Nɔ̍mbāā 22 - Yāu̍ Mɛ̄lɛ̄ka̍a̍

Māsāa̍ Mo̍wa̍bī yo̍o̍ŋgu̍ Be̍la᷅m

¹ O̍ ko̍ŋ kɔ̍ɔ̍lī, mi̍ wāŋnda̍ I̍sɔ̄lūɛ̄ī a̍ hi̍a̍ū lāchī a̍ kɔ̄la̍ŋ, ma̍ fūūlūū o̍ lɛ̄ŋndē dɛ̍ŋgbɛ̍le̍ŋ Mo̍wa̍bī, Chɔ̍ɔ̍dāŋ i̍kɛ̍i̍ bā pāa̍le̍ŋ lē chāŋndo̍, ma̍ kīālū dɔ̍ɔ̍ŋgɔ̍ɔ̍ lo̍ŋ, Chɛ̄lu̍i̍kō chi̍e̍e̍ ndu̍ wa̍ lēe̍lo̍ō bā pāa̍le̍ŋ lē dēl lo̍.

^2-3 Mɛ̄ɛ̍ Be̍la̍kī, māsāa̍ o̍ lɛ̄ŋndē Mo̍wa̍bī le̍ŋ ni᷄ŋ, ndu̍ yɔ̍nūŋ māā po̍ Si̍pɔ̄ɔ̄ wo̍ ni̍ ō chē nyɛ̄ I̍sɔ̄lūɛ̍i̍ya̍ ā tōsa̍ a̍ A̍mɔ̍lu̍a̍i̍tīi̍ya̍ wo̍, ndu̍yɛ̍ ma̍ chā mɛ̄ɛ̍ I̍sɔ̄lūɛ̍i̍ya̍ ā wa̍ fāŋā yɛ̍, ndu̍ ni̍, a̍ wāŋnda̍ Mo̍wa̍bī kpo̍u̍, mi̍ sīōōŋīī bɛ̄ndūe̍i̍ ī bīī nda̍, mi̍ kɔ̄lta̍ŋ lā yɔ̄nu᷄ŋ nda̍ ni᷄ŋ pu̍lāŋ pu̍lāŋ.

⁴ O̍ ko̍ŋ kɔ̍ɔ̍lī, mi̍ wāŋnda̍ Mo̍wa̍bī a̍ dīmūl wāŋ bɛ̄ndūa̍a̍ Mi̍dīāŋ āā, “Sɛ̍lɛ̍ bɛ̍ndōo̍ ho̍ō tɛ̄ɛ̄mbūūwo̍ ko̍ni̍ nda̍ hīŋ na̍a̍ ndu̍yɛ̍ a̍ nyɛ̄ o̍ nyɛ̍ cho̍ na̍a̍ ō bālāā o̍ chɔ̍ chɔ̍ bɛ̍ndū ni᷄ŋ ni̍, mɛ̄ɛ̍ nāūwo̍ ō kēlēŋā nu̍a̍ā bīllo̍ dīo̍o̍ yɛ̍.” O̍ ko̍ŋ, mi̍ Be̍la̍kī, māsāa̍ le̍ Mo̍wa̍bī,

⁵ o̍ vi̍ām ki̍i̍la̍a̍ nāa̍ Be̍la᷅m, po̍ Bi̍ɔ̍ɔ̄ wo̍ chūā, o̍ wa̍ Pɛ̍tɔ̄ɔ̄ chi̍e̍e̍ o̍ Pēē Bɛ̍ndōo̍ Yūfi̍lu̍a̍tīī i̍kɛ̍i̍, o̍ lɛ̄ŋndē A̍māā le̍ŋ ni᷄ŋ ndo̍. Mbo̍ dīmūl Be̍la᷅m āā, “Kāa̍le̍ pu᷅m lē fūla̍ I̍chi̍pī mī lē hu᷄ŋ cha᷅l la̍ īkɛ̄i̍ na̍nu᷄ŋ, lē chō bɔ̄ɔ̍ ka̍a̍le̍ bɛ̍ndu̍, ā chō ā tīūwāā ā kūāna᷄ŋ kɛ᷅ kɛ᷅.

