Nɔ̍mbāā 5 - Yāu̍ Mɛ̄lɛ̄ka̍a̍

A̍ wānāa̍ si̍mnūŋ a̍ nɔ̍ɔ̍lɛ̍i̍ Mɛ̍lɛ̄ka̍ o̍ hɔ̄l la̍ o̍kɔ̄ɔ̄

¹ Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā,

² “Di̍mu̍l I̍sɔ̄lūɛ̍i̍ya̍ māā wānāa̍ nɔ̍ nāā wɔ̄ɔ̍ŋndo̍ ō pu᷄m lēkɔ̄ɔ̍ wa̍ ki̍nɛ̍i̍, a̍ wānāa̍ chi̍ī o̍ lɛ̄mbɔ̄ɔ̍ ni᷄ŋ nda̍, o̍ ko̍ŋ kɔ̍ɔ̍lī, a̍ wānāa̍ si̍mnūŋ a̍ nɔ̍ɔ̍lɛ̍i̍ ya̍ Mɛ̍lɛ̄ka̍ o̍ hɔ̄l le̍ mɛ̄ɛ̍ nda̍ pīla̍ŋ wa̍nā vi̍lɛ̍i̍yo̍ yɛ̍ wa̍, wāŋnda̍ ha̍ā ki̍nɛ̍i̍, lā nɔ̄ mī lā sōli̍ nda̍ o̍ dɔ̍ɔ̍ŋgɔ̍ɔ̍ ni᷄ŋ, kāni̍ fo̍ndōle̍ wānāa̍ cho̍ ā nɔ̄ɔ̄lɛ̍i̍ ya̍ Mɛ̍lɛ̄ka̍ o̍ hɔ̄l la̍ nda̍ chō ni̍.

³ Wāŋnda̍ ha̍ā lā nɔ̄ mī lā sōli̍ nda̍ o̍ dɔ̍ɔ̍ŋgɔ̍ nya̍ chō wo̍ ni᷄ŋ, ō wa̍ wa̍nā pɔ̍nɔ̍, o̍ wa̍ wa̍nā la̍nɔ̍, yɔ̄ŋi̍ nda̍ tōsa̍ mī dɔ̍ɔ̍ŋgɔ̍ɔ̍ ō sīmnu᷄ŋ o̍ nɔ̍ɔ̍lɛ̍i̍, nāa̍ ya̍ Mɛ̍lɛ̄ka̍ pīla̍ chō īchāli̍ nya̍ tɛ̄ɛ̄ŋ nda̍.”

⁴ O̍ ko̍ŋ, mi̍ wāŋnda̍ I̍sɔ̄lūɛ̄ī a̍ to̍sā mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l Mūu̍sē yɛ̍. Wānāā Mɛ̄lɛ̄ka̍ dīmu̍l nda̍ ka̍ŋ nda̍ ki̍nɛ̍i̍, ma̍ sōlī nda̍ o̍ dɔ̍ɔ̍ŋgɔ̍ɔ̍ ni᷄ŋ kpo̍u̍.

Dɛ̍nɛ̍ pa̍lāa̍ le̍ yɔ̄ŋ wɔ̄ɔ̍ŋndo̍

⁵ O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā,

⁶ “Di̍mu̍l wa᷅ŋnda̍ I̍sɔ̄lūɛ̄ī māā nyɛ̄ ya̍ Mɛ̍lɛ̄ka̍ dīmi̍ wo̍ cho̍ ho̍ō ni̍. Wānā o̍ wāna̍ to̍sa̍l chāa̍ŋ ndɔ̍ sūɛ̍i̍ wɔ̍ɔ̍ŋnde̍ pɛ̍, kɛ̄lɛ̄ŋgāā mbō kɛ̄ɛ̍ wāa̍ sa̍kpō a̍ ya̍ Mɛ̍lɛ̄ka̍ Ya̍a̍wɛ̄ɛ̄, ō wa̍ wa̍nā pɔ̍nɔ̍, ō wa̍ wa̍nā la̍nɔ̍, mɛ̄ɛ̍ wānā ko̍ŋ ō tōsa̍ yɔ̄ŋ wɔ̄ɔ̍ŋndo̍ a̍ ya̍ Mɛ̍lɛ̄ka̍.

