Nɔ̍mbāā 33 - Yāu̍ Mɛ̄lɛ̄ka̍a̍

Fo̍ndāŋndā yɛ̍ yɛ̍la̍ I̍sɔ̄lūɛ̍i̍ya̍ ā kēēku̍ chɔ̍ŋ I̍chi̍pī ha̍a̍a̍ ma̍ fūūlūū Mo̍wa̍bī la̍ŋ

¹ Bōōndi̍i̍ I̍sɔ̄lūɛ̍i̍ya̍ ā ma᷄l I̍chi̍pī a̍ yu̍ŋgu̍la̍ ndāla̍ŋ le̍nde̍ kpɛ̍ kpɛ̍ mi̍ Mūu̍sē nda̍ E̍lɔ̄ŋ a̍ wa᷅ hūnɔ̄ɔ̍ a̍ nda̍ ve̍, fo̍ndāŋndā yɛ̍ yɛ̍la̍ nda̍ kēēku̍ ki̍nɛ̍i̍ la̍ŋ, la̍ cho̍ la᷅ŋ ni̍.

² Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē mbo̍ pōōnyīāā fo̍ndāŋnda̍ŋ ndāŋ dīōla̍ŋ kpɛ̍ kpɛ̍, fo̍ndā nda̍ fūūlūū ko̍ mā kēlū dɔ̍ɔ̍ŋgɔ̍ɔ̍ lo̍ŋ, Mūu̍sē o̍ po̍o̍nyīāā fo̍ndā kōŋ dīōla̍ŋ.

³ I̍sɔ̄lūɛ̍i̍ya̍ ā ma᷄l Lu̍a̍mɛ̍sī chi̍e̍e̍, o̍ lɛ̄ŋndē I̍chi̍pīle̍ŋ ni᷄ŋ o̍ pāŋgi̍i̍ tāse̍i̍ o̍ wɔ̄sīo̍o̍ ni᷄ŋ, mālɔ̄ tɔ̍ a̍ lē ŋūɛ̍ɛ̍nu̍. Mɛ̄ɛ̍ nda̍ dē nyɛ̄ dīāā Hīōūwɔ̄ɔ̄ chōo̍ wo̍, dīi̍mā ndɔ̄ɔ̍ nda̍ ma᷄l I̍chi̍pī ni̍. Ndu̍yɛ̍ mālɔ̄ɔ̄ ndāa̍ I̍chi̍pī, kpe̍nde̍ke̍le̍ nda̍ ma᷄l ni̍, wāŋnda̍ I̍chi̍pī kpo̍u̍ ma̍ chā nda̍ mālɔ̄ɔ̍.

⁴ A̍ te̍le̍ŋ ko̍ŋ, wāŋnda̍ I̍chi̍pī a̍ wa̍ pūa̍a̍ ndāā tāsi̍a̍a̍ Mɛ̄lɛ̄ka̍ Ya̍a̍wɛ̄ɛ̄ o̍ di̍u̍ wa̍ chɔ̄ɔ̍. Mi̍ Mɛ̄lɛ̄ka̍ Ya̍a̍wɛ̄ɛ̄ o̍ chɔ᷅m kpe̍nde̍ke̍le̍ māā ō chō wāna̍ kpāāyā bɛ̍ndū mbo̍ hīāū mɛ̄lɛ̄ka̍a̍ wāŋnda̍ I̍chi̍pī.

⁵ Mɛ̄ɛ̍ wāŋnda̍ I̍sɔ̄lūɛ̄ī a̍ ma̍l Lu̍a̍mɛ̍sī chi̍e̍e̍, ma̍ hūŋ Su̍kɔ̍tī chi̍e̍e̍, ma̍ kīālū dɔ̍ɔ̍ŋgɔ̍ɔ̍ lo̍ŋ.

⁶ Ma̍ cha᷄ŋ Su̍kɔ̍tī ma̍ hūŋ Ɛ̍tām chi̍e̍e̍, o̍ lɛ̄ŋndē po̍lte̍ŋ īkɛ̄i̍, ma̍ kīālū dɔ̍ɔ̍ŋgɔ̍ɔ̍ lo̍ŋ.

