Nɔ̍mbāā 31 - Yāu̍ Mɛ̄lɛ̄ka̍a̍

I̍sɔ̄lūɛ̍i̍ya̍ sɔ̄ŋga̍ a̍ wāŋnda̍ Mi̍dīāŋ

¹ Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā,

² “Mi̍ŋgu̍l wa᷅ŋnda̍ Mi̍dīāŋ māa̍, le̍ nyɛ̄ nda̍ tōsa̍ a̍ I̍sɔ̄lūɛ̍i̍ya̍ wo̍. Ndu̍yɛ̍ tē a̍ chi̍i̍ nda̍ māa̍ ko̍ŋ mīŋgūl pɛ̍, ā nɔ̄ le̍ wūo̍o̍.”

³ Mi̍ Mūu̍sē o̍ lo᷅ o̍ ko̍ŋ mbo̍ dīmūl wāŋnda̍ I̍sɔ̄lūɛ̄ī āā, “Lā bɛ̄ɛ̄ndi̍a̍a̍ pu̍a̍a̍ nyāa̍ le̍ kɔ̄la̍ŋ sɔ̍ŋgɔ̄ɔ̍ a̍ wāŋnda̍ Mi̍dīāŋ, mī ŋ̄ mīŋgu̍l nda̍ māa̍ le̍ nyɛ̄ nda̍ tōsa̍ a̍ Mɛ̄lɛ̄ka̍ Ya̍a̍wɛ̄ɛ̄ wo̍.

⁴ Lā hɛ̄li̍ pu̍a̍a̍ o̍ yu̍ŋgu̍la̍ I̍sɔ̄lūɛ̍i̍la̍ŋ tɛ̄ɛ̄ŋ, yu̍ŋgu̍ o̍ yu̍ŋgu̍ pūa̍a̍ wāa̍ ō pīlɛ̍.”

⁵ O̍ ko̍ŋ, mi̍ wāŋnda̍ I̍sɔ̄lūɛ̄ī a̍ hɛ̍lī pūa̍a̍ so̍vɛ̄i̍ya̍ wāa̍la̍ŋ tɔ̍ a̍ lā tīɔ̍ɔ̍ŋ yu̍ŋgu̍la̍ I̍sɔ̄lūɛ̍i̍la̍ŋ tɛ̄ɛ̄ŋ, yu̍ŋgu̍ o̍ yu̍ŋgu̍ pūa̍a̍ wāa̍ ō pīlɛ̍.

⁶ Pūa̍a̍ Mūu̍sē o̍ hɛ̍li̍ ha̍ā o̍ yu̍ŋgu̍ o̍ yu̍ŋgu̍ cho̍o̍ wāa̍ ō pīlɛ̍ wa̍, mbo̍ vīām nda̍ o̍ chɔ̄ūwo̍. Fi̍ni̍ha̍a̍sī, po̍ Ɛ̄li̍a̍a̍sā wānā so̍līāā lāsa̍lāa̍, ndu̍ si̍m nda̍ lāchī ni̍ mbo̍ kūā a̍ nda̍ o̍ chɔ̄ūwo̍, lātūlu̍ a̍ nyɛ̄m kāsi᷄ŋ wa̍ o̍ fo̍nda̍ Mɛ̄lɛ̄ka̍a̍ le̍ Mɛ̄lɛ̄ka̍ dīōmndo̍ nyūnāa̍ a̍ mu̍ŋ ndo̍ŋ, ndu̍yɛ̍ a̍ pūtɛ̍nɛ̍i̍la̍ chɔ̄ūla̍ wa̍ le̍ hɔ̄ŋndo̍ le̍ pūa̍a̍ dīmūllo̍ le̍ ya̍a̍mɔ̍ɔ̍wa̍a̍ chīŋa̍la᷅ŋndo̍ la̍ŋ.

⁷ Mi̍ I̍sɔ̄lūɛ̍i̍ya̍ ā kɔ̍ chi᷅ŋa̍la᷅ŋ Mi̍dīāŋnda̍ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l nda̍ yɛ̍, ndu̍yɛ̍ ma̍ yām nda̍ o̍ ko̍ŋ kɔ̍ɔ̍lī, ma̍ dīū wāŋ pīāāndūa̍a̍ Mi̍dīāŋ kpo̍u̍.

