Nɔ̍mbāā 28 - Yāu̍ Mɛ̄lɛ̄ka̍a̍

A̍ sa̍lāla̍ nɔ̍ le̍ sōli᷄ŋndo̍ le̍ te̍le̍ŋ o̍ te̍le̍ŋ nda̍ŋ o̍kɔ̄ɔ̄

¹ O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mūl Mūu̍sē āā,

² “Di̍mu̍l wa᷅ŋnda̍ I̍sɔ̄lūɛ̄ī māā ya̍ Mɛ̍lɛ̄ka̍ dīmi̍ a̍a̍, ‘Nyɛ̄ dīāā o̍ nyɛ̄ dīāā nya̍ nɔ̄ mī lā sōli̍ sa̍lā lūāmāa̍ o̍ ya̍ lo̍, lā nɔ̄ mī lā sōli̍ ndu̍ a̍ te̍le̍ŋ kpe̍e̍kpe̍i̍ nya̍ nɔ̄ lē ndu̍ sōlīo̍o̍ wo̍. Sa̍lā wāā le̍nde̍ tē chūŋ ndɔ̄ɔ̍ ō kōma̍l la̍ pɛ̍, ya̍ Mɛ̍lɛ̄ka̍ Ya̍a̍wɛ̄ɛ̄ I̍ hi̍ni̍ kɔ̄l nyɛ̄ kɛ̄ndɛ̄ kɛ̍ndɛ̄.’

³ “Di̍mu̍l nda̍ māā ya̍ Mɛ̄lɛ̄ka̍ dīmi̍ āā, ‘Lēpāla̍ o̍ lēpāla̍ lā nɔ̄ mī lā sōli̍ sa̍lā lūāmāa̍ o̍ ya̍ Mɛ̄lɛ̄ka̍ lo̍ a̍ sāā fɔ̍ŋndu̍a̍a̍ chi̍i̍ wɔ̄sīo̍o̍ ō pīlɛ̍ wa̍ ā ŋīɔ̍ɔ̍ŋ, a̍ nɔ̍ sɔ᷅ŋ o̍ sɔ̄ŋ te̍ wa̍,

⁴ īdīi̍ ō pīlɛ̍, a̍ fīti̍līo̍o̍ ō pīlɛ̍.

⁵ Sāā ŋi̍ɔ̍ɔ̍ŋnda̍ ha̍ā, ō kɛ᷅ kɛ̄, tē lā wa̍ ndu̍ sa̍lāa̍ sōlīo̍o̍ o̍ ma̍āŋndo̍ ho̍ō chōo̍ pɛ̍, lā nɔ̄ mī lā chu̍a̍ kōlō lu̍a̍māā bēe̍dīi̍yo̍ ō kɛ̍ndɛ̄ kɛ̍ndɔ̄ɔ̍ pa᷅ŋnda̍ŋ lā tīɔ̍ɔ̍ŋ, mī lā mūūli̍āŋ ndu̍ a̍ chūɛ̄īmā ɔ̄li̍fīi̍mā kɛ̄ndɛ̄ kɛ̍ndīa̍ŋ pa̍ŋtīi̍la̍ŋ lā tīɔ̍ɔ̍ŋ, le̍ sa̍lā tɔ̄lɔ̄ɔ̄ ku̍llo̍ sōlīo̍o̍, mī lā sōli̍ ndu̍ sa̍lāa̍ lātūlu̍ a̍ sāā ko̍ŋ.

⁶ Sa̍lā lūāmāā ho̍ō o̍ Pēmbīī Sa̍a̍nāīve̍ nya̍ kāndu̍ ndu̍ sōlīo̍o̍ ni̍, ndu̍yɛ̍ lā nɔ̄ mī lā hīōū lāchī a̍ ndu̍ sōlīo̍o̍ o̍ ya̍ Mɛ̄lɛ̄ka̍ lo̍ lēpāa̍ o̍ lēpāa̍. Sa̍lāa̍ ho̍ō, tē chūŋ ndɔ̄ɔ̍ kōma̍l la̍ pɛ̍, ya̍ Mɛ̄lɛ̄ka̍ Ya̍a̍wɛ̄ɛ̄ I̍ hi̍ni̍ kɔ̄l nyɛ̄ kɛ̄ndɛ̄ kɛ̍ndɛ̄.

