Nɔ̍mbāā 4 - Yāu̍ Mɛ̄lɛ̄ka̍a̍

Wa̍lta̍ yu̍ŋgu̍la̍ Ko̍ha̍tī la̍ŋ, a̍ fu̍la̍ o̍ pūlāle̍ Li̍va̍īle̍ŋ chōo̍ wa̍ ā nɔ̄ kūēē le̍ tōsāa̍ la̍ŋ

¹ O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l Mūu̍sē nda̍ E̍lɔ̄ŋ āā,

^2-3 “Wāŋ pīāāndūa̍a̍ fu̍la̍ o̍ yu̍ŋgu̍la̍ Ko̍ha̍tī, po̍ Li̍va̍īyo̍ chōo̍, ma̍ wā chɔ̍ŋ wɔ̍sīla̍ŋ be̍le̍-ya̍a̍ ha̍a̍a̍ kɔ̍ wɔ̍sīla̍ŋ be̍le̍-ŋu̍ɛ̍ɛ̍nu̍, ndu̍yɛ̍ mā nɔ̄lā mā to̍sa̍ wa̍llo̍ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍ ni᷄ŋ nda̍ ki̍nɛ̍i̍, po̍o̍nyi̍a̍a̍ nda̍ dīōla̍ŋ a̍ yu̍ŋgu̍la̍ ndā fūla̍ chōo̍ la̍ŋ kpɛ̍ kpɛ̍.

⁴ Nyɛ̄m kāsi᷄ŋ hi̍o̍ū kpo̍u̍ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍ ni᷄ŋ ndo̍ŋ ki̍nɛ̍i̍, wāŋ pīāāndūāā ŋ̄ chō ha̍ā dīōla̍ŋ pōōnyīāā fūlāa̍ o̍ yu̍ŋgu̍ Ko̍ha̍tī wo̍ chōo̍ wa̍, nda̍ nɔ̍ ni̍ mā wa̍ nyɛ̄m mu᷅ŋ chīla̍ŋ. Wa̍li̍ ndāa̍ cho̍ ko̍ŋ ni̍.

⁵ “Te̍le̍ŋ o̍ te̍le̍ŋ tē lā wa̍ dɔ̍ɔ̍ŋgɔ̍ɔ̍ pūūsi̍a̍a̍ pɛ̍ mi̍ lā wā hīōūwɔ̄ɔ̍ lāchī, E̍lɔ̄ŋ nda̍ pūa̍a̍ ndūa̍a̍ ā nɔ̄ mā lūɛ̄ī o̍ tɛ̍ndīi̍yo̍ ni᷄ŋ mā fāŋa̍ kōla̍ cho̍ ō lāndāā kɔ̍fu̍ si̍m le̍ kpe̍ma̍ nūu̍ wo̍ lāchī mā kūmbū kɔ̍fū kōŋ a̍ kōlā ko̍ŋ.

⁶ O̍ ko̍ŋ kɔ̍ɔ̍lī, mā pɛ̄ŋgɛ̍la̍ ya̍u̍ chūīŋndo̍ le̍cho̍ō. Mā mūli̍ŋ mā pɛ̄ŋgɛ̍la̍ kōlā bu̍li̍īyo̍ lēcho̍ō, o̍ ko̍ŋ kɔ̍ɔ̍lī, mā chūa̍ yɔ̄mīī nda̍ kūā a̍ kɔ̍fū kōŋ nde̍ mā sɔ̄ɔ̄ŋi̍a̍a̍ ndi̍ o̍ kɔ̍fōo̍ kpēŋgo᷄ŋ vēllāa̍ vēllē nāa̍ i̍ nɔ̍ le̍ wāa̍ wa̍.

⁷ “O̍ ko̍ŋ kɔ̍ɔ̍lī, mā chūa̍ kōlā bu̍li̍īyo̍ mā pɛ̄ŋgɛ̍la̍ ndu̍ o̍ ti̍bīi̍ nda̍ kɛ̄sī be̍e̍dīi̍ chɔ᷅m māā Mɛ̍lɛ̄ka̍ chō a̍ nya̍ lātūlu̍ wo̍ chōo̍. O̍ ko̍ŋ kɔ̍ɔ̍lī, mā chūa̍ nyɛ̄m lāāndu᷄ŋ cho̍ le̍ sa̍lāla̍ŋ sōlīo̍o̍ a̍ mu̍ŋ ndo̍ŋ, hɛ̄ŋgɛ̍i̍la̍ŋ, a̍ hɛ̄ŋgɛ̍i̍la̍ cho̍ le̍ nyɛ̄m chūŋ kɛ̄ndɔ᷄ŋ lōmɔ̄ɔ̍ lēni᷄ŋ nda̍ŋ, a̍ hɛ̄ŋgɛ̍i̍la̍ cho̍ le̍ sa̍lāla̍ŋ lā pīlɛ̍ la̍ŋ sōlīo̍o̍ la̍ŋ, o̍ ko̍ŋ kɔ̍ɔ̍lī, a̍ kpɛ̍ɛ̍nɛ̍ŋ cho̍ le̍ mūɛ̄īmā sa̍la᷄ŋ dɔ̄wɔ̄ɔ̍ lēni᷄ŋ ndo̍ŋ, mā kɛ̄si̍ mu̍ŋ o̍ kōlā pɛ̍ŋgɛ̄lāā kōŋ chōo̍ o̍ ti̍bīi̍yo̍ chōo̍. Ndu̍yɛ̍ bēe̍dīi̍ nɔ̍ mbō wa̍ o̍ ti̍bīi̍yo̍ ho̍ō chōo̍ le̍ te̍le̍ŋ o̍ te̍le̍ŋ ndo̍, ō nɔ̄ mbō wa̍ ō kɛ̄sīāā o̍ ti̍bīi̍yo̍ ko̍ŋ chōo̍.

