Nɔ̍mbāā 23 - Yāu̍ Mɛ̄lɛ̄ka̍a̍

¹ Mi̍ Be̍la᷅m o̍ lo᷅ o̍ ko̍ŋ mbo̍ dīmūl Be̍la̍kī āā, “Te̍ŋgu̍l la̍ ma̍āŋnda̍ŋ lā ŋɔ᷄mmɛ̍ū na̍nu᷄ŋ, o̍ ko̍ŋ kɔ̍ɔ̍lī, mā chu̍u̍ ya̍ nāūwāā tōōyīa̍a̍ ā ŋɔ᷄mmɛ̍ū a̍ sāa̍ ko̍ndu̍a̍a̍ ā ŋɔ᷄mmɛ̍ū.”

² O̍ ko̍ŋ kɔ̍ɔ̍lī, mi̍ Be̍la̍kī o̍ to̍sā mɛ̄ɛ̍ Be̍la᷅m o̍ di̍mu̍l ndu̍ yɛ̍. Ndu̍yɛ̍ Be̍la̍kī ni̍, Be̍la᷅m ni̍, ma̍ sōlī sa̍lāla̍ŋ o̍ ma̍āŋndā lāŋ chōo̍, ma̍āŋ o̍ ma̍āŋ ma̍ sōlī sa̍lāa̍ lēchōo̍, nāū tōōyōo̍ ō pīlɛ̍ a̍ sāā ko̍ndo̍o̍ ō pīlɛ̍.

³ Mɛ̄ɛ̍ nda̍ chīi̍ sa̍lāla̍ŋ nda᷅ŋ sōlī, mi̍ Be̍la᷅m o̍ di̍mūl Be̍la̍kī āā, “Si̍m o̍ sa̍lā nūm lu̍a̍māā ŋ̄ sōli̍ ho̍ō wo̍ īkɛ̄i̍ na̍nu᷄ŋ, I̍ cho̍ lākɔ̄ īnɛ̍. Kɛ̄lɛ̄ŋgāā dɔ̍ɔ̍ mī Mɛ̄lɛ̄ka̍ Ya̍a̍wɛ̄ɛ̄ o̍ chɔ̍mnu̍ŋ ya̍ mbō ke̍ ya̍ yōōŋgōo̍ le̍ nūm. Ndu̍yɛ̍ nyɛ̄ o̍ nyɛ̄ o̍ dɔ̍ū ya̍ o̍ sōndō le̍ nūm pɛ̍ I̍ cho̍ nu̍m dīmūl.” O̍ ko̍ŋ kɔ̍ɔ̍lī, mi̍ Be̍la᷅m o̍ he᷅l pēmbēi̍ chōo̍ mbo̍ kūā o̍ bōlle̍ŋ di̍.

⁴ Ndu̍yɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ chɔ̍mnu᷄ŋ ndu̍ o̍ pēmbīī kēŋ chōo̍ lo̍ŋ. Mi̍ Be̍la᷅m o̍ dīmūl Mɛ̄lɛ̄ka̍ āā, “I̍ ta̍ŋgu̍l ma̍āŋnda̍ŋ lā ŋɔ᷄mmɛ̍ū, ndu̍yɛ̍ o̍ ma̍āŋ o̍ ma̍āŋ chōo̍ mi̍ so̍lī nāū tōōyōo̍ ō pīlɛ̍ a̍ sāā ko̍ndo̍o̍ ō pīlɛ̍ sa̍lāa̍ lēchōo̍.”

⁵ Mi̍ Mɛ̄lɛ̄ka̍ Ya̍a̍wɛ̄ɛ̄ o̍ lo᷅ o̍ ko̍ŋ mbo̍ kē Be̍la᷅m yōōŋgōo̍ le̍ Be̍la̍kī, mbo̍ dīmūl Be̍la᷅m le̍ mbō kɔ̍ di̍mūl Be̍la̍kī.

⁶ O̍ ko̍ŋ kɔ̍ɔ̍lī, mi̍ Be̍la᷅m o̍ mi̍i̍ŋgū nāa̍ o̍ mɛ̍i̍ Māsāa̍ Be̍la̍kī wa̍. Be̍la̍kī o̍ wa̍ īsīsi̍ o̍ sa̍lā o̍ so̍li̍ wo̍ īkɛ̄i̍ nda̍ wāŋ bɛ̄ndūa̍a̍ Mo̍wa̍bī kpo̍u̍.

