Nɔ̍mbāā 24 - Yāu̍ Mɛ̄lɛ̄ka̍a̍

¹ Mɛ̄ɛ̍ Be̍la᷅m o̍ che᷅ māā Mɛ̄lɛ̄ka̍ Ya̍a̍wɛ̄ɛ̄ o̍ ye̍e̍ma̍ ndu̍ le̍ mbō dɔ̄ū wāŋnda̍ I̍sɔ̄lūɛ̍i̍ sa̍la̍, Be̍la᷅m o̍ wu̍u̍ lɛ̍ nyɛ̄ mɛ̄ɛ̍ nda̍ wūū nu̍a̍ā kōo̍ŋ le̍ sūɛ̍i̍ sīnāa̍ yɛ̍ mɛ̄ɛ̍ o̍ to̍sa̍ o̍ tāse̍la̍ ndɔ̄ɔ̍ yɛ̍ le̍. Mbo̍ mūlī hɔ̄lla̍ kūmbū lɛ̄ŋndē po̍lte̍ŋ.

² O̍ ko̍ŋ, mbo̍ chā I̍sɔ̄lūɛ̍i̍ya̍ ā dīīna᷄ŋ ku̍ndāla̍ŋ a̍ yu̍ŋgu̍la̍ŋ o̍ dɔ̍ɔ̍ŋgɔ̍ nda̍ kēlū wo̍ ni᷄ŋ. O̍ ko̍ŋ kɔ̍ɔ̍lī, mi̍ Nyi̍na̍ Mɛ̄lɛ̄ka̍a̍ ō tūāl Ba̍lām kɔ̄ɔ̄lī,

³ mi̍ Be̍la᷅m o̍ ka̍ndū yōōŋgūla̍ Mɛ̄lɛ̄ka̍ la̍ŋ dīmīo̍o̍. Mbo̍ dīmī āā, “Ya̍ Be̍la᷅m, po̍ Bi̍ɔ̍ɔ̄ wo̍, ya̍ cho̍ yōōŋgōo̍ ho̍ō dīmīo̍o̍ ni̍. Ya̍ wa᷅na̍ cha᷅ sɔ̍ɔ̍ŋ wa̍la̍ŋ ndo̍, ya̍ cho̍ yōōŋgōo̍ ho̍ō dīmīo̍o̍ ni̍.

⁴ Ya̍ wa᷅na̍ tu̍ɛ̍ī yo̍ōŋgūla̍ Mɛ̄lɛ̄ka̍ la̍ŋ ndo̍ ya̍ cho̍ yōōŋgōo̍ ho̍ō dīmīo̍o̍ ni̍. Ya̍ cha᷅ yi̍lāŋnda̍ Mɛ̄lɛ̄ka̍ nɔ̍ kpāāyāa̍ kpo̍u̍ wo̍ la̍ŋ ni̍. Ya̍ hi̍nī lɛ᷅ŋ sa̍kpō ni̍, ndu̍yɛ̍ mī ku̍mbi̍ hɔ̄lta̍ŋ nyɛ̄ kɛ̄ndɛ̄ kɛ̍ndɛ̄ le̍ sɔ̄ɔ̍ŋ chɔ̄ɔ̍.

⁵ Wāŋnda̍ I̍sɔ̄lūɛ̄ī, tɛ̍ndīi̍la̍ nyāla̍ŋ lā chō bɔ̍ɔ̍ tɛ̍ndīi̍la̍ kɛ̍ndɛ̄ bɛ̄ndū, Nāa̍ nyāā cha̍lāa̍ ā chō bɔ̄ɔ̍ fo̍ndāŋ kɛ̄ndɛ̄ bɛ̄ndū.