⁸ O̍ ko̍ŋ kɔ̍ɔ̍lī, mā pɛ̄ŋgɛ̍la̍ kōlā si̍a̍ŋāa̍ o̍ nyɛ̄m lāāndūŋ mu᷅ŋ chōo̍, ndu̍yɛ̍ mā chūa̍ yāu̍ chūīŋndo̍ mā pɛ̄ŋgɛ̍la̍ ndu̍ o̍ kōla̍ ko̍ŋ chōo̍. O̍ ko̍ŋ kɔ̍ɔ̍lī, mā chūa̍ yɔ̄mīi̍ cho̍ le̍ kɔ̄la̍ŋ a̍ ti̍bīi̍ ko̍ŋ nde̍ mā sɔ̄ɔ̄ŋi̍a̍a̍ ndi̍ o̍ ti̍bīi̍yo̍ kpēŋgo᷄ŋ vēllāa̍ vēllē nāa̍ i̍ nɔ̍ le̍ wāa̍ wa̍.

⁹ “O̍ ko̍ŋ kɔ̍ɔ̍lī, mā chūa̍ kōlā bu᷅li̍īyo̍, mā kūmbū nyɛ̄ kɛ̄sīāā lāla̍mbūi̍yo̍ a̍ ndu̍, lātūlu̍ a̍ la̍mbūi̍la̍ cho̍ lēcho̍ō la̍ŋ, a̍ kpānya̍la̍ cho̍ le̍ sāa̍bɛ̄i̍la̍ la̍mbūi̍la̍ la̍ŋ bɛ̄ɛ̄ndīa̍a̍ la̍ŋ, a̍ hɛ̄ŋgɛ̍i̍la̍ cho̍ le̍ yīŋnde̍ŋ chūa̍a̍ lēni᷄ŋ le̍ la̍mbūi̍la̍ la̍ŋ nda̍ŋ, o̍ ko̍ŋ kɔ̍ɔ̍lī, a̍ kpɛ̍ɛ̍nɛ̍ŋ cho̍ le̍ chūɛ̄īmā la̍mbūi̍ya̍ŋ dɔ̄wɔ̄ɔ̍ lēni᷄ŋ nda̍ŋ.

¹⁰ O̍ ko̍ŋ kɔ̍ɔ̍lī, mā chūa̍ nyɛ̄ kɛ̄sīāā lāla̍mbūi̍ ko̍ŋ a̍ wōlɔ̄ɔ̄lā ndɔ̄la̍ŋ lātūlu̍ mā sīmbū ndu̍ o̍ yāu̍ chūīŋndo̍ ni᷄ŋ ma̍ kɛ̄si̍ ndu̍ o̍ nyɛ̄ vīlīāā lāwōlɔ̄ɔ̍ ni᷄ŋ.

¹¹ “O̍ ko̍ŋ kɔ̍ɔ̍lī, mā chūa̍ kōlā bu̍li̍īyo̍ mā pɛ̄ŋgɛ̍la̍ ndu̍ o̍ ma̍āŋ ŋ̄ko̍o̍līi̍ cho̍ le̍ nyɛ̄m chūŋ kɛ̄ndɔ᷄ŋ lōmɔ̄ɔ̍ lēchōo̍ wo̍ chōo̍, ndu̍yɛ̍ mā chūa̍ yāu̍ chūīŋndo̍, mā kūmbū ma̍āŋ kōŋ a̍ ndu̍. O̍ ko̍ŋ kɔ̍ɔ̍lī, mā chūa̍ yɔ̄mīi̍ cho̍ le̍ kɔ̄la̍ŋ a̍ ma̍āŋ kōŋ nde̍ mā sɔ̄ɔ̄ŋi̍a̍a̍ ndi̍ o̍ ma̍āŋndo̍ kpēŋgo᷄ŋ vēllāa̍ vēllē nāa̍ i̍ nɔ̍ le̍ wāa̍ wa̍.

