Nɔ̍mbāā 3 - Yāu̍ Mɛ̄lɛ̄ka̍a̍

A̍ pūa̍a̍ E̍lɔ̄ŋnda̍ o̍kɔ̄ɔ̄

¹ Bōōndi̍i̍ Mɛ̄lɛ̄ka̍ Ya̍a̍wɛ̄ɛ̄ o̍ so̍ō nāa̍ Mūu̍sē chu̍a̍ nda̍ E̍lɔ̄ŋ o̍ Pēmbīī Sa̍a̍nāīve̍ chōo̍ ve̍, wānāa̍ wa̍ wɔ̄ a̍ te̍le̍ŋ ko̍ŋ mi̍ nda̍ a̍a̍ fu̍lā o̍ pūlāle̍ E̍lɔ̄ŋ nda̍ Mūu̍sē le̍ŋ chōo̍ wa̍ nda̍ wa̍ ha̍ā ni̍.

² E̍lɔ̄ŋ po̍ ndɔ̍ tāso̍o̍ ndu̍ wa̍ Na̍da̍bī ni̍. O̍ ko̍ŋ kɔ̍ɔ̍lī, pūa̍a̍ ndūa̍a̍ ā pīli̍a̍a̍ wa̍ Ābi̍hū, a̍ Ɛ̄li̍a̍a̍sā, a̍ I̍ta̍māā ni̍.

³ E̍lɔ̄ŋ pūa̍a̍ ndūa̍a̍ ha̍ā nda̍ nda̍ sūu̍ chūɛ̄īya̍ŋ ni̍ ndu̍yɛ̍ ma̍ sīīŋgūū nda̍ wānāā sōlīāā lāsa̍lāa̍.

⁴ Kɛ̍ Na̍da̍bī ni̍ a̍ Ābi̍hū mi̍ Mɛ̄lɛ̄ka̍ Ya̍a̍wɛ̄ɛ̍ o̍ di̍ī nda̍, fo̍ndōle̍ le̍ mɛ̄ɛ̍ nda̍ sōli̍ sa̍lāa̍ o̍ Mɛ̄lɛ̄ka̍ lo̍ a̍ te̍le̍ŋ nda̍ a̍a̍ nɔ̍ le̍ sa̍lā kōŋ sōlī le̍ wo̍, o̍ po̍llo̍ ni᷄ŋ Sa̍a̍nāī yɛ̍. Ndu̍yɛ̍ nda̍ ŋi̍ɔ̍ɔ̍ŋ kpo̍u̍ ā mɛ̄i̍ chu̍a̍u̍wāā ŋ̄wāŋ pīāāndū le̍. Le̍ he̍ī, mi̍ Ɛ̄li̍a̍a̍sā nda̍ I̍ta̍māā a̍ hi̍a̍ū lāchī a̍ sa̍lāla̍ŋ sōlīo̍o̍ o̍ Mɛ̄lɛ̄ka̍ lo̍ nda̍ E̍lɔ̄ŋ fi̍nyā ndā wa̍ā lātūlu̍, ha̍a̍a̍ a̍ bōōndi̍i̍ fi̍nyā ndā wa̍ yōōmū ve̍.

Ā hɛ̄li̍ yu̍ŋgu̍ Li̍va̍īyo̍ le̍ wānāā sōlīāā lāsa̍lāa̍ mālāa̍

⁵ Mī Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā,

⁶ “Di̍mu̍l yu̍ŋgu̍ Li̍va̍īyo̍ mā hīŋ mā hu̍ŋ yɔ̍ŋgū nda̍ o̍ E̍lɔ̄ŋ, wānā so̍līāā lāsa̍lāa̍ lo̍, le̍ mā wa̍ wānāā ndūāā ma̍lāā.

⁷ Nda̍ nɔ̍ ni̍ mā tōsa̍ wa̍llo̍ o̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍ ni᷄ŋ, le̍ wānāā sōlīāā lāsa̍lāa̍ a̍ I̍sɔ̄lūɛ̍i̍ya̍ kpo̍u̍ ni̍.

⁸ O̍ ko̍ŋ kɔ̍ɔ̍lī, nyɛ̄m lāāndu᷄ŋ cho̍ o̍ tɛ̍ndīi̍ ko̍ŋ ni᷄ŋ ndo̍ŋ kpo̍u̍, nda̍ nɔ̍ ni̍ mā wa̍ mu̍ŋ hɔ̄lte̍ŋ. Ndu̍yɛ̍ nyɛ̄ o̍ nyɛ̍ cho̍ I̍sɔ̄lūɛ̍i̍ya̍ kūēē le̍ tōsāa̍ o̍ tɛ̍ndīi̍ ko̍ŋ ni᷄ŋ, nda̍ nɔ̍ ni̍ mā tōsa̍ ndu̍ kpo̍u̍.

