Nɔ̍mbāā 30 - Yāu̍ Mɛ̄lɛ̄ka̍a̍

Sāwāla̍ŋ a̍ būŋga᷄ŋ chūa̍a̍ o̍ Mɛ̄lɛ̄ka̍ lo̍ o̍kɔ̄ɔ̄

¹ O̍ ko̍ŋ kɔ̍ɔ̍lī, mi̍ Mūu̍sē o̍ di̍mūl wānāa̍ wa̍ yu̍ŋgu̍la̍ I̍sɔ̄lūɛ̍i̍ chīla̍ŋ nda̍ āā, “Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ wo̍ cho̍ ho̍ō ni̍. Ō dīmi̍ āā,

² ‘Wānā o̍ wānā tē a̍ chu̍a̍ būŋgɛ̄i̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ pɛ̍ le̍ īsɔ̄ɔ̍ o̍ īsɔ̄ɔ̍ to̍sā, kɛ̄lɛ̄ŋgāā mā chu̍a̍ būŋgɛ̄ī kālā kāla̍ mā me̍na̍ŋ o̍ ya̍ Mɛ̍lɛ̄ka̍ lo̍ le̍ nyɛ̄ yɔ̄ŋgū pɛ̍, a̍ nɔ̍ mā tɛ̍ɛ̍mbu̍u̍ būŋgɛ̄ī kēŋ te̍, ā nɔ̄ mā lo̍ o̍ dīōmndē nūmnde̍ŋ chōo̍ mā to̍sa̍ nyɛ̄ ŋ̄ chūa̍ būŋgɛ̄i̍ yo̍.

³ “ ‘Mī ī yɔ̄nu̍ŋ dɔ̍ɔ̍ mī chūāāmbɔ̄ lāāndōo̍ o̍ cho̍ wɔ̄ o̍ fi̍nyā ndɔ̄ lo̍ chi̍ɛ̍ī ni̍ŋ ndo̍ ō chūa̍ būŋgɛ̄i̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ le̍ īsɔ̄ɔ̍ to̍sā, kɛ̄lɛ̄ŋgāā mbō mēna̍ŋ o̍ ya̍ Mɛ̄lɛ̄ka̍ lo̍ le̍ nyɛ̄ yɔ̄ŋgū.

⁴ Tē ō wa̍ pɛ̍ mī chūāāmbɔ̄ lāāndū kōŋ fi̍nyā ndɔ̄ o̍ tu̍e̍ī a̍ būŋgɛ̄ī chūā ndɔ̄ɔ̍ ō chūa̍ ve̍ o̍kɔ̄ɔ̄, kɛ̍ mbō kūūna̍ chu̍a̍ ndɔ̄ɔ̍ le̍ pɛ̍, būŋgɛ̄ī chūā ndɔ̄ɔ̍ ō chu̍a̍ ke̍ŋ nde̍, chūā ndɔ̄ ko̍ŋ ō nɔ̄ mbō pēēlu̍ ndi̍.

⁵ Kɛ̍ tē chūāāmbɔ̄ lāāndū kōŋ fi̍nyā ndɔ̄ o̍ tu̍e̍ī ndu̍ būŋgɛ̄i̍ chūa̍a̍ pɛ̍ mbō kūūna̍ ndu̍, mɛ̄ɛ̍ būŋgɛ̄ī kēŋ ī cho̍ ndu̍ kūēē le̍. Ya̍ Mɛ̍lɛ̄ka̍ Ya̍a̍wɛ̄ɛ̄ nɔ̍lā mī ma̍l ndu̍ le̍ nyɛ̄ o̍ to̍sa̍ ko̍ŋ ndo̍, fo̍ndōle̍, le̍ mɛ̄ɛ̍ fi̍nyā ndɔ̄ o̍ ku̍u̍na̍ ndu̍ yɛ̍.

⁶ “ ‘Mī ī yɔ̄nu̍ŋ dɔ̍ɔ̍ mī wānā la̍nɔ̍ɔ̍ ho̍ō ō chūa̍ būŋgɛ̄i̍, ɔ̄ɔ̄ mbō lo̍ sūɛ̍i̍ mbō chūa̍ būŋgɛ̄ī o̍ ve̍ kɔ̍l le̍ chūā le̍ ve̍, kɛ̍ mbō hu᷄ŋ cha᷅l ni᷅ŋ o̍ nɔ̄ɔ̍.

⁷ Mī pɔ̍nɔ̍ ndɔ̄ ko̍ŋ ō tūēī a̍ būŋgɛ̄i̍ he̍ī o̍kɔ̄ɔ̄, kɛ̍ mbō kūūna̍ ndu̍ le̍, mɛ̄ɛ̍ chūā kōŋ ō nɔ̄ mbō wa̍ o̍ būŋgɛ̄ī kēŋ bɛ̄ŋgu̍, mɛ̄ɛ̍ mbō pēēlu̍ ndi̍.

⁸ Kɛ̍ tē pɔ̍nɔ̍ ndɔ̄ o̍ tu̍e̍ī a̍ ndi̍ o̍kɔ̄ɔ̄ pɛ̍, mbō kūūna̍ ndu̍, mɛ̄ɛ̍ būŋgɛ̄ī kēŋ ī fāŋa̍ŋ ndu̍ kūēē. Ya̍ Mɛ̍lɛ̄ka̍ Ya̍a̍wɛ̄ɛ̄ nɔ̍lā mī ma̍l ndu̍ le̍ nyɛ̄ o̍ to̍sa̍ wo̍.