¹² O̍ ko̍ŋ kɔ̍ɔ̍lī, mā chūa̍ nyɛ̄m lāāndo᷄ŋ ŋ̄ pīlɔ̍ŋ, ŋ̍ nda̍ tōsā wa̍llo̍ o̍ fo̍ndā kāsīo̍o̍ wo̍ŋ mā sīmbū mu̍ŋ o̍ kōlā bu̍li̍īyo̍ ni᷄ŋ, mā mūli̍ŋ mā sīmbū mu̍ŋ o̍ yāu̍ chūīŋndo̍ ni᷄ŋ. O̍ ko̍ŋ kɔ̍ɔ̍lī, mā chūa̍ mu̍ŋ mā kɛ̄si̍ mu̍ŋ o̍ nyɛ̄ vīlīāā lāwōlɔ̄ɔ̍ ni᷄ŋ.

¹³ O̍ ko̍ŋ kɔ̍ɔ̍lī, mā kɔ̍ bɛ̄ɛ̄sūū pūltā chūɛ̄īmā ŋūālɛ̍i̍la̍ cho̍ o̍ ma̍āŋ nda̍ lūām chu̍ɛ̍i̍mā chɔ̄lu̍a̍ŋ nda̍ŋ chōo̍ la̍ŋ mā fāāŋīāā la̍ŋ kpo̍u̍. Ndu̍yɛ̍ mā chūa̍ kōlā bɔ̍ɔ̄la̍ā mā pɛ̄ŋgɛ̍la̍ ndu̍ o̍ ma̍āŋndo̍ ho̍ō chōo̍.

¹⁴ Ndu̍yɛ̍ wōlɔ̄ɔ̄la̍ cho̍ o̍ ma̍āŋ kōŋ nda̍ŋ ki̍nɛ̍i̍, hɛ̄ŋgɛ̍i̍la̍ chu̍a̍ā lēyīŋnda̍ŋ ni̍, a̍ chūlā sa̍ŋgi̍la̍ŋ, a̍ si̍ɔ̍būi̍la̍ŋ, a̍ hɛ̄ŋgɛ̍i̍la̍ cho̍ le̍ kōo̍wa̍ŋ bīyɔ̄ɔ̍ lēni᷄ŋ le̍ ma̍ŋ fāsāŋīa̍a̍ wa̍ŋ, mā chūa̍ la̍ŋ kpo̍u̍ mā kɛ̄si̍ la̍ŋ o̍ ma̍āŋndo̍ chōo̍. O̍ ko̍ŋ kɔ̍ɔ̍lī, mā chūa̍ yāu̍ chūīŋndo̍ mā pɛ̄ŋgɛ̍la̍ lēcho̍ō. Ndu̍yɛ̍ mā chūa̍ yɔ̄mīi̍ cho̍ le̍ kɔ̄la̍ŋ a̍ ma̍āŋ kōŋ nde̍ mā sɔ̄ɔ̄ŋi̍a̍a̍ ndi̍ o̍ ma̍āŋndo̍ kpēŋgo᷄ŋ vēllāa̍ vēllē nāa̍ i̍ nɔ̍ le̍ wāa̍ wa̍.

¹⁵ Te̍le̍ŋ o̍ te̍le̍ŋ tē lā wa̍ dɔ̍ɔ̍ŋgɔ̍ɔ̍ pūūsi̍a̍a̍ pɛ̍ le̍ hīōūwɔ̄ɔ̍ lāchī, E̍lɔ̄ŋ nda̍ pūa̍a̍ ndūa̍a̍ ā nɔ̄ fɛ̍lɛ̍ŋ mā lūɛ̄ī o̍ fo̍ndā kāsi̍ hi̍o̍ū kpo̍u̍ wo̍, mā kɔ̍ ku̍mbū kūmbūū nyɛ̄m cho̍ lo̍ŋ mi̍ ŋ̄ wā ŋ̄ kāsī ya̍ Mɛ̍lɛ̄ka̍ o̍ hɔ̄l lo̍ŋ, lātūlu̍ a̍ wōlɔ̄ɔ̄lā wa̍lta̍ cho̍ lo̍ŋ nda̍ŋ kpo̍u̍. Tē ā chīi̍ nyɛ̄ o̍ nyɛ̄ kūmbū kūmbūū pɛ̍, wānāa̍ fu̍la̍ o̍ yu̍ŋgu̍ Ko̍ha̍tī wo̍ chōo̍ wa̍ ā lūɛ̄ī ni̍ko̍, ā kɔ̍ chu̍ā nyɛ̄m mu᷅ŋ le̍ kɔ̄la̍ŋ a̍ mu̍ŋ nāa̍ nyā chō kɔ̄la̍ŋ dɔ̍ɔ̍ŋgɔ̍ chēle̍ŋ kīōlɔ̄ɔ̍ wa̍. Kāni̍ mɛ̄ɛ̍ mī E̍lɔ̄ŋ nda̍ pūa̍a̍ ndūa̍a̍ ā kūmbu̍ ku̍mbu̍u̍ fɛ̍lɛ̍ŋ nyɛ᷅m mu᷅ŋ ma̍lāŋ yu̍ŋgu̍ Ko̍ha̍tī wo̍ ā pīlāŋ mu̍ŋ, tē ā kūmbu̍ ku̍mbu̍u̍ mu̍ŋ fɛ̍lɛ̍ŋ te̍, mā pīla̍ŋ mu̍ŋ, ā sɔ̄la̍ pīɔ̍mndo̍. “Bā o̍ bā nya̍ wa̍ kɔ̄la̍ŋ a̍ tɛ̍ndīi̍yo̍ ho̍ō pɛ̍, nyɛ̄ o̍ nyɛ̍ cho̍ o̍ tɛ̍ndīi̍ ko̍ŋ ni᷄ŋ, yu̍ŋgu̍ Ko̍ha̍tī wo̍ nda̍ nɔ̍ wōlɔ̄ɔ̄lā lāŋ le̍ chūa̍a̍ ni̍ mā kūɛ̄ a̍ la̍ŋ.