⁹ Ā nɔ̄ mā hɛ̍li̍ yu̍ŋgu̍ Li̍va̍īyo̍ I̍sɔ̄lūɛ̍i̍ya̍ tɛ̄ɛ̄ŋ kpo̍u̍, mā yɔ̍ŋgu̍ ndu̍ o̍ E̍lɔ̄ŋ ndo̍ nda̍ pūa̍a̍ ndūa̍a̍ mā wa̍ ā yɔ̄ŋga᷄ŋ o̍ nda̍lo̍ te̍ŋge̍le̍ŋ le̍ nda̍ wa̍lta̍ŋ wāa̍ tōsāllo̍.

¹⁰ Hɛ̍li̍ E̍lɔ̄ŋ a̍ pūa̍a̍ ndūa̍a̍, mā wa̍ wānāā sōlīāā lāsāa̍. Wa̍li̍ o̍ wa̍li̍ cho̍ wa̍li̍ so̍līāā lāsa̍lā, nda̍ nɔ̍ ni̍ mā wa̍ ndu̍ to̍sāa̍. Ō fūla̍ o̍ pūlāle̍ E̍lɔ̄ŋnde̍ŋ kɔ̄ɔ̄lī, wānā o̍ wānā che᷅le̍ŋ te̍ ō sɔ̍ɔ̍ŋgu̍u̍ o̍ fo̍ndā nī di̍a̍ndāa̍ īkɛ̄i̍ pɛ̍, wānā ko̍ŋ ō nɔ̄ mbō sɔ̄la̍ pīɔ̍mndo̍.”

¹¹ Mi̍ Mɛ̄lɛ̄ka̍ Ya̍a̍wɛ̄ɛ̄ o̍ hi̍a̍ū lāchī a̍ sūɛ̍i̍ nāa̍ Mūu̍sē chu̍a̍ mbo̍ di̍mūl ndu̍ āā,

¹² “I̍sɔ̄lūɛ̍i̍ya̍ tɛ̄ɛ̄ŋ ki̍nɛ̍i̍, yu̍ŋgu̍ Li̍va̍īyo̍ ndu̍ ya̍ I̍ hɛ̍li̍ ni̍ le̍ mbō wa̍ nyɛ̍ ni̍. Yu̍ŋgu̍ ko̍ŋ ndu̍ nɔ̄ mbō wa̍ le̍ ya̍. Ndu̍ ya̍ I̍ chu̍a̍ ni̍ māā sɔ̍ŋgɔ̍ le̍ po̍ tāse̍ o̍ po̍ tāse̍ ve̍lu᷄ŋ I̍sɔ̄lūɛ̄ī pɛ̍.

¹³ Kāni̍ fo̍ndōle̍, po̍ tāse̍ o̍ po̍ tāse̍ ve̍lu᷄ŋ I̍sɔ̄lūɛ̄ī, le̍ ya̍ Mɛ̍lɛ̄ka̍ o̍ cho̍ ni̍. Bōōndi̍i̍ ya̍ Mɛ̍lɛ̄ka̍ dīu̍ chūāūwāā pīāāndūāā tāsi̍a̍a̍ I̍chi̍pīa̍a̍ a̍ chɔ̄lūāā pīāāndūāā tāsi̍a̍a̍ chɔ̄lūāā ndāa̍ ā kōm nda̍ ve̍, bōōndi̍i̍ ke̍ŋ ya̍ I̍ hɛ̍li̍ chūāūwāā pīāāndūāā tāsi̍a̍a̍ I̍sɔ̄lūɛ̄ī ni̍, a̍ chɔ̄lūāā pīāāndūāā tāsi̍a̍a̍ chɔ̄lūāā ndāa̍ kōm nda̍ le̍ ma̍ wa̍ le̍ ya̍. Kɛ̍ I̍ cho̍ ni̍ko̍ yu̍ŋgu̍ Li̍va̍īyo̍ chūā sɔ̍ŋgɔ̍ ko̍ŋ mbō wa̍ le̍ ya̍. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.”