⁷ Wānā ko̍ŋ ō nɔ̄ mbō chɔ̄ɔ̄mu̍u̍ yɔ̄ŋ wɔ̄ɔ̍ŋ o̍ to̍sa̍ a̍ chāa̍ŋ ndɔ̄ ko̍ŋ ndo̍. Ndu̍yɛ̍ ō nɔ̄ mbō pāāwa̍ chāa̍ŋ ndɔ̍ ko̍ŋ a̍ ba̍na̍sīi̍yo̍ lēcho̍ō. Tē ō nɔ̄ le̍ pāāwāa̍ kɛ̍mɛ̄ pɛ̍, ō hāndu̍ lēchōo̍ bi̍di̍i̍ŋ.

⁸ Kɛ̍ tē ō wa̍ pɛ̍, mī wāna̍ o̍ to̍sa̍l ko̍ŋ yɔ᷅ŋ wɔ̄ɔ̍ŋndo̍ wo̍ ō vī, ndu̍yɛ̍ mī wānā ko̍ŋ ō mɛ̄i̍ wānāyɛ̍ī ndɔ̄ le̍ pāāwāa̍ o̍ ndu̍ lo̍ le̍, mɛ̄ɛ̍ nyɛ̄ wānā ko̍ŋ ndu̍ o̍o̍ nɔ̍ le̍ pāāwāa̍ wo̍ ō nɔ̄ mbō yɔ̄ŋgu̍ ndu̍ o̍ wānā so̍līāā lāsa̍lāa̍ lo̍, a̍ sāā ko̍ndo̍o̍ lēchōo̍, mī nyɛ̄ kōŋ ō wa̍ le̍ ya̍ Mɛ̄lɛ̄ka̍ Ya̍a̍wɛ̄ɛ̄. Ndu̍yɛ̍ mī wānā so̍līāā lāsa̍lāa̍ ō sōli̍ sāā ko̍ndo̍ ko̍ŋ sa̍lāa̍ o̍ ya̍ Mɛ̍lɛ̄ka̍ lo̍ le̍ mī wānā ko̍ŋ ō sɔ̄la̍ mālɔ̄ɔ̍ le̍ yɔ̄ŋ ndɔ̄ wɔ̍ɔ̍ŋndo̍ ndu̍yɛ̍ mbō sɔ̄la̍ dīōndɔ̄ɔ̍ ya̍ Mɛ̍lɛ̄ka̍ o̍ hɔ̄l.

⁹ Ndu̍yɛ̍ ō fūla̍ o̍ ko̍ŋ kɔ̍ɔ̍lī, nyɛ̄ o̍ nyɛ̄ I̍sɔ̄lūɛ̍i̍nɔ̍ɔ̍ ō hīŋ pɛ̍ o̍ wānā so̍līāā sa̍lāa̍ lo̍, mī nyɛ̄ kōŋ ō wa̍ ō yɔ̄ŋa᷄ŋ o̍ ya̍ Mɛ̍lɛ̄ka̍ lo̍ māā kē kpe̍e̍kpe̍i̍ pɛ̍, nyɛ̄ kōŋ le̍ wānā so̍līāā lāsa̍lāa̍ o̍ wa᷅ ni̍.

¹⁰ Wānā o̍ wānā so̍līāā lāsa̍lā nda̍ chūu̍ kē wāā le̍nde̍ pɛ̍, le̍ ndu̍ kē kōŋ ō chō ni̍.”

A̍ mɛ̄ɛ̍ sɔ̄ɔ̍ŋ pa̍ŋa̍lɛ̍i̍yo̍ŋ pɔ̍nɔ̍ɔ̍ a̍ la̍nɔ̍ɔ̍ tɛ̄ɛ̄ŋ ŋ̄ nɔ̄ mī ŋ̄ bīīnu᷄ŋ yɛ̍

¹¹ O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ dīmūl Mūu̍sē āā,

¹² “Di̍mu̍l wa᷅ŋnda̍ I̍sɔ̄lūɛ̄ī māā nyɛ̄ ya̍ Mɛ̍lɛ̄ka̍ dīmi̍ wo̍ cho̍ ho̍ō ni̍. Mī ī yɔ̄nu̍ŋ dɔ̍ɔ̍, mī pōo̍ chīīku̍u̍ la̍a̍ ndɔ̄ māā ō lūɛ̄ī tīɔ̄mɔ̄ɔ̍.