⁹ “ ‘Tē wānā la̍nɔ̍ pɔ̍nɔ̍ ndɔ̄ vi᷅ ō nɔ̍ lɛ̍ pɔ̍nɔ̍ le̍ wo̍, ɔ̄ɔ̄ wānā la̍nɔ̍ kɛ̍ɛ̍ ho̍ō nɔ̄ɔ̍ wo̍, ō chūa̍ ībūŋgā o̍ ībūŋgā le̍ īsɔ̄ɔ̍ o̍ īsɔ̄ɔ̍ to̍sā pɛ̍, wānā la̍nɔ̍ ko̍ŋ ō nɔ̄ mbō pēēlu̍ būŋgɛ̄ī kēŋ.

¹⁰ “ ‘Mī ī yɔ̄nu̍ŋ dɔ̍ɔ̍ mī wānā la̍nɔ̍ cho̍ o̍ nɔ̄ɔ̍ wo̍ ō chūa̍ būŋgɛ̄i̍ o̍ ya̍ Mɛ̍lɛ̄ka̍ lo̍, ɔ̄ɔ̄ mbō chūa̍ būŋgɛ̄i̍ le̍ nyɛ̄ yɔ̄ŋgū, mbō mēna̍ŋ o̍ ya̍ Mɛ̍lɛ̄ka̍ lo̍.

¹¹ Mī pɔ̍nɔ̍ ndɔ̄ o̍ tu̍e̍ī a̍ būŋgɛ̄i̍ he̍ī o̍kɔ̄ɔ̄ kɛ̍ mbō kūūna̍ ndu̍ le̍, mɛ̄ɛ̍ chūā kōŋ ō nɔ̄ mbō wa̍ o̍ būŋgɛ̄ī kēŋ bɛ̄ŋgu̍, mɛ̄ɛ̍ mbō pēēlu̍ ndi̍.

¹² Kɛ̍ tē pɔ̍nɔ̍ ndɔ̄ o̍ tu̍e̍ī a̍ ndi̍ o̍kɔ̄ɔ̄ pɛ̍, mbō kūūna̍ ndu̍, mɛ̄ɛ̍ būŋgɛ̄ī kēŋ ī fāŋa̍ŋ ndu̍ kūēē. Ya̍ Mɛ̍lɛ̄ka̍ Ya̍a̍wɛ̄ɛ̄ nɔ̍lā mī ma̍l ndu̍ le̍ nyɛ̄ o̍ to̍sa̍ ko̍ŋ ndo̍, fo̍ndōle̍, le̍ mɛ̄ɛ̍ pɔ̍nɔ̍ ndɔ̄ o̍ ku̍u̍na̍ ndu̍ yɛ̍.

¹³ Chūā kōŋ pɔ̍nɔ̍ ndɔ̄ o̍ nɔ̍ di̍ mbō tɛ̄ɛ̄mbu̍u̍ būŋgɛ̄ī kēŋ, ndu̍yɛ̍ ō nɔ̄ di̍ mbō tōsa̍ mī būŋgɛ̄ī kēŋ ī pēēlu̍ŋ.

¹⁴ Kɛ̍ tē pɔ̍nɔ̍ ndɔ̄ o̍ tu̍e̍ī a̍ būŋgɛ̄ī la̍a̍ndɔ̄ o̍ chu̍a̍ ke̍ŋ nde̍ o̍kɔ̄ɔ̄ pɛ̍, mbō nīīlu̍ pāa̍le̍ le̍ŋ kpɛ᷅ŋ mbō kūūna̍ la̍a̍ndɔ̍ le̍, mɛ̄ɛ̍ chūā kōŋ pɔ̍nɔ̍ ndɔ̄ o̍ chi̍i̍ chɛ̄lɔ̄ɔ̄ a̍ būŋgɛ̄ī kēŋ o̍kɔ̄ɔ̄, fo̍ndōle̍, ō tūēī a̍ ndi̍ o̍kɔ̄ɔ̄ ō kūūna̍ ndu̍ le̍. Chūā kōŋ ō nɔ̄ mbō pēēlu̍ būŋgɛ̄ī kēŋ.

¹⁵ Tē pɔ̍nɔ̍ ndɔ̄ o̍ tu̍e̍ī a̍ būŋgɛ̄ī kēŋ o̍kɔ̄ɔ̄ pɛ̍, mbō lo̍ chūmndo̍ ha̍a̍a̍ mī pāa̍le̍ le̍ŋ lē hīōū ma̍lāŋ o̍ ku̍u̍nā la̍a̍ndɔ̍ pɛ̍, mɛ̄ɛ̍ pɔ̍nɔ̍ ndɔ̄ ndu̍ tɔ̍ɔ̍ya̍ŋ būŋgɛ̄ī kēŋ ō wā cho̍o̍ ni̍.’ ”

¹⁶ Sāwāla̍ Mɛ̄lɛ̄ka̍ Ya̍a̍wɛ̄ɛ̄ o̍ dɔ̍ū a̍ būŋgāŋ chūa̍a̍ŋ o̍kɔ̄ɔ̄ la̍ŋ, la̍ŋ cho̍ la̍ŋ ni̍. Pɔ̍nɔ̍ɔ̍ a̍ la̍nɔ̍ɔ̍ tɛ̄ɛ̄ŋ ni̍, a̍ fi̍nyāa̍ nda̍ chūā ndɔ̄ la̍a̍ndōo̍ tɛ̄ɛ̄ŋ, o̍ cho̍ wɔ̄ fi̍nyā ndɔ̄ o̍ bā bɛ̄ŋgu̍ wo̍, sāwāla̍ŋ nda᷅ŋ la̍ŋ la̍ cho̍ a̍ būŋgāŋ nda̍ chūā wo̍ŋ o̍kɔ̄ɔ̄ ni̍.