ō yɔ̄ŋa᷄ŋ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ wo̍, ō wa̍ wa̍nā pɔ̍nɔ̍ ō wa̍ wa̍nā la̍nɔ̍,

³ wānā ko̍ŋ ō nɔ̍ mbō ko᷄l māmūɛ̄ī kɛ̄lɛ̄ŋgāā mūɛ̄īmā kālā ka̍lā le̍. Māmūɛ̄ī o̍ māmūɛ̄ī ma̍ cho̍ mā tōōsīāā a̍ kīle̍pīi̍ya̍ŋ, ō nɔ̍ mbō ko᷄l ma̍ŋ te̍, ndu̍yɛ̍ ō nɔ̍ mbō dē vɛ̄lɛ̄ mākīle̍pīi̍ le̍, mā dīūwāā ni̍, mā vēsɛ̍i̍ ni̍.

⁴ Ha̍a̍a̍ a̍ te̍le̍ŋ wānā ko̍ŋ ō chō ō yɔ̄ŋa᷄ŋ o̍ ya̍ Mɛ̍lɛ̄ka̍ lo̍ mbo̍ wā māā Na̍a̍sālūɛ̍i̍nɔ̍ wo̍, wānā ko̍ŋ ō nɔ̍ mbō dē nyɛ̄ o̍ nyɛ̍ cho̍ ō tōōsīāā a̍ mākīle̍pīi̍ le̍. Bōo̍ mākīle̍pīi̍yo̍ bɛ̍ɛ̍ ō nɔ̍ mbō dē ndu̍ le̍, kɛ̄lɛ̄ŋgāāle̍ mbō dē ku̍lu̍la̍ŋ.

⁵ “Ha̍a̍a̍ a̍ te̍le̍ŋ wānā ko̍ŋ ō chō o̍ būŋgɛ̄ī o̍ chu̍a̍ ke̍ŋ nde̍ bɛ̄ŋgu̍ māā Na̍a̍sālūɛ̍i̍nɔ̍ wo̍, ō nɔ̍ mbo̍ sēndi̍ le̍, yīīŋnde̍ nɔ̄ mī ī wa̍ ndu̍ o̍ lēbōl le̍nde̍ ī vīlɛ̄ī, ha̍a̍a̍ mī te̍le̍ŋ o̍ chu̍a̍ būŋgɛ̄i̍ le̍ wāa̍ Na̍a̍sālūɛ̍i̍nɔ̍ wo̍ ō chūū. Wānā ko̍ŋ ō nɔ̄ mbō kɛ̄si̍ ndu̍ pi̍la̍ wāna̍ kāsī ya̍ Mɛ̍lɛ̄ka̍ Ya̍a̍wɛ̄ɛ̄ o̍ hɔ̄l.

⁶ Ndu̍yɛ̍ ha̍a̍a̍ mī te̍le̍ŋ o̍ cho̍ ko̍ŋ o̍ yɔ̍ŋa᷄ŋ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ wo̍ ō chūu̍, wānā ko̍ŋ ō nɔ̍ mbō sɔ̄ɔ̄ŋgu̍u̍ wānā vi̍lɛ̍i̍yo̍ īkɛ̄i̍ le̍.

⁷ Ā yɔ᷄ŋ bɛ̍ɛ̍ mbō wa̍ māā wānā ko̍ŋ fi̍nyā ndɔ̍, ɔ̄ɔ̄ kāla̍ ndɔ̄, ɔ̄ɔ̄ pɔ̄mbɔ̄ ndɔ̄, ɔ̄ɔ̄ bɛ̄ ndɔ̄, ɔ̄ɔ̄ yēma̍ ndɔ̍ vi᷅ ni̍, ō nɔ̍ mbō sɔ̄ɔ̄ŋgu̍u̍ wānā vi̍lɛ̍i̍ ko̍ŋ īkɛ̄i̍ le̍, yɔ̄ŋi̍ o̍ si̍mnu̍ŋ o̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l. Kāni̍ fo̍ndōle̍, wānā ko̍ŋ yīīŋīi̍ cho̍ ndu̍ ke̍ŋ o̍ lēbōl le̍, ndi̍ cho̍ tāāmāsi̍o̍o̍ ni̍ māā ō chō ō yɔ̄ŋa᷄ŋ o̍ ya̍ Mɛ̍lɛ̄ka̍ lo̍.