¹³ Kɛ̍ ndu̍yɛ̍ mī chūa̍a̍ ho̍ō ō vēŋ sūɛ̍i̍ he̍ī kpi̍ŋ, mbō kūānūŋ hi̍ni̍ŋnda̍ŋ a̍ wānā pɔ̍nɔ̍ che᷅le̍ŋ, pɔ̍nɔ̍ɔ̍ si̍nā le̍, ndu̍yɛ̍ wānā o̍ wānā o̍ si̍nā vɛ̍lɛ̄ a̍ ndi̍ o̍kɔ̄ɔ̄ le̍. O̍ ko̍ŋ kɔ̍ɔ̍lī, se̍ī o̍ se̍ī cho̍ vɛ̍lɛ̄ mbō tɛ̄nda̍ lēse̍ī a̍ ndi̍ o̍kɔ̄ɔ̄ le̍, ndu̍yɛ̍ ā bīi̍ yɛ̍ vɛ̄lɛ̄ nda̍ nda̍ po̍ ko̍ŋ te̍.

¹⁴ Mī ī yɔ̄nu̍ŋ mī pɔ̍nɔ̍ɔ̍ ō chīīku̍u̍ sūɛ̍i̍ he̍ī mbō wa̍ la̍a̍ ndɔ̍ pāŋālāa̍. Ɔ̄ɔ̄ mī po̍ che᷅le̍ŋ ō wa̍ la̍a̍ ndɔ̍ pāŋālāa̍, kɛ̍ mī ī ve̍ to᷅nya̍ māā la̍a̍ ndɔ̄ o̍ cho̍ tīɔ̄mɔ̄ɔ̍ le̍.

¹⁵ Wānā pɔ̍nɔ̍ wa᷅ ko̍ŋ la̍a̍ ndɔ̍ pāŋālāa̍ wo̍, ō nɔ̄ mbō hīŋ a̍ la̍a̍ ndɔ̄ ko̍ŋ nāa̍ wa̍nā so̍līāā lāsa̍lāa̍ chūa̍. O̍ ko̍ŋ kɔ̍ɔ̍lī, mbō hīŋ a̍ kōlo̍ ŋ̄ba̍a̍līi̍yo̍ pa᷅ŋnda̍ŋ lā tīɔ̍ɔ̍ŋ le̍ sa̍lāa̍ sōlīo̍o̍. Ō nɔ̍ mbō tāla̍ māchūɛ̄ī o̍ kōlō ko̍ŋ chōo̍ le̍, ndu̍yɛ̍, ō nɔ̍ mbō dɔ̄ū vɛ̄lɛ̄ nyɛ̄m chūŋ kɛ̄ndɔ᷄ŋ lēcho̍ō le̍. Kāni̍ fo̍ndōle̍, sa̍la̍ tɔ̄lɔ̄ɔ̄ ku̍l nɔ̍ mbō sōli̍ŋ le̍ pāŋālāa̍ wo̍ o̍ cho̍ ni̍, sa̍la̍ cho̍ le̍ tōnya̍a̍ sīnāa̍ a̍ yɔ̄ŋ wɔ̄ɔ̍ŋndo̍ o̍kɔ̄ɔ̄ wo̍.

¹⁶ “Tē po̍ kōŋ hīŋ a̍ chūā kōŋ nāa̍ wānā so̍līāā lāsa̍lāa̍ chūā pɛ̍, wānā so̍līāā lāsa̍lāa̍ ō kɔ̍ si̍mī chūā kōŋ ma̍āŋndo̍ lāchī.