⁸ Māsāā bɛ̍ndūāā ŋu̍ɛ̍ɛ̍nu̍a̍a̍ Mi̍dīāŋ bɛ̍ɛ̍ ma̍ dīū nda̍ kpo̍u̍ a̍ mɔ̄ɔ̄ŋ fāŋndo̍ŋ, nda̍ yɔ̍nūŋ ni̍ māā I̍vī, a̍ Lu̍ɛ̍kɛ̄m, a̍ Sɔ̍ū, a̍ Hɔ̍ɔ̄, ndu̍yɛ̍ a̍ Lu̍ɛ̍bā. O̍ ko̍ŋ kɔ̍ɔ̍lī, ma̍ dīī vɛ̄lɛ̄ Be̍la᷅m, po̍ Bi̍ɔ̍ɔ̄ wo̍.

⁹ O̍ ko̍ŋ kɔ̍ɔ̍lī, mi̍ wāŋnda̍ I̍sɔ̄lūɛ̄ī a̍ bi̍ū wāŋ lāāndūa̍a̍ Mi̍dīāŋ, a̍ chɛ̄lɛ̄kpi̍a̍a̍ wa̍ lo̍ŋ nda̍ ma̍ kūānu᷄ŋ a̍ nda̍. Ndu̍yɛ̍ nāūwāā ndāa̍ bɛ̍ɛ̍, a̍ sāa̍ ndāa̍, a̍ chūīŋāā ndāa̍, ma̍ bīū nda̍ kpo̍u̍ ma̍ kūānu᷄ŋ a̍ nda̍, lātūlu̍ a̍ nyɛ̄m kɛ̄ndɛ᷄ŋ wa̍ Mi̍dīāŋ ndo̍ŋ kpo̍u̍.

¹⁰ Kɛ̍ chi̍e̍e̍ŋ bɛ̍ndūŋ wāŋnda̍ Mi̍dīāŋ kpo̍u̍, a̍ dɔ̍ɔ̍ŋgɔ̍lā ndāla̍ŋ, mi̍ wāŋnda̍ I̍sɔ̄lūɛ̄ī a̍ lu̍ām kpo̍u̍.

¹¹ Nyɛ̄ o̍ nyɛ̄ wāŋnda̍ I̍sɔ̄lūɛ̄ī a̍ pu̍ŋga̍ Mi̍dīāŋ ma̍ kūānu᷄ŋ a̍ mu̍ŋ kpo̍u̍, lātūlu̍ a̍ wānāā nda̍ bīu̍ wa̍ ndu̍yɛ̍ a̍ chɔ̄lūa̍a̍.

¹² Nyɛ̄m wāŋnda̍ I̍sɔ̄lūɛ̍i̍ a̍ pu̍ŋga̍ mu̍ŋ ndo̍ŋ, a̍ wāŋndā chīe̍e̍ya̍a̍ nda̍ bīu̍ wa̍, lātūlu̍ a̍ chɔ̄lūa̍a̍, ma̍ kɔ̍ do̍o̍nu᷄ŋ Mūu̍sē ko̍na̍, nda̍ Ɛ̄li̍a̍a̍sā, wānā so̍līāā lāsa̍lāa̍, ndu̍yɛ̍ a̍ ku̍ndā I̍sɔ̄lūɛ̍i̍ya̍a̍ tu̍a̍a̍ kpo̍u̍. I̍sɔ̄lūɛ̍i̍ya̍ ā wa̍ o̍ dɔ̍ɔ̍ŋgɔ̍ɔ̍ o̍ dɛ̍ŋgbɔ̍ɔ̍ Mo̍wa̍bī bā pāa̍le̍ŋ lē chāŋndo̍, Chɔ̍ɔ̍dāŋ i̍kɛ̍i̍, Chɛ̄lu̍i̍kō wa̍ Chɔ̍ɔ̍dāŋ le̍e̍lōo̍, bā pāa̍le̍ŋ lē dēl lo̍.

^13-14 Mɛ̄ɛ̍ pūa̍a̍ ha̍ā ā chɛ᷄ŋ o̍ chɔ̄ūwo̍ lāchi̍, Mūu̍sē ni̍, Ɛ̄li̍a̍a̍sā, wānā so̍līāā lāsa̍lāa̍ ni̍, a̍ wa̍ŋ bɛ̄ndūāā I̍sɔ̄lūɛ̍i̍ya̍, ma̍ kūā nāa̍ so̍vɛ̄i̍ya̍ ha̍ā ā wa̍ ā dīīna᷄ŋ o̍ dɔ̍ɔ̍ŋgɔ̍ɔ̍ īkɛ̄i̍ ya̍. Mi̍ Mūu̍sē o̍ kɔ̍ do̍o̍nu᷄ŋ wa̍nāa̍ wa̍ ku̍ndālā so̍vɛ̄i̍yāā yɛ̍ yi̍a̍a̍ ha̍ā bōlle̍ wa̍ tu̍mbe̍ ta̍u̍ ta̍u̍, a̍ wa̍ bōlle̍ wāa̍la̍ŋ a̍ kɛ̄mɛ̄la̍ŋ nda̍.