⁶ Ā chō ā kūāna᷄ŋ ya̍ lāchī mɛ̄ɛ̍ wāūwa̍ŋ mā wā nu̍a̍ā o̍ pūla᷄ŋ ni᷄ŋ yɛ̍, mɛ̄ɛ̍ yɔ̄mīī kūāmɛ̄ī ī wā nu̍a̍ā ō kpe̍le̍la̍ŋ ni᷄ŋ o̍ pīo̍o̍ kɔ̄ŋgɔ̍ yɛ̍, le̍nde̍ nda̍ chō ni̍. Ā chō māchūāā mɛ̄ɛ̍ a̍lo̍o̍sī Mɛ̄lɛ̄ka̍ Ya̍a̍wɛ̄ɛ̄ o̍ tɔ᷅l lo̍ ō chō nu̍a̍ā yɛ̍. Mɛ̄ɛ̍ yɔ̄mīī si̍dāāve̍ ī wā nu̍a̍ā o̍ pīo̍o̍ kɔ̄ŋgɔ̍ yɛ̍, le̍nde̍ nda̍ chō ni̍.

⁷ Wāŋnda̍ ha̍ā ā sɔ̄lā ni̍ŋ pi̍ɔ̍ɔ̍ ta̍u̍ ta̍u̍ o̍ lɛ̄ŋndē ndāle̍ŋ ni᷄ŋ le̍ wa̍lta̍ ndāla̍ ŋ̄chīɛ̄ɛ̄la̍ŋ, tɔ̄lɔ̄ɔ̄lā ndāla̍ŋ lā wā ni̍ŋ mɛ᷅ŋnda̍ŋ sɔ̄lāa̍ ta̍u̍ ta̍u̍. Māsa̍ ndā bɛ̍ndōo̍ ō wā ni̍ŋ wa᷅na̍ kpāāyā mbō hīōū Māsāa̍ A̍ka̍kī. Ndu̍yɛ̍ māsāle̍ ndɔ̄le̍ŋ lē wā ni̍ŋ ma̍sāle̍ tɔ̍ɔ̍ bɛ̍ndu̍.

⁸ Mɛ̄lɛ̄ka̍ so̍li̍ wāŋnda̍ ha̍ā o̍ lɛ̄ŋndē I̍chi̍pīle̍ŋ ni᷄ŋ ni̍ mbo̍ hūŋ a̍ nda̍. Wāna̍ nda̍ nɔ̄ wo̍ ō chō māchūāā mɛ̄ɛ̍ chīi̍ dīāllūŋ kālā bɛ̄ndōo̍ ō chō nu̍a̍ā yɛ̍. Ā dēl ni̍ŋ ya̍a̍mɔ̍ɔ̍wa̍a̍ ndāa̍ chōo̍ mā yēm nda̍, ndu̍yɛ̍ mā pēsi̍ nda̍ pāāla̍ŋ vɛ̍ vɛ̍. Ā chō ya̍a̍mɔ̍ɔ̍wa̍a̍ ndāa̍ būūlūū a̍ chīŋɔ̍ma̍ ndāa̍ŋ.

⁹ Wāŋnda̍ I̍sɔ̄lūɛ̄ī a̍ cho̍ māchūāā mɛ̄ɛ̍ kpɔ̍kūŋ kpāāyā bɛ̄ndōo̍ ō chō nu̍a̍ā yɛ̍. Tē ō dē pɛ̍ mbō hīni̍ pɛ̄ŋgīo̍o̍, ō nɛ̄ɛ̍nɛ̍ bi̍ī yɛ̍ kɔ̄llo̍ mbō kɔ̍ kpe̍ŋā ndu̍? Wānāa̍ dɔ̍ū wāŋnda̍ ha̍ā sa̍lā pɛ̍, Mɛ̄lɛ̄ka̍ dɔ̄ū wānāā kāŋ sa̍lā. Wānāa̍ me̍na̍ nda̍ pɛ̍, Mɛ̄lɛ̄ka̍ mēna̍ nya̍.”

¹⁰ Mɛ̄ɛ̍ Be̍la̍kī o̍ tu̍e̍ī yōōŋgūlā Be̍la᷅m o̍ wa̍ dīmīo̍o̍ la̍ŋ, mbo̍ kīāl sūe̍i̍, mbo̍ dīmūl Be̍la᷅m āā, “I̍ ve̍e̍lu̍ nu̍m le̍ mā hu̍ŋ me̍na̍l la̍ ya̍a̍mɔ̍ɔ̍wa̍a̍ nīa̍a̍ a̍ mi̍i̍ŋgu̍ nda̍ sa̍lā dɔ̄wɔ̄ɔ̍? Bɛ̄mbɔ̄ɔ̍ lēyāa̍ wa̍ŋ ŋ̄ dɔ̄ū nda̍ sa̍lā ni̍.