⁶ Ā hīōū na̍a̍ māyōōmū po̍lo̍ŋ. Le̍la̍ŋ hu̍ŋ mā hu̍ŋ he̍ndūl la̍ nda̍ sēndi̍o̍o̍ chōo̍. Kɛ̄lɛ̄ŋgāā mī nɔ̍la̍ mī ye᷅m nda̍ mī so̍li̍ nda̍ o̍ lɛ̄ŋnde̍ŋ nde᷅ŋ ni᷄ŋ. Kāni̍ fo̍ndōle̍, I̍ sīnā māā wānā o̍ wānā ŋ̄ dɔ̄ū sa̍lā pɛ̍, sa̍lāa̍ wa᷅ wa᷅nā ko̍ŋ chōo̍ ni̍, ndu̍yɛ̍ wānā o̍ wānā ŋ̄ hāndu̍ sēndi̍o̍o̍ chōo̍ pɛ̍, sēndi̍o̍o̍ wa᷅ wa̍nā ko̍ŋ chōo̍ ni̍.”

⁷ O̍ ko̍ŋ, mi̍ wāŋ bɛ̄ndūa̍a̍ Mo̍wa̍bī a̍ wāŋ bɛ̄ndūa̍a̍ Mi̍dīāŋ a̍ ma̍lnu᷄ŋ ma̍ kūā nāa̍ Be̍la᷅m chu̍a̍ a̍ yōōŋgū Be̍la̍kī o̍ yɔ̍ŋ ndo̍. Ndu̍yɛ̍ mɛ̄ɛ̍ nda̍ wa̍ kɔ̄la̍ŋ, ma̍ chūā nyɛ̄ nda̍ a̍a̍ nɔ̍ le̍ kɔ̄la̍ŋ Be̍la᷅m pāāwāa̍ wo̍ ma̍ kūā a̍ ndu̍ o̍ bā. Ma̍ kɔ̍ do̍o̍nu᷄ŋ Be̍la᷅m ko̍na̍ kpo̍u̍.

⁸ Mi̍ Be̍la᷅m o̍ lo᷅ o̍ ko̍ŋ mbo̍ dīmūl nda̍ āā, “Lā lɔ᷄l na̍nu᷄ŋ, tē pāa̍le̍ŋ lē sɛ̄ sīɔ̄dīi̍ pɛ̍, I̍ di̍mu̍l nya̍ nyɛ̄ Mɛ̄lɛ̄ka̍ Ya̍a̍wɛ̄ɛ̄ o̍ cho̍ ya̍ chūɛ̄llɛ̄ŋ dīmūllo̍.” O̍ ko̍ŋ, mi̍ wāŋ bɛ̄ndūa̍a̍ ha̍ā ā lɔ̄l lo̍ŋ.

⁹ Ndu̍yɛ̍ īchɔ̄l ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ chɔ̍mnu᷄ŋ Be̍la᷅m, mbo̍ nyūnā Be̍la᷅m āā, “Pūa̍a̍ kūɛ̍ɛ̍nɛ̍ a̍ hi᷅ŋ yɛ̄ ka̍ŋ nu̍m o̍ bɛ̄ŋgu̍ cho̍o̍?”

¹⁰ Mi̍ Be̍la᷅m o̍ dīmūl Mɛ̄lɛ̄ka̍ āā, “Māsāa̍ Be̍la̍kī o̍ cho̍ Mo̍wa̍bī wo̍ ndu̍ ve᷅m nda̍ nāa̍ ya̍ chu̍a̍ ni̍ a̍ yōōŋgōo̍

¹¹ māā wānāā pūm a̍ fūla̍ I̍chi̍pī ma̍ hu᷄ŋ ti̍ū o̍ lɛ̄ŋndē ndɔ̄le̍ŋ ni᷄ŋ kpo̍u̍. Ō yēēma̍ ya̍ mī ku̍ɛ̄ mī kɔ̍ me̍nāl ndu̍ wāŋnda̍ ha̍ā, māā kɛ̄lɛ̄ŋgāā dɔ̍ɔ̍ mbō nɔ̄la̍ mbō yēm nda̍ mbō sōli̍ nda̍ o̍ lɛ̄ŋndē ndɔ̄le̍ŋ ni᷄ŋ.”