A̍ mɛ̄ɛ̍ nda̍ chɔ᷄m Līva̍īya̍ bōllē pīlɛ̍ yɛ̍ o̍kɔ̄ɔ̄

¹⁴ O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē nāa̍ I̍sɔ̄lūɛ̍i̍ya̍ wa̍ o̍ po̍llo̍ ni᷄ŋ Sa̍a̍nāī wa̍ āā,

¹⁵ “Po̍o̍nyi̍a̍a̍ wa̍nāa̍ fu̍la̍ o̍ yu̍ŋgu̍ Li̍va̍īyo̍ chōo̍ wa̍ dīōla̍ŋ kpo̍u̍ le̍ sīnāa̍ mɛ̄ɛ̍ nda̍ chō bōllē pīlɛ̍ yɛ̍, pōōnyīa̍a̍ nda̍ dīōla̍ŋ a̍ chīɛ̄īla̍ŋ ndu̍yɛ̍, a̍ ku̍ndālā nda̍ fūla̍ chōo̍ la̍ŋ. Wānā pɔ̍nɔ̍ o̍ wānā pɔ̍nɔ̍ fu̍la̍ o̍ yu̍ŋgu̍ ko̍ŋ chōo̍ mbo̍ wā chɔ̍ŋ pa̍ŋge̍i̍ ī pīlɛ̍ ɔ̄ɔ̄ hīōūwɔ̄ɔ̍ o̍ ko̍ŋ cho̍o̍, po̍o̍nyi̍a̍a̍ nda̍ dīōla̍ŋ kpo̍u̍.”

¹⁶ O̍ ko̍ŋ, mi̍ Mūu̍sē o̍ to̍sā mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l ndu̍ yɛ̍, mbo̍ pōōnyīāā wānāā fu̍la̍ o̍ yu̍ŋgu̍ Li̍va̍īyo̍ chōo̍ wa̍ dīōla̍ŋ kpo̍u̍.

¹⁷ Li̍va̍ī ndu̍ o̍o̍ nɔ̍ pūa̍a̍ ā yāa̍. Dīōlā ndāla̍ŋ la̍ŋ la̍ cho̍ la᷅ŋ ni̍. Kɛ̍ɛ̍sīɔ̄m, a̍ Ko̍ha̍tī, a̍ Mɛ̍lu̍a̍lī.

¹⁸ Wānāa̍ fu̍la̍ o̍ pūlāle̍ Kɛ̍ɛ̍sīɔ̄m nde̍ŋ chōo̍ ma̍ sīmnu᷄ŋ bo̍līī lāyu̍ŋgu̍e̍i̍ ya̍ nda̍ wa̍ ha̍ā ni̍. Li̍bi̍nī, a̍ Si̍mɛ̄ī.

¹⁹ Wānāa̍ fu̍la̍ o̍ pūlāle̍ Ko̍ha̍tīle̍ŋ chōo̍ ma̍ sīmnu᷄ŋ bo̍līī lāyu̍ŋgu̍e̍i̍ ya̍ nda̍ cho̍ ha̍ā ni̍. A̍mi̍lūām, a̍ I̍si̍hāā, a̍ Hi̍būlɔ̄ŋ, a̍ U̍sɛ̄ɛ̄l.

²⁰ Wānāa̍ fu̍la̍ o̍ pūlāle̍ Mɛ̍lu̍a̍lī le̍ŋ chōo̍ ma̍ sīmnu᷄ŋ bo̍līī lāyu̍ŋgu̍e̍i̍ ya̍ nda̍ cho̍ ha̍ā ni̍. Ma̍a̍lī, a̍ Mu̍sī. Wāŋnda̍ ha̍ā nda̍ si̍mnu᷄ŋ bo̍līī lāyu̍ŋgu̍e̍i̍ le̍ yu̍ŋgu̍la̍ yɛ̍ yɛ̍la̍ fu̍la̍ o̍ pūlāle̍ Li̍va̍īle̍ŋ chōo̍ la̍ŋ ni̍.

²¹ Yu̍ŋgu̍la̍ fu̍la̍ o̍ pūlāle̍ Kɛ̍ɛ̍sīɔ̄m nde̍ŋ chōo̍ la̍ŋ, la̍ŋ la̍ cho̍ la̍ŋ ni̍. Yu̍ŋgu̍ Li̍bi̍nī wo̍ a̍ yu̍ŋgu̍ Si̍mɛ̄ī yo̍.

²² Wāŋ pīāāndūa̍a̍ fu̍la̍ o̍ yu̍ŋgu̍la̍ ti̍ɔ̍ɔ̍ŋ ndālāŋ la̍ŋ ma̍ wā chɔ̍ŋ pa̍ŋge̍i̍ ī pīlɛ̍ ha̍a̍a̍ kɔ̍ la̍chi̍ kɛ᷅ ma̍ chɔ̄m nda̍ wa̍, ā wa̍ fa̍ū fa̍ū wāa̍la̍ŋ lā ŋɔ᷄mmɛ̍ū, a̍ kɛ̄mɔ̄ɔ̍ lē ŋūɛ̍ɛ̍nu̍ (7,500).