⁷ O̍ ko̍ŋ kɔ̍ɔ̍lī, ma̍ cha᷄ŋ ndo̍ŋ, ma̍ mīīŋgū Pīhāhi̍lɔ̍tī chi̍e̍e̍ ma̍ kīālū dɔ̍ɔ̍ŋgɔ̍ɔ̍ lo̍ŋ, Ba̍a̍l Sɛ̍fɔ̄ŋ bā pāa̍le̍ŋ lē cha᷄ŋ ndo̍, Mi̍ki̍dɔ̄ɔ̄ i̍kɛ̍i̍.

⁸ Ma̍ cha᷄ŋ Pīhāhi̍lɔ̍tī ma̍ tāŋ Pēē Si̍a̍ŋā Mɛ̄ŋmā Īhɛ᷄llo̍, ma̍ hūŋ o̍ lɛ̄ŋndē po̍lte̍ŋ Si̍ɔ̍ɔ̄. Mɛ̄ɛ̍ nda̍ kūɛ̄ le̍ pālɛ̍i̍ ī yāa̍ o̍ lɛ̄ŋndē po̍lte̍ le̍ŋ ni᷄ŋ, ma̍ fūūlūū Ma̍a̍lūāā, ma̍ kīālū dɔ̍ɔ̍ŋgɔ̍ɔ̍ lo̍ŋ.

⁹ Ma̍ cha᷄ŋ lo̍ŋ ma̍ kūā Ɛ̍līm chi̍e̍e̍. Ndu̍yɛ̍ mɛ̄ŋmā ŋ̄būŋga᷄ŋ mā wa̍ Ɛ̍līm ndo̍ŋ tɔ̍ a̍ ŋ̄ mūu̍ŋ, a̍ wāūwa̍ŋ be̍le̍-ŋɔ̍mmɛ̍ū. Mɛ̄ɛ̍ nda̍ fūūlu̍u̍ lo̍ŋ, ma̍ kīālū dɔ̍ɔ̍ŋgɔ̍ɔ̍ lo̍ŋ ma̍ wā lo̍ŋ le̍ te̍le̍ŋ ti̍ŋ.

¹⁰ Ma̍ cha᷄ŋ Ɛ̍līm, ma̍ hu᷄ŋ ki̍o̍lū dɔ̍ɔ̍ŋgɔ̍ɔ̍ o̍ Pēē Si̍a̍ŋā Mɛ̄ŋmā Īhɛ᷄llo̍.

¹¹ O̍ ko̍ŋ kɔ̍ɔ̍lī, ma̍ cha᷄ŋ vɛ̍lɛ̄ lo̍ŋ ma̍ hu᷄ŋ ki̍o̍lū dɔ̍ɔ̍ŋgɔ̍ɔ̍ o̍ lɛ̄ŋndē po̍lte̍ŋ Si᷅ŋ.

¹² Ma̍ cha᷄ŋ lo̍ŋ ma̍ hu᷄ŋ ki̍o̍lū dɔ̍ɔ̍ŋgɔ̍ɔ̍ Dɔ̍fi̍kāā chi̍e̍e̍.

¹³ Ma̍ cha᷄ŋ Dɔ̍fi̍kāā, ma̍ hu᷄ŋ ki̍o̍lū dɔ̍ɔ̍ŋgɔ̍ɔ̍ A̍lɔ̍sī.

¹⁴ Ma̍ cha᷄ŋ A̍lu̍sī ma̍ hu᷄ŋ ki̍o̍lū dɔ̍ɔ̍ŋgɔ̍ɔ̍ Lu̍ɛ̍fi̍dīm, kɛ̍ mɛ̄ŋmā o̍ mɛ̄ŋmā ve᷄ lo̍ŋ le̍ mī nda̍ a̍a̍ ko̍l te̍.

¹⁵ Ma̍ cha᷄ŋ Lu̍ɛ̍fi̍dīm, ma̍ hu᷄ŋ ki̍o̍lū dɔ̍ɔ̍ŋgɔ̍ɔ̍ o̍ lɛ̄ŋndē po̍lte̍ŋ ni᷄ŋ Sa̍a̍nāī.

¹⁶ Ma̍ cha᷄ŋ Sa̍a̍nāī, ma̍ hu᷄ŋ ki̍o̍lū dɔ̍ɔ̍ŋgɔ̍ɔ̍ Kībīlɔ̄tī-Hāta̍a̍vāā.

¹⁷ Ma̍ cha᷄ŋ vɛ̍lɛ̄ lo̍ŋ ma̍ hu᷄ŋ ki̍o̍lū dɔ̍ɔ̍ŋgɔ̍ɔ̍ Hāsɛ̍lɔ̍tī.