⁷ Ndu̍yɛ̍ tē lā wa̍ sa̍lāa̍ ho̍ō sōlīo̍o̍ pɛ̍, lā nɔ̄ mī lā tāla̍ vɛ̄lɛ̄ mūɛ̄īmā kālā ka̍la᷄ŋ pa̍ŋtīi̍la̍ŋ lā tīɔ̍ɔ̍ŋ o̍ ma̍āŋndo̍ chōo̍ māā sa̍lā māmūɛ̄ī.

⁸ Tē lā sōli̍ sāa̍ ō pīlɛ̍ sa̍lā īdīi̍yo̍ pɛ̍, lā sōli̍ ō pīlɔ̍ɔ̍ sa̍lāa̍ a̍ fīti̍līo̍o̍, lātūlu̍ a̍ sa̍lā tɔ̄lɔ̄ɔ̄ ku̍llo̍, ndu̍yɛ̍ a̍ sa̍lā māmūɛ̄īyo̍. Sa̍lāa̍ ho̍ō, tē chūŋ ndɔ̄ɔ̍ kōma̍l la̍ pɛ̍, ya̍ Mɛ̄lɛ̄ka̍ I̍ hi̍ni̍ kɔ̄l nyɛ̄ kɛ̄ndɛ̄ kɛ̍ndɛ̄.

A̍ sa̍la̍ nɔ̍ le̍ sōli᷄ŋndo̍ o̍ pāa̍le̍ pɛ̍ŋgīāāle̍ŋ chōo̍ wo̍ o̍kɔ̄ɔ̄

⁹ “ ‘Ō pāa̍le̍ o̍ pāa̍le̍ pɛ̍ŋgīāā chōo̍, lā nɔ̄ mī lā sōli̍ sa̍lā lūāmāa̍ o̍ ya̍ Mɛ̄lɛ̄ka̍ lo̍ a̍ sāā ko̍ndu̍a̍a̍ fɔ̍ŋndu̍a̍a̍ chi̍i̍ wɔ̄sīo̍o̍ ō pīlɛ̍ wa̍ ā ŋīɔ̍ɔ̍ŋ, a̍ nɔ̍ sɔ᷅ŋ o̍ sɔ̄ŋ te̍ wa̍. Sāā ŋi̍ɔ̍ɔ̍ŋnda̍ ha̍ā, ō kɛ᷅ kɛ̄, tē lā wa̍ ndu̍ sa̍lāa̍ sōlīo̍o̍ pɛ̍, lā nɔ̄ mī lā chu̍a̍ kōlō lu̍a̍māā bēe̍dīi̍yo̍ ō kɛ̍ndɛ̄ kɛ̍ndɔ̄ɔ̍ pa᷅ŋnda̍ŋ lā hīɔ̍ɔ̍lu̍, mī lā mūūli̍āŋ ndu̍ a̍ chūɛ̄īmā ɔ̄li̍fīi̍ya̍ŋ, le̍ sa̍lā tɔ̄lɔ̄ɔ̄ ku̍llo̍. Mī lā sōli̍ ndu̍ sa̍lāa̍ lātūlu̍ a̍ sāā ko̍ŋ. Ndu̍yɛ̍ mī lā sōli̍ vɛ̄lɛ̄ mūɛ̄īya̍ŋ sa̍lāa̍ a̍ sāā ko̍ŋ lātūlu̍.

¹⁰ Ō pāa̍le̍ pɛ̍ŋgīāā o̍ pāa̍le̍ pɛ̍ŋgīāā chōo̍, lā nɔ̄ mī sōli̍ sa̍lā lūāmāa̍ ho̍ō, ō fūla̍ o̍ sa̍lā lūāmāā nya̍ nɔ̄ mī lā sōli̍ le̍ te̍le̍ŋ o̍ te̍le̍ŋ, lātūlu̍ a̍ sa̍lā tɔ̄lɔ̄ɔ̄ ku̍llo̍, ndu̍yɛ̍ a̍ sa̍lā māmūɛ̄īyo̍ wo̍ kɔ̄ɔ̄lī.