¹² Kɛ̍ mi̍ Mɛ̄lɛ̄ka̍ dīmūl Be̍la᷅m āā, “Tu̍āl ki̍i̍la̍a̍ ka̍ŋ kɔ̄ɔ̄lī mī lā kūɛ̄ nya̍ nda̍ le̍. Ndu̍yɛ̍ ku̍ā mā ha̍ndu̍ wānāā kāŋ sēndi̍ chōo̍ le̍, fo̍ndōle̍, wānāa̍ cho̍ ā dūāūwāā sa̍lā wa̍ wānāā kāŋ ā chō ni̍.”

¹³ Mɛ̄ɛ̍ pāa̍le̍ŋ lē sɛ̄ dīi̍mā ndɔ̄ɔ̍, mi̍ Be̍la᷅m o̍ pe̍nā chɔ̄nɔ᷄ŋ, mbo̍ dīmūl wāŋ bɛ̄ndūāā Māsāa̍ Be̍la̍kī o̍ ve᷅m nda̍ āā, “Lā mīīŋgu̍. Mɛ̄lɛ̄ka̍ Ya̍a̍wɛ̄ɛ̄ o̍ kɛ̍ɛ̍ māā ya̍ I̍ ku̍ā nya̍ kɔ̄ɔ̄lī le̍.”

¹⁴ O̍ ko̍ŋ, mi̍ wāŋ bɛ̄ndūa̍a̍ ha̍ā ā māl ma̍ mīīŋgū Be̍la̍kī o̍ ībūŋ. Ma̍ kɔ̍ do̍o̍nu᷄ŋ ndu̍ ko̍na̍ māā Be̍la᷅m o̍ kɛ̍ɛ̍ le̍ hūnɔ̄ɔ̍.

¹⁵ O̍ ko̍ŋ kɔ̍ɔ̍lī, mi̍ Māsāa̍ Be̍la̍kī o̍ so̍lī vɛ̄lɛ̄ wāŋ bɛ̄ndūa̍a̍ ku̍ndā bɛ̄ndōo̍ hīōūwɔ̄ɔ̍ ā tāsi̍a̍a̍, ā nda̍ a̍a̍ nɔ̍ vɛ̄lɛ̄ tɔ̍ɔ̍ ma̍ hīāū ā tāsi̍a̍a̍ wa̍, mbo̍ vīām nda̍ nāa̍ Be̍la᷅m chu̍a̍.

¹⁶ Mi̍ wāŋ bɛ̄ndūa̍a̍ ha̍ā ā mālnu᷄ŋ ma̍ kūā nāa̍ Be̍la᷅m chu̍a̍ a̍ yōōŋgū Māsāa̍ Be̍la̍kī o̍ yɔ̍ŋ ndo̍. Ma̍ kɔ̍ do̍u̍nu᷄ŋ Be̍la᷅m ko̍na̍ āā, “Māsāa̍ Be̍la̍kī, po̍ Si̍pɔ̄ɔ̄ wo̍ ndu̍ vēm na̍a̍ nāa̍ nūm chu̍a̍ a̍ yōōŋgōo̍ ho̍ō ni̍, ō dīmi̍ āā, ‘Yāndi̍i̍ Be̍la᷅m, chɔ̍ŋ mā hīŋ, nyɛ̄ o̍ nyɛ̄ ku̍u̍nā nu̍m hūnɔ̄ɔ̍ le̍.

¹⁷ I̍ cho̍ nu̍m pāāwā mā hi̍ni̍ kɔ̄l nyɛ̄ kɛ̄ndɛ̄ kɛ̍ndɛ̄, ndu̍yɛ̍ nyɛ̄ o̍ nyɛ̄ ŋ̄ di̍mu̍l la̍ pɛ̍ le̍ mī to̍sa̍l nu̍m I̍ nɔ̍lā mī to̍sa̍l nu̍m. Kɛ̍ yāndi̍i̍ hu̍ŋ mā hu̍ŋ me̍nāl la̍ wāŋnda̍ ha̍ā.’ ”

¹⁸ Kɛ̍ mi̍ Be̍la᷅m o̍ mu̍lūl nda̍ āā, “Ā yɔ᷄ŋ bɛ̍ɛ̍ mī Māsāa̍ Be̍la̍kī o̍ ke̍ ya̍ ka̍ni̍ŋ hu̍mbo᷄ŋ a̍ ko̍o̍līi̍yo̍ŋ kpo̍u̍ o̍ chīɛ̄ī ndɔ̍ lēmāsāa̍ ni᷄ŋ, I̍ nɔ̍lā mī so̍li̍ Mɛ̄lɛ̄ka̍ Ya̍a̍wɛ̄ɛ̍ Mɛ̄lɛ̄ka̍ nūu̍ dīōm o̍ nɛ̄ī o̍ nɛ̄ī ni̍ŋ mī ku̍ɛ̄ le̍.