¹⁸ Ma̍ cha᷄ŋ lo̍ŋ ma̍ hu᷄ŋ ki̍o̍lū dɔ̍ɔ̍ŋgɔ̍ɔ̍ Lu̍i̍ti̍māā.

¹⁹ Ma̍ cha᷄ŋ Lu̍i̍ti̍māā, ma̍ hu᷄ŋ ki̍o̍lū dɔ̍ɔ̍ŋgɔ̍ɔ̍ Lūīmɔ̄ŋ Pɛ̍lu̍ɛ̍sī.

²⁰ Ma̍ cha᷄ŋ Lu̍i̍mɔ̄ŋ Pɛ̍lu̍ɛ̍sī ma̍ hu᷄ŋ ki̍o̍lū dɔ̍ɔ̍ŋgɔ̍ɔ̍ Li̍bi̍nāā.

²¹ Ma̍ cha᷄ŋ Li̍bi̍nāā ma̍ hu᷄ŋ ki̍o̍lū dɔ̍ɔ̍ŋgɔ̍ɔ̍ Lu̍i̍sāā.

²² Ma̍ cha᷄ŋ Lu̍i̍sāā ma̍ hu᷄ŋ ki̍o̍lū dɔ̍ɔ̍ŋgɔ̍ɔ̍ Kɛ̄hɛ̄la̍tāā.

²³ Ma̍ cha᷄ŋ lo̍ŋ ma̍ fūūlūū o̍ Pēmbīī Si̍ɛ̍fāāve̍, ma̍ kīālū dɔ̍ɔ̍ŋgɔ̍ɔ̍ lo̍ŋ.

²⁴ Ma̍ cha᷄ŋ o̍ pēmbīī kēŋ ma̍ hu᷄ŋ ki̍o̍lū dɔ̍ɔ̍ŋgɔ̍ɔ̍ Ha̍lu̍a̍dā.

²⁵ Ma̍ cha᷄ŋ Ha̍lu̍a̍dā, ma̍ hu᷄ŋ ki̍o̍lū dɔ̍ɔ̍ŋgɔ̍ɔ̍ Mākīhɛ̍lɔ̍tī.

²⁶ Ma̍ cha᷄ŋ vɛ̍lɛ̄ lo̍ŋ ma̍ hu᷄ŋ ki̍o̍lū dɔ̍ɔ̍ŋgɔ̍ɔ̍ Ta̍ha̍tī.

²⁷ Ma̍ cha᷄ŋ Ta̍ha̍tī ma̍ hu᷄ŋ ki̍o̍lū dɔ̍ɔ̍ŋgɔ̍ɔ̍ Tɛ̍lūā.

²⁸ Ma̍ cha᷄ŋ Tɛ̍lūā ma̍ hu᷄ŋ ki̍o̍lū dɔ̍ɔ̍ŋgɔ̍ɔ̍ Mi̍ti̍kāā.

²⁹ Ma̍ cha᷄ŋ Mi̍ti̍kāā, ma̍ hu᷄ŋ ki̍o̍lū dɔ̍ɔ̍ŋgɔ̍ɔ̍ Hāsīmo̍nāā.

³⁰ Ma̍ cha᷄ŋ Hāsīmo̍nāā, ma̍ hu᷄ŋ ki̍o̍lū dɔ̍ɔ̍ŋgɔ̍ɔ̍ Mōsɛ̄lɔ̍tī.

³¹ Ma̍ cha᷄ŋ Mōsɛ̄lɔ̍tī, ma̍ hu᷄ŋ ki̍o̍lū dɔ̍ɔ̍ŋgɔ̍ɔ̍ Bɛ̄nī Cha̍a̍kāŋ.

³² Ma̍ cha᷄ŋ Bɛ̍nī Cha̍a̍kāŋ, ma̍ hu᷄ŋ ki̍o̍lū dɔ̍ɔ̍ŋgɔ̍ɔ̍ Hɔ̄ɔ̄ Hākīdi̍ka̍dī.

³³ Ma̍ cha᷄ŋ lo̍ŋ ma̍ hu᷄ŋ ki̍o̍lū dɔ̍ɔ̍ŋgɔ̍ɔ̍ Chōtība̍tāā.

