Nɔ̍mbāā 36 - Yāu̍ Mɛ̄lɛ̄ka̍a̍

A̍ nyɛ̄m ke᷅ŋ wāŋ lāāndūāā I̍sɔ̄lūɛ̍i̍yāa̍ cha᷅l o̍ nɔ̄la̍ŋ nda̍ o̍kɔ̄ɔ̄

¹ Pāa̍le̍ pi᷅lɛ̍, mi̍ wānāa̍ wa̍ yu̍ŋgu̍la̍ fu̍la̍ o̍ pūlāle̍ Ki̍i̍li̍a̍dīle̍ŋ chōo̍ la̍ŋ bōlle̍ wa̍ ā mālnu᷄ŋ ma̍ kōmāl Mūu̍sē nda̍ wāŋ bɛ̄ndūāā I̍sɔ̄lūɛ̍i̍ya̍, a̍ wa̍ yu̍ŋgu̍la̍ŋ I̍sɔ̄lūɛ̍i̍ bōlle̍ wa̍. Ndu̍yɛ̍ Ki̍i̍li̍a̍dī ko̍ŋ fi̍nyā ndɔ̍ wa̍ Māka̍yā ni̍, po̍ Mānāa̍sē wo̍. Mānāa̍sē ko̍ŋ yɛ̍ fi̍nyā ndɔ̍ wa̍ Chōo̍sɛ̍ ni̍.

² Ma̍ kɔ̍ di̍mūl Mūu̍sē āā, “Fāllo̍, bōōndi̍i̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l nu̍m le̍ mā pi̍ɔ̍u̍ yu̍ŋgu̍la̍ŋ I̍sɔ̄lūɛ̍i̍ lɛ̄ŋnde̍ŋ a̍ kōo̍ŋ wūūwo̍ ve̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l nu̍m le̍ mā ke̍ chūāūwāā wāŋ lāāndūa̍a̍ wānāyɛ̍i̍ nɛ̄i̍ Sɛ̄lōfɛ̍ha̍dī ve̍ nyɛ̄m ke᷅ŋ fi̍nyā ndā wo̍ŋ.

³ Kɛ̍ ndu̍yɛ̍ si̍na̍ pɛ̍ŋgu̍ māā tē wāŋ lāāndūa̍a̍ ha̍ā ā cha᷄l nɔ̄la̍ŋ wāŋ pīāāndūāā chēle̍ŋnda̍ o̍ lābā pɛ̍, a̍ fu̍la̍ o̍ yu̍ŋgu̍la̍ che̍le̍ŋnda̍ŋ chōo̍ wa̍, nyɛ̄m ke᷅ŋ wāŋ lāāndūa̍a̍ ha̍ā le̍ yu̍ŋgu̍la̍ pīāāndāā ndāā ka̍ŋ ŋ̍ wa᷅ ni̍. O̍ ko̍ŋ, mī nyɛ̄m ke᷅ŋ yu̍ŋgu̍ nāa̍ ŋ̄ fāŋa̍ŋ le̍cho̍o̍.

⁴ Ndu̍yɛ̍ tē ō lo̍ o̍ ko̍ŋ pɛ̍, mī wɔ̄sī nyɛ̄ o̍ nyɛ̄ ō nɔ̄ le̍ bāŋa᷄ŋndo̍ sɔ̄lāa̍ ve̍ ō fūūlu̍u̍ pɛ̍, wāŋ lāāndūa̍a̍ ha̍ā nyɛ̄m ke᷅ŋ fi̍nyā nda̍ o̍ mɛ̍i̍ mu̍ŋ ma̍ lōō mu̍ŋ ndo̍ŋ, ŋ̄ sīmnu᷄ŋ nyɛ᷅m ke᷅ŋ yu̍ŋgu̍la̍ pīāāndāā ndāa̍ kpe̍e̍kpe̍i̍. O̍ ko̍ŋ, mī nyɛ̄m ke᷅ŋ yu̍ŋgu̍ nāa̍ ŋ̄ fāŋa᷅ŋ le̍cho̍o̍.”

⁵ O̍ ko̍ŋ, mi̍ Mūu̍sē o̍ chɔ᷅m wāŋnda̍ sāwāla̍ Mɛ̄lɛ̄ka̍ Ya̍a̍wɛ̄ɛ̄ o̍ dɔ̍ū a̍ sūɛ̍i̍ wa̍ā le̍nde̍ o̍kɔ̄ɔ̄ la̍ŋ. Mbo̍ dīmī āā, “Nyɛ̄ wānāa̍ fu̍la̍ o̍ pūlāle̍ Mānāa̍sē le̍ŋ chōo̍ wa̍ ā dīmi̍ ho̍ō wo̍, tōnya̍ kpe̍e̍kpe̍i̍ o̍ cho̍ ni̍.

⁶ Le̍la̍ŋ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ a̍ chūāūwāā wāŋ lāāndūa̍a̍ Sɛ̄lōfɛ̍ha̍dī wa̍ o̍kɔ̄ɔ̄ wo̍ cho̍ ho̍ō ni̍. Ō dīmi̍ āā, ‘Chūāūwāa̍ Sɛ̄lōfɛ̍ha̍dī wa̍ ā nɔ̄ di̍ mā cha᷄l nɔ̄la̍ŋ wāŋ pīāāndūāā nda̍ yēēma̍ wa̍ o̍ bā. Kɛ̍ ndu̍yɛ̍ ā nɔ̍ mā cha᷄l nɔ̄la̍ŋ wāŋ pīāāndūāā wāā o̍ yu̍ŋgu̍la̍ che̍le̍ŋ chōo̍ o̍ lābā le̍, mɛ̄ɛ̍ wāŋ pīāāndūāā nda̍ fūla̍ nda̍ nda̍ā o̍ yu̍ŋgu̍ pi̍lɔ̍ɔ̍ chōo̍ wa̍.