¹¹ Chɔ̍ŋ mā mi̍i̍ŋgu̍ o̍ nūmndo̍! Ya̍ i̍i̍ chu̍e̍l nu̍m būŋgɛ̄i̍ māā I̍ cho̍ nu̍m pāāwā mā hi̍ni̍ kɔ̄l, kɛ̍ Mɛ̄lɛ̄ka̍ Ya̍a̍wɛ̄ɛ̄ o̍ to̍sa̍ ma̍ fūlā pāāwā ya̍ I̍ wa̍ nu̍m ndo̍.”

¹² Mi̍ Be̍la᷅m o̍ lo᷅ o̍ ko̍ŋ mbo̍ dīmūl Be̍la̍kī āā, “I̍ di̍mu̍l ki̍i̍la̍a̍ nu̍mnda̍ kpe̍nde̍ke̍le̍ māā

¹³ ā yɔ᷄ŋ bɛ̍ɛ̍ mā ke̍ ya̍ ka̍ni̍ŋ hu̍mbo᷄ŋ kpo̍u̍ a̍ ko̍o̍līi̍yo̍ŋ kpo̍u̍ o̍ chīɛ̄ī nu̍m lēmāsāa̍ ni᷄ŋ, māā I̍ so̍lī Mɛ̍lɛ̄ka̍ Ya̍a̍wɛ̄ɛ̍ dīōm mī to̍sa̍ nyɛ̄ o̍ nyɛ̄ o̍ kpāāya̍ nī ni̍ŋ te̍, ō wa̍ su̍ɛ̍i̍ wɔ̍ɔ̍ŋ o̍ wa̍ su̍ɛ̍i̍ kɛ̍ndɛ̄. I̍ hi̍ū di̍ōm Mɛ̄lɛ̄ka̍ Ya̍a̍wɛ̄ɛ̄ wo̍ chōo̍ mī di̍mi̍ nyɛ̄ o̍ nyɛ̄ chēle̍ŋ te̍, mɛ̄ɛ̍ nyɛ̄ o̍ du̍a̍ū ya̍ o̍ sōndō wo̍.”

Yōōŋgūlā mɛ̄ɛ̄lāālā Be̍la᷅m o̍ di̍mi̍ la̍ŋ

¹⁴ Mi̍ Be̍la᷅m o̍ lo᷅ o̍ ko̍ŋ mbo̍ dīmūl Māsāa̍ Be̍la̍kī āā, “Ī cho̍ mīīŋgɔ᷄ŋndo̍ o̍ wānāā nīa̍a̍ lo̍. Kɛ̍ ya̍ŋ ndɔ̍ ni᷅la̍ŋ mī di̍mu̍l nu̍m nyɛ̄ I̍sɔ̄lūɛ̍i̍ya̍ ā tōsā ni̍ŋ a̍ wānāā nūmnda̍ o̍ sīɔ̄dīi̍ lāchīo̍o̍ ni᷄ŋ ndo̍.”

¹⁵ O̍ ko̍ŋ kɔ̍ɔ̍lī, mi̍ Be̍la᷅m o̍ ka̍ndū yōōŋgūla̍ŋ dīmīo̍o̍. Mbo̍ dīmī āā, “Ya̍ Be̍la᷅m, po̍ Bi̍ɔ̍ɔ̄ wo̍, ya̍ cho̍ yōōŋgōo̍ ho̍ō dīmīo̍o̍ ni̍. Ya̍ wa᷅na̍ cha᷅ sɔ̍ɔ̍ŋ wa̍la̍ŋ ndo̍, ya̍ cho̍ yōōŋgōo̍ ho̍ō dīmīo̍o̍ ni̍.