⁸ Ha̍a̍a̍ a̍ te̍le̍ŋ wānā ko̍ŋ ō chō Na̍a̍sālūɛ̍i̍nɔ̍ wo̍, wānā ko̍ŋ ō chō wāna̍ kāsī ya̍ Mɛ̍lɛ̄ka̍ Ya̍a̍wɛ̄ɛ̄ o̍ hɔ̄l.

⁹ “Tē ō wa̍ pɛ̍ mī wāŋndo̍ ō vī wu᷄ pe̍nde̍ke̍le̍ŋndo̍, wāna̍ cho̍ ō yɔ̄ŋa᷄ŋ o̍ ya̍ Mɛ̍lɛ̄ka̍ lo̍ wo̍ īkɛ̄i̍, mī wānā ko̍ŋ ō pīla̍ŋ wa̍nā vi̍lɛ̍i̍ ko̍ŋ, o̍ ko̍ŋ, mī yīīŋnde̍ ndu̍ o̍ lēbōl i̍ chɔ᷅m māā ō chō ō yɔ̄ŋa᷄ŋ o̍ ya̍ Mɛ̍lɛ̄ka̍ lo̍ ve̍ ī sīmnu᷄ŋ i̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l, wānā ko̍ŋ ō nɔ̄ mbō chu᷄m le̍ pālɛ̍i̍ ī ŋɔ᷄mpu᷅m, o̍ ŋɔ᷄mmɛ̍ū wo̍ ō nɔ̄ mbō sēndi̍ yīīŋīī kēŋ ndu̍ o̍ lēbōl. Ko̍ŋ to̍sā ni̍ mī wānā ko̍ŋ ō mīīŋgu̍ sīmnɔ᷄ŋ o̍ di̍a̍ndāā ya̍ Mɛ̍lɛ̄ka̍ o̍ hɔ̄l.

¹⁰ O̍ ko̍ŋ kɔ̍ɔ̍lī, o̍ pāa̍le̍ ŋɔ̄ma̍a̍ le̍ŋ chōo̍, wānā ko̍ŋ ō nɔ̄ mbō hīŋ a̍ pīīŋāā fɔ̍ŋndu̍a̍a̍ ā ŋīɔ̍ɔ̍ŋ ɔ̄ɔ̄ ka᷅ŋgbu̍a̍a̍ fɔ̍ŋndu̍a̍a̍ ā ŋīɔ̍ɔ̍ŋ nāa̍ wānā so̍līāā lāsa̍lāa̍ chūa̍, o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍ sōndōo̍.

¹¹ Ndu̍yɛ̍, yōūwāā ŋīɔ̍ɔ̍ŋ nda̍ ha̍ā wānā so̍līāā lāsa̍lāa̍ ō nɔ̄ mbō sōli̍ ō pīlɛ̍ sa̍lāa̍ le̍ yɔ̄ŋ wɔ̄ɔ̍ŋndo̍ fāŋāa̍, o̍ ko̍ŋ kɔ̍ɔ̍lī mbō sōli̍ ō pīlɔ̍ɔ̍ sa̍lā lūāmāa̍. Mɛ̄ɛ̍ o̍ nɛ̄īyo̍ ho̍ō ni᷄ŋ wānā so̍līāā lāsa̍lāa̍ ō lōōkū to̍sā ni̍ mī wānā ko̍ŋ ō sɔ̄la̍ mālɔ̄ɔ̍ le̍ yɔ̄ŋ ndɔ̄ wɔ̍ɔ̍ŋndo̍, kāni̍ fo̍ndōle̍, pīla̍ŋ o̍ pi̍la̍ŋ ko̍ŋ wa̍nā vi̍lɛ̍i̍ ko̍ŋ ndo̍, yɔ̄ŋ wɔ̄ɔ̍ŋndo̍ o̍ to̍sa̍ ko̍ŋ ni̍. O̍ ko̍ŋ kɔ̍ɔ̍lī, wānā ko̍ŋ ō nɔ̄ vɛ̄lɛ̄ mbō mīŋgi̍ būŋgɛ̄ī chēle̍ŋ chūā pāa̍le̍ le̍ŋ o̍ ya̍ Mɛ̍lɛ̄ka̍ lo̍ le̍ mbō wa̍ ō yɔ̄ŋga᷄ŋ o̍ ya̍ lo̍ māā Na̍a̍sālūɛ̍i̍nɔ̍, ndu̍yɛ̍ mbō ma᷄l yīīŋīī ndūɛ̍i̍ mī ī kāndu̍ vɛ̄lɛ̄ yīmbɔ̄ɔ̍.