¹⁹ Kɛ̍ yāndi̍i̍, nya̍ bɛ̍ɛ̍ lā lɔ᷄l na̍nu᷄ŋ mɛ̄ɛ̍ chāāŋāā nyāa̍ ā tōsa̍ yɛ̍. I̍ cho̍ Mɛ̄lɛ̄ka̍ Ya̍a̍wɛ̄ɛ̍ chɔ̄ɔ̄lū nyūnā a̍ ndi̍ o̍kɔ̄ɔ̄.”

²⁰ Īchɔ̄l ko̍ŋ, mi̍ Mɛ̄lɛ̄ka̍ chɔ̄mnu᷄ŋ Be̍la᷅m mbo̍ dīmūl Be̍la᷅m āā, “Mɛ̄ɛ̍ wāŋnda̍ ha̍ā ā hīŋ nu̍m kɔ̄ɔ̄lī le̍ mī lā kūɛ̄ nya̍ nda̍ yɛ̍, bɛ̍ɛ̍ndi̍a̍ŋ mī lā kūɛ̄ nya̍ nda̍. Kɛ̍ ndu̍yɛ̍ tē ā kūɛ̄ pɛ̍, nyɛ̄ o̍ nyɛ̄ ya̍ I̍ cho̍ nu̍m dīmūl le̍ mā di̍mi̍, ndu̍ ŋ̄ nɔ̄ ni̍ mā di̍mi̍.”

²¹ Mɛ̄ɛ̍ pāa̍le̍ŋ lē sɛ̄ dīi̍mā ndɔ̄ɔ̍, mi̍ Be̍la᷅m o̍ pe̍nā chɔ̄nɔ᷄ŋ, mbo̍ bɛ̄ɛ̄ndīāā sōfɛ̍lɛ̍ ndɔ̄ɔ̍ mbo̍ bīī kɔ̄la̍ŋ nda̍ wāŋ bɛ̄ndūāā Māsāa̍ Be̍la᷅m o̍ ve᷅m nda̍ lātūlu̍.

Nyɛ̍ yɔ̍nu̍ŋ Be̍la᷅m tɛ̄ɛ̄ŋ nda̍ sōfɛ̍lɛ̍ ndɔ̄ɔ̍ wo̍

²² Mi̍ Be̍la᷅m o̍ bi̍ī kɔ̄la̍ŋ o̍ sōfɛ̍lɛ̍ ndɔ̄ɔ̍ chōo̍. Ō wa̍ kɔ̄la̍ŋ a̍ bu̍ɛ̍i̍yāā ndūa̍a̍ kɔ̄ɔ̄lī ā ŋīɔ̍ɔ̍ŋ. Kɛ̍ mi̍ Mɛ̄lɛ̄ka̍ dūāūnu᷄ŋ tu̍mbe̍ a̍ Be̍la᷅m le̍ mɛ̄ɛ̍ o̍ wa̍ kɔ̄la̍ŋ yɛ̍. Mi̍ Mɛ̄lɛ̄ka̍ Ya̍a̍wɛ̄ɛ̄ o̍ vi̍ām ki̍i̍la̍nɔ̍ ndɔ̄ɔ̍ mbo̍ kɔ̍ si᷅m Be̍la᷅m o̍ nɛ̄ī le̍ mbō hāu̍ ndu̍.