A̍ sa̍la̍ nɔ̍ le̍ sōli᷄ŋ ndo̍ o̍ pāa̍le̍ tāse̍ o̍ pāa̍le̍ ta̍se̍ cho̍o̍ o̍ īpāŋgu̍ o̍ īpāŋgu̍ ni̍ŋ ndo̍ o̍kɔ̄ɔ̄

¹¹ “ ‘Pāa̍le̍ tāse̍le̍ŋ o̍ īpāŋgu̍ o̍ īpāŋgu̍ ni̍ŋ, lā nɔ̄ mī lā sōli̍ sa̍lā lūāmāa̍ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ a̍ nāūwāā tōōyīāā fɔ̍ŋndu̍a̍a̍ ā ŋīɔ̍ɔ̍ŋ, a̍ sāā ko̍ndo̍o̍ ō pīlɛ̍, ndu̍yɛ̍ a̍ sāā ko̍ndu̍a̍a̍ chi̍i̍ yɔ̄ wɔ̄sīo̍o̍ ō pīlɛ̍ wa̍ ā ŋɔ᷄mmɛ̍ū. Ndu̍yɛ̍ chɔ̄lūa̍a̍ ha̍ā kpo̍u̍, ā nɔ̍ mā nɔ̄ sɔ̄ŋ o̍ sɔ̄ŋ te̍.

¹² Nāūwāā tōōyīāā ŋīɔ̍ɔ̍ŋ nda̍ ha̍ā, nāū o̍ nāū tē lā wa̍ ndu̍ sa̍lāa̍ sōlīo̍o̍ pɛ̍, sa̍lā tɔ̄lɔ̄ɔ̄ ku̍l nya̍ nɔ̄ mī lā mɔ̄sɔ̍ŋa̍ sōlī a̍ ndu̍ la̍tu̍lu̍ wo̍, lā nɔ̄ mī lā tūu̍ kōlō to̍o̍sīāā bēe̍dīi̍yo̍ ō kɛ̄ndɛ̄ kɛ̍ndɔ̄ɔ̍ pa᷅ŋnda̍ŋ lā ŋɔ᷄mpu᷅m mī lā mūūli̍āŋ ndu̍ a̍ chūɛ̄īmā ɔ̄li̍fīi̍ya̍ŋ. Mī lā sōli̍ ndu̍ sa̍lā a̍ nāū kōŋ lātūlu̍. Ndu̍yɛ̍ sāā fɔ̍ŋndɔ̍ nyā chō sa̍lāa̍ sōlī wo̍, sa̍lā tɔ̄lɔ̄ɔ̄ ku̍l nya̍ nɔ̄ mī lā mɔ̄sɔ̍ŋa̍ sōlī a̍ ndu̍ la̍tu̍lu̍ wo̍, lā nɔ̄ mī lā tūu̍ kōlō to̍o̍sīāā bēe̍dīi̍yo̍ ō kɛ̄ndɛ̄ kɛ̍ndɔ̄ɔ̍ pa᷅ŋnda̍ŋ lā hīɔ̍ɔ̍lu̍, mi̍ lā mūūli̍āŋ ndu̍ a̍ chūɛ̄īmā ɔ̄li̍fīi̍ya̍ŋ mī lā sōli̍ ndu̍ sa̍lā a̍ sāā ko̍ŋ lātūlu̍.

¹³ O̍ ko̍ŋ kɔ̍ɔ̍lī, sāā ko̍ndu̍a̍a̍ ŋɔ̍mmɛ̍ūwāā nya̍ chō ka̍ŋ sa̍lāa̍ sōlī wa̍, ō kɛ᷅ o̍ kɛ᷅ tē lā wa̍ ndu̍ sa̍lāa̍ sōlīo̍o̍ pɛ̍, sa̍lā tɔ̄lɔ̄ɔ̄ ku̍l nya̍ nɔ̄ mī lā mɔ̄sɔ̍ŋa̍ sōlī a̍ ndu̍ la̍tu̍lu̍ wo̍, lā nɔ̄ mī tūu̍ kōlō to̍o̍sīāā bēe̍dīi̍yo̍ ō kɛ̄ndɛ̄ kɛ̍ndɔ̄ɔ̍ pa᷅ŋnda̍ŋ lā tīɔ̍ɔ̍ŋ, mī lā mūūli̍āŋ ndu̍ a̍ chūɛ̄īmā ɔ̄li̍fīi̍ya̍ŋ, mī lā sōli̍ ndu̍ a̍ sa̍lā sāā ko̍ndo̍ ko̍ŋ lātūlu̍. Sa̍lālā lūāmāā la̍ŋ nda᷅ŋ tē chūŋ ndɔ̄ɔ̍ ō kōma̍l la̍ pɛ̍, ya̍ Mɛ̄lɛ̄ka̍ Ya̍a̍wɛ̄ɛ̄ I̍ hi̍ni̍ kɔ̄l kɛ̄ndɛ̄ kɛ̍ndɛ̄.