¹⁵ Mi̍ Mūu̍sē o̍ nyu̍nā nda̍ āā, “Vɛ᷅ mi̍ lā mɛ̄ī wāŋ lāāndūa̍a̍ kpo̍u̍ yo̍o̍mū?

¹⁶ Wāŋ lāāndūa̍a̍ ha̍ā nda̍ to᷅l nyɛ̄ Be̍la᷅m o̍ di̍mi̍ wo̍ kɔ̄ɔ̄lī ni̍, ma̍ tōsā mi̍ wāŋnda̍ I̍sɔ̄lūɛ̍i̍ a̍ so̍lī Mɛ̄lɛ̄ka̍ Ya̍a̍wɛ̄ɛ̍ dīōm o̍ Pēmbīī Pi̍ɔ̍ɔ̄ve̍, ma̍ mūli᷄ŋ Ba̍a̍l sōōlūūwo̍ māā mɛ̄lɛ̄ka̍ nda̍. Ndu̍yɛ̍ le̍ nyɛ̄ nda̍ tōsa̍ ko̍ŋ ndo̍, mi̍ nāā kpūndɛ̍ bɛ̄ndōo̍ ō tūāl wānāa̍ Mɛ̄lɛ̄ka̍ Ya̍a̍wɛ̄ɛ̄ wa̍ chōo̍.

¹⁷ Le̍la̍ŋ chɛ̄lɛ̄kpi̍a̍a̍ nya̍ hīŋ ha̍ā wa̍, ā pīāāndūa̍a̍ ki̍nɛ̍i̍ lā dīu̍ nda̍, o̍ ko̍ŋ kɔ̍ɔ̍lī, wāŋ lāāndūa̍a̍ si̍nā ni᷅ŋ sūɛ̍i̍ wānā pɔ̍nɔ̍ wa̍ ki̍nɛ̍i̍ nda̍ bɛ̍ɛ̍ mī lā dīu̍ nda̍ kpo̍u̍.

¹⁸ Kɛ̍ wāŋ lāāndūa̍a̍ si̍nā wɔ̍ sūɛ̍i̍ wānā pɔ̍nɔ̍ le̍ wa̍, mī lā mɛ̄i̍ ka̍ŋ le̍ nya̍ pi̍la̍.

¹⁹ Ndu̍yɛ̍ ō fūla̍ o̍ ko̍ŋ kɔ̍ɔ̍lī, nya̍ wa̍ ha̍ā o̍ chɔ̄ūwo̍ wa̍ ki̍nɛ̍i̍, wānā o̍ wāna̍ kɔ̍ di̍ī wāŋndo̍, kɛ̄lɛ̄ŋgāā mbo̍ pīla᷄ŋ wa̍nā vi̍lɛ̍i̍yo̍, wānāā kāŋ ki̍nɛ̍i̍ ā nɔ̄ mā wa̍ o̍ dɔ̍ɔ̍ŋgɔ̍ɔ̍ īkɛ̄i̍ na̍nu᷄ŋ le̍ pālɛ̍i̍ ī ŋɔ᷄mmɛ̍ū. O̍ pāa̍le̍ ya̍a̍ ndɔ̄le̍ŋ chōo̍ ndu̍yɛ̍ a̍ o̍ pāa̍le̍ ŋɔ̍mmɛ̍ūle̍ŋ chōo̍, wānāā kāŋ ā nɔ̄ mā dīndi̍ nda̍ pi̍la̍ ndu̍yɛ̍ mā dīndi̍ vɛ̄lɛ̄ wāŋ lāāndūāā nya̍ hīŋ o̍ bīyɔ̄ɔ̍ ni᷄ŋ nda̍ Mɛ̄lɛ̄ka̍ o̍ hɔ̄l.

²⁰ O̍ ko̍ŋ kɔ̍ɔ̍lī, ā nɔ̄ vɛ̄lɛ̄ mā dīndi̍ nyɛ̄lā ndāla̍ chu̍ɛ̍i̍ya᷄ŋnda̍ŋ, ndu̍yɛ̍ a̍ nyɛ̄ o̍ nyɛ̄ nda̍ nɔ̄ mbo̍ wā ō tōōsīāā a̍ yāu̍ chɔ̄lōo̍, kɛ̄lɛ̄ŋgāā a̍ yīīŋīī chūīŋnde̍, ɔ̄ɔ̄ yɔ̄mndo̍.”