¹² Wānā ko̍ŋ ō nɔ̄ vɛ̄lɛ̄ mbō mīŋgi̍ ndu̍ pi̍la̍ yɔ̄ŋgū o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍, ō ve᷅ lɛ̍ o̍ būŋgɛ̄ī pāāndūe̍i̍ bɛ̄ŋgu̍ le̍. Kāni̍ fo̍ndōle̍, yīīŋīi̍ wa̍ ndu̍ o̍ lēbōl mi̍ ndi̍ i̍i̍ chɔ᷅m māā ō wa̍ ō yɔ̄ŋga᷄ŋ o̍ ya̍ Mɛ̍lɛ̄ka̍ lo̍ ve̍, ī chīī ni᷅ŋ sīmnɔ᷄ŋ i̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l. Ndu̍yɛ̍ ō nɔ̄ mbō hīŋ a̍ sāā ko̍ndo̍ chi̍i̍ wɔ̄sīo̍o̍ ō pīlɛ̍ wo̍, le̍ ma̍ sōli̍ sa̍lā bīōndɔ᷄ŋndo̍.”

¹³ Mi̍ Mɛ̄lɛ̄ka̍ hīāū lāchī a̍ sūɛ̍i̍ nāa̍ Mūu̍sē chu̍a̍ mbo̍ dīmī āā, “Tē ō wa̍ pɛ̍ mī wāŋndo̍ te̍le̍ŋ ndɔ̍ o̍ chu̍a̍ būŋgɛ̄i̍ le̍ wāa̍ Na̍a̍sālūɛ̍i̍nɔ̍ wō ō chūū, sa̍lālā wānā ko̍ŋ nɔ̍ mbō sōli̍ la̍ŋ, la̍ŋ la̍ cho̍ la᷅ŋ ni̍. Wānā ko̍ŋ ō nɔ̄ mbō kūɛ̄ o̍ tɛ̍ndīi̍ chɔ᷄m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ sōndōo̍,

¹⁴ le̍ mbō kɔ̍ so̍lī sa̍lāla̍ŋ a̍ sāa̍ ā yāa̍ a̍ nɔ̍ sɔ᷅ŋ o̍ sɔ̄ŋ te̍ wa̍. O̍ nɔ̄ mbō sōli̍ sa̍lā lūāmāa̍ a̍ sāā ko̍ndo̍o̍ ō pīlɛ̍, o̍ chi̍i̍ wɔ̄sīo̍o̍ ō pīlɛ̍ wo̍, o̍ ko̍ŋ kɔ̍ɔ̍lī, mbō sōli̍ vɛ̄lɛ̄ sa̍lāa̍ a̍ sāā fɔ̍ŋndɔ̍ la̍a̍ndōo̍ ō pīlɛ̍, o̍ chi̍i̍ wɔ̄sīo̍o̍ ō pīlɛ̍ wo̍, sa̍la̍ cho̍ le̍ yɔ̄ŋ wɔ̄ɔ̍ŋndo̍ fāŋāa̍ wo̍, ndu̍yɛ̍ mbō sōli̍ vɛ̄lɛ̄ sa̍lā kɔ̄l nyūlōo̍ a̍ sāā ko̍ndo̍o̍ ō pīlɛ̍.

¹⁵ Sa̍lāla̍ŋ nda᷅ŋ ā nɔ̄ mā sōli̍ la̍ŋ lātūlu̍ a̍ sa̍lālā tɔ̄lɔ̄ɔ̄ ku̍llo̍, o̍ ko̍ŋ kɔ̍ɔ̍lī, a̍ sa̍lālā mūɛ̄īmā kīle̍pīi̍la̍ŋ, ndu̍yɛ̍ a̍ bēe̍dīi̍ nda̍ do̍ū yi̍i̍sīi̍ le̍ wo̍ kāmbɛ̍i̍yo̍ ō pīlɛ̍, bēe̍dīi̍ nda̍ mūūli̍āŋ ko̍lo̍ ndɔ̄ɔ̍ a̍ chūɛ̄īmā ɔ̄li̍fīi̍ya̍ŋ ndo̍, o̍ ko̍ŋ kɔ̍ɔ̍lī, a̍ bēe̍dīi̍ nda̍ tōōsīāā fɛ̍fɛ̍dɛ̍ɛ̍ fɛ̍fɛ̍dɛ̍ɛ̍ mā sūu̍ chūɛ̄īmā ɔ̄li̍fīi̍ya̍ŋ lēchōo̍ wo̍.