¹⁴ Ndu̍yɛ̍ nāūwāā tōōyīāā nya̍ chō ha̍ā sa̍lāla̍ŋ sōlī wa̍, ō kɛ᷅ o̍ kɛ᷅ tē lā wa̍ ndu̍ sa̍lāa̍ sōlīo̍o̍ pɛ̍, mūɛ̄īmā nya̍ nɔ̄ mī lā so̍li̍ sa̍lāa̍ a̍ ndu̍ la̍tu̍lu̍ wa̍ŋ, mā nɔ̄ mī mā wa̍ pa̍ŋtīi̍la̍ŋ lā hīɔ̍ɔ̍lu̍. O̍ ko̍ŋ kɔ̍ɔ̍lī, mūɛ̄īmā nya̍ nɔ̄ mī lā sōli̍ sa̍lāa̍ a̍ sāā ko̍ndo̍o̍ la̍tu̍lu̍ wa̍ŋ, mā nɔ̄ mī mā wa̍ pa̍ŋtīi̍la̍ŋ lā yāa̍. Ndu̍yɛ̍ sāā fɔ̍ŋndu̍a̍a̍ ŋɔ̍mmɛ̍ūwāā nya̍ nɔ̄ le̍ sa̍lāla̍ŋ sōlīo̍o̍ wa̍, ō kɛ᷅ o̍ kɛ᷅ mūɛ̄īmā nya̍ nɔ̄ mī lā sōli̍ sa̍lāa̍ a̍ ndu̍ la̍tu̍lu̍ wa̍ŋ, mā nɔ̄ mī mā wa̍ pa̍ŋtīi̍la̍ŋ lā tīɔ̍ɔ̍ŋ. Sa̍lālā lūāmāālā nya̍ nɔ̄ mī lā sōli̍ o̍ pāa̍le̍ tāse̍le̍ŋ chōo̍ o̍ īpāŋgu̍ o̍ īpāŋgu̍ ni᷄ŋ o̍ wɔ̄sīo̍o̍ ni᷄ŋ nda̍ŋ, la̍ŋ la̍ cho̍ la̍ŋ ni̍.

¹⁵ O̍ pāa̍le̍ tāse̍le̍ŋ chōo̍ o̍ īpāŋgu̍ o̍ īpāŋgu̍ ni̍ŋ, lā nɔ̄ mī lā sōli̍ sa̍lāla̍ŋ nda᷅ŋ, lātūlu̍ a̍ sa̍lālā nya̍ sōlī le̍pa̍a̍ o̍ lēpāa̍ a̍ sa̍lālā mūɛ̄īmā mākīle̍pīi̍la̍ŋ lātūlu̍ la̍ŋ. Ndu̍yɛ̍ vɛ̍lɛ̄, lā nɔ̄ mī lā sōli̍ chūīŋ tōōyīo̍o̍ ō pīlɛ̍ sa̍la̍ fa̍ŋā yɔ᷅ŋ wɔ̄ɔ̍ŋndo̍ wo̍ o̍ pāa̍le̍ tāse̍le̍ŋ chōo̍ o̍ īpāŋgu̍ o̍ īpāŋgu̍ ni̍ŋ.