¹⁶ “Ndu̍yɛ̍ Ɛ̄li̍a̍a̍sā, po̍ E̍lɔ̄ŋ ndo̍, ndu̍ cho̍ tɛ̍ndīi̍ ko̍ŋ kpo̍u̍ bo᷅lle̍ŋ ni̍ a̍ nyɛ̄ o̍ nyɛ̍ cho̍ lēni᷄ŋ mbo̍ wā ō yɔ̄ŋa᷄ŋ o̍ ya̍ Mɛ̍lɛ̄ka̍ lo̍, chɔ̍ŋ a̍ chūɛ̄īma̍ cho̍ le̍ la̍mbūi̍la̍ŋ nda̍ŋ, mbo̍ kūā a̍ nyɛ̄m chūŋ kɛ̄ndɔ᷄ŋ, a̍ sa̍lālā nyɛ̄ dīāā ku̍llo̍, a̍ chūɛ̄īma̍ cho̍ le̍ wāŋnda̍ hɛ̄līo̍o̍ ndu̍yɛ̍ a̍ nyɔ̄ɔ̍ŋ dīndīo̍o̍ ya̍ Mɛ̍lɛ̄ka̍ o̍ lāŋ, o̍ ko̍ŋ kɔ̍ɔ̍lī a̍ nyɔ̄ɔ̍ ŋ̄ pīlɔ̍ŋ kpo̍u̍.”

¹⁷ O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē nda̍ E̍lɔ̄ŋ āā,

¹⁸ “Lā lo᷅ tōfā mī wānāa̍ fu̍la̍ o̍ yu̍ŋgu̍ Ko̍ha̍tī wo̍ chōo̍ wa̍ ā sɔ̄la̍ tɛ̄ɛ̄mbūūwo̍ kpo̍u̍, mī yu̍ŋgu̍ ndāa̍ kīōlu̍ o̍ pūlāle̍ Li̍va̍īle̍ŋ chōo̍ le̍.

¹⁹ Le̍ mī lā chīɔ̍u̍ yōōmūlā ndāla̍ŋ ā yɔ᷄ŋ bɛ̍ɛ̍ mā sɔ̄ɔ̄ŋgu̍u̍ nyɛ᷄m cho̍ ŋ̄ kāsī mi̍ ŋ̄ hīāū kpo̍u̍ wo̍ŋ īkɛ̄i̍ ā sɔ̍lā pi̍ɔ̍m te̍, nyɛ̄ nya̍ nɔ̄ mī lā tōsa̍ wo̍ cho̍ ho̍ō ni̍. Tē ā wa̍ lūɛ̄īyɔ̄ɔ̍ o̍ fo̍nda᷄ŋ kāsi̍ hi̍o̍ū kpo̍u̍ wo̍ pɛ̍, le̍ wōlɔ̄ɔ̄lā nda̍ nɔ̄ le̍ chūa̍a̍ la̍ŋ chūa̍a̍ le̍ kɔ̄la̍ŋ a̍ la̍ŋ, E̍lɔ̄ŋ nda̍ pūa̍a̍ ndūa̍a̍ ā nɔ̄ mā lūɛ̄ī a̍ nda̍ lātūlu̍ mā chɔ᷄m wānā o̍ wānā nyɛ̄ o̍ nɔ̍ le̍ tōsāa̍ wo̍, a̍ wōlɔ̄ɔ̄lā o̍ nɔ̍ le̍ chūa̍a̍ la̍ŋ.