¹⁶ “Wānā so̍līāā lāsa̍lāa̍ ō nɔ̄ mbō sōli̍ sa̍lāla̍ŋ nda᷅ŋ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍, tē ō sōli̍ pɛ̍ sa̍la̍ cho̍ le̍ yɔ̄ŋ wɔ̄ɔ̍ŋndo̍ fāŋāa̍ wo̍, ō sōli̍ ni̍ko̍ sa̍lā lūāmāa̍.

¹⁷ Tē ō wa̍ sa̍lā kɔ̄l nyūlōo̍ sōlīo̍o̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ a̍ sāā ko̍ndo̍o̍ pɛ̍, ō nɔ̄ mbō mɔ̄sɔ̍ŋa̍ ndu̍ sōlī a̍ bēe̍dīi̍ ka̍mbɛ̍i̍ ko̍ŋ, lātūlu̍ a̍ sa̍lā tɔ̄lɔ̄ɔ̄ ku̍llo̍, ndu̍yɛ̍ a̍ sa̍lā mūɛ̄īmā kīle̍pīi̍ya̍ŋ.

¹⁸ Wāna̍ cho̍ ko̍ŋ o̍ yɔ̍ŋga᷄ŋ o̍ ya̍ Mɛ̍lɛ̄ka̍ lo̍ māā Na̍a̍sālūɛ̍i̍nɔ̍ wo̍, ō nɔ̄ mbō sēndi̍ yīīŋnde̍ ndu̍ o̍ lēbōl o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ o̍ cho̍ a̍ nya̍ lātūlu̍ wo̍ sōndōo̍, o̍ ko̍ŋ kɔ̍ɔ̍lī, mbō chūa̍ yīīŋīī kēŋ, mbō kɔ̍ ma᷅l ndi̍ o̍ yīŋ nāa̍ nda̍ chō sa̍lā kɔ̄l nyūlōo̍ sōlīo̍o̍ wa̍.

¹⁹ “O̍ ko̍ŋ, wānā so̍līāā lāsa̍lāa̍ ō chūa̍ chōŋgu̍ sāā ko̍ndo̍o̍ nda̍ sōli̍ sa̍lāa̍ wo̍ ō yāūwāa̍, a̍ bēe̍dīi̍ nda̍ līnda̍ kōlo̍ ndɔ̄ɔ̍ a̍ chūɛ̄īmā ɔ̍li̍fīi̍ya̍ŋ ndo̍ kpūŋgbɛ̄i̍ ī pīlɛ̍, a̍ bēe̍dīi̍ fɛ̍fɛ̍dɛ̍ɛ̍ fɛ̍fɛ̍dɛ̍ɛ̍ wo̍ kpūŋgbɛ̄i̍ ī pīlɛ̍, ō dɔ̄ū la̍ŋ wānā ko̍ŋ o̍ bā.

²⁰ O̍ ko̍ŋ kɔ̍ɔ̍lī, mī wānā so̍līāā lāsa̍lāa̍ ō bīī wānā ko̍ŋ wōlɔ̄ɔ̄lā sa̍lālā lāŋ o̍ bā mbō hēēlu̍ la̍ŋ o̍ bāla̍ŋ chōo̍ ya̍ Mɛ̍lɛ̄ka̍ Ya̍a̍wɛ̄ɛ̄ o̍ hɔ̄l, le̍ la̍ŋ yɔ̄ŋgōo̍ o̍ ya̍ lo̍ māā sa̍lā. Ndu̍yɛ̍ wōlɔ̄ɔ̄lā sa̍lālā lāŋ kpo̍u̍, lātūlu̍ a̍ vīsīŋ sa̍lāŋ nda̍ hēēlu̍ o̍ bāla̍ŋ chōo̍ ya̍ Mɛ̍lɛ̄ka̍ o̍ hɔ̄l le̍ mu̍ŋ yɔ̄ŋgōo̍ o̍ ya̍ lo̍ wo̍ŋ, mu̍ŋ yɔ̍nūŋ māā mɛ̄ɛ̄ya̍ŋ a̍ lɔ̄lōo̍ ni̍, wānā so̍līāā lāsa̍lāa̍ ndu̍ nɔ̍ la̍ŋ ni̍. Sa̍la̍ cho̍ ō kāsīo̍o̍ mbo̍ wā le̍ wānā so̍līāā lāsa̍lāa̍ wo̍ ndu̍ cho̍ ko̍ŋ ni̍. Tē ā chīi̍ nyɛ̄ o̍ nyɛ̄ to̍sā nu̍a̍ā pɛ̍ kpo̍u̍ le̍ wānā ko̍ŋ, mɛ̄ɛ̍ wānā ko̍ŋ ō nɔ̄ ni᷅ŋ di̍ mbō ko᷄l mūɛ̄īmā kīle̍pīi̍ya̍ŋ, fo̍ndōle̍ ō cho̍ lɛ̍ Na̍a̍sālūɛ̍i̍nɔ̍ le̍.