²¹ O̍ ko̍ŋ kɔ̍ɔ̍lī, mi̍ Ɛ̄li̍a̍a̍sā, wānā so̍līāā lāsa̍lāa̍ ō dīmūl pūa̍a̍ fu̍la̍ ha̍ā o̍ chɔ̄ūwo̍ wa̍ āā, “Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l vɛ̄lɛ̄ Mūu̍sē māā lā nɔ̄ mī lā tōsa̍ wo̍ ndu̍ cho̍ ho̍ō ni̍.

^22-23 Nyɛ̄ o̍ nyɛ̍ cho̍ ō ŋu̍ē le̍, mbo̍ wā ō tōōsīāā a̍ īko̍o̍līi̍, kɛ̄lɛ̄ŋgāā a̍ ka̍ni̍i̍ hu̍mbū, kɛ̄lɛ̄ŋgāā a̍ ībūlɔ᷄ŋsīi̍, ɔ̄ɔ̄ a̍ īchīli̍ŋ, ɔ̄ɔ̄ a̍ chīli̍ŋi̍i̍ hu̍mbūi̍ cho̍ nu̍a̍ā bɛ̄kū bɛ̄kū ve̍, ɔ̄ɔ̄ a̍ li̍īye̍, mi̍ lā fūlā a̍ ndu̍ o̍ chɔ̄ūwo̍, lā nɔ̄ mī lā kēēku̍ ndu̍ o̍ yīŋ le̍ mī lā dīndi̍ ndu̍. Ndu̍yɛ̍ o̍ ko̍ŋ kɔ̍ɔ̍lī, lā nɔ̄ vɛ̄lɛ̄ mī lā dīndi̍ ndu̍ a̍ mɛ̄ŋma̍ cho̍ le̍ nyɔ̄ɔ̍ dīndīo̍o̍ mbō sīmnu᷄ŋ o̍ di̍a̍ndāā Mɛ̄lɛ̄ka̍ o̍ hɔ̄l la̍ŋ. Ndu̍yɛ̍ nyɛ̄ o̍ nyɛ̄ ŋu̍ā, ndu̍ bɛ̍ɛ̍ lā nɔ̄ mī lā dīndi̍ ndu̍ a̍ mɛ̄ŋma̍ cho̍ le̍ nyɔ̄ɔ̍ dīndīo̍o̍ mbō sīmnu᷄ŋ o̍ di̍a̍ndāā Mɛ̄lɛ̄ka̍ o̍ hɔ̄l la̍ŋ.

²⁴ O̍ pāa̍le̍ ŋɔ̍mmɛ̍ūle̍ŋ chōo̍, nya̍ nɔ̍ ka̍ŋ le̍ dīndīo̍o̍ sɔ̄lāa̍ wa̍ ki̍nɛ̍i̍, lā nɔ̄ mī lā tɔ̄ɔ̄ nyɛ̄lā nyāla̍ chu̍ɛ̍i̍ya᷄ŋnda̍ŋ. O̍ ko̍ŋ, mī lā sīmnu᷄ŋ a̍ di̍a̍ndāā Mɛ̄lɛ̄ka̍ o̍ hɔ̄l, mī lā mīīŋgu̍ ni̍ko̍ o̍ dɔ̍ɔ̍ŋgɔ̍ɔ̍ ni᷄ŋ.”

A̍ mɛ̄ɛ̍ I̍sɔ̄lūɛ̍i̍ya̍ pīɔ̍u̍ nyɛ̄m nda̍ pūŋga̍ o̍ chɔ̄ūwo̍ wo̍ŋ yɛ̍

²⁵ Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā,

²⁶ “Nyɛ̄ o̍ nyɛ̄ wāŋnda̍ I̍sɔ̄lūɛ̄ī a̍ fu̍la̍ o̍ chɔ̄ūwo̍, lātūlu̍ a̍ wāŋnda̍ chīe̍e̍ya̍ ndu̍yɛ̍ a̍ chɔ̄lūa̍a̍, nūm ni̍, Ɛ̄li̍a̍a̍sā wānā so̍līāā lāsa̍lāa̍, a̍ wāŋ bɛ̄ndūāā I̍sɔ̄lūɛ̍i̍ya̍ lā nɔ̄ mī lā chɔ᷄m mu̍ŋ bōllē pīlɛ̍.