²⁰ Tē E̍lɔ̄ŋ nda̍ pūa̍a̍ ndūa̍a̍ ā lūe̍i̍ fɛ̍lɛ̍ŋ mā kɔ̍ ku̍mbū kūmbūū nyɛ᷄m cho̍ o̍ fo̍ndāa̍ ho̍ō mi̍ ŋ̄ wā ŋ̄ kāsī Mɛ̄lɛ̄ka̍ o̍ hɔ̄l lo̍ŋ te̍, mbō lo̍ o̍ ko̍ŋ, mī wānāa̍ fu̍la̍ o̍ yu̍ŋgu̍ Ko̍ha̍tī wo̍ chōo̍ wa̍ ā lūɛ̄ī mā de᷄l nyɛ̄m mu᷅ŋ hɔ̄lte̍ŋ pi̍lōŋ bɛ̍ɛ̍ pɛ̍, pīɔ̍mndo̍ nda̍ sɔ̄la̍ ni̍.”

Wa̍lta̍ yu̍ŋgu̍la̍ Kɛ̍ɛ̍sīɔ̄m nda̍ŋ, a̍ fu̍la̍ o̍ pūlāle̍ Li̍va̍īle̍ŋ chōo̍ wa̍ ā nɔ̄ kūēē le̍ tōsāa̍ la̍ŋ

²¹ O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā,

^22-23 “Wāŋ pīāāndūa̍a̍ fu̍la̍ o̍ yu̍ŋgu̍la̍ Kɛ̍ɛ̍sīɔ̄m, po̍ Li̍va̍īyo̍ chōo̍, ma̍ wā chɔ̍ŋ wɔ̍sīla̍ŋ be̍le̍-ya̍a̍ ha̍a̍a̍ kɔ̍ wɔ̍sīla̍ŋ be̍le̍-ŋu̍ɛ̍ɛ̍nu̍, ndu̍yɛ̍ mā nɔ̄lā mā tōsa̍ wa̍llo̍ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍ ni᷄ŋ nda̍ ki̍nɛ̍i̍, po̍o̍nyi̍a̍a̍ nda̍ dīōla̍ŋ a̍ yu̍ŋgu̍la̍ ndā fūla̍ chōo̍ la̍ŋ kpɛ̍ kpɛ̍.

²⁴ Wāŋ pīāāndūāā ŋ̄ chō ha̍ā dīōla̍ŋ pōōnyīāā wa̍ ki̍nɛ̍i̍, wa̍lta̍ nda̍ nɔ̄ le̍ tōsāa̍ la̍ŋ ndu̍yɛ̍ a̍ wōlɔ̄ɔ̄lā nda̍ nɔ̄ le̍ kɔ̄la̍ŋ nda̍ŋ la̍ŋ la̍ cho̍ la᷅ŋ ni̍.

²⁵ Tɛ̍ndīi̍yo̍ kpo̍u̍, lātūlu̍ a̍ kōla̍ nda̍ kūmbū ndu̍ lēni᷄ŋ ndo̍, a̍ kōla̍ nda̍ kūmbū ndu̍ lēcho̍ō wo̍, a̍ yāu̍ chūi̍ŋ cho̍ lēcho̍ō wo̍, a̍ kōla̍ cho̍ ō lāndāā o̍ dīo̍o̍ wo̍, nda̍ nɔ̍ ni̍ mā kūɛ̄ a̍ la̍ŋ.

²⁶ O̍ ko̍ŋ kɔ̍ɔ̍lī, la̍u̍ ba̍lu̍ tɛ̍ndīi̍yo̍ a̍ ma̍āŋndo̍ wo̍, kōlāla̍ cho̍ la̍ū kōŋ lā bālāā la̍ŋ ni̍, a̍ yūēī nda̍ kīndū kōlāla̍ la̍ŋ nde̍, a̍ kōlāla̍ cho̍ lā lāndāā o̍ dīo̍o̍ le̍ lūɛ̄īyɔ̄ɔ̍ o̍ la̍ūwo̍ lēni᷄ŋ nda̍ŋ, ndu̍yɛ̍ a̍ wōlɔ̄ɔ̄ o̍ wōlɔ̄ɔ̄ wa̍li̍ che᷅le̍ŋ cho̍ a̍ nyɔ̄ɔ̍ŋ mu᷅ŋ o̍kɔ̄ɔ̄, wāŋnda̍ ha̍ā nda̍ nɔ̍ ni̍ mā kūɛ̄ a̍ la̍ŋ. Kpe̍ku̍ o̍ kpe̍ku̍ cho̍ a̍ wōlɔ̄ɔ̄la̍ŋ nda᷅ŋ o̍kɔ̄ɔ̄, wāŋnda̍ ha̍ā wa̍li̍ ndāa̍ cho̍ ko̍ŋ ni̍. Yu̍ŋgu̍la̍ Kɛ̍ɛ̍sīɔ̄m nda̍ŋ la̍ nɔ̍ ni̍ mī lā kūɛ̄ a̍ wōlɔ̄ɔ̄la̍ŋ nda᷅ŋ kpo̍u̍.