²³ Mɛ̄ɛ̍ sōfɛ̍lɛ̍ Be̍la᷅m ndo̍ ō chē ki̍i̍la̍nɔ̍ Mɛ̄lɛ̄ka̍ Ya̍a̍wɛ̄ɛ̄ wo̍ īsīsi̍ o̍ nɛ̄i̍ a̍ mūɛ̄ī fāŋnde̍ ndu̍ o̍ ba̍, mi̍ sōfɛ̍lɔ̍ɔ̍ ho̍ō ō sēī yōndōo̍ ni᷄ŋ le̍ mbō kpɛ̄kpɛ̍la̍ ki̍i̍la̍nɔ̍ Mɛ̄lɛ̄ka̍a̍ ho̍ō, mbō hīōū. O̍ ko̍ŋ, mi̍ Be̍la᷅m o̍ lu̍a̍ā sōfɛ̍lɔ̍ɔ̍ ho̍ō mbo̍ mīŋgī sōfɛ̍lɔ̍ɔ̍ hɔ̄lla̍ o̍ nɛ̄ī.

²⁴ O̍ ko̍ŋ kɔ̍ɔ̍lī, mi̍ ki̍i̍la̍nɔ̍ Mɛ̄lɛ̄ka̍a̍ ho̍ō ō kūā mbo̍ kɔ̍ si᷅m nāa̍ nɛ̄īyo̍ ō wa̍ nu̍a̍ā sɔ̍ɔ̍kɛ̍nyɛ̍ɛ̍ wa̍, o̍ kpe̍le̍la̍ yɔ̄mīī mākīle̍pīi̍la̍ ti̍ɔ̍ɔ̍ŋnda̍ŋ tɛ̄ɛ̄ŋ, kpāki̍ lāpōūwo̍ ō wa᷄ ba̍ā, mi̍ ho̍ō ō wā ba̍ā.

²⁵ Mɛ̄ɛ̍ sōfɛ̍lɔ̍ɔ̍ ho̍ō ō chē vɛ̄lɛ̄ ki̍i̍la̍nɔ̍ Mɛ̄lɛ̄ka̍a̍ ho̍ō, mbo̍ kīndī kīndī le̍ mbō hōlnu̍ŋ kpa̍kīo̍o̍ mbō hīōū. Sōfɛ̍lɔ̍ɔ̍ ō lo̍ hīōūwɔ̄ɔ̍, mbo̍ kīndīlā Be̍la᷅m pēlēi̍ o̍ kpākīo̍o̍. O̍ ko̍ŋ, mi̍ Ba̍lām o̍ lu̍a̍ā vɛ̄lɛ̄ sōfɛ̍lɔ̍ɔ̍.

²⁶ O̍ ko̍ŋ kɔ̍ɔ̍lī, mi̍ ki̍i̍la̍nɔ̍ Mɛ̄lɛ̄ka̍a̍ ō kūā vɛ̄lɛ̄ lāchī mbo̍ kɔ̍ si᷅m vɛ̄lɛ̄ nāa̍ nɛ̄īyo̍ ō wa̍ nu̍a̍ā sɔ̍ɔ̍kɛ̍nyɛ̍ɛ̍ wa̍, fo̍ndā o̍ fo̍ndā ō ve᷄ mī sōfɛ̍lɔ̍ɔ̍ ndu̍ o̍o̍ hi̍o̍ū le̍.

²⁷ Mɛ̄ɛ̍ sōfɛ̍lɔ̍ɔ̍ ō chē ki̍i̍la̍nɔ̍ Mɛ̄lɛ̄ka̍a̍ īsīsi̍ o̍ nɛ̄ī le̍nde̍, mbo̍ bīāmnu᷄ŋ. O̍ ko̍ŋ kɔ̍ɔ̍lī, mi̍ Be̍la᷅m o̍ du̍a̍u̍nu᷄ŋ tu̍mbe̍ mbo̍ kāndū sōfɛ̍lɔ̍ɔ̍ ho̍ō lɔ̄ɔ̍ a̍ tīnda̍ wa̍ ndu̍ o̍ bā wo̍.

²⁸ O̍ ko̍ŋ, mi̍ Mɛ̄lɛ̄ka̍ Ya̍a̍wɛ̄ɛ̄ o̍ ku̍mbī sōfɛ̍lɔ̍ɔ̍ ho̍ō sōndōo̍ mbo̍ sūāā, mbo̍ nyūnā Be̍la᷅m āā, “Ō yɛ̄ɛ̄nɛ̍ ya̍ I̍ to̍sa̍l lɛ̄ nu̍m ma̍ lūāā ya̍ lɔ̄ɔ̄ lēyāa̍ wo̍ ho̍ō?”