²⁷ Tē lā chɔ᷄m nyɔ̄ɔ̍ŋ mu᷅ŋ pɛ̍ a̍ wāŋndā chīe̍e̍ya̍ ndu̍yɛ̍ a̍ chɔ̄lūa̍a̍, lā pīɔ̍u̍ mu̍ŋ tɛ̄ɛ̄ŋ ku̍ndāla̍ŋ lā tīɔ̍ɔ̍ŋ, ku̍ndāa̍ pīlɛ̍ le̍ so̍vɛ̄i̍ya̍a̍ ku̍ɛ̄ o̍ chɔ̄ūwo̍ wa̍, ku̍ndāa̍ pīlɛ̍ le̍ wāŋnda̍ I̍sɔ̄lūɛ̄ī kpo̍u̍.

²⁸ Ku̍ndā so̍vɛ̄i̍ya̍ ō chō sɔ̄lā wo̍, lā nɔ̄ mī lā sōli̍ o̍ cho̍ le̍ Mɛ̄lɛ̄ka̍ Ya̍a̍wɛ̄ɛ̄ wo̍ lēchōo̍. Wāŋndā chīe̍e̍ya̍a̍ nda̍ chō sɔ̄lā wa̍ ni̍, nāūwāā nda̍ chō sɔ̄lā wa̍ ni̍, sōfɛ̍li̍a̍a̍ ni̍, a̍ sāa̍, a̍ chūīŋnda̍, o̍ kɛ̄mɛ̄ le̍ ŋu̍ɛ̍ɛ̍nu̍ o̍ kɛ̄mɛ̄ le̍ ŋu̍ɛ̍ɛ̍nu̍ cho̍o̍, lā nɔ̄ mī lā fāŋa̍ ō pīlɛ̍ mī ndu̍ wa̍ le̍ Mɛ̄lɛ̄ka̍.

²⁹ Tē lā fāŋa̍ wānāā pīlɛ̍ŋ pi̍lɛ̍ŋa̍a̍ ka̍ŋ pɛ̍, a̍ chɔ̄lūāā kāŋ, lā ke᷄ Ɛ̄li̍a̍a̍sā, wānā so̍līāā lāsa̍lāa̍, ā wa̍ le̍ Mɛ̄lɛ̄ka̍ Ya̍a̍wɛ̄ɛ̄ māā kē.

³⁰ O̍ ko̍ŋ kɔ̍ɔ̍lī, ku̍ndā wāŋnda̍ I̍sɔ̄lūɛ̄ī a̍ cho̍ sɔ̄la̍ wo̍ bɛ̍ɛ̍, wāŋndā chīe̍e̍ya̍a̍ ni̍, nāūwāā nda̍ chō sɔ̄lā wa̍ ni̍, sōfɛ̍li̍a̍a̍ ni̍, a̍ sāa̍, a̍ chūīŋnda̍, o̍ be̍le̍-ŋu̍ɛ̍ɛ̍nu̍ o̍ be̍le̍-ŋu̍ɛ̍ɛ̍nu̍ cho̍o̍, lā nɔ̄ mī lā fāŋa̍ ō pīlɛ̍ mī ndu̍ wa̍ le̍ ya̍ Mɛ̄lɛ̄ka̍. Ā nya̍ chō ka̍ŋ fa̍ŋā lēchōo̍ wa̍ ki̍nɛ̍i̍, lā nɔ̄ mī ke᷄ Līva̍īya̍, a̍ cho̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ o̍ cho̍ a̍ nya̍ lātūlu̍ wo̍ māndāa̍ wa̍.”

³¹ O̍ ko̍ŋ kɔ̍ɔ̍lī, mi̍ Mūu̍sē nda̍ Ɛ̄li̍a̍a̍sā wānā so̍līāā lāsa̍lāa̍, ā tōsā mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l nda̍ yɛ̍, ma̍ chɔ̄m nyɛ̄m mu᷅ŋ bōllē pīlɛ̍.

³² Nyɛ̄m so̍vɛ̄i̍ya̍ ā kɔ̍ pu̍ŋgā o̍ chɔ̄ūwo̍ ma̍ hūŋ a̍ mu̍ŋ ndo̍ŋ, lātūlu̍ a̍ ŋ̄ nda̍ kɛ̄sɛ̍ le̍ nda̍ pi̍la̍ wo̍ŋ mu̍ŋ wa̍ mu᷅ŋ bōllē pīlɛ̍ ni̍. Sāa̍ a̍ chūīŋnda̍ ā wa̍ wāa̍la̍ŋ kɛ̄mɔ̄ɔ̍ lē ŋɔ᷄mpu᷅m a̍ be̍le̍-ŋɔ̍mmɛ̍ū a̍ lā ŋūɛ̍ɛ̍nu̍ (675,000),