¹⁶ Ya̍ wa᷅na̍ tu̍ɛ̍ī yo̍ōŋgūla̍ Mɛ̄lɛ̄ka̍ la̍ŋ ndo̍, ya̍ cho̍ yōōŋgōo̍ ho̍ō dīmīo̍o̍ ni̍. Ndu̍yɛ̍ Mɛ̄lɛ̄ka̍ Bɛ̄ndōo̍ Kpo̍u̍ ō ke᷄ ya̍ tāāsi̍o̍o̍. Ya̍ cha᷅ yi̍lāŋnda̍ Mɛ̄lɛ̄ka̍ nɔ̍ kpāāyāa̍ kpo̍u̍ wo̍ la̍ŋ ni̍. Ya̍ hi̍nī lɛ᷅ŋ sa̍kpō ni̍, ndu̍yɛ̍ mī ku̍mbi̍ hɔ̄lta̍ŋ nyɛ̄ kɛ̄ndɛ̄ kɛ̍ndɛ̄ le̍ sɔ̄ɔ̍ŋ chɔ̄ɔ̍.

¹⁷ Nyɛ̄ ya̍ I̍ cho̍ chɔ̄ɔ̍ wo̍, sūɛ̍i̍ wa̍ā ō sīɔ̄dīi̍ lāchīo̍o̍ ni᷄ŋ pɔ̍. I̍ che̍nu᷄ŋ wa᷅ŋndo̍ ya̍ o̍ hɔ̄l, kɛ̍ ō cho̍ su̍ɛ̍i̍ wa̍ā kpɛ̍ɛ̍lūŋ te̍. Pāa̍le̍ wa᷅ ni̍ŋ mī wāna̍ wa᷅ ni̍ŋ ma̍sāa̍ I̍sɔ̄lūɛ̄ī yo̍ ō fūla̍ o̍ pūlāle̍ Che̍kɔ̍pūle̍ŋ chōo̍, mɛ̄ɛ̍ lūe̍i̍ ī dīāndū nu̍a̍ā yɛ̍. Ō chō hūnɔ̄ɔ̄ wāŋ bɛ̄ndūa̍a̍ Mo̍wa̍bī tɛ̄ɛ̄mbūū kpo̍u̍. Ndu̍yɛ̍ mbō yēm wāŋnda̍ Sɛ̍tī chi̍e̍e̍ kpo̍u̍.

¹⁸ Wāŋnda̍ I̍sɔ̄lūɛ̄ī a̍ cho̍ hūnɔ̄ɔ̄ lɛ̄ŋndē I̍dɔ̄mnde̍ŋ yōmɔ̄ɔ̄ mā chūa̍ le̍ŋ, ndu̍yɛ̍ wāŋnda̍ Si̍ɛ̍ɛ̄, ndu̍ yɔ̍nūŋ māā ya̍a̍mɔ̍ɔ̍wa̍a̍ ndāa̍ ni̍, nda̍ bɛ̍ɛ̍ mā yēm lɛ̄ŋndē ndāle̍ŋ mā chūa̍ le̍ŋ. Ndu̍yɛ̍ wāŋnda̍ I̍sɔ̄lūɛ̄ī nda̍ nda̍ ā hīāū ni̍ŋ la̍chi̍ a̍ kpāāyāa̍ sɔ̄lāa̍.

¹⁹ Māsāa̍ ō fūlā ni̍ŋ o̍ yu̍ŋgu̍ Che̍kɔ̍pū wo̍ chōo̍, ndu̍yɛ̍ mbō hu᷄ŋ tɛ̍ɛ̍mbūū wānāa̍ lo᷅ ni̍ŋ yo̍o̍mū o̍ chi̍e̍e̍ o̍ chi̍e̍e̍ bɛ̍ndū ni᷄ŋ nda̍.”