⁷ O̍ ko̍ŋ kɔ̍ɔ̍lī, mi̍ Be̍la᷅m o̍ ka̍ndū yōōŋgūla̍ Mɛ̄lɛ̄ka̍ la̍ŋ dīmīo̍o̍. Mbo̍ dīmī āā, “Be̍la᷅m, māsāa̍ Mo̍wa̍bī o̍ yɔ̍ŋ le̍ ya̍ mi̍ hu᷅ŋ, chɔ̄nɔ᷄ŋndo̍ Si̍i̍līāā, fūlāa̍ o̍ pēmbūŋ cho̍ bā pāa̍le̍ŋ lē chāŋndo̍ wo̍ŋ chōo̍. Mbo̍ lō o̍ ko̍ŋ mbo̍ dīmūl la̍ āā, ‘Hu̍ŋ ma̍ hu̍ŋ me̍nāl la̍ yu̍ŋgu̍ Che̍kɔ̍pū wo̍. Hu̍ŋ mā hu̍ŋ yo̍ndā a̍ dɛ̍nɛ̍ pa̍lāā wāŋnda̍ I̍sɔ̄lūɛ̄ī o̍kɔ̄ɔ̄.’

⁸ Kɛ̍ ō vɛ̄ɛ̍nɛ̍ ya̍ I̍ me̍nā yɛ̍ wānāā Mɛ̄lɛ̄ka̍ chīi̍ sa̍lā dɔ̄wɔ̄ɔ̄ wa̍? Vɛ̄ɛ̍nɛ̍ ya̍ I̍ yo̍ndā yɛ̍ a̍ dɛ̍nɛ̍ pa̍lāā wāŋnda̍ o̍kɔ̄ɔ̄, wānāā Mɛ̄lɛ̄ka̍ dīmi̍ le̍ dɛ̍nɛ̍ pa̍lāā tūsī chōo̍ le̍ wa̍?

⁹ Ī lo̍ o̍ pōūtā vīlɛ̄īla̍ŋ tūllo̍ mi̍ cha᷅ nda̍ kɔ̄ɔ̄lī kɔ̄ɔ̄lī, I̍ lo̍ o̍ pēmbo᷄ŋ chōo̍ mi̍ cha᷅ nda̍. Kāa̍le̍ cho̍ŋnu̍ŋ mi̍ lē wānu᷄ŋ le̍ŋ pīlɛ̍ kpe̍e̍le̍le̍ŋ nda̍ chō ni̍. Ndu̍yɛ̍ ā tu̍ū nda̍ pi̍la̍ bɛ̍ɛ̍ a̍ kāa̍le̍ o̍ kāa̍le̍ che᷅le̍ŋ te̍, fo̍ndōle̍ nda̍ hi̍o̍ū kpo̍u̍.

¹⁰ Yu̍ŋgu̍ Che̍kɔ̍pū wo̍ mɛ̄ɛ̍ chu̍ndo̍o̍ ō chō nu̍a̍ā lɛ̄ŋ ō chu̍ū chɔ᷅m te̍ yɛ̍, le̍nde̍ nda̍ chō sɛ̍lɛ̍ ni̍. Ā chō sɛ̍lɛ̍ ha̍a̍a̍ wānā nɔ̍lā mā chɔ̍m nda̍ bōllē pīlɛ̍ le̍. I̍ ye̍e̍mā bɔ̍ɔ̍ mī vi᷅ mɛ̄ɛ̍ wānāā tōnya̍a̍ ā wū yɛ̍, I̍ ye̍e̍ma̍ bɔ̄ɔ̍ mī mɛ̄ɛ̄lu̍la̍ nīla̍ŋ lā wa̍ mɛ̄ɛ̍ mɛ̄ɛ̄lu̍la̍ wāŋnda̍ ha̍ā lā wa̍ yɛ̄.”

¹¹ Mɛ̄ɛ̍ Be̍la᷅m o̍ chi̍i̍ yōōŋgōo̍ ho̍ō dīmi̍, mi̍ Māsāa̍ Be̍la̍kī o̍ nyu̍nā ndu̍ āā, “Ō yɛ̄ɛ̍nɛ̍ ŋ̄ chō yɛ̄ ya̍ ho̍ō tōsāllo̍? I̍ yo̍o̍ŋgu̍ nu̍m le̍ mā hu̍ŋ he̍ndūl la̍ ya̍a̍mɔ̍ɔ̍wa̍a̍ nīa̍a̍ sēndi̍o̍o̍ chōo̍, a̍ to̍sa̍ ke̍ŋ te̍ ma̍ mīīŋgū nda̍ sa̍lāa̍ dɔ̄wɔ̄ɔ̍.”