³³ a̍ nāūwa̍ wāa̍la̍ŋ be̍le̍-ŋɔ̍mmɛ̍ū a̍ lā tīɔ̍ɔ̍ŋ (72,000),

³⁴ a̍ sōfɛ̍li̍a̍a̍ wāa̍la̍ŋ be̍le̍-ŋɔ̍mpu᷅m a̍ ō pīlɛ̍ (61,000),

³⁵ a̍ chūāāmbūāā lāāndūa̍a̍ ā nda̍ a̍a̍ si̍nā wɔ̍ sūɛ̍i̍ wānā pɔ̍nɔ̍ le̍ wa̍, wāa̍la̍ŋ be̍le̍-ya̍a̍ a̍ lā tīɔ̍ɔ̍ŋ (32,000).

³⁶ Mɛ̄ɛ̍ nda̍ pīɔ̍u̍ chɔ̄lūa̍a̍ ha̍ā a̍ wāŋndā chīe̍e̍ya̍ ha̍ā ku̍ndāla̍ŋ lā tīɔ̍ɔ̍ŋ, ku̍ndā so̍vɛ̄i̍ya̍ ō sɔ̄la̍ wo̍ ndu̍ wa̍ ho̍ō ni̍. Sāa̍ a̍ chūīŋnda̍ ā wa̍ fa̍ū fa̍ū wāa̍la̍ŋ kɛ̄mɔ̄ɔ̍ lē yāa̍ a̍ be̍le̍-ya̍a̍ a̍ lā ŋɔ᷄mmɛ̍ū a̍ kɛ̄mɔ̄ɔ̍ lē ŋūɛ̍ɛ̍nu̍ (337,500).

³⁷ O̍ sāā ka̍ŋ tɛ̄ɛ̄ŋ a̍ chūīŋāā kāŋ, ma̍ fāŋā kɛ̄mɔ̄ɔ̍ lē ŋɔ᷄mpu᷅m a̍ be̍le̍-ŋɔ̍mmɛ̍ū a̍ ā ŋūɛ̍ɛ̍nu̍ (675) mi̍ nda̍ wā le̍ Mɛ̄lɛ̄ka̍ Ya̍a̍wɛ̄ɛ̄.

³⁸ O̍ ko̍ŋ kɔ̍ɔ̍lī, nāūwāā nda̍ sɔ̄la̍ o̍ ku̍ndā ndāa̍ chōo̍ wa̍ ā wa̍ fa̍ū fa̍ū wāa̍la̍ŋ be̍le̍-ya̍a̍ a̍ lā ŋɔ᷄mpu᷅m (36,000). O̍ nāūwāā kāŋ tɛ̄ɛ̄ŋ ma̍ fāŋā nāūwa̍ be̍le̍-ŋɔ̍mmɛ̍ū a̍ ā ŋīɔ̍ɔ̍ŋ mi̍ nda̍ wā le̍ Mɛ̄lɛ̄ka̍ Ya̍a̍wɛ̄ɛ̄.

³⁹ Sōfɛ̍li̍a̍a̍ nda̍ sɔ̄la̍ o̍ ku̍ndā ndāa̍ chōo̍ wa̍, ā wa̍ kpo̍u̍ kpo̍u̍ wāa̍la̍ŋ be̍le̍-ya̍a̍ a̍ kɛ̄mɔ̄ɔ̍ lē ŋūɛ̍ɛ̍nu̍ (30,500). O̍ sōfɛ̍li̍a̍a̍ ka̍ŋ tɛ̄ɛ̄ŋ, ma̍ fāŋā be̍le̍-ŋɔ̍mpu᷅m a̍ ō pīlɛ̍, mi̍ nda̍ wā le̍ Mɛ̄lɛ̄ka̍ Ya̍a̍wɛ̄ɛ̄.

⁴⁰ O̍ ko̍ŋ kɔ̍ɔ̍lī, ma̍ sɔ̄lā chūāā lāāndūa̍a̍, ā nda̍ a̍a̍ si̍nā wɔ̍ sūɛ̍i̍ wānā pɔ̍nɔ̍ le̍ wa̍ wāa̍la̍ŋ tɔ̍ a̍ lā ŋɔ᷄mpu᷅m (16,000). O̍ chūāā lāāndūāā nda̍ sɔ̄la̍ ka̍ŋ nda̍ tɛ̄ɛ̄ŋ ma̍ fāŋā be̍le̍-ya̍a̍ a̍ ā ŋīɔ̍ɔ̍ŋ mi̍ nda̍ wā le̍ Mɛ̄lɛ̄ka̍ Ya̍a̍wɛ̄ɛ̄.