A̍ sa̍lālā nda̍ nɔ̄ mā so̍li̍ a̍ te̍le̍ŋ bɔ̄ŋa᷅ŋnda̍ di᷅ nda̍ dīā be̍e̍dīi̍ nɔ̍ yi̍i̍sīi̍ le̍ wo̍ la̍ŋ o̍kɔ̄ɔ̄

¹⁶ “ ‘O̍ ko̍ŋ kɔ̍ɔ̍lī, pāŋgi̍i̍ tāse̍i̍ o̍ wɔ̄sī o̍ wɔ̄sī ni᷄ŋ mālɔ̄ tɔ̍ a̍ lē hīɔ̍ɔ̍lu̍, lā nɔ̄ mī lā bīī Bɔ̄ŋa᷅ŋ Lōōna᷄ŋndo̍ a̍ Hīōūwɔ̄ɔ̄ chōo̍ o̍kɔ̄ɔ̄, le̍ ya̍ Mɛ̄lɛ̄ka̍ Ya̍a̍wɛ̄ɛ̍ bɛ̄ɛ̄le̍ŋ kīo̍o̍.

¹⁷ O̍ mālɔ̄ tɔ̍ a̍ lē ŋūɛ̍ɛ̍nu̍a̍ŋ chōo̍ di̍i̍mā ndɔ̄ɔ̍, lā nɔ̄ mī lā kāndu̍ bɔ̄ŋa᷅ŋ pālɛ̍i̍ ŋɔ̍mmɛ̍ūwo̍. Ndu̍yɛ̍ o̍ pālɛ̍i̍ ŋɔ̍mmɛ̍ūve̍ he̍ī bɛ̄ŋgu̍ ki̍nɛ̍i̍, bēe̍dīi̍ nɔ̍ yi̍i̍sīi̍ le̍ni̍ŋ te̍ wo̍ ndu̍ nya̍ nɔ̄ ni̍ mī lā wa̍ dīo̍o̍.

¹⁸ Ndu̍yɛ̍ o̍ pāa̍le̍ tāse̍le̍ bɔ̄ŋa᷅ŋ pālɛ̍i̍ ŋɔ̍mmɛ̍ū wo̍ ho̍ō chōo̍, lā nɔ̄ mī lā bɔ̄ɔ̄ŋi̍āŋ kpo̍u̍ na̍a̍ pi᷅lɛ̍. Wānā o̍ wānā a̍ nɔ̍ mā to̍sa̍ wa̍li̍ pa̍a̍le̍ le̍ŋ te̍.

¹⁹ Pāa̍le̍ le̍ŋ, lā nɔ̄ mī lā sōli̍ sa̍lā lūāmāa̍ o̍ Mɛ̍lɛ̄ka̍ Ya̍a̍wɛ̄ɛ̄ lo̍, a̍ nāūwāā tōōyīa̍a̍ fɔ̍ŋndu̍a̍a̍ ā ŋīɔ̍ɔ̍ŋ, ndu̍yɛ̍ a̍ sāā ko̍ndo̍o̍ o̍ pīlɛ̍, o̍ ko̍ŋ kɔ̍ɔ̍lī, a̍ sāā ko̍ndu̍a̍a̍ fɔ̍ŋndu̍a̍a̍ ā ŋɔ᷄mmɛ̍ū, sāa̍ chi̍i̍ wɔ̄sīo̍o̍ ō pīlɛ̍ wa̍. Ndu̍yɛ̍ chɔ̄lūa̍a̍ ha̍ā ā nɔ̍ mā nɔ̄ sɔ̄ŋ o̍ sɔ̄ŋ te̍.