¹² Mi̍ Ba̍lām o̍ dīmūl Māsāa̍ Be̍la̍kī āā, “Nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ dɔ̍ū ya̍ o̍ sōndō wo̍ I̍ mɛ̍i̍ ko̍ŋ di̍mī mī di̍mi̍ nyɛ̄ chēle̍ŋ te̍?”

Yōōŋgū dīi̍ŋ ndɔ̄ Be̍la᷅m o̍ di̍mi̍ wo̍

¹³ O̍ ko̍ŋ kɔ̍ɔ̍lī, mi̍ Be̍la̍kī o̍ di̍mūl Be̍la᷅m āā, “Ŋ̄ kɔ̍ o̍ fo̍ndā chēle̍ŋ nāa̍ ŋ̄ nɔ̄lā mā chē wānāā ya̍ I̍ cho̍ nu̍m ha̍ā dīmūllo̍ a̍ nda̍ o̍kɔ̄ɔ̄ wa̍. A̍ cho̍ nu̍m wā māchɛ̄lū wa̍ ko̍ni̍ ŋ̄ chō chɔ̄ ni̍, a̍ chi᷅ ni̍ŋ nda̍ kpo̍u̍ le̍. O̍ ko̍ŋ, mā me̍na̍l la̍ nda̍.”

¹⁴ O̍ ko̍ŋ kɔ̍ɔ̍lī, mi̍ Māsāa̍ Be̍la̍kī o̍ ku̍ā a̍ Be̍la᷅m o̍ fo̍ndāŋ kpāyāŋndo̍ So̍fīm, mbo̍ hēl a̍ ndu̍ o̍ Pēmbīī Pi̍si̍kāve̍ chōo̍. O̍ ko̍ŋ kɔ̍ɔ̍lī, mi̍ Māsāa̍ Be̍la̍kī o̍ ta̍ŋgūl vɛ̄lɛ̄ ma̍āŋnda̍ŋ ndo̍ŋ la̍ ŋɔ᷄mmɛ̍ū, ndu̍yɛ̍ ma̍ sōlī nāū tōōyōo̍ a̍ sāā ko̍ndo̍o̍ sa̍lāa̍ o̍ ma̍āŋ o̍ ma̍āŋ chōo̍.

¹⁵ Mɛ̄ɛ̍ nda̍ chīi̍ sa̍lāla̍ŋ nda᷅ŋ sōlī, mi̍ Be̍la᷅m o̍ di̍mūl Be̍la̍kī āā, “Si̍m o̍ sa̍lā nūm lu̍a̍māā ŋ̄ sōli̍ ho̍ō wo̍ īkɛ̄i̍ na̍nu᷄ŋ, I̍ cho̍ lākɔ̄ mī ŋ̄ kɔ̍ su̍ūki̍āŋ na̍a̍ Mɛ̄lɛ̄ka̍ Ya̍a̍wɛ̄ɛ̄.”

¹⁶ Ndu̍yɛ̍ mi̍ Mɛ̄lɛ̄ka̍ Ya̍a̍wɛ̄ɛ̄ o̍ chɔ̍mnu᷄ŋ Be̍la᷅m mbo̍ kē ndu̍ yōōŋgōo̍ le̍ Māsāa̍ Be̍la̍kī, mbo̍ dīmūl ndu̍ le̍ mbō mīīŋgu̍ mbō kɔ᷄ di̍mūl Be̍la̍kī yōōŋgū kōŋ.

¹⁷ O̍ ko̍ŋ kɔ̍ɔ̍lī, mi̍ Ba̍lām o̍ mi̍i̍ŋgū nāa̍ o̍ mɛ̍i̍ Māsāa̍ Be̍la̍kī īsīsi̍ wa̍. Māsāa̍ Be̍la̍kī o̍ wa̍ īsīsi̍ o̍ sa̍la̍ lūāmāā o̍ so̍li̍ wo̍ īkɛ̄i̍ nda̍ wāŋ bɛ̄ndūa̍a̍ Mo̍wa̍bī. Mi̍ Māsāa̍ Be̍la̍kī o̍ nyu̍nā Be̍la᷅m āā, “Ō yɛ̄ɛ̍nɛ̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mi̍ yɛ̄?”