¹⁷ O̍ ko̍ŋ kɔ̍ɔ̍lī, mī wānā so̍līāā lāsa̍lāa̍ ō dɔ̄ū mɛ̄ŋma̍ cho̍ mā yɔ̄ŋga᷄ŋ o̍ Mɛ̄lɛ̄ka̍ lo̍ wa̍ŋ o̍ kpɛ̍ɛ̍nɛ̍i̍ pūūlūe̍i̍ ni᷄ŋ, ndu̍yɛ̍ mbō kɔ̍ kɔ̍ndū chu̍ndo̍o̍ lɛ̄ŋ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍ ni᷄ŋ, mbō hu᷄ŋ dɔ̍ū ndu̍ o̍ mɛ̄ŋmā māŋ ni᷄ŋ mbō hi᷄ŋ mɛ̄ŋmā māŋ a̍ chu̍ndu̍ ko̍ŋ lātūlu̍.

¹⁸ Ndu̍yɛ̍ tē wānā so̍līāā lāsa̍lāa̍ ō sīmi̍ chūā kōŋ o̍ ma̍āŋ ya̍ Mɛ̍lɛ̄ka̍ Ya̍a̍wɛ̄ɛ̄ lāchī pɛ̍, ō nɔ̄ mbō tīīmbu̍u̍ chūā kōŋ yīīŋnde̍, o̍ ko̍ŋ kɔ̍ɔ̍lī, mbō chūa̍ kōlo̍ sa̍lā tɔ̄lɔ̄ɔ̄ ku̍llo̍, o̍ cho̍ le̍ sa̍lā pāŋa̍lɛ̍i̍yo̍ sōlīo̍o̍ le̍ tōnya̍a̍ sīnāa̍ a̍ yɔ̄ŋ wɔ̄ɔ̍ŋndo̍ wo̍, mbō ke̍ chūā kōŋ mbō si᷄m a̍ ndu̍ o̍ bā. O̍ ko̍ŋ kɔ̍ɔ̍lī, mī wānā so̍līāā lāsa̍lāa̍ ndu̍ pi̍la̍ si̍m a̍ kpɛ̍ɛ̍nɛ̍i̍ nɔ̍ ke̍ŋ mɛ̄ŋmā lōlɛ̍i̍ya̍ŋ lēni᷄ŋ nde̍ o̍ bā, mɛ̄ŋma̍ to̍sā mī sēndi̍o̍o̍ ō bīī wāŋndo̍ wa̍ŋ.

¹⁹ O̍ ko̍ŋ kɔ̍ɔ̍lī, mi̍ wānā so̍līāā lāsa̍lāa̍ ō tōsa̍ mī chūa̍a̍ ō mēna᷄ŋ. Mbō dīmu̍l chūa̍a̍ āā, ‘Kāni̍ nya̍ cha᷄l nya̍ pɔ̍nɔ̍ nu̍m, tē a̍ to̍sa̍l lɔ̍ ndu̍ lāka̍fā o̍ lāka̍fā, mī lā wa̍ nya̍ wānā pɔ̍nɔ̍ che᷅le̍ŋ, o̍ ko̍ŋ mā sīmnu᷄ŋ o̍ nɔ̍ɔ̍lɛ̍i̍ Mɛ̍lɛ̄ka̍ o̍ hɔ̄l te̍, mɛ̄ɛ̍ me̍na̍ŋ. Tē ō cho̍ tɛ̍ɛ̍mbūū nūm te̍, mɛ̄ɛ̍ sēndi̍ māmɛ̄ŋndo̍ ho̍ō ō bi̍ī nu̍m te̍.