³⁴ Ma̍ cha᷄ŋ vɛ̍lɛ̄ lo̍ŋ ma̍ hu᷄ŋ ki̍o̍lū dɔ̍ɔ̍ŋgɔ̍ɔ̍ Ābīlɔ̍nāā.

³⁵ Ma̍ cha᷄ŋ A̍bīlɔ̍nāā, ma̍ hu᷄ŋ ki̍o̍lū dɔ̍ɔ̍ŋgɔ̍ɔ̍ Kɛ̍bā.

³⁶ Ma̍ cha᷄ŋ lo̍ŋ ma̍ hu᷄ŋ ki̍o̍lū dɔ̍ɔ̍ŋgɔ̍ɔ̍ Ka̍dɛ̍sī, o̍ lɛ̄ŋndē po̍lte̍ŋ Sɛ᷅ŋ.

³⁷ O̍ ko̍ŋ kɔ̍ɔ̍lī, ma̍ cha᷄ŋ lo̍ŋ ma̍ hu᷄ŋ ki̍o̍lū dɔ̍ɔ̍ŋgɔ̍ɔ̍ o̍ Pēmbīī Hɔ̍ɔ̄ve̍, o̍ pɛ̄ŋgu̍la̍ŋ a̍ I̍dɔ̄m.

³⁸ Bōōndi̍i̍ nda̍ wa̍ lo̍ŋ nde̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl E̍lɔ̄ŋ wānā so̍līāā lāsa̍lāa̍, le̍ mbō he᷄l o̍ Pēmbīī Hɔ̍ɔ̄ve̍ chōo̍. Ndu̍yɛ̍ lo̍ŋ E̍lɔ̄ŋ o̍ sɔ̍la̍ pīɔ̍mndo̍ ni̍. Mālɔ̄ɔ̄ I̍sɔ̄lūɛ̍i̍ya̍ ā ma᷄l I̍chi̍pī wo̍, wɔ̄sī nda̍ chīŋa̍ wɔ̄sīla̍ŋ be̍le̍-hi̍ɔ̍ɔ̍lu̍ o̍ ti᷅ŋndo̍ tɛ̄ɛ̄ŋ ndo̍, pāŋgi̍i̍ ŋu̍ɛ̍ɛ̍nu̍e̍i̍ o̍ wɔ̄sī kōŋ ni᷄ŋ pāa̍le̍ tāse̍le̍ŋ, pāa̍le̍ le̍ŋ kpe̍e̍kpe̍i̍ E̍lɔ̄ŋ o̍ vi᷅ ni̍.

³⁹ E̍lɔ̄ŋ o̍ wa̍ wɔ̄sīla̍ŋ kɛ̄mɛ̄ a̍ bi̍di̍i̍ŋ a̍ lā yāa̍ (123), mbo̍ wū o̍ Pēmbīī Hɔ̍ɔ̄ve̍ lo̍ŋ.

⁴⁰ Mi̍ māsā bɛ̍ndōo̍ le̍ lɛ̄ŋndē A̍lu̍a̍dīle̍ŋ, o̍ wa̍ īchāli̍ o̍ lɛ̄ŋndē Ke̍nāŋnde̍ŋ bā tōūwo̍ wo̍ ō tūɛ̄ī māā I̍sɔ̄lūɛ̍i̍ya̍ ā chō hūnɔ̄ɔ̍.

⁴¹ O̍ ko̍ŋ kɔ̍ɔ̍lī, mi̍ wāŋnda̍ I̍sɔ̄lūɛ̄ī a̍ ma᷅l nāa̍ nda̍ wa̍ o̍ Pēmbīī Hɔ̍ɔ̄ve̍ wa̍, ma̍ hu᷄ŋ ki̍o̍lū dɔ̍ɔ̍ŋgɔ̍ɔ̍ Sāli̍mo̍nāā.

⁴² Ma̍ cha᷄ŋ Sāli̍mo̍nāā, ma̍ hu᷄ŋ ki̍o̍lū dɔ̍ɔ̍ŋgɔ̍ɔ̍ Pu̍nɔ̄ŋ.

⁴³ Ma̍ cha᷄ŋ Pu̍nɔ̄ŋ, ma̍ hu᷄ŋ ki̍o̍lū dɔ̍ɔ̍ŋgɔ̍ɔ̍ Ōbo̍tī.