¹⁸ O̍ ko̍ŋ kɔ̍ɔ̍lī, mi̍ Be̍la᷅m o̍ ka̍ndū vɛ̄lɛ̄ yōōŋgūla̍ Mɛ̄lɛ̄ka̍ la̍ŋ dīmīo̍o̍, mbo̍ dīmī āā, “Chɔ̍ŋ mā ya̍ŋ nīla̍ŋ Māsāa̍ Be̍la̍kī, Ya̍ŋ ni᷅la̍ŋ mā tūēī nyɛ̄ ya̍ I̍ cho̍ dīmī wo̍, nūm po᷄ Si̍pɔ̄ɔ̄ wo̍.

¹⁹ Mɛ̄lɛ̄ka̍ cho̍ māā wāna̍ chi̍e̍e̍ mbō dīmi̍ lāchōō le̍, ō cho̍ māā wāna̍ chi̍e̍e̍ mbō fāŋa̍ŋ o̍ dīōm ndɔ̄ɔ̍ chōo̍ le̍. Ō di̍mī le̍ īsɔ̄ɔ̍ to̍sā mbō kɛ̄ɛ̍ ndi̍ tōsā le̍. Nyɛ̄ o̍ nyɛ̄ o̍ di̍mi̍ pɛ̍ le̍ tōsāa̍, tōsāa̍ o̍ to̍sā ndu̍ ni̍.

²⁰ I̍ sɔ̍la̍ dīmūllo̍ le̍ mī dɔ̍ū wāŋnda̍ ha̍ā sa̍lā. Ndu̍yɛ̍ wānā o̍ wānā Mɛ̄lɛ̄ka̍ chīi̍ sa̍lā dɔ̄wɔ̄ɔ̄ pɛ̍, I̍ nɔ̍lā lɛ̍ mī fa̍ŋa̍ wānā ko̍ŋ sa̍lā kōŋ chōo̍ le̍.

²¹ I̍ chi̍ŋnu̍ŋ i̍sɔ̍ɔ̍ o̍ īsɔ̄ɔ̍ wɔ̍ɔ̍ŋ o̍ hɔ̄l le̍ yu̍ŋgu̍ Che̍kɔ̍pū wo̍ le̍. I̍ chi̍ŋnu̍ŋ dɛ̍nɛ̍ pa̍lāā o̍ dɛ̍nɛ̍ pa̍lāā o̍ hɔ̄l le̍ wāŋnda̍ I̍sɔ̄lūɛ̄ī le̍. Mɛ̄lɛ̄ka̍ Ya̍a̍wɛ̄ɛ̄, Mɛ̄lɛ̄ka̍ ndāa̍ ō chō a̍ nda̍ la̍tu̍lu̍. Ndu̍ nda̍ yōnda̍ a̍ ndu̍ o̍kɔ̄ɔ̄ ni̍ māā ndu̍ cho̍ Māsa̍ ndā Bɛ̍ndōo̍ ni̍.

²² Mɛ̄lɛ̄ka̍ so̍li̍ nda̍ o̍ lɛ̄ŋndē I̍chi̍pīle̍ŋ ni᷄ŋ ni̍ mbo̍ hūŋ a̍ nda̍. Wāna̍ nda̍ nɔ̄ wo̍ ō chō māchūāā mɛ̄ɛ̍ chīi̍ dīāllūŋ kālā bɛ̄ndōo̍ ō chō nu̍a̍ā yɛ̍.

²³ Kpāāyā o̍ kpāāya̍ mākōŋgo̍ ō nɔ̍lā yu̍ŋgu̍ Che̍kɔ̍pū wo̍ ho̍ō le̍. Kpāāyā o̍ kpāāya̍ lēmānde̍ ō nɔ̍lā I̍sɔ̄lūɛ̍i̍ya̍ ha̍ā le̍. Wāŋnda̍ dīmī ni̍ŋ a̍ wāŋnda̍ I̍sɔ̄lūɛ̍i̍ o̍kɔ̄ɔ̄ āā, ‘Lā tōfa̍ wɔ̍ dɛ̍nɛ̍ kɛ̍ndɛ̄ bɛ̄ndū Mɛ̄lɛ̄ka̍ tōsa̍l nda̍ wo̍ se᷅.’