²¹ “Sāwāla̍ŋ nda᷅ŋ la̍ cho̍ le̍ wānāa̍ yɔ̍ŋgūŋ o̍ ya̍ Mɛ̍lɛ̄ka̍ lo̍ māā Na̍a̍sālūɛ̍i̍ya̍ la̍ŋ ni̍. Sa̍lā o̍ nɔ̍ mbō sōli̍ le̍ yɔ̄ŋgɔ᷄ŋ ndɔ̄ɔ̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ wo̍, ndu̍ cho̍ ko̍ŋ ni̍. Ndu̍yɛ̍ ō fūla̍ o̍ sa̍lā kōŋ kɔ̄ɔ̄lī, tē wānā ko̍ŋ ō chūa̍ ībūŋgā o̍ ībūŋgā chēle̍ŋ le̍ sa̍la̍ chēle̍ŋ sōlī pɛ̍, wānā ko̍ŋ ō nɔ̄ mbō pēēlu̍ būŋgɛ̄ī ndūɛ̄ī ke̍ŋ, mbō tōsa̍ nyɛ̄ o̍ chu̍a̍ būŋgɛ̄i̍ yo̍.”

A̍ sa̍lālā wānāā sōlīāā lāsa̍lāa̍ ā nɔ̄ mā dɔ̄ū wāŋnda̍ la̍ŋ o̍kɔ̄ɔ̄

²² O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ dīmūl Mūu̍sē āā,

²³ “Di̍mu̍l wa̍nāā sōlīāā lāsa̍lāa̍, E̍lɔ̄ŋ nda̍ pūa̍a̍ ndūa̍a̍ māā tē ā wa̍ I̍sɔ̄lūɛ̍i̍ya̍ sa̍lālā la̍ŋ dɔ̄wɔ̄ɔ̍ pɛ̍, dīōmndā nda̍ nɔ̄ mā dīmi̍ o̍ sa̍lālā la̍ŋ dɔ̄wɔ̄ɔ̍ ni᷄ŋ nda̍ŋ la̍ŋ la̍ cho̍ la᷅ŋ ni̍. Ā nɔ̄ mā dīmi̍ āā,

²⁴ ‘Mbɔ̄ māā Mɛ̄lɛ̄ka̍ Ya̍a̍wɛ̄ɛ̄ o̍ dɔ̍u̍ nya̍ sa̍lā mbō mānda̍ nya̍ fɔ̍.

²⁵ Mbɔ̄ māā Mɛ̄lɛ̄ka̍ Ya̍a̍wɛ̄ɛ̄ o̍ tu̍i̍i̍nu̍ŋ nya̍ īnyīɛ̍ɛ̍, ndu̍yɛ̍ mbō wa̍ wāna̍ īkɛ̄ndɛ̄ nāa̍ nya̍ chūā fɔ̍.

²⁶ Mbɔ̄ māā Mɛ̄lɛ̄ka̍ Ya̍a̍wɛ̄ɛ̄ o̍ chɔ̍ nya̍ nyīnā, ndu̍yɛ̍ mbō ke᷄ nya̍ kɔ̄l nyūlōo̍ fɔ̍.’

²⁷ “Te̍le̍ŋ o̍ te̍le̍ŋ tē ā wa̍ wāŋnda̍ sa̍lāla̍ŋ dɔ̄wɔ̄ɔ̍ pɛ̍, ā nɔ̄ mā pɛ̄l dīōlā nīla̍ŋ o̍ nda̍ sa̍lāla̍ŋ dɔ̄wɔ̄ɔ̍ ni᷄ŋ. Tē ā tōsa̍ le̍nde̍ pɛ̍, sa̍lāa̍ ya̍ Mɛ̍lɛ̄ka̍ dūāū wa᷅ŋnda̍ ni̍.”