²⁰ O̍ ko̍ŋ kɔ̍ɔ̍lī, mi̍ Be̍la᷅m o̍ cha᷅ vɛ̄lɛ̄ yi̍lāŋndo̍ a̍ Āma̍la̍kāi̍tīi̍ya̍ o̍kɔ̄ɔ̄. Mbo̍ kāndū yōōŋgūla̍ŋ dīmīo̍o̍ a̍ nda̍ o̍kɔ̄ɔ̄ āā, “Kāa̍la̍ŋ tɛ̄ɛ̄ŋ kpo̍u̍, kāa̍le̍ A̍ma̍lɛ̍ka̍i̍tīi̍le̍ŋ le̍ŋ le̍ wa̍ kāa̍le̍ le̍e̍ hi̍o̍ū kpo̍u̍ le̍ŋ ni̍. Kɛ̍ ō mɛ̄ɛ̄lu̍la̍ŋ lē chō hūnɔ̄ɔ̄ tāmbu̍.”

²¹ O̍ ko̍ŋ kɔ̍ɔ̍lī, mi̍ Be̍la᷅m o̍ cha᷅ vɛ̄lɛ̄ yi̍lāŋndo̍ a̍ Ke̍na̍na̍i̍tīi̍ya̍ o̍kɔ̄ɔ̄. Mbo̍ kāndū yōōŋgūla̍ŋ dīmīo̍o̍ nda̍ o̍kɔ̄ɔ̄ āā, “Nāa̍ nyāā cha̍lāa̍ ā chō ā bɛ̄ɛ̄ndīāā ā kālā ka̍lā, nāa̍ nyɛ̄ o̍ nyɛ̄ yɔ̍nūŋ nya̍ le̍ wa̍. Mɛ̄ɛ̍ wāa̍ŋndē yōūwo̍ lē wānūŋ nu̍a̍ā o̍ pōūta̍ŋ chōo̍ pɔ̍ yɛ̍, le̍nde̍ nāa̍ nyāa̍ cha̍lāa̍ ā chōŋnu᷄ŋ yɛ̍lɛ̍kɛ̍lɛ̍ɛ̍ ni̍.

²² Kɛ̍ ndu̍yɛ̍ a̍ ko̍ŋ kpo̍u̍, nya̍ Ke̍na̍na̍i̍tīi̍ya̍ ha̍ā lā chō hūnɔ̄ɔ̄ wā ā tɛ̄ɛ̄mbāā, bōōndi̍i̍ Āsi̍i̍līāŋnda̍ ā bīī ni̍ŋ nya̍ mā kūɛ̄ a̍ nya̍ o̍ bīyɔ̄ɔ̍ ni᷄ŋ nde̍.”

²³ O̍ ko̍ŋ kɔ̍ɔ̍lī, mi̍ Be̍la᷅m o̍ hi̍a̍ū lāchī yōōŋgūla̍ŋ dīmīo̍o̍, mbo̍ dīmī āā, “Kpo̍u̍, ō nɛ̄ɛ̍nɛ̍ lo᷅ yɛ̍ ni̍ŋ yo̍o̍mū tē Mɛ̄lɛ̄ka̍ tōsa̍ he̍ī pɛ̍?

²⁴ Dɛ̄ndɛ̄la̍ bɛ̍ndūla̍ ku̍ā o̍ mɛ̄ŋnda̍ŋ chōo̍ la̍ŋ lā chō chɔ̄nɔ᷄ŋ Ki̍tīm mī lā hīŋ a̍ pūa̍a̍ sɔ̍ŋgāa̍. Ya̍a̍mɔ̍ɔ̍wa̍ ha̍ā ā chō hūnɔ̄ɔ̄ lɛ̄ŋndē Āsi̍i̍līāāle̍ŋ a̍ lɛ̄ŋndē Ɛ̍bāle̍ŋ yōmɔ̄ɔ̄. Kɛ̍ nda̍ bɛ̍ɛ̍ ya̍a̍mɔ̍ɔ̍wa̍ ā chō nda̍ hūnɔ̄ɔ̄ mɛ̄ɛ̄lū tɛ̄ɛ̄mbūū.”

²⁵ Mɛ̄ɛ̍ Be̍la᷅m o̍ chi̍i̍ yōōŋgūlā lāŋ dīmī kpo̍u̍, mbo̍ cha᷄ŋ mbo̍ mīīŋgu᷄ŋ o̍ ndu̍lo̍, o̍ ko̍ŋ kɔ̍ɔ̍lī, Be̍la̍kī bɛ̍ɛ̍ mbo̍ kūānu᷄ŋ.