²⁴ Wāŋnda̍ I̍sɔ̄lūɛ̄ī a̍ cho̍ māchūāā mɛ̄ɛ̍ kpɔ̍kūŋ lāāndōo̍ ō wā nu̍a̍ā yɛ̍. Mɛ̄ɛ̍ kpɔ̍kūŋ kpāāyā bɛ̍ndōo̍ ō wā nu̍a̍ā yɛ̍ le̍nde̍ nda̍ chō īsīsi̍ ni̍. Kpɔ̍kūŋ wāā nu̍a̍ā ō pɛ̍ŋgi̍ le̍, ha̍a̍a̍ mbō lo̍ o̍ ko̍ŋ mbō de᷄l vīsī o̍ cho̍ chɔ̄ wo̍ chōo̍, mbō sɛ̄ɛ̄si̍a̍a̍ ndu̍ ndu̍yɛ̍ mbō dē ndu̍. Mɛ̄ɛ̍ mbō ko᷄l kōo̍ma̍ vīsī o̍ cho̍ dīyɔ̄ɔ̄ wo̍ ma̍lāŋ o̍ pɛ̍ŋgī.”

²⁵ O̍ ko̍ŋ kɔ̍ɔ̍lī, mi̍ Be̍la̍kī o̍ dīmūl Be̍la᷅m āā, “Mɛ̄ɛ̍ ŋ̄ kɛ̄ɛ̍ le̍ nda̍ mēnāa̍ yɛ̍, mɛ̄ɛ̍ du̍a̍ū nda̍ sa̍lā le̍.”

²⁶ Mi̍ Be̍la᷅m o̍ lo᷅ o̍ ko̍ŋ mbo̍ dīmūl Be̍la̍kī āā, “I̍ di̍mu̍l nu̍m kpe̍nde̍ke̍le̍ māā nyɛ̄ o̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ dɔ̍ū ya̍ o̍ sōndō pɛ̍, ndu̍ ya̍ I̍ di̍mī ni̍.”

Yōōŋgū yāa̍ ndɔ̄ Be̍la᷅m o̍ di̍mi̍ wo̍

²⁷ O̍ ko̍ŋ kɔ̍ɔ̍lī, mi̍ Be̍la̍kī o̍ di̍mūl Be̍la᷅m āā, “Hu̍ŋ ŋ̄ kɔ̍ o̍ fo̍ndā chēle̍ŋ. Kɛ̄lɛ̄ŋgāā dɔ̍ɔ̍ mī Mɛ̄lɛ̄ka̍ ō hīni̍ kɔ̄l mbō dīmu̍l nu̍m mā lo̍ o̍ fo̍ndāŋ kōŋ mā me̍na̍ wāŋnda̍ ha̍ā.”

²⁸ Mi̍ Be̍la̍kī o̍ he᷅l a̍ Be̍la᷅m o̍ Pēmbīī Pi̍ɔ̍ɔ̄ve̍ chōo̍, pēmbīī wānā lo᷅ le̍cho̍ō mā chē lɛ̄ŋndē po̍lte̍ŋ nde̍.

²⁹ O̍ ko̍ŋ kɔ̍ɔ̍lī, mi̍ Be̍la᷅m o̍ di̍mūl Be̍la̍kī āā, “Ta̍ŋgu̍l ma̍āŋnda̍ŋ lā ŋɔ᷄mmɛ̍ū ndu̍yɛ̍ mā chu̍u̍ ya̍ nāūwāā tōōyīa̍a̍ ā ŋɔ᷄mmɛ̍ū, a̍ sāā ko̍ndu̍a̍a̍ ā ŋɔ᷄mmɛ̍ū.”

³⁰ O̍ ko̍ŋ kɔ̍ɔ̍lī, mi̍ Be̍la̍kī o̍ to̍sā mɛ̄ɛ̍ Be̍la᷅m o̍ di̍mu̍l ndu̍ yɛ̍, ndu̍yɛ̍ ma̍ sōlī nāū tōōyīo̍o̍ ō pīlɛ̍ a̍ sāā ko̍ndo̍o̍ ō pīlɛ̍ sa̍lāa̍ o̍ ma̍āŋ o̍ ma̍āŋ chōo̍.