²⁰ Ndu̍yɛ̍ nāūwāā tōōyīāā ŋīɔ̍ɔ̍ŋāā nya̍ chō ha̍ā sa̍lāa̍ sōlī a̍ nda̍ wa̍, ō kɛ᷅ kɛ᷅, sa̍lā tɔ̄lɔ̄ɔ̄ ku̍l nya̍ nɔ̄ mī lā mɔ̄sɔ̍ŋa̍ sōlī a̍ ndu̍ la̍tu̍lu̍ wo̍, ō nɔ̄ mbō wa̍ kōlō to̍o̍sīāā bēe̍dīi̍yo̍ ō kɛ̄ndɛ̄ kɛ̍ndɔ̄ɔ̍ pa᷅ŋnda̍ŋ lā ŋɔ᷄mpu᷅m, mī lā mūūli̍āŋ ndu̍ a̍ chūɛ̄īmā ɔ̄li̍fīi̍ya̍ŋ. Ndu̍yɛ̍ sāā ko̍ndo̍ nyā chō ho̍ō sa̍lāa̍ sōlī a̍ ndu̍ wo̍, sa̍lā tɔ̄lɔ̄ɔ̄ ku̍l nya̍ nɔ̄ mī lā mɔ̄sɔ̍ŋa̍ sōlī a̍ ndu̍ la̍tu̍lu̍ wo̍, ō nɔ̄ mbō wa̍ kōlō to̍o̍sīāā bēe̍dīi̍yo̍ ō kɛ̄ndɛ̄ kɛ̍ndɔ̄ɔ̍ pa᷅ŋnda̍ŋ lā hīɔ̍ɔ̍lu̍ mi̍ lā mūūli̍āŋ ndu̍ a̍ chūɛ̄īmā ɔ̄li̍fīi̍ya̍ŋ.

²¹ O̍ ko̍ŋ kɔ̍ɔ̍lī, sāā ko̍ndu̍a̍a̍ fɔ̍ŋndu̍a̍a̍ ŋɔ̍mmɛ̍ūwāā ka̍ŋ, ō kɛ᷅ o̍ kɛ᷅ lā nɔ̄ mī lā mɔ̄sɔ̍ŋa̍ ndu̍ sa̍lāa̍ sōlī a̍ sa̍lā tɔ̄lɔ̄ɔ̄ ku̍llo̍, a̍ kōlō to̍o̍sīāā bēe̍dīi̍yo̍ ō kɛ̄ndɛ̄ kɛ̍ndɔ̄ɔ̍ pa᷅ŋnda̍ŋ lā tīɔ̍ɔ̍ŋ, mī lā mūūli̍āŋ ndu̍ a̍ chūɛ̄īmā ɔ̄li̍fīi̍ya̍ŋ.

²² Ō fūla̍ o̍ sa̍lālā lāŋ kɔ̄ɔ̄lī, lā nɔ̄ vɛ̄lɛ̄ mī lā sōli̍ chūīŋ tōōyōo̍ ō pīlɛ̍ sa̍la̍ fa̍ŋā yɔ᷅ŋ wɔ̄ɔ̍ŋndo̍ wo̍. Chūīŋ tōōyē kōŋ, ndu̍ cho̍ wā le̍ yɔ̄ŋndā nyāla̍ wɔ̍ɔ̍ŋnda̍ŋ fāŋāa̍ ni̍.

²³ Lā nɔ̄ mī lā wa̍ sa̍lāla̍ŋ nda᷅ŋ sōlīo̍o̍ o̍ ya̍ Mɛ̍lɛ̄ka̍ lo̍, ō fūla̍ o̍ sa̍lālā lūāmāālā īdīi̍lā nya̍ nɔ̄ lē sōlīo̍o̍ le̍ te̍le̍ŋ o̍ te̍le̍ŋ nda̍ŋ kɔ̄ɔ̄lī.

²⁴ Pālɛ̍i̍ ŋɔ̍mmɛ̍ū nya̍ chō wā ke̍ŋ o̍ bɔ̄ŋa᷅ŋndo̍ ho̍ō chōo̍ ve̍ ki̍nɛ̍i̍, lēpāa̍ o̍ lēpāa̍ sa̍lā nyɛ̄ dīāā nya̍ nɔ̄ mī lā lōm o̍ ma̍āŋndo̍ chōo̍ o̍ ya̍ Mɛ̄lɛ̄ka̍ lo̍ wo̍, ndu̍ cho̍ ko̍ŋ ni̍. Sa̍lāla̍ŋ ndāŋ tē chūŋ ndɔ̄ɔ̍ ō kōma̍l ya̍ Mɛ̍lɛ̄ka̍ Ya̍a̍wɛ̄ɛ̄ pɛ̍, I̍ hīni̍ kɔ̄l nyɛ̄ kɛ̄ndɛ̄ kɛ̍ndɛ̄. Lā nɔ̄ mī wa̍ sa̍lāla̍ŋ nda᷅ŋ sōlīo̍o̍ īwɔ̄sī o̍ īwɔ̄sī, ō fūla̍ o̍ sa̍lālā lūāmāālā nya̍ nɔ̄ mī lā sōli̍ lēpāa̍ o̍ lēpāa̍ lātūlu̍ a̍ sālā māmūɛ̄ī kīle̍pīi̍ya̍ŋ nda̍ŋ kɔ̄ɔ̄lī.