⁷ Yu̍ŋgu̍ o̍ yu̍ŋgu̍ I̍sɔ̄lūɛ̄ī, nyɛ̄m nda̍ŋ ki̍ɔ̍ɔ̍ŋ ŋ̄ nɔ̄ mī ŋ̄ wa̍ le̍ nda̍ mā cha᷄l lēcho̍ō. Lā chu̍ā nyɛ̄m ke᷅ŋ yu̍ŋgu̍ o̍ yu̍ŋgu̍ mī lā ke᷄ yu̍ŋgo̍o̍ ō pīlɔ̍ɔ̍ le̍.

⁸ Wānā la̍nɔ̍ o̍ wānā la̍nɔ̍ lo̍o̍ nyɛ̄m kɛ̍ŋ fi̍nyā ndɔ̄ wo̍ŋ pɛ̍, wānā la̍nɔ̍ ko̍ŋ ō nɔ̄ mbō cha᷄l nɔ̄ɔ̍ wānā pɔ̍nɔ̍ wa̍ā o̍ yu̍ŋgu̍ fi̍nyā ndɔ̄ ko̍ŋ chōo̍ o̍ bā. Mɛ̄ɛ̍ o̍ nɛ̄īyo̍ ho̍ō ni᷄ŋ, yu̍ŋgu̍ o̍ yu̍ŋgu̍ nyɛ̄m nda̍ŋ ke᷅ŋ fi̍nyāā ndāa̍ ā me᷄l nda̍ wo̍ŋ, ŋ̄ nɔ̄lā mī ŋ̄ wa̍ le̍ nda̍ pīlɛ̍ kpe̍.

⁹ Lā chɛ᷅l mī nyɛ̄m ke᷅ŋ yu̍ŋgu̍ o̍ yu̍ŋgu̍ ŋ̍ si̍mnu᷄ŋ nyɛ᷅m ke᷅ŋ yu̍ŋgo̍o̍ o̍ pīlɔ̍ɔ̍ le̍. Yu̍ŋgu̍ o̍ yu̍ŋgu̍ I̍sɔ̄lūɛ̄ī, nyɛ̄m nda̍ŋ ki̍ɔ̍ɔ̍ŋ ŋ̄ nɔ̄ mī ŋ̄ wa̍ le̍ nda̍ mā cha᷄l lēcho̍ō.’ ”

¹⁰ Ndu̍yɛ̍ mi̍ chūāūwāā wāŋ lāāndūa̍a̍ Sɛ̄lōfɛ̍ha̍dī wa̍ ā tōsa̍ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l Mūu̍sē yɛ̍.

¹¹ Nda̍ ki̍nɛ̍i̍, Ma̍a̍lāā ni̍, Tɛ̍sāā ni̍, Hɔ̍ki̍lāā ni̍, Mi̍li̍kāā ni̍, a̍ No̍wā, ma̍ chāl o̍ nɔ̄la̍ŋ chūāūwāa̍ bōmāā ndāa̍ o̍ lābā.

¹² Pūa̍a̍ nda̍ fūla̍ nda̍ nda̍ā o̍ yu̍ŋgu̍ Mānāa̍sē wo̍ chōo̍, ndu̍ yɔ̍nūŋ māā po̍ Chōo̍si̍ɔ̍ɔ̍ ni̍ wa̍, ma̍ chāl pūa̍a̍ ka̍ŋ o̍ lābā. O̍ ko̍ŋ, nyɛ̄m ke᷅ŋ fi̍nyā ndā o̍ mɛ̍i̍ ma̍ lōō mu̍ŋ ndo̍ŋ, mi̍ ŋ̄ hīāū lāchī a̍ wāa̍ le̍ yu̍ŋgu̍ fi̍nyā ndā o̍ fu̍la̍ chōo̍ wo̍.

¹³ Sāwāla̍ŋ nda᷅ŋ ndu̍yɛ̍ a̍ pɛ̄ɛ̄kūla̍ŋ nda᷅ŋ Mɛ̄lɛ̄ka̍ Ya̍a̍wɛ̄ɛ̄ o̍ dɔ̍ū Mūu̍sē o̍ sōndō ni̍ mbo̍ dīmūl I̍sɔ̄lūɛ̍i̍ya̍ la̍ŋ, bōōndi̍i̍ nda̍ wa̍ o̍ dɛ̍ŋgbɔ̍ɔ̍ Mo̍wa̍bī, Chɔ̍ɔ̍dāŋ kɔ̍ŋgɔ̍, bā pāa̍le̍ŋ lē chāŋndo̍, mi̍ Chɛ̄lu̍i̍kō chi̍e̍e̍ ndu̍ wa᷅ Chɔ̍ɔ̍dāŋ le̍e̍lōo̍ bā pāa̍le̍ŋ lē dēl lo̍ ve̍.