²⁷ Ndu̍yɛ̍ kpe̍ku̍ o̍ kpe̍ku̍ yu̍ŋgu̍la̍ Kɛ̍ɛ̍sīɔ̄m nda̍ŋ lā nɔ̄ le̍ tōsāa̍, wōlɔ̄ɔ̄lā nda̍ nɔ̄ le̍ kɔ̄la̍ŋ nda̍ŋ ni̍, a̍ wa̍lta̍ che᷅le̍ŋndā nda̍ nɔ̄ le̍ to̍sāa̍ la̍ŋ, E̍lɔ̄ŋ nda̍ pūa̍a̍ ndūa̍a̍ nda̍ nɔ̍ ni̍ mā chɔ᷄m nda̍ nyɛ̄ nda̍ nɔ̄ le̍ tōsāa̍ wo̍.

²⁸ Yu̍ŋgu̍la̍ Kɛ̍ɛ̍sīɔ̄m nda̍ŋ ki̍nɛ̍i̍, wa̍li̍ nda̍ nɔ̄ mā tōsa̍ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍ wo̍, ndu̍ cho̍ ko̍ŋ ni̍. Ndu̍yɛ̍ I̍ta̍māā, po̍ E̍lɔ̄ŋ wa̍nā so̍līāā lāsa̍lāa̍, ndu̍ nɔ̍ ni̍ mbō wa̍ nda̍ chīla̍ŋ.”

Wa̍lta̍ yu̍ŋgu̍la̍ Mɛ̍lu̍a̍lī la̍ŋ, a̍ fu̍la̍ o̍ pūlāle̍ Li̍va̍īle̍ŋ chōo̍ wa̍ ā nɔ̄ kūēē le̍ tōsāa̍ la̍ŋ

^29-30 O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā, “Wāŋ pīāāndūa̍a̍ fu̍la̍ o̍ yu̍ŋgu̍la̍ Mɛ̍lu̍a̍lī, po̍ Li̍va̍īyo̍ chōo̍, ma̍ wā chɔ̍ŋ wɔ̍sīla̍ŋ be̍le̍-ya̍a̍ ha̍a̍a̍ kɔ̍ wɔ̍sīla̍ŋ be̍le̍-ŋu̍ɛ̍ɛ̍nu̍, ndu̍yɛ̍ mā nɔ̄lā mā tōsa̍ wa̍llo̍ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍ ni᷄ŋ nda̍ ki̍nɛ̍i̍, po̍o̍nyi̍a̍a̍ nda̍ dīōla̍ŋ a̍ yu̍ŋgu̍la̍ ndā fūla̍ chōo̍ la̍ŋ kpɛ̍ kpɛ̍

³¹ Wāŋ pīāāndūāā kāŋ ki̍nɛ̍i̍, nda̍ nɔ̍ le̍ kɔ̄la̍ŋ a̍ da̍kpe̍ŋnda̍ tɛ̍ndīi̍yo̍ ni̍, a̍ yɔ̄mīi̍ sa̍a̍ da̍kpe̍ŋnda̍ la̍ŋ nde̍, a̍ yɔ̄mīī nda̍ sīmi̍ māā māsūŋgbu̍ ve̍, a̍ nyɛ̄la̍ cho̍ lā tōōsīāā le̍ da̍kpe̍ŋnda̍ la̍ŋ a̍ yɔ̄mīī māsūŋgbu̍i̍ ke̍ŋ sīmīo̍o̍ lēni᷄ŋ nde̍,

³² a̍ yɔ̄mīī vīlɛ̄ī nda̍ sīmi̍ le̍ kōla̍ la̍ūwo̍ bāa̍ ve̍, a̍ nyɛ̄la̍ cho̍ le̍ chīli̍ŋu̍ŋ mu̍ŋ sīmīo̍o̍ lēni᷄ŋ nda̍ŋ, a̍ pɛ̍ɛ̍kīi̍ye̍, o̍ ko̍ŋ kɔ̍ɔ̍lī, a̍ yūe̍i̍ cho̍ le̍ kōla̍ la̍ūwo̍ ho̍ō kīndɔ̄ɔ̍ ve̍. Nyɛ̄ o̍ nyɛ̍ cho̍ a̍ wōlɔ̄ɔ̄lā tāŋgūlāāla̍ŋ nda᷅ŋ o̍kɔ̄ɔ̄, lātūlu̍ a̍ la̍ŋ mīŋgīo̍o̍ bɛ̄ɛ̄ndīa̍a̍, wāŋnda̍ ha̍ā wa̍li̍ ndāa̍ cho̍ ko̍ŋ ni̍. Ndu̍yɛ̍ nda̍ kpo̍u̍ ā nɔ̄ mā chɔ̍m nda̍ wānā o̍ wānā wōlɔ̄ɔ̄lā o̍ nɔ̍ le̍ chūa̍a̍ la̍ŋ.