⁴¹ Chɔ̄lūāā nda̍ fāāŋīāā ka̍ŋ le̍cho̍ō o̍ ku̍nda̍ ndāa̍ chōo̍ wa̍ ki̍nɛ̍i̍, a̍ chūāā lāāndūāā nda̍ fāŋa̍ ka̍ŋ le̍cho̍ō wa̍, mi̍ Mūu̍sē ke᷅ Ɛ̄li̍a̍a̍sā mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l ndu̍ yɛ̍, mi̍ nda̍ wā le̍ Mɛ̄lɛ̄ka̍ māā kē.

⁴² O̍ ko̍ŋ kɔ̍ɔ̍lī, mi̍ wāŋnda̍ I̍sɔ̄lūɛ̄ī bɛ̍ɛ̍ nda̍ sɔ̄lā ku̍ndāa̍ o̍ ndāa̍ mɛ̄ɛ̍ so̍vɛ̄i̍ya̍a̍ ku̍ɛ̄ o̍ chɔ̄ūwo̍ wa̍ ā sɔ̄la̍ ku̍ndāa̍ o̍ ndāa̍ yɛ̍.

⁴³ Ku̍ndā wāŋnda̍ I̍sɔ̄lūɛ̄ī a̍ sɔ̍la̍ wo̍ ndu̍ wa̍ ho̍ō ni̍. Sāa̍ a̍ chūīŋnda̍ ā wa̍ fa̍ū fa̍ū wāa̍la̍ŋ kɛ̄mɔ̄ɔ̍ lē yāa̍ a̍ be̍le̍-ya̍a̍ a̍ lā ŋɔ᷄mmɛ̍ū, a̍ kɛ̄mɔ̄ɔ̍ lē ŋūɛ̍ɛ̍nu̍ (337,500).

⁴⁴ O̍ ko̍ŋ kɔ̍ɔ̍lī, nāūwāā nda̍ sɔ̄la̍ o̍ ku̍ndā ndāa̍ chōo̍ wa̍ ā wa̍ fa̍ū fa̍ū wāa̍la̍ŋ be̍le̍-ya̍a̍, a̍ lā ŋɔ᷄mpu᷅m (36,000).

⁴⁵ Sōfɛ̍li̍a̍a̍ nda̍ sɔ̄la̍ o̍ ku̍ndā ndāa̍ chōo̍ wa̍, ā wa̍ fa̍ū fa̍ū wāa̍la̍ŋ be̍le̍-ya̍a̍ a̍ kɛ̄mɔ̄ɔ̍ lē ŋūɛ̍ɛ̍nu̍ (30,500).

⁴⁶ O̍ ko̍ŋ kɔ̍ɔ̍lī, ma̍ sɔ̄lā chūāā lāāndūa̍a̍, ā nda̍ a̍a̍ si̍nā wɔ̍ sūɛ̍i̍ wānā pɔ̍nɔ̍ le̍ wa̍ wāa̍la̍ŋ tɔ̍ a̍ lā ŋɔ᷄mpu᷅m (16,000).

⁴⁷ Ku̍ndā wāŋnda̍ I̍sɔ̄lūɛ̄ī a̍ sɔ̍la̍ ho̍ō wo̍, wāŋndā chīe̍e̍ya̍a̍ ni̍, nāūwāā nda̍ sɔ̄la̍ wa̍ ni̍, sōfɛ̍li̍a̍a̍ ni̍, a̍ sāa̍, a̍ chūīŋnda̍, o̍ be̍le̍-ŋu̍ɛ̍ɛ̍nu̍ o̍ be̍le̍-ŋu̍ɛ̍ɛ̍nu̍ cho̍o̍, mi̍ Mūu̍sē o̍ fa̍ŋā ō pīlɛ̍ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l ndu̍ yɛ̍, mbo̍ kē Līva̍īya̍, a̍ wa̍ tɛ̍ndīi̍ Mɛ̄lɛ̄ka̍ Ya̍a̍wɛ̄ɛ̄ wo̍ māndāa̍ wa̍.

⁴⁸ O̍ ko̍ŋ kɔ̍ɔ̍lī, wānāa̍ wa̍ ku̍ndālā yɛ̍ yɛ̍la̍ so̍vɛ̄i̍ya̍ ha̍ā bōlle̍ wa̍, nda̍ yɔ̍nūŋ māā a̍ wa̍ wāa̍la̍ŋ a̍ kɛ̄mɛ̄la̍ŋ bōlle̍ wa̍ ā kūā nāa̍ Mūu̍sē chu̍a̍.