²⁹ Mi̍ Be̍la᷅m o̍ mu̍lūl sōfɛ̍lɔ̍ɔ̍ āā, “Le̍ mɛ̄ɛ̍ ŋ̄ sōli̍ ya̍ dīɔ̄mnde̍ yɛ̍ ya̍ I̍ lɔ̍ɔ̄ nu̍m ni̍. Te̍ ya̍ i̍i̍ nɔ̍ bɛ̍ɛ̍ mu̍ɛ̍ī fāŋnde̍ o̍ bā pɛ̍, dīyɔ̄ɔ̍ ya̍ I̍ wa̍ nu̍m su̍ŋ su̍ŋ ni̍.”

³⁰ Mi̍ sōfɛ̍lɔ̍ɔ̍ ō dīmūl ndu̍ āā, “Sōfɛ̍lɛ̍ nu̍m ŋ̄ kūā cho̍o̍ wo̍ ya̍ I̍ cho̍ ni̍. Kāni̍ bɛ̍ɛ̍ ŋ̄ chō o̍ yōōmū nūmndo̍ ni᷄ŋ, ya̍ ku̍ā a̍ nūm ni̍. Ā chē ni᷅ŋ mī to̍sa̍ a̍ nūm nu̍a̍ā kāni̍ bɛ̍ɛ̍?” Mi̍ Be̍la᷅m o̍ mu̍lī āā, “Kāni̍ bɛ̍ɛ̍ o̍ to̍sa̍ wɔ̍ nu̍a̍ā le̍.”

³¹ O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ ku̍mbī Be̍la᷅m hɔ̄lta̍ŋ mbo̍ chā ki̍i̍la̍nɔ̍ Mɛ̄lɛ̄ka̍ Ya̍a̍wɛ̄ɛ̄ wo̍ īsīsi̍ ndu̍ o̍ nɛ̄ī, a̍ mūɛ̄ī fāŋnde̍ ndu̍ o̍ bā. Mɛ̄ɛ̍ Be̍la᷅m o̍ che᷅ ndu̍, mi̍ Be̍la᷅m o̍ ba᷅ŋ wūla̍ŋ, mbo̍ fūūlūū hɔ̄lla̍ lɛ̄ŋ di̍.

³² Mi̍ ki̍i̍la̍nɔ̍ Mɛ̄lɛ̄ka̍a̍ ō dīmūl ndu̍ āā, “Vɛ᷅ ma̍ lūāā sōfɛ̍lɛ̍ nu̍mndo̍ lɔ̄ɔ̄ lēyāa̍ ko̍ŋ? Ya̍ ha̍u̍ nu̍m nɛ̄īyo̍ lāchī ni̍ māā a̍ hi̍ū le̍, ka̍ni̍ fo̍ndōle̍ le̍ mɛ̄ɛ̍ ŋ̄ tōsa̍ bōllē kālāle̍ŋ ma̍ sōli̍ ya̍ dīōm yɛ̍.

³³ Sōfɛ̍lɛ̍ nu̍mndo̍ ō chē ya̍ nu̍m īsīsi̍ la̍chi̍, nyɛ̄ kōŋ o̍ mu̍li̍ŋ mu̍li᷄ŋ ko̍ŋ lēyāa̍ ni̍ le̍ mbō chūa̍ nɛ̄ī che᷅le̍ŋ. Tē ō cho̍ ko̍ŋ te̍ dīyɔ̄ɔ̍ ya̍ I̍ wa̍ nu̍m ni̍, mī ya̍ i̍i̍ mɛ̍i̍ sōfɛ̍lɔ̍ɔ̍ yōōmū.”

³⁴ Mi̍ Be̍la᷅m o̍ dīmūl ki̍i̍la̍nɔ̍ Mɛ̄lɛ̄ka̍ Ya̍a̍wɛ̄ɛ̄ wo̍ āā, “I̍ to̍sa̍ yɔ̄ŋ wɔ̄ɔ̍ŋndo̍. I̍ si̍na̍ māā ā chō ya̍ īsīsi̍ o̍ nɛ̄ī le̍ ya̍ hāū le̍. Le̍la̍ŋ tē a̍ hi̍ni̍ kɔ̍l a̍ kɔ̄lā ya̍ I̍ cho̍ la᷅ŋ nda̍ŋ te̍, mɛ̄ɛ̍ I̍ cho̍ mīīŋgu̍.”