²⁰ Kɛ̍ chɔ̍ŋ a̍ chāli̍i̍ nyɛ̄i̍ nya̍ pɔ̍nɔ̍ nu̍m, tē a̍ wa̍ ni᷅ŋ nya̍ wānā pɔ̍nɔ̍ che᷅le̍ŋ pɛ̍,

^21-22 kōlɔ̄ɔ̄ ŋ̄ chō mɛ̄ŋnda̍ŋ ma᷅ŋ ndo̍, tē mā fūūlu̍u̍ nu̍m ni᷄ŋ pɛ̍, mbɔ̄ māā Mɛ̄lɛ̄ka̍ Ya̍a̍wɛ̄ɛ̄ o̍ to̍sa̍ mī dēmbōo̍ ō pɛ̄ nu̍m, ndu̍yɛ̍ mbō tōsa̍ a̍ vi᷅lū le̍ fɔ̍. Mbɔ̄ māā Mɛ̄lɛ̄ka̍ tōsa̍ mī sēndi̍o̍o̍ ō wa̍ nu̍m chōo̍ wa᷅ŋnda̍ tɛ̄ɛ̄ŋ fɔ̍.’ “O̍ ko̍ŋ, mī chūa̍a̍ ō mūli̍ āā, ‘Āmi̍i̍nā.’

²³ “O̍ ko̍ŋ kɔ̍ɔ̍lī, mī wānā so̍līāā lāsa̍lāa̍ ō pōōnyi̍a̍a̍ dīōmndā sēndi̍lā lāŋ o̍ yāu̍wo̍ chōo̍ kpo̍u̍, ndu̍yɛ̍ mbō tɔ̄ɔ̄ yāu̍ ko̍ŋ o̍ mɛ̄ŋmā lōlɛ̍i̍ma̍ ma̍ŋ ni᷄ŋ.

²⁴ O̍ ko̍ŋ, mī wānā so̍līāā lāsāa̍ ō ke̍ chūā kōŋ mɛ̄ŋmā lōlɛ̍i̍ma̍ ma̍ŋ mbō ko᷄l, mɛ̄ŋma̍ to̍sā mī sēndi̍o̍o̍ ō bīī wāŋndo̍ wa̍ŋ. Ndu̍yɛ̍ tē ō wa̍ pɛ̍ māā chūā kōŋ ō tōsa̍ sūɛ̍i̍ wɔ̍ɔ̍ŋīī wāā le̍nde̍ a̍ pɔ̍nɔ̍ ndɔ̍, tē mɛ̄ŋmā māŋ mā fūūlu̍u̍ ndu̍ ni᷄ŋ pɛ̍, nāā īpūlu̍ wɔ̍ɔ̍ŋndo̍ o̍ sɔ̍lā ni̍.

²⁵ Ndu̍yɛ̍ wānā so̍līāā lāsa̍lāa̍ ō nɔ̄ mbō bīī sa̍lā tɔ̄lɔ̄ɔ̄ ku̍l nɔ̍ ko̍ŋ mbō sōli̍ŋ le̍ pāŋālāa̍ wo̍ chūā kōŋ o̍ bā, mbō hēēlu̍ ndu̍ chōo̍ cho̍o̍ o̍ bāla̍ŋ chōo̍ ya̍ Mɛ̍lɛ̄ka̍ Ya̍a̍wɛ̄ɛ̍ lāchī le̍ ndu̍ yɔ̄ŋgōo̍ o̍ ya̍ Mɛ̍lɛ̄ka̍ lo̍. Mbō mu̍li̍ŋ mbō hīŋ a̍ sa̍lā kōŋ o̍ ma̍āŋndo̍.

²⁶ Tē wānā so̍līāā lāsa̍lāa̍ ō hīŋ a̍ ndu̍ lo̍ŋ pɛ̍, ō lo̍ o̍ ko̍ŋ ō nyɔ̄la̍ ndu̍ nyɛ̄ pɔ̄mbɔ̄ le̍ tānāa̍, ō lōm ō pɔ̄mbɔ̄ o̍ cho̍ ko̍ŋ nyɔ̍lā wo̍ o̍ ma̍āŋndo̍. Tē ō chīi̍ sa̍lā kōŋ lōmɔ̄ɔ̄ pɛ̍, ō ke᷄ ni̍ko̍ chūā kōŋ mɛ̄ŋmā sēndi̍ mā māŋ lē mbō ko᷄l.