⁴⁹ Ma̍ lō o̍ ko̍ŋ ma̍ dīmūl Mūu̍sē āā, “Fāllo̍, ŋ̄ chɔ᷄m so̍vɛ̄i̍ya̍a̍ nāa̍ na̍a̍ kūɛ̄ o̍ chɔ̄ūwo̍ wa̍ kpo̍u̍ bo̍llē pīlɛ̍, mi̍ sāālu᷄ŋ māā wānā pi᷅lɛ̍ bɛ̍ɛ̍ o̍ fe̍ŋa̍ŋ nda̍ chōo̍ le̍.

⁵⁰ Le̍la̍ŋ nyɛ̄m ŋ̄ko̍o̍līi̍ŋ na̍a̍ ŋ̄ pūŋga̍ o̍ chɔ̄ūwo̍ mi̍ ŋ̄ hūŋ a̍ mu̍ŋ ndo̍ŋ, mu̍ŋ yɔ̍nūŋ ni̍ māā kēla᷄ŋ lāchōŋgo̍ŋ, a̍ kēla᷄ŋ lābāa̍ŋ, a̍ kēla᷄ŋ ŋ̄sōo̍ŋ, a̍ kēla᷄ŋ lānīo̍ŋ, ndu̍yɛ̍ a̍ yɔ̄lɔ᷄ŋ, ŋ̄ chō mu̍ŋ yɔ̍ŋgū o̍ Mɛ̄lɛ̄ka̍ Ya̍a̍wɛ̄ɛ̄ lo̍ māā kē, le̍ mɛ̄ɛ̍ o̍ ma̍nda̍ yōōmūlā nāāla̍ŋ yɛ̍.”

⁵¹ O̍ ko̍ŋ, nyɛ̄ o̍ nyɛ̄ ŋ̄ko̍o̍līi̍ wāŋnda̍ ha̍ā ā yɔ̄ŋgu̍, ŋ̄kēlā ni̍, ŋ̄yɔ̄lɔ̄ ni̍, a̍ nyɛ̄m yīīna᷄ŋ che᷅le̍ŋ ndo̍ŋ, mi̍ Mūu̍sē nda̍ Ɛ̄li̍a̍a̍sā wānā so̍līāā lāsa̍lāa̍ ā bīī mu̍ŋ.

⁵² Nyɛ̄m ŋ̄ko̍o̍līi̍ bōlīī so̍vɛ̄i̍ya̍ ha̍ā ā yɔ̄ŋgu̍ ki̍nɛ̍i̍ yo̍ŋ, mu᷅ŋ hi̍o̍ū lūsu̍llo̍ pa᷅ŋnda̍ŋ kɛ̄mɔ̄ɔ̍ lē hīɔ̍ɔ̍lu̍.

⁵³ Ndu̍yɛ̍ pūa̍a̍ chɔ̄ūwāa̍ wa̍ sɔ̍ŋgɔ̄ɔ̍ wa̍ ki̍nɛ̍i̍, a̍ ve̍ ŋ̍wa᷅ŋ bɛ̄ndū le̍ wa̍, nyɛ̄m nda̍ pūŋga̍ wo̍ŋ mi̍ wānā o̍ wānā o̍ kɛ̍sī nyɔ̄ɔ̍ŋ ŋ̍ ndɔ̄ɔ̍ŋ.

⁵⁴ So̍vɛ̄i̍ya̍a̍ wa̍ wāa̍la̍ŋ a̍ kɛ̄mɛ̄la̍ŋ bōlle̍ wa̍ ki̍nɛ̍i̍, nyɛ̄m ŋ̄ko̍o̍līi̍ŋ nda̍ yɔ̄ŋgu̍ mu̍ŋ ndo̍ŋ ki̍nɛ̍i̍, mi̍ Mūu̍sē nda̍ Ɛ̄li̍a̍a̍sā wānā so̍līāā lāsa̍lāa̍ ā bīī mu̍ŋ, ma̍ lūēī mu̍ŋ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nda̍ la̍tu̍lu̍ wo̍ ni᷄ŋ, ma̍ kɔ̍ kɛ̍sī mu̍ŋ Mɛ̄lɛ̄ka̍ lāchī lo̍ŋ, le̍ mī ŋ̄ wa̍ lo̍ŋ māā nyɛ̄ lōōna᷄ŋ.