²⁵ O̍ ko̍ŋ kɔ̍ɔ̍lī, o̍ pāa̍le̍ ŋɔ̍mmɛ̍ūle̍ŋ chōo̍ nya̍ kpo̍u̍ lā nɔ̄ mī lā bɔ̄ɔ̄ŋi̍āŋ le̍ ya̍ Mɛ̄lɛ̄ka̍ sōōlūūwo̍. Wānā o̍ wānā a̍ nɔ̍ mā to̍sa̍ wa̍li̍ o̍ wa̍li̍ pa̍a̍le̍ le̍ŋ te̍.

A̍ sa̍lāla̍ nda̍ nɔ̄ le̍ sōlīo̍o̍ a̍ te̍le̍ŋ bɔ̄ŋa᷅ŋ chīɔ̄ɔ̄ŋ kūāūwāa̍ la̍ŋ o̍kɔ̄ɔ̄

²⁶ “ ‘O̍ ko̍ŋ kɔ̍ɔ̍lī, tē lā wa̍ bɔ̄ŋa᷅ŋ chīɔ̄ɔ̄ŋ kūāūwāa̍ bīyɔ̄ɔ̍ pɛ̍, o̍ pāa̍le̍ tāse̍le̍ bɔ̄ŋa᷅ŋndo̍ ho̍ō chōo̍, le̍ŋ le̍ yɔ̍nūŋ māā pāa̍le̍ nya̍ nɔ̄ le̍ tɔ̄lɔ̄ɔ̄lā nyāla̍ tāse̍la̍ŋ yɔ̄ŋgōo̍ o̍ ya̍ Mɛ̄lɛ̄ka̍ Ya̍a̍wɛ̄ɛ̄ lo̍ le̍ŋ ni̍, nya̍ kpo̍u̍ lā nɔ̄ mī lā bɔ̄ɔ̄ŋi̍āŋ na̍a̍ pi᷅lɛ̍ le̍ ya̍ Mɛ̄lɛ̄ka̍ sōōlūūwo̍. Wānā o̍ wānā a̍ nɔ̍ mā to̍sa̍ wa̍li̍ o̍ wa̍li̍ pa̍a̍le̍ le̍ŋ te̍.

²⁷ Pāa̍le̍ le̍ŋ lā nɔ̄ mī lā sōli̍ sa̍lālā lūāmāāla̍ŋ o̍ ya̍ Mɛ̍lɛ̄ka̍ Ya̍a̍wɛ̄ɛ̄ lo̍ a̍ nāūwāā tōōyīāā fɔ̍ŋndu̍a̍a̍ ā ŋīɔ̍ɔ̍ŋ, ndu̍yɛ̍ a̍ sāā ko̍ndo̍o̍ o̍ pīlɛ̍, o̍ ko̍ŋ kɔ̍ɔ̍lī, a̍ sāā ko̍ndu̍a̍a̍ fɔ̍ŋndu̍a̍a̍ ā ŋɔ᷄mmɛ̍ū, sāa̍ chi̍i̍ wɔ̄sīo̍o̍ ō pīlɛ̍ wa̍. Ndu̍yɛ̍ chɔ̄lūa̍a̍ ha̍ā ā nɔ̍ mā nɔ̄ sɔ̄ŋ o̍ sɔ̄ŋ te̍. Sa̍lāla̍ŋ nda᷅ŋ tē chūŋ ndɔ̄ɔ̍ ō kōma̍l ya̍ Mɛ̄lɛ̄ka̍ Ya̍a̍wɛ̄ɛ̄ pɛ̍, I̍ hīni̍ kɔ̄l nyɛ̄ kɛ̄ndɛ̄ kɛ̍ndɛ̄.