²³ Yu̍ŋgu̍la̍ ti̍ɔ̍ɔ̍ŋnda̍ fu̍la̍ la᷅ŋ o̍ pūlāle̍ Kɛ̍ɛ̍sīɔ̄m nde̍ŋ chōo̍ la̍ŋ, la̍ŋ la̍a̍ nɔ̍ le̍ wāa̍ o̍ tɛ̍ndīi̍ Mɛ̄lɛ̄ka̍a̍ kɔ̄ɔ̄lī bā pāa̍le̍ŋ lē dēllo̍ ni̍.

²⁴ I̍līa̍a̍sa̍fī, po̍ La̍yɛ̄l wo̍ ndu̍ wa̍ māsāa̍ le̍ yu̍ŋgu̍la̍ ti̍ɔ̍ɔ̍ŋnda̍ŋ nda᷅ŋ ni̍.

²⁵ Yu̍ŋgu̍la̍ ti̍ɔ̍ɔ̍ŋnda̍ŋ nda᷅ŋ, nda̍ nda̍ a̍a̍ nɔ̍ le̍ tɛ̍ndīi̍ chɔ᷅m māā Mɛ̄lɛ̄ka̍ Ya̍a̍wɛ̄ɛ̄ cho̍ a̍ nya̍ lātūlu̍ wo̍ māndāa̍ ni̍, a̍ nyɛ̄ o̍ nyɛ̍ wa̍ o̍ tɛ̍ndīi̍ ko̍ŋ, chɔ̍ŋ a̍ kōlāla̍ nda̍ kūmbū tɛ̍ndīi̍yo̍ ho̍ō lēni᷄ŋ nda̍ŋ, mbo̍ kūā a̍ kōlāla̍ nda̍ kūmbū ndu̍ lēcho̍ō la̍ŋ, a̍ kōla̍ wa̍ ō lāndāā o̍ dīo̍o̍ wo̍,

²⁶ a̍ kōlāla̍ wa̍ la̍ū tɛ̍ndīi̍ ko̍ŋ lā bālāā la̍ŋ, a̍ ma̍āŋ wa̍ o̍ tɛ̍ndīi̍ ko̍ŋ ndo̍, o̍ ko̍ŋ kɔ̍ɔ̍lī a̍ kōla̍ wa̍ ō lāndāā o̍ dīo̍o̍ le̍ lūɛ̄īyɔ̄ɔ̍ o̍ la̍ū wa̍ tɛ̍ndīi̍yo̍ ō bālāā wo̍ wo̍. Wa̍li̍ o̍ wa̍li̍ wa̍ le̍ to̍sa᷄ŋndo̍ o̍ fo̍ndāŋ nda̍ŋ nda᷅ŋ, wāŋnda̍ ha̍ā nda̍ wa̍ wa̍lta̍ la̍ŋ chīla̍ŋ ni̍.

²⁷ O̍ ko̍ŋ kɔ̍ɔ̍lī, yu̍ŋgu̍la̍ fu̍la̍ o̍ pūlāle̍ Ko̍ha̍tī le̍ŋ chōo̍ la̍ŋ la̍ŋ la̍ cho̍ la᷅ŋ ni̍. Yu̍ŋgu̍ A̍mi̍lūām ndo̍, a̍ yu̍ŋgu̍ I̍si̍hāā wo̍, a̍ yu̍ŋgu̍ Hi̍būlɔ̄ŋ ndo̍, a̍ yu̍ŋgu̍ U̍sɛ̄ɛ̄l wo̍.

²⁸ Wāŋ pīāāndūa̍a̍ fu̍la̍ o̍ yu̍ŋgu̍la̍ŋ nda᷅ŋ chōo̍ ma̍ wā chɔ̍ŋ pa̍ŋge̍i̍ ī pīlɛ̍ ha̍a̍a̍ kɔ̍ la̍chi̍ kɛ᷅ ma̍ chɔ̄m nda̍ wa̍, ā wa̍ fa̍ū fa̍ū wāa̍la̍ŋ lā ŋɔ̄ma̍a̍, a̍ kɛ̄mɔ̄ɔ̍ lē ŋɔ᷄mpu᷅m (8,600). Yu̍ŋgu̍la̍ŋ nda᷅ŋ la̍ŋ la̍a̍ nɔ̍ le̍ nyɛ̄m dīānda᷄ŋ wa̍ o̍ tɛ̍ndīi̍ Mɛ̄lɛ̄ka̍a̍ wo̍ŋ māndāa̍ ni̍.