²⁷ Tē ī wa̍ tōnya̍ pɛ̍ māā chūā kōŋ ō tōsa̍l pɔ̍nɔ̍ ndɔ̍ ka̍fāla̍ŋ, mbo̍ lō o̍ ko̍ŋ mbo̍ chɛ̄l ma̍ wā nda̍ wānā pɔ̍nɔ̍ che᷅le̍ŋ pɛ̍, kōlɔ̄ɔ̄ o̍ cho̍ mɛ̄ŋmā sēndi̍ mā māŋ ndo̍, tē mā fūūlu̍u̍ ndu̍ ni᷄ŋ pɛ̍, ō chō nāā īpūlu̍ wɔ̍ɔ̍ŋndo̍ sɔ̄lā. Mɛ̄ŋmā māŋ mā chō tōsā mī dēmbōo̍ pɛ̄ ndu̍, ndu̍yɛ̍ mī mā tōsa̍ ō vi̍lū chu̍ā o̍ chūā le̍. Ndu̍yɛ̍ o̍ ko̍ŋ kɔ̍ɔ̍lī, mī sēndi̍o̍o̍ wa̍ ndu̍ chōo̍ wa̍nāā ndūa̍a̍ tɛ̄ɛ̄ŋ.

²⁸ Kɛ̍ tē chūa̍a̍ ho̍ō ō tōsa̍ dɔ̍ɔ̍ sūɛ̍i̍ wɔ̍ɔ̍ŋ ī wa̍ā le̍nde̍ le̍, mbō wānu̍ŋ o̍ di̍a̍ndāā ya̍ Mɛ̍lɛ̄ka̍ o̍ hɔ̄l, mɛ̄ɛ̍ ō ko᷄l bɛ̍ɛ̍ mɛ̍ŋmā māŋ nyɛ̄ o̍ nyɛ̄ yɔ̍nūŋ a̍ ndu̍ le̍, chūāūwa̍ o̍ vi̍a̍lū ni̍.

²⁹ “Ndu̍yɛ̍ he̍ī nɔ̄ ni᷅ŋ mī ī wa̍ māā sāwā. Tē wānā la̍nɔ̍ɔ̍ ō tōsa̍l pɔ̍nɔ̍ ndɔ̍ ka̍fāla̍ŋ pɛ̍, ndu̍ yɔ̍nūŋ ni̍ māā pɔ̍nɔ̍ ndɔ̍ mɛ̄īyo̍ mbō tōl wānā pɔ̍nɔ̍ che᷅le̍ŋ kɔ̄ɔ̄lī, mbō tɛ̄ɛ̄mbu̍u̍ ndu̍ pi̍la̍ lābɛ̄ɛ̄ pɛ̍,

³⁰ lɔ̍ɔ̍ mī ī yɔ̄nu̍ŋ mī pōo̍ ō wa̍ la̍a̍ ndɔ̍ pāŋālāa̍ māā ō chō tīɔ̄mɔ̄ɔ̍ pɛ̍, wānā pɔ̍nɔ̍ ko̍ŋ ō nɔ̄ mbō hīŋ a̍ la̍a̍ ndɔ̄ ko̍ŋ nāa̍ wānā so̍līāā lāsa̍lāa̍ chūa̍. O̍ ko̍ŋ, mī wānā so̍līāā lāsa̍lāa̍ ō sīmi̍ chūā kōŋ ya̍ Mɛ̍lɛ̄ka̍ Ya̍a̍wɛ̄ɛ̍ lāchī, ndu̍yɛ̍ mbō tōsa̍ a̍ chūā kōŋ mɛ̄ɛ̍ sāwāla̍ nīla̍ŋ lā dīmi̍ nu̍a̍ā yɛ̍.

³¹ Ndu̍yɛ̍ ā yɔ᷄ŋ bɛ̍ɛ̍ mī ī ve̍ to᷅nya̍ le̍, chūā kōŋ pɔ̍nɔ̍ ndɔ̄ nɔ̍ mbō sɔ̄la̍ īsɔ̄ɔ̍ o̍ īsɔ̄ɔ̍ le̍. Kɛ̍ tē ō wa̍ pɛ̍ māā chūa̍a̍ ndu̍ ndu̍ tɛ̍ɛ̍mbu̍u̍, ō nɔ̄ mbō sɔ̄la̍ dɛ̍nɛ̍ pālāa̍.”