⁴⁴ O̍ ko̍ŋ kɔ̍ɔ̍lī, ma̍ cha᷄ŋ Ōbo̍tī ma̍ hu᷄ŋ ki̍o̍lū dɔ̍ɔ̍ŋgɔ̍ɔ̍ o̍ pɔ̄mndo̍ A̍ba̍lūīm, o̍ būŋgɛ̄ī Mo̍wa̍bīve̍ ni᷄ŋ.

⁴⁵ Ma̍ cha᷄ŋ lo̍ŋ, ma̍ hu᷄ŋ ki̍o̍lū dɔ̍ɔ̍ŋgɔ̍ɔ̍ Di̍bɔ̄ŋ Ka̍a̍dī.

⁴⁶ Ma̍ cha᷄ŋ vɛ̍lɛ̄ Di̍bɔ̄ŋ Ka̍a̍dī, ma̍ hu᷄ŋ ki̍o̍lū dɔ̍ɔ̍ŋgɔ̍ɔ̍ Ālīmɔ̄ŋ Dībīla̍ta̍yīm.

⁴⁷ O̍ ko̍ŋ kɔ̍ɔ̍lī, ma̍ māl lo̍ŋ ma̍ hu᷄ŋ ki̍o̍lū dɔ̍ɔ̍ŋgɔ̍ɔ̍ o̍ pēmbūŋ A̍ba̍lūīm ndo̍ŋ, le̍ kɔ̄la̍ŋ o̍ Pēmbīī Ni̍bɔ̄ve̍.

⁴⁸ O̍ ko̍ŋ kɔ̍ɔ̍lī, ma̍ māl lo̍ŋ ma̍ hūŋ o̍ dɛ̍ŋgbɔ̍ɔ̍ Mo̍wa̍bī, Chɔ̍ɔ̍dāŋ i̍kɛ̍i̍, bā pāa̍le̍ŋ lē chāŋndo̍, Chɛ̄lu̍i̍kō chi̍e̍e̍ ndu̍ wa̍ Chɔ̍ɔ̍dāŋ le̍e̍lōo̍, bā pāa̍le̍ŋ lē dēl lo̍.

⁴⁹ Ma̍ kīālū dɔ̍ɔ̍ŋgɔ̍ɔ̍ Mo̍wa̍bī, Chɔ̍ɔ̍dāŋ nda̍ŋ hōlnɔ᷄ŋndo̍, chɔ̍ŋ Bɛ̍tī Chɛ̍su̍i̍mɔ̍tī mbo̍ fūūlūū le̍nde̍ a̍ E̍bɛ̄ɛ̄l Si̍tīm.

Dīōmndā Mɛ̄lɛ̄ka̍ dīmu̍l I̍sɔ̄lūɛ̍i̍ya̍, lɔ̍ɔ̍ pa̍ ma̍ tāŋ Chɔ̍ɔ̍dāŋ nda̍ŋ

⁵⁰ Bōōndi̍i̍ nda̍ wa̍ o̍ dɔ̍ɔ̍ŋgɔ̍ kōŋ Mo̍wa̍bī lo̍ŋ, o̍ Pīo̍o̍ Chɔ̍ɔ̍dāŋ hōlnɔ᷄ŋndo̍ ve̍, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā,

⁵¹ “Si̍la̍ wa᷅ŋnda̍ I̍sɔ̄lūɛ̍i̍ sīlāla̍ŋ nda᷅ŋ, māā ya̍ Mɛ̍lɛ̄ka̍ dīmi̍ a̍a̍, ‘Tē lā ta᷄ŋ Chɔ̍ɔ̍dāŋ nda̍ŋ pɛ̍, mī lā lūɛ̄ī o̍ lɛ̄ŋndē Ke̍nāŋnde̍ŋ ni᷄ŋ,

⁵² wānāa̍ cho̍ o̍ lɛ̄ŋndē lēŋ ni᷄ŋ nya̍ lāchī wa̍ ki̍nɛ̍i̍, lā sōli̍ nda̍ kpo̍u̍ o̍ lɛ̄ŋndē lēŋ ni᷄ŋ. Ndu̍yɛ̍ mɛ̄lɛ̄ka̍a̍ ndāa̍ nda̍ tōōsi̍a̍a̍ a̍ pōūta̍ŋ nda̍ ni̍, a̍ ā nda̍ tōōsi̍a̍a̍ a̍ chīli̍ŋnde̍ wa̍, lā tɛ̄ɛ̄mbu̍u̍ nda̍ kpo̍u̍, o̍ ko̍ŋ kɔ̍ɔ̍lī, mī lā tɛ̄ɛ̄mbu̍u̍ fo̍ndāŋndā lāsōōlu̍u̍la̍ ndāla̍ŋ kpo̍u̍.