²⁹ O̍ tɛ̍ndīi̍yo̍ īkɛ̄i̍, bā tōūwo̍ lo̍ŋ yu̍ŋgu̍la̍ŋ nda᷅ŋ la̍ŋ la̍a̍ nɔ̍ ni̍ mī la̍a̍ wa̍.

³⁰ Ɛ̄līsa̍fāŋ, po̍ U̍sɛ̄ɛ̄l wo̍ ndu̍ wa̍ māsāa̍ le̍ yu̍ŋgu̍la̍ŋ ndāŋ ni̍.

³¹ Nyɛ̄m kāsi᷄ŋ wa̍ o̍ tɛ̍ndīi̍ Mɛ̄lɛ̄ka̍a̍ wo̍ŋ ki̍nɛ̍i̍, chɔ̍ŋ a̍ kɔ̍fu̍ si̍m le̍ kpe̍ma̍ Mɛ̄lɛ̄ka̍a̍ wo̍, mbo̍ kūā a̍ ti̍bīi̍yo̍, a̍ nyɛ̄lā kɛ̄sīāālā la̍mbūi̍la̍ wa̍ lo̍ŋ nda̍ŋ, a̍ ma̍āŋnda̍ŋ, a̍ nyɛ̄m lāāndu᷄ŋ wa̍ o̍ fo̍ndāŋ kāsi᷄ŋ mī wānāā sōlīāā lāsa̍lāa̍ nda̍ a̍a̍ so̍līŋ kpe̍ku̍ a̍ mu̍ŋ ndo̍ŋ, o̍ ko̍ŋ kɔ̍ɔ̍lī, a̍ kōla̍ wa̍ ō lāndāā o̍ fo̍ndā kāsi̍ hi̍o̍ū kpo̍u̍ wo̍ dīō wo̍, nyɔ̄ɔ̍ŋ mu᷅ŋ ki̍nɛ̍i̍ yu̍ŋgu̍la̍ŋ nda᷅ŋ la̍ wa̍ mu̍ŋ māndāa̍ ni̍. Nyɛ̄ o̍ nyɛ̍ wa̍ a̍ nyɔ̄ɔ̍ŋ mu᷅ŋ o̍kɔ̄ɔ̄, lātūlu̍ a̍ mu̍ŋ bɛ̄ɛ̄ndīa̍a̍, wāŋnda̍ ha̍ā wa̍li̍ ndāa̍ wa̍ ko̍ŋ ni̍.

³² Ɛ̄li̍a̍a̍sā, po̍ E̍lɔ̄ŋ wāna̍ so̍līāā lāsa̍lāa̍, ndu̍ wa̍ māsa̍ Līva̍īya̍ ni̍. O̍ ko̍ŋ kɔ̍ɔ̍lī, ndu̍ wa̍ vɛ̄lɛ̄ wānāā nda̍ a̍a̍ ma̍ndā fo̍ndā kāsīo̍o̍ wa̍ bōlle̍ŋ ni̍.

³³ O̍ ko̍ŋ kɔ̍ɔ̍lī, yu̍ŋgu̍la̍ fu̍la̍ o̍ pūlāle̍ Mɛ̍lu̍a̍lī le̍ŋ chōo̍ la̍ŋ, la̍ŋ la̍ cho̍ la᷅ŋ ni̍. Yu̍ŋgu̍ Ma̍a̍lī wo̍, a̍ yu̍ŋgu̍ Mu̍u̍sī wo̍.

³⁴ Wāŋ pīāāndūa̍a̍ fu̍la̍ o̍ yu̍ŋgu̍la̍ŋ nda᷅ŋ chōo̍ ma̍ wā chɔ̍ŋ pa̍ŋge̍i̍ ī pīlɛ̍ mbo̍ hīāū lāchī ma̍ chɔ̄m nda̍ wa̍, ā wa̍ fa̍ū fa̍ū wāa̍la̍ŋ lā ŋɔ᷄mpu᷅m, a̍ kɛ̄mɔ̄ɔ̍ lē dīi̍ŋ (6,200).

³⁵ Su̍lūɛ̄l, po̍ A̍bi̍hēē wo̍, ndu̍ wa̍ māsāa̍ le̍ yu̍ŋgu̍la̍ ti̍ɔ̍ɔ̍ŋnda̍ nda᷅ŋ ni̍. O̍ tɛ̍ndīi̍yo̍ īkɛ̄i̍ ba᷅ lūāŋndo̍ lo̍ŋ yu̍ŋgu̍la̍ŋ nda᷅ŋ la̍ŋ la̍a̍ nɔ̍ le̍ wāa̍ ni̍.

³⁶ Nda̍ nda̍ wōlɔ̄ɔ̄ o̍ wōlɔ̄ɔ̄ tāŋgūlāa̍ wa̍ o̍ tɛ̍ndīi̍yo̍ ho̍ō, chɔ̍ŋ a̍ da̍kpe̍ŋnda̍ŋ, mbo̍ kūā a̍ yɔ̄mīī vīlɛ̄i̍ sa̍a̍ da̍kpe̍ŋnda̍ la̍ŋ nde̍, a̍ yɔ̄mīī vīlɛ̄ī nda̍ sīmi̍ māā māsūŋgbu̍ ve̍, a̍ nyɛ̄la̍ wa̍ lā tōōsīāā le̍ sūŋgbu̍ma̍ ma̍ŋ a̍ da̍kpe̍ŋnda̍ la̍ŋ sīmīo̍o̍ lēni᷄ŋ nda̍ŋ, o̍ ko̍ŋ kɔ̍ɔ̍lī a̍ wōlɔ̄ɔ̄lā tɛ̍ndīi̍yo̍ ho̍ō lā pīlɛ̍ la̍ŋ, wāŋnda̍ ha̍ā nda̍ wa̍ la̍ŋ chīla̍ŋ ni̍. Nyɛ̄ o̍ nyɛ̍ wa̍ a̍ wōlɔ̄ɔ̄lā tāŋgūlāālā tɛ̍ndīi̍yo̍ ho̍ō o̍kɔ̄ɔ̄, lātūlu̍ a̍ la̍ŋ mīŋgīo̍o̍ bɛ̄ɛ̄ndīa̍a̍, wāŋnda̍ ha̍ā wa̍li̍ ndāa̍ wa̍ ko̍ŋ ni̍.

³⁷ O̍ ko̍ŋ kɔ̍ɔ̍lī, la̍u̍ wa̍ tɛ̍ndīi̍yo̍ ho̍ō ō bālāā wo̍, wōlɔ̄ɔ̄ o̍ wōlɔ̄ɔ̄ tāŋgūlāa̍ wa̍ o̍ la̍ū kōŋ bālɔ̄ɔ̍, le̍ kōla̍ ba̍lu̍ la̍ū kōŋ ndo̍ bāa̍, yɔ̄mīī nda̍ sīmi̍ māā māsūŋgbu̍ ve̍ ni̍, nyɛ̄lā nda̍ a̍a̍ si̍mī yɔ̍mīī kēŋ lēni᷄ŋ nde̍ ni̍, chīli̍ŋu̍ŋ pɔ̍mbɔ᷄m wa̍ māā ŋ̄pɛ̍ɛ̍kīi̍ yo̍ŋ ni̍, o̍ ko̍ŋ kɔ̍ɔ̍lī, a̍ yūe̍i̍ wa̍ le̍ kōla̍ la̍ūwo̍ ho̍ō kīndɔ̄ɔ̍ ve̍, la̍ŋ bɛ̍ɛ̍ kpo̍u̍ wāŋnda̍ ha̍ā nda̍ wa̍ la̍ŋ chīla̍ŋ ni̍.

³⁸ O̍ ko̍ŋ kɔ̍ɔ̍lī, Mūu̍sē ni̍, a̍ E̍lɔ̄ŋ a̍ pūa̍a̍ E̍lɔ̄ŋ nda̍, nda̍ nda̍ a̍a̍ nɔ̍ ni̍ mī nda̍ a̍a̍ wa̍ o̍ tɛ̍ndīi̍yo̍ sōndōo̍ kpe̍e̍kpe̍i̍ bā pāa̍le̍ŋ lē chāŋndo̍. Wa̍li̍ o̍ wa̍li̍ ndu̍ o̍o̍ nɔ̍ le̍ tōsa᷄ŋndo̍ o̍ fo̍ndā kāsīo̍o̍ le̍ I̍sɔ̄lūɛ̍i̍ya̍, nda̍ nda̍ a̍a̍ nɔ̍ ni̍ mī nda̍ a̍a̍ to̍sa̍ ndu̍. O̍ fūla̍ o̍ nda̍ kɔ̄ɔ̄lī, wānā o̍ wānā yɔ̍ŋāā chēle̍ŋ tē nūm o̍o̍ sɔ̍ɔ̍ŋgu̍u̍ fo̍ndā kōŋ īkɛ̄i̍ pɛ̍, a̍ sɔ̍la̍ pīɔ̍mndo̍.

³⁹ Wānā pɔ̍nɔ̍ o̍ wānā pɔ̍nɔ̍ fu̍la̍ o̍ pūlāle̍ Li̍va̍īle̍ŋ chōo̍, mbo̍ wā chɔ̍ŋ pa̍ŋge̍i̍ ī pīlɛ̍ mbo̍ kūā a̍ lāchī kɛ᷅, mi̍ Mūu̍sē o̍ po̍o̍nyīāā nda̍ dīōla̍ŋ kpo̍u̍ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l ndu̍ yɛ̍. Ā wa̍ fa̍ū fa̍ū, wāa̍la̍ŋ bi̍dīi̍ŋ a̍ lā tīɔ̍ɔ̍ŋ (22,000).

A̍ mɛ̄ɛ̍ Mɛ̄lɛ̄ka̍ chu̍a̍ yu̍ŋgu̍ Li̍va̍īyo̍ le̍ sɔ̍ŋgɔ̍ chūāūwāā pīāāndūāā tāsi̍a̍a̍ I̍sɔ̄lūɛ̄ī yɛ̍

⁴⁰ O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l Mūu̍sē āā, “Chūāūwāā pīāāndūāā tāsi̍a̍a̍ I̍sɔ̄lūɛ̄ī ki̍nɛ̍i̍, chɔ̍ŋ pa̍ŋge̍i̍ ī pīlɛ̍ mbō kūɛ̄ a̍ lāchī kɛ᷅, po̍o̍nyi̍a̍a̍ nda̍ dīōla̍ŋ kpo̍u̍ mā chɔ̍m nda̍ mɛ̄ɛ̍ nda̍ chō bōllē pīlɛ̍ yɛ̍.

⁴¹ Kɛ̍ yu̍ŋgu̍ Li̍va̍īyo̍ ndu̍ ki̍nɛ̍i̍, nda̍ nɔ̍ mā wa̍ I̍sɔ̄lūɛ̍i̍ya̍a̍ tu̍a̍a̍ chōo̍ le̍, nda̍ nda̍ le̍ ya̍ nda̍ chō ni̍. Nda̍ ya̍ I̍ chu̍a̍ le̍ sɔ̍ŋgɔ̍ chūāūwāā pīāāndūāā tāsi̍a̍a̍ I̍sɔ̄lūɛ̄ī ni̍. O̍ ko̍ŋ kɔ̍ɔ̍lī, chɔ̄lūāā ndāa̍ bɛ̍ɛ̍ ki̍nɛ̍i̍, le̍ ya̍ nda̍ chō ni̍, le̍ sɔ̍ŋgɔ̍ chɔ̄lūāā pīāāndūāā tāsi̍a̍a̍ I̍sɔ̄lūɛ̍i̍ya̍ chɔ̄lūāā ndāa̍ ā kōm nda̍. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.”

^42-43 O̍ ko̍ŋ kɔ̍ɔ̍lī, mi̍ Mūu̍sē o̍ to̍sā mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l ndu̍ yɛ̍. Chūāūwāā pīāāndūāā tāsi̍a̍a̍ I̍sɔ̄lūɛ̄ī ki̍nɛ̍i̍, chɔ̍ŋ pa̍ŋge̍i̍ ī pīlɛ̍ mbo̍ kūā a̍ lāchī kɛ᷅, mbo̍ pōōnyīāā nda̍ dīōla̍ŋ kpo̍u̍. Ā wa̍ fa̍ū fa̍ū wāa̍la̍ŋ bi̍di̍i̍ŋ a̍ lā tīɔ̍ɔ̍ŋ, a̍ kɛ̄mɔ̄ɔ̍ lēdīi̍ŋ a̍ be̍le̍-ŋɔ̍mmɛ̍ū a̍ ā yāa̍ (22,273).

⁴⁴ Mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā,

⁴⁵ “Chu̍a̍ yu̍ŋgu̍ Li̍va̍īyo̍ ma̍ ma̍l ndu̍ ya̍ o̍ bā le̍ sɔ̍ŋgɔ̍ chūāūwāā pīāāndūāā tāsi̍a̍a̍ I̍sɔ̄lūɛ̄ī, o̍ ko̍ŋ kɔ̍ɔ̍lī, mā ma̍l vɛ̄lɛ̄ chɔ̄lūāā ndāa̍ ya̍ o̍ bā le̍ sɔ̍ŋgɔ̍ chɔ̄lūāā pīāāndūāā tāsi̍a̍a̍ chɔ̄lūāā I̍sɔ̄lūɛ̍i̍ya̍ ā kūām nda̍. Yu̍ŋgu̍ Li̍va̍īyo̍ ā nɔ̄ mā wa̍ le̍ ya̍ le̍ sɔ̍ŋgɔ̍ chūāūwāā pīāāndūāā tāsi̍a̍a̍ I̍sɔ̄lūɛ̄ī. Ya̍ cho̍ Mɛ̄lɛ̄ka̍ Ya̍a̍wɛ̄ɛ̄ ni̍.