³⁵ Kɛ̍ mi̍ ki̍i̍la̍nɔ̍ Mɛ̄lɛ̄ka̍ Ya̍a̍wɛ̄ɛ̄ wo̍ ō dīmūl ndu̍ āā, “Lā kɔ̍ nya̍ pūa̍a̍ ka̍ŋ. Kɛ̍ ndu̍yɛ̍ tē ā kūɛ̄ pɛ̍, nyɛ̄ ya̍ I̍ cho̍ nu̍m dīmūllo̍ ndu̍ ŋ̄ nɔ̄ ni̍ mā di̍mi̍.” O̍ ko̍ŋ, mi̍ Be̍la᷅m nda̍ wāŋ bɛ̄ndūāā Māsāa̍ Be̍la̍kī o̍ ve᷅m nda̍ ā kūā lātūlu̍.

A̍ mɛ̄ɛ̍ Be̍la̍kī o̍ ku̍ɛ̄ Be̍la᷅m dēmūllo̍ yɛ̍

³⁶ Mɛ̄ɛ̍ Be̍la̍kī o̍ tu̍e̍ī māā Be̍la᷅m o̍ cho̍ hūnɔ̄ɔ̍, mbo̍ kūā Ba̍lām lāchī A̍ā chi̍e̍e̍, o̍ Pīo̍o̍ A̍nɔ̄ŋ kɔ̍ŋgɔ̍ o̍ pɛ̄ŋgu̍la̍ŋ a̍ lɛ̄ŋndē Mo̍wa̍bīle̍ŋ.

³⁷ Mi̍ Be̍la̍kī o̍ di̍mūl Be̍la᷅m āā, “I̍ yo̍o̍ŋgu̍ nu̍m māā chɔ̍ŋ ndɔ̍ nya̍ mā hīŋ, vɛ᷅ a̍ hi̍ŋ te̍? Bāā yīya᷄ŋndo̍ ŋ̄ wa̍ ni̍ māā I̍ ve̍ nu̍m pāāwā mā hi̍ni̍ kɔ̄l te̍?”

³⁸ Mi̍ Be̍la᷅m o̍ di̍mūl ndu̍ āā, “I̍ hi᷅ŋ ni᷅ŋ. Kɛ̍ I̍ nɔ̍lā mī di̍mi̍ nyɛ̄ o̍ nyɛ̄ o̍ kpāāya̍ nī ni̍ŋ te̍. Nyɛ̄ o̍ nyɛ̄ Mɛ̄lɛ̄ka̍ dɔ̄ū ya̍ o̍ sōndō pɛ̍, ndu̍ ya̍ I̍ nɔ̍ ni̍ mī di̍mi̍.”

³⁹ O̍ ko̍ŋ kɔ̍ɔ̍lī, mi̍ Be̍la̍kī ku̍ā a̍ Be̍la᷅m Hu̍sɔ̄ɔ̄ chi̍e̍e̍.

⁴⁰ Mi̍ Be̍la̍kī o̍ di̍ī nāūwāā tōōyīa̍a̍ a̍ sāa̍ ā ti᷄ŋ mbo̍ sōlī sa̍lāa̍ o̍ Mɛ̄lɛ̄ka̍ lo̍. Ndu̍yɛ̍ mbo̍ kē Be̍la᷅m nda̍ wāŋ bɛ̄ndūa̍a̍ ku̍ɛ̄ ndu̍ vēēlōo̍ wa̍ vīsīŋ sa̍la᷄ŋ ŋ̍ nda̍ŋ.

Yōōŋgū tāse̍ Be̍la᷅m o̍ di̍mi̍ wo̍

⁴¹ Mɛ̄ɛ̍ pāa̍le̍ŋ lē sɛ̄ dīi̍mā ndɔ̄ɔ̍, mi̍ Be̍la̍kī nda̍ Be̍la᷅m a̍ he᷅l Ba̍mɔ̍tī Bāāl. Ndu̍yɛ̍ mi̍ Be̍la᷅m o̍ cha᷅ I̍sɔ̄lūɛ̍i̍ya̍ ā ti᷄ŋ kɔ̄ɔ̄lī kɔ̄ɔ̄lī.