⁵³ Lā chūa̍ lɛ᷅ŋndē le̍ŋ kpo̍u̍ mī lā cha᷄l lo̍ŋ. Nya̍ ya̍ I̍ ke̍ lɛ̄ŋndē lēŋ nyɛ̄ nyā ni̍.

⁵⁴ Ndu̍yɛ̍ lā nɔ̄ mī lā pīɔ̍u̍ lɛ̄ŋndē lēŋ a̍ būŋga᷄ŋ yu̍ŋgu̍la̍ŋ I̍sɔ̄lūɛ̍i̍ tɛ̄ɛ̄ŋ a̍ kōo̍ŋ wūūwo̍, le̍ sīnāa̍ būŋgɛ̄ī yu̍ŋgu̍ o̍ yu̍ŋgu̍ o̍ nɔ̍ le̍ sɔ̄lāa̍ ve̍. Ndu̍yɛ̍ mɛ̄ɛ̍ yu̍ŋgo̍o̍ ō wā yɛ̍, le̍nde̍ o̍ nɔ̍ ni̍ mbō sɔ̄la̍ būŋgɛ̄i̍, tē yu̍ŋgo̍o̍ ō wa̍ pɛ̍ ta̍u̍, ō sɔ̄la̍ būŋgɛ̄i̍ ta̍u̍, tē yu̍ŋgo̍o̍ ō wa̍ pɛ̍ o̍ pɔ̍mbɔ̄, ō sɔ̄la̍ būŋgɛ̄i̍ ī pɔ̄mbɔ̄. Kōo̍ŋ nya̍ chō mu̍ŋ wo̍ŋ, mu̍ŋ cho̍ nya̍ chɔ̄m mɛ̄ɛ̍ yu̍ŋgu̍ o̍ yu̍ŋgu̍ o̍ nɔ̍ le̍ būŋgɛ̄i̍ sɔ̄lāa̍ yɛ̍ ni̍. Mɛ̄ɛ̍ nu̍a̍ā nya̍ nɔ̄ ni̍ mī lā pīɔ̍u̍ lɛ̄ŋndē lēŋ yu̍ŋgu̍la̍ fi̍nyāā nyāa̍ tɛ̄ɛ̄ŋ.

⁵⁵ Kɛ̍ ndu̍yɛ̍ tē lā kɛ̄ɛ̍ le̍ wāŋnda̍ ha̍ā sōlīo̍o̍ o̍ lɛ̄ŋndē lēŋ ni᷄ŋ kpo̍u̍ pɛ̍, ā tūa̍a̍ cho̍ lō nya̍ tɛ̄ɛ̄ŋ nda̍, ā wā ni̍ŋ ma̍wa̍ā nya̍ tɛ̄ɛ̄ŋ mɛ̄ɛ̍ bīlte̍ŋ lē dēl nu̍a̍ā wāŋndo̍ o̍ hɔ̄l mī lē wa̍ ndu̍ o̍ lēhɔ̄l lɛ̍, mɛ̄ɛ̍ yūɛ̍i̍ ī wā nu̍a̍ā wāŋndo̍ o̍ ŋ̄dīāl lɛ̍, le̍nde̍ nda̍ wā ni̍ŋ nya̍ tɛ̄ɛ̄ŋ ni̍. Ā wā ni̍ŋ nya̍ nyɛ̄ pālāa̍ hāndɔ̄ɔ̍ chōo̍ le̍ te̍le̍ŋ te̍le̍ŋ o̍ lɛ̄ŋndē lēŋ ni᷄ŋ.

⁵⁶ Ndu̍yɛ̍ dɛ̍nɛ̍ pa̍lāā o̍ dɛ̍nɛ̍ pa̍lāā ya̍ i̍i̍ kɛ̍ɛ̍si̍a̍a̍ le̍ nda̍ tūsīo̍o̍ chōo̍ nya̍ ya̍ I̍ tu̍sī ndu̍ chōo̍ kpo̍u̍ ni̍.’ ”