⁴⁶ Chūāūwāā pīāāndūa̍a̍ tāsi̍a̍a̍ I̍sɔ̄lūɛ̄ī nda̍ hi̍o̍ū wa̍ ku̍ndā a̍ wāŋ pīāāndūa̍a̍ o̍ yu̍ŋgu̍ Li̍va̍īyo̍ chōo̍. Wāŋnda̍ kɛ̄mɔ̄ɔ̍ lē dīi̍ŋ a̍ be̍le̍-ŋɔ̍mmɛ̍ū a̍ ā yāa̍ nda̍ hi̍o̍ū lēchōo̍ ni̍ (273). Le̍la̍ŋ I̍sɔ̄lūɛ̍i̍ya̍ ā nɔ̄ mā ba̍ŋa̍ wānāa̍ hi̍o̍ū ka̍ŋ le̍cho̍ō wa̍ a̍ nyɛ̄ sɔ̄lāa̍.

⁴⁷ Le̍ wānā o̍ wānā, a̍ nɔ̄ mā bīī nda̍ nyɛ̄ sɔ̄lāa̍ o̍ bā ka̍ni̍ŋ hu̍mbo᷄ŋ ŋ̄ ŋūɛ̍ɛ̍nu̍. Nyɛ̄ sɔ̄lāa̍ ho̍ō sēke̍lēi̍ wāŋ bɛ̄ndūa̍a̍ ā chɛ̄la᷅ŋ cho̍o̍ le̍ lūsu̍l nyɛ̄ sɔ̄lāa̍ sīnāa̍ wo̍, o̍ sēke̍lēi̍ ko̍ŋ lēchōo̍ nya̍ nɔ̄ ni̍ mī lā hāndu̍ ndu̍ le̍ lūsu̍l ndɔ̄ɔ̍ sīnāa̍.

⁴⁸ Tē ā bīī nyɛ̄ sɔ̄lāa̍ ho̍ō le̍ I̍sɔ̄lūɛ̍i̍ya̍a̍ hi̍o̍ū ka̍ŋ le̍cho̍ō wa̍ bāŋāa̍ pɛ̍, a̍ ke̍ E̍lɔ̄ŋ nda̍ pūa̍a̍ ndūa̍a̍.”

⁴⁹ O̍ ko̍ŋ, mi̍ Mūu̍sē o̍ bi̍ī nyɛ̄ sɔ̄lāa̍ ho̍ō wāŋnda̍ o̍ bā le̍ I̍sɔ̄lūɛ̍i̍ya̍a̍ hi̍o̍ū ka̍ŋ le̍cho̍ō wa̍ bāŋāa̍. Kāni̍ fo̍ndōle̍, chūāūwāā pīāāndūāā tāsi̍a̍a̍ I̍sɔ̄lūɛ̄ī nda̍ nda̍ a̍a̍ hi̍o̍ū wā ku̍ndā a̍ pūa̍a̍ o̍ yu̍ŋgu̍ Li̍va̍īyo̍ chōo̍.

⁵⁰ Nyɛ̄ sɔ̄lāā o̍ bi̍ī yo̍ mbo̍ kūā bōllē pīlɛ̍, ka̍ni̍ŋ hu̍mbo᷄ŋ wāa̍ ō pīlɛ̍, a̍ kɛ̄mɔ̄ɔ̍ lē yāa̍ a̍ be̍le̍-ŋɔ̍mpu᷅m a̍ ŋ̄ ŋūɛ̍ɛ̍nu̍ (1,365). Ndu̍yɛ̍ nyɛ̄ sɔ̄lāa̍ ho̍ō o̍ sēke̍lēi̍ wāŋ bɛ̄ndūa̍a̍ ā chɛ̄la᷅ŋ cho̍o̍ le̍ lūsu̍l nyɛ̄ sɔ̄lāa̍ sīnāa̍ wo̍ nda̍ kɛ̄si̍ ndu̍ ni̍ le̍ lūsu̍l ndɔ̄ɔ̍ sīnāa̍.

⁵¹ Mi̍ Mūu̍sē o̍ chu̍ā nyɛ̄ sɔ̄lāā kōŋ mbo̍ kē E̍lɔ̄ŋ nda̍ pūa̍a̍ ndūa̍a̍ mɛ̄ɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mu̍l ndu̍ yɛ̍.