²⁸ Ndu̍yɛ̍ nāūwāā tōōyīāā fɔ̍ŋndu̍a̍a̍ ŋīɔ̍ɔ̍ŋāā nya̍ chō ha̍ā sa̍lāa̍ sōlī wa̍, ō kɛ᷅ o̍ kɛ᷅ sa̍lā tɔ̄lɔ̄ɔ̄ ku̍l nya̍ nɔ̄ mī lā mɔ̄sɔ̍ŋa̍ sōlī a̍ ndu̍ la̍tu̍lu̍ wo̍, ō nɔ̄ mbō wa̍ kōlō to̍o̍sīāā bēe̍dīi̍yo̍ ō kɛ̄ndɛ̄ kɛ̍ndɔ̄ɔ̍ pa᷅ŋnda̍ŋ lā ŋɔ᷄mpu᷅m, mī lā mūūli̍āŋ ndu̍ a̍ chūɛ̄īmā ɔ̄li̍fīi̍ya̍ŋ. Ndu̍yɛ̍ sāā ko̍ndo̍ nyā chō ho̍ō sa̍lāa̍ sōlī a̍ ndu̍ wo̍, sa̍lā tɔ̄lɔ̄ɔ̄ ku̍l nya̍ nɔ̄ mī lā mɔ̄sɔ̍ŋa̍ sōlī a̍ ndu̍ la̍tu̍lu̍ wo̍, ō nɔ̄ mbō wa̍ kōlō to̍o̍sīāā bēe̍dīi̍yo̍ ō kɛ̄ndɛ̄ kɛ̍ndɔ̄ɔ̍ pa᷅ŋnda̍ŋ lā hīɔ̍ɔ̍lu̍ mī lā mūūli̍āŋ ndu̍ a̍ chūɛ̄īmā ɔ̄li̍fīi̍ya̍ŋ.

²⁹ O̍ ko̍ŋ kɔ̍ɔ̍lī, sāā ko̍ndu̍a̍a̍ fɔ̍ŋndu̍a̍a̍ ŋɔ̍mmɛ̍ūwāā ka̍ŋ, ō kɛ᷅ o̍ kɛ᷅ lā nɔ̄ mī lā mɔ̄sɔ̍ŋa̍ ndu̍ sa̍lāa̍ sōlī a̍ sa̍lā tɔ̄lɔ̄ɔ̄ ku̍llo̍, a̍ kōlō to̍o̍sīāā bēe̍dīi̍yo̍ ō kɛ̄ndɛ̄ kɛ̍ndɔ̄ɔ̍ pa᷅ŋnda̍ŋ lā tīɔ̍ɔ̍ŋ, mī lā mūūli̍āŋ ndu̍ a̍ chūɛ̄īmā ɔ̄li̍fīi̍ya̍ŋ.

³⁰ Ō fūla̍ o̍ sa̍lālā lāŋ nda᷅ŋ kɔ̄ɔ̄lī, lā nɔ̄ vɛ̄lɛ̄ mī lā sōli̍ chūīŋ tōōyōo̍ ō pīlɛ̍ sa̍la̍ fa̍ŋā yɔ᷅ŋ wɔ̄ɔ̍ŋndo̍ wo̍. Chūīŋ tōōyē kōŋ, ndu̍ cho̍ wā le̍ yɔ̄ŋndā nyāla̍ wɔ̍ɔ̍ŋnda̍ŋ fāŋāa̍ ni̍.

³¹ Lā nɔ̄ mī lā wa̍ sa̍lāla̍ŋ nda᷅ŋ sōlīo̍o̍ a̍ sa̍lālā mūɛ̄īmā mākīle̍pīi̍ya̍ŋ lātūlu̍, ō fūla̍ o̍ sa̍lālā lūāmāālā nya̍ sōlī le̍pa̍a̍ o̍ lēpāa̍ lātūlu̍ a̍ sa̍lālā tɔ̄lɔ̄ɔ̄ ku̍lta̍ŋ nda̍ŋ kɔ̄ɔ̄lī. Ndu̍yɛ̍ chɔ̄lūa̍a̍ ha̍ā, ā nɔ̍ mā nɔ̄ sɔ̄ŋ o̍ sɔ̄ŋ te̍.