³³ Yu̍ŋgu̍la̍ Mɛ̍lu̍a̍lī la̍ŋ nda̍ŋ ki̍nɛ̍i̍, wa̍li̍ nda̍ nɔ̄ mā tōsa̍ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍ wo̍, ndu̍ cho̍ ko̍ŋ ni̍. Ndu̍yɛ̍ I̍ta̍māā, po̍ E̍lɔ̄ŋ wa̍nā so̍līāā lāsa̍lāa̍, ndu̍ nɔ̍ ni̍ mbō wa̍ nda̍ chīla̍ŋ.”

A̍ mɛ̄ɛ̍ nda̍ chɔ᷄m yu̍ŋgu̍ Li̍va̍īyo̍ bōllē pīlɛ̍ yɛ̍ o̍kɔ̄ɔ̄

^34-35 Wāŋ pīāāndūa̍a̍ fu̍la̍ o̍ yu̍ŋgu̍la̍ Ko̍ha̍tī la̍ŋ chōo̍ ma̍ wā chɔ̍ŋ wɔ̍sīla̍ŋ be̍le̍-ya̍a̍ ha̍a̍a̍ kɔ̍ wɔ̍sīla̍ŋ be̍le̍-ŋu̍ɛ̍ɛ̍nu̍, ndu̍yɛ̍ ma̍ wā ā bɛ̄ndāā le̍ wa̍llo̍ tōsāa̍ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ la̍tu̍lu̍ wo̍ ni᷄ŋ nda̍ ki̍nɛ̍i̍, mi̍ Mūu̍sē nda̍ E̍lɔ̄ŋ, o̍ ko̍ŋ kɔ̍ɔ̍lī, a̍ wāŋ bɛ̄ndūāā I̍sɔ̄lūɛ̍i̍ya̍ ā pīli̍a̍a̍ ā po̍o̍nyīāā nda̍ dīōla̍ŋ a̍ yu̍ŋgu̍la̍ŋ nda̍ fūla̍ chōo̍ la̍ŋ kpɛ̍ kpɛ̍.

³⁶ Ā wa̍ fa̍ū fa̍ū wāa̍la̍ŋ lā tīɔ̍ɔ̍ŋ, a̍ kɛ̄mɔ̄ɔ̍ lē ŋɔ᷄mmɛ̍ū a̍ be̍le̍-ŋu̍ɛ̍ɛ̍nu̍ (2,750).

³⁷ Wāŋ pīāāndūa̍a̍ fu̍la̍ o̍ yu̍ŋgu̍la̍ Ko̍ha̍tī la̍ŋ chōo̍ ma̍ wā ā bɛ̄ndāā le̍ wa̍llo̍ tōsāa̍ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ la̍tu̍lu̍ wo̍ ni᷄ŋ nda̍, nda̍ wa̍ ka̍ŋ ni̍. Mi̍ Mūu̍sē nda̍ E̍lɔ̄ŋ a̍ po̍o̍nyīāā nda̍ dīōla̍ŋ kpo̍u̍ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l nda̍ yɛ̍.

^38-40 O̍ ko̍ŋ kɔ̍ɔ̍lī, ma̍ chɔ̄m vɛ̄lɛ̄ wāŋ pīāāndūa̍a̍ fu̍la̍ o̍ yu̍ŋgu̍la̍ Kɛ̍ɛ̍sīɔ̄m nda̍ŋ chōo̍ ma̍ wā chɔ̍ŋ wɔ̍sīla̍ŋ be̍le̍-ya̍a̍ kɔ̍ wɔ̍sīla̍ŋ be̍le̍-ŋu̍ɛ̍ɛ̍nu̍, ndu̍yɛ̍ ma̍ wā ā bɛ̄ndāā le̍ wa̍llo̍ to̍sāa̍ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ la̍tu̍lu̍ wo̍ ni᷄ŋ nda̍ a̍ yu̍ŋgu̍la̍ nda̍ fūla̍ chōo̍ la̍ŋ kpɛ̍ kpɛ̍. Ā wa̍ fa̍ū fa̍ū wāa̍la̍ŋ lā tīɔ̍ɔ̍ŋ, a̍ kɛ̄mɔ̄ɔ̍ lē ŋɔ᷄mpu᷅m a̍ be̍le̍-ya̍a̍ (2,630).

⁴¹ Wāŋ pīāāndūa̍a̍ fu̍la̍ o̍ yu̍ŋgu̍la̍ Kɛ̍ɛ̍sīɔ̄m nda̍ŋ chōo̍ ma̍ wā ā bɛ̄ndāā le̍ wa̍llo̍ tōsāa̍ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ la̍tu̍lu̍ wo̍ ni᷄ŋ nda̍, nda̍ wa̍ ka̍ŋ ni̍. Mi̍ Mūu̍sē nda̍ E̍lɔ̄ŋ a̍ po̍o̍nyīāā nda̍ dīōla̍ŋ kpo̍u̍ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l nda̍ yɛ̍.

^42-44 O̍ ko̍ŋ kɔ̍ɔ̍lī, ma̍ chɔ̄m vɛ̄lɛ̄ wāŋ pīāāndūa̍a̍ fu̍la̍ o̍ yu̍ŋgu̍la̍ Mɛ̍lu̍a̍lī la̍ŋ chōo̍ ma̍ wā chɔ̍ŋ wɔ̍sīla̍ŋ be̍le̍-ya̍a̍ kɔ̍ wɔ̍sīla̍ŋ be̍le̍-ŋu̍ɛ̍ɛ̍nu̍, ndu̍yɛ̍ ma̍ wā ā bɛ̄ndāā le̍ wa̍llo̍ to̍sāa̍ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ la̍tu̍lu̍ wo̍ ni᷄ŋ nda̍ a̍ yu̍ŋgu̍la̍ nda̍ fūla̍ chōo̍ la̍ŋ kpɛ̍ kpɛ̍. Ā wa̍ fa̍ū fa̍ū wāa̍la̍ŋ lā yāa̍, a̍ kɛ̄mɔ̄ɔ̍ lē dīi̍ŋ (3,200).

⁴⁵ Wāŋ pīāāndūa̍a̍ fu̍la̍ o̍ yu̍ŋgu̍la̍ Mɛ̍lu̍a̍lī la̍ŋ chōo̍ ma̍ wā ā bɛ̄ndāā le̍ wa̍llo̍ tōsāa̍ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ la̍tu̍lu̍ wo̍ ni᷄ŋ nda̍, nda̍ wa̍ ka̍ŋ ni̍. Mi̍ Mūu̍sē nda̍ E̍lɔ̄ŋ a̍ po̍o̍nyīāā nda̍ dīōla̍ŋ kpo̍u̍ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l nda̍ yɛ̍.

^46-47 Mɛ̄ɛ̍ nu̍a̍ā Mūu̍sē nda̍ E̍lɔ̄ŋ, a̍ wāŋ bɛ̄ndūāā I̍sɔ̄lūɛ̍i̍ya̍ ā pīli̍a̍a̍ ā pōōnyi̍a̍a̍ wāŋ pīāāndūa̍a̍ fu̍la̍ o̍ pūlāle̍ Li̍va̍īle̍ŋ chōo̍, ma̍ wā chɔ̍ŋ wɔ̍sīla̍ŋ be̍le̍-ya̍a̍ ha̍a̍a̍ kɔ̍ wɔ̍sīla̍ŋ be̍le̍-ŋu̍ɛ̍ɛ̍nu̍ wa̍ dīōla̍ŋ a̍ yu̍ŋgu̍la̍ŋ kpɛ̍ kpɛ̍ ni̍. Wāŋ pīāāndūa̍a̍ ha̍ā nda̍ wa̍ ā bɛ̄ndāā le̍ wa̍lta̍ yɛ̍ yɛ̍la̍ŋ to̍sāa̍ o̍ tɛ̍ndīi̍ chɔ̍m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ la̍tu̍lu̍ wo̍ ni᷄ŋ ni̍, ndu̍yɛ̍ a̍ le̍ kɔ̄la̍ŋ a̍ tɛ̍ndīi̍ ko̍ŋ, o̍ ko̍ŋ kɔ̍ɔ̍lī a̍ wōlɔ̄ɔ̄lā ndɔ̄la̍ŋ kpo̍u̍.

⁴⁸ Ā wa̍ fa̍ū fa̍ū wāa̍la̍ŋ lā ŋɔ̄ma̍a̍, a̍ kɛ̄mɔ̄ɔ̍ lē ŋūɛ̍ɛ̍nu̍ a̍ be̍le̍-ŋɔ̍ma̍a̍ (8,580).

⁴⁹ Mi̍ Mūu̍sē o̍ pōōnyīāā nda̍ dīōla̍ŋ ā pīlɛ̍ŋ pi̍lɛ̍ŋ nda̍ kpo̍u̍, ndu̍yɛ̍ mbō chɔ̄m wānā o̍ wānā wa̍li̍ o̍ nɔ̍ le̍ to̍sāa̍ wo̍, ndu̍yɛ̍ a̍ wōlɔ̄ɔ̄lā o̍ nɔ̍ le̍ chūa̍a̍ la̍ŋ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l Mūu̍sē yɛ̍. Mɛ̄ɛ̍ nu̍a̍ā Mūu̍sē o̍ lo̍o̍ku̍ yu̍ŋgu̍ Li̍va̍īyo̍ chɔ̄m bōllē pīlɛ̍ ni̍, mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l ndu